Luk 10
10
Jisɔs ato asɔgba atanasa na wobo na aba
1Munu Ntaa asang asɔgba atanasa na wobo na aba#10:1 Atan asa na wobo na aba: Akokono awɛr yaga arag si Jisɔs asang asɔgba atan asa na wobo. bantingi, ato mbɔ anɛ aba aba sa agbɔɛ mba ka baka na afo ya arag sa amogho. 2Atɔ mbɔ “Noto ɛfangfang ka ba enene aritu. Tɔ Ntaa mfɔna noto, sa ato ba ane a noto akag ka ɛgbɛ ɛjɛ. 3Sɔng! Mkpa war to nasi ɔjɔ ka ɛbɔngɔ abibi ɔnya,” 4Ki ton akpugha yayi sɛ ɛba nɛjɛn sɛ akpaghata; ki kag nnɛ wawi nnyɔ ka mba. 5“Ngara yi ɔnam na ka nju, gbɔmba rag si, nanaa ɛjɔ ka nju yifa: 6Arena si nnɛ yi nanaa ɛkorɛ are fa, nanaa ɛnɛrɛ ɛjɔ na mbɔ, erina jɔna ɛfɛnɛ ka mfo ɛbrɛ. 7Jɔ fa ka nju yi, nɛ wɔ kpere ejo ji akɛ war, si nne a noto akpe ntoro ɛyɛ. Ba ki jɛn ɛnam nju yifa eru ɛnam yintingi eru. 8Ngara yi Ɛnam na ka ɛka akpere war, nɛ ji akɛ war. 9Kag njɔ kɛ anɛ ba aya anɔb ɔtɔ mbɔ si, ‘Oton Ɔsɔwɔ ɛmaba ɛkpere war.’ 10Ka ɛnam na ka ɛjɛbɛ atɛn war, sɔng ga ka aba nna mfa, 11‘Araggasi ebubu ɛka ɛjɛrɛ jɛ ɛwɔmɔ warr ka ajaa ɛmɛ ɛsɛnɛ ɛtɔngɔ si ɛma war tuu ɔtɔng. Ma gbɛrɛ si: Oton Ɔsɔwɔ amaba ekpere.’ 12Ntɔ war ɛdɛdɛghɛ, ebeb nanɛrɛ ka ofo bifa ɛga anɛ ba Sɔdɔm.
13“Esiyiri akɛ anɛ ba korasin! Esiyiri akɛ anɛ ba Bɛsaida! Arenasi akpɔgisi a mbe#10:13 akpɔgisi a mbe Ajɛnambe bi nnɛ arikonoeko, bi Ɔsɔwɔ ya ane. ya ane ka Korasin na Bɛsaida ane ka Taya na Sidɔn, mbɔ ka ayanga nekpen mba arab, ajɔ nji ayɔbɔ asaghambɔ́ awuru nimbɔ ntɔng ɛtɔngɔ si amɔgbɔ ka abibi mbɔ. 14Ka ɛnɔnɔb ɛkɛ Taya na Sidɔn ka ofo ɛnaa ɛga wɔ Korasin na Bɛsaida. 15Ka wɔ Kafɛnum ɔkana si ɔfɔfɔ nakagha ka etek Ɔsɔwɔ? Eˈe, emogho ka mfo bi ngon efigi war.
16“Ka atɔ asɔgba ɛyɛ, kpere nnɛ ya ayogho atɔng akɛ war ayogho akɛmɛ; kpere nnɛ ya atɛn war atɛnɛm mmɛ, ka nnɛ ya atɛnɛm na, atɛn Ɔsɔwɔ ya atom.”
17Ngara yi asɔgba atanasa na wobo na aba afɛnɛ na ɛyɛbɛ nete atɔ Jisɔs, “Ntaa, araggasi abibi atughu akɛmɛ agba akɛ warr ka mbeng ɛya.”
18Jisɔs akpɛ mbɔ, “Nyɛ nnam aru ka nobo amagbɔ ka nsisi nasi mgbambri. 19Mma war kɛ nɔyɔ ni ɛnyɛghɛ ɔnyɔ na banang ka ata, ɛfɛnɛ ɛga anɛ ba ujing nsam wɔɔ; jaji war enem. 20Ɛjɔgana, ki yighi si abibi atughu akɛmɛ agba akɛ war, yighi si mbeng ɛyɛrɛ amanam ka etek Ɔsɔwɔ.”
21Mbara Nɛfɛb akɛ Jisɔs ɛyɛbɛ nete ka ngara yi, arag, “Mmakag Nsɛ, Ntaa Nton a bɔsɔ na nsisi, atebsi, ɔbar mbe bifa oriribi ɔtɔ anɛ ba awagwag na ba anyi ejo, ka oribi ntɔ abɛnsɛ. Ee, Nsɛ, jina ji ɛkɔra si one.
22“Nsɔjaa amisighi abɔ ka kperekpere ejo akɛm. Nnɛ wawi ya anyi Mmɔ arem ya aga Nsɛ, ka nnɛ ya anyi Nsɛ arem ya aga Mmɔ na anɛ ba Mmɔ ama sang si agbɛrɛɛ.”
23Akpeghe atɔ asɔgba ɛyɛ ka nkɔ, “Ɛnara ɛjɔ ɛkɛ, amar ya ayɛ ji war ɛyɛ. 24Ka ntɔ war ebe abono Ɔsɔwɔ na aton asɛb si ayɛ ji war ɛyɛ ka ariyɛ, asɛb si ayog ji war eyogho ka ariyog.”
Ɛbɛɛ Ateb Etingi Nnɛ a Sameria
25Ofo bibi mgbɛra ejighi Ɔsɔwɔ atam ayimi abɔmmɔ Jisɔs si agarɛ, “Nkpekpene,” nnɛ ane nang ka afɔ nekpen niˈnkankan?
26Jisɔs akpɛɛ, “Nwɛr ejighi ayɛnɛ nang? Eriba nang?”
27Mgbɛra ejighi akpɛ, “Nɔngɔ Ntaa Ɔsɔwɔ ɛba akɔra na nete ɛna kpakpa, na etughu ɛja kpakpa, na nɔyɔ ɛna kpakpa, na nkana ɛya kpakpa, kpɛnɛ fa, agbaetek ɛba akɔra nasi biji ɛba ɛkɔra.”
28Jisɔs akpɛ, erena, “Ne na sɔng ɔfɔ nekpen.”
29Fa yi mgbɛra ejighi asɛb mba si atɔngɔ si anyinyi ji yɛ ya ne, abɔmmɔ Jisɔs, “Yɛnnɛ yɔ yi are nnɛ a agbaetek ɛwaa?”
30Jisɔs akpɛ ka arag, “Munnu aru ka Jɛrusalɛm amogho ya Jɛriko, ama anam anyaju ka abɔ, ajughɛ abɔ́ ka biji, amɔbɛ arɛ, atam asighɛ amo mba mbɔ. 31Ɛwɛmɛ si njɔ Ɔsɔwɔ#10:31 njɔ Ɔsɔwɔ Nnɛ ya ajɔ mbe ka nju Ɔsɔwɔ. asing mba yi ayiɛ ya anɔng ka nkɔ mba, ayanga ɛkpara jiga amogho. 32Lɛbi nnɛ a noto ka nju Ɔsɔwɔ titi, atam si fa ayiɛ si anɔng ka nkɔ mba ayanga ɛkpara jiga amo. 33Ka nnɛ a sameria yi ariɛ kɔ si nnɛ atam asing mba yi ama ayiɛ si anɔng, afɔ ɛkpɔgisi akiɛ. 34Ajɛrɛ akperɛ, akɔ akuu na amam awurɛ ka bɛnɛn bi, akɔ mbɔ́ abɔbɛ. Ka atab munnu yɔ akono ka nnyanɔsɔn ɛyɛ, amo nanɛ ka mfo bi ba ɛjɛnamba ya asɛnɛ asiayɔ ababɛ. 35Ka ɛtɔɔngɔ ofo akɛ nne a noto ka nju yi dinarus ɛba. Arag, ‘Atɔɛ si ababɛ, arena si akpugha ya ɔrɔbɔ ka isi ɛjɛ atu aga si nkia, mmanna fɛnɛ nkia kɛ.’
36“Jisɔs abɔmmɔ mgbɛra ejighi, ka ɛbɔngɔ anɛ ba asa, yɛnnɛ are agbaetek akɛ nnɛ yi anyaju amɔbɛ?”
37Mgbɛra ejighi akpɛɛ, “Nnɛ ya afɔ ɛkpɔgisi akiɛ.”
Jisɔs atɔɛ, “Sɔng tam ne na.”
Jisɔs areb Mata na Meri
38Nsɛrɛ si jisɔs na asɔgba ɛyɛ ajɔ amo ya Jɛrusalɛm, ama asi ka ɛka ji manka ya abengɛ si Mata ama kperɛ amo nanɛ ka etek ɛjɛ. 39Akpe mmɔannyɛ yɔka abengɛ si Meri, ya ajɔ ayongo atɔng ka ji Ntaa ajɔ akpene. 40Nete Mata ɛjɔ ka ejonɛnɛghɛ ji ajɔ anaa. Aba amakɔrɔ Jisɔs abɔmmɛ, “Ntaa ɛnɔnɔb yi mmɔannajaa yɔka atam asigim yi nne noto nanting? Tɔɛ ama tɔbɔm!”
41Ntaa akpɛɛ “Mata, Mata, wɔyɔ ɔkana ebe mbe ka nete, 42Ejo jiji ji ɛga nɔb, ere nono Ɔsɔwɔ. Meri ama sang ji ɛga nɔb, nnɛ wawi arem ya atabɛ.”
Currently Selected:
Luk 10: NDD Nta
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
