मत्तयाल 10
10
येसु ओना सिस्युल्कुन बेसता कबुर वेहालय लोहंतोर
(मरकुस 3:13-19; लूकाल 6:12-16)
1येसु ओना पन्नेंड सिस्युल्कुन दग्गेरा केय्सि, ओर्कु देय्याल्क गेदमना अदिकारम हीतोर. अचोने आयका अन्नि तीरकुना रोगाल्क, बादन बेस कियना अदिकारमगुडा हीतोर. 2आ पन्नेंडु मंदि प्रेरितुल्कुना पोरोलीं इल्हा मंतां: मोदाला सिमोन (ओन पत्रुगुडा इंतुर), ओना तम्मुर अंदरियल, जब्दिना इव्वुर मर्क याकोब, योहान, 3पिलिप, बरतलमय, तोमल, कर वसुल कियना मत्तयाल, अल्पिना मर्रि याकोब, तद्दि, 4सिमोन कनानि, इस्कारियोत यहुदल (ईरे येसुन पीसि हीतोर).
5ई पन्नेंड मंदि सिस्युल्कुंक येसु इसोंटा हुकुम हीसि लोहचीतोर: यहुदि आयवोरा नड्डुम होनमट, सामरिया लोकुल्कुना बद्दे नाटेने होळियमट. 6दानकु बदुलु इस्राएलता तप्सोत्ता आ गोर्रेनहेके होंट. 7मिमेट होनानेंके, “स्वर्ग राज्येम दग्गेर्क एव्ता,” इंचि वेहासेक होंट. 8रोगाल्कुन बेस कीम्टु, हातोर्कुंक जीवा अरहट, कुस्टरोगम आतोर्कुन बेस कीम्टु, देय्याल्कुन गेदमिसिम्टु. मीकु ई हक्कु पुक्कटते दोर्कुता इंचि मिमेट इंका इसोंटा सेवा पुक्कटते कीम्टु. 9होननेंके मी नडिक बंगारम, एंडि, रागिता कोत्तां इरमट. 10जोरा ओयमट, एक्कोतव अंगिं, हेरपुह्क ओयमट. दुड्डुगुडा ओयमट. बारित्ते कबळ कियनोंक ओना बूति ओन्क दोर्कमळ गावाले.
11मिमेट मोदाला बद नाटे, बद सहरते अय्ते दांतिटो, अद नाटे वरोर बेसता मनकना बारेमते जाडा कीम्टु. मिमेट अगटाल पेय्सि होननाल ओना लोने मंटु. 12मिमेट लोते होळियनेंके, “सांति मन्निकांटी,” इंचि होळियट. 13ओक्कला आ लोन बेसतद आते मिमेट हीता सांति अगा मनंता. गानि ओक्कला आ लोन बेसतद आयाकोंटे मिमेट हीता आ सांति मिहागेन वापस वांता. 14बोर अय्ते मीकुन लोप्पो वाया हिय्युरो मी पोल्लें केंजुरो अस्के ओना लोतालो मरि नाटेनालो पेय्सनेंके मिमेट मी कादा दुब्बा अग्गेन दुल्पिसि#10:14 कादा दुब्बा अग्गेन दुल्पिसि संबंदम नेमाहमळ, पेन मीकुन लक्कु कीता. पेय्सट. #मरकुस 6:11; लूकाल 9:5 15नना मीकु निजम वेहासेक गदा, पेन न्यायम कियना रोजुने सदोम आनि गमोरा#10:15 सदोम आनि गमोरा वेल्लेन वर्सां मुन्ने पेन ई सहरकुन नासडेम कीता. बारित्ते आ सहरकु वेल्लेन पापमते निंडिस मत्तां. सहरकुना परिस्तिति आ नाह्कुंकन्ना बच्चोरो बेस मनंता.#उत्पत्ति 19:24-28
वायना कस्टाल्कुना बारेमते येसु वेहांतोर
(मरकुस 13:9-13; लूकाल 21:12-17)
16हुळाट, तोडेल्लिन लोप्पो गोर्रेन लोहताप नना मीकुन लोहचंतन, इंचि मिमेट तरासुनलेसीं जेगर्ता आनि पावरेम पिट्टेनलेसीं इमानदार मंटु. 17मनकालोर मीकुन पंचादितोरा कय्दे अप्पजेपनुर आनि दर्मसास्त्रम कराहना लोह्कुने ओसि मीकुन पोट्टे देब्बांगुडा तना परांतुर. इंचि मिमेट मनकालोरागटालगुडा जेगर्ता मंटु. 18नाहेंका मीकुन ओर राज्यपाल आनि राजालोरा मुन्ने ओयानुर अस्के ओरा मुन्ने, विस्वासम कियवोरा मुन्ने नावा बारेमते मिमेट गवाइदार्क आकिट. 19-20वळकानोर मिमेट आयो मीलोप्पो मनना पेनबाबाना आत्मा आंद. अदुनहाटीं मीकुन बस्के अय्ते ओरा कय्दे अप्पजेपंतुरो अस्के अगा बतल वळ्कना, बतल वळ्कानायो इंचि रंदि कियमट. वेलापोर्रेन मिमेट बतल वळकुगोमो अद मीकु पेन वेहंता.
21कासा दादल-तम्मुह्क पगां आसि हव्कालय अप्पजेपनुर. पिलाल्क ओरा तल्लुर-बाबोंक अड्डम तिरियसि ओर्कुन हव्का वेहांतुर. 22नावा पोरोलताहेंका अंटोर लोकुल्क मीकुन हय्सुर. गानि बोर अय्ते आकिरदाका ओर्सकुंचेके ओप्के पीसि मनंतुर, ओर्के मुक्ति दोर्कंता. 23मीकुन उंदि नाटे तकलिप हियानय्ते मिमेट इंकुंदि नाटे पेय्सि होंट. नना निजम वेहासेक मंतन, इस्राएलता अन्नि नाह्कुने तिरियसि पेनदा बेसता कबुर वेहामळ मारवा मुन्नेने मनकना रूपमते पुटतोन नना वांतन.
पेनदुक वेरियट, लोकुल्कुंक आयो!
(लूकाल 12:2-7)
24गुरुंकन्ना सिस्युड पेद्दोड आयोर, अल्हेने मालकुंकन्ना जीतागाड पेद्दोड आयोर. 25सिराप सिस्युड गुरुनलेसीं, जीतागाड मालकुनालेसीं आयगोम अचोने सालु. ओक्कला लोता मालकुन नाकुने बेलजेबुल#10:25 बेलजेबुल इद अन्नि देय्याल्कुंकन्ना पेद्दा देय्यम पोरोल आंद. इद देय्याल्कुना मुक्यल आंद. इनानय्ते, लोते मनना मीवद अंटोरद बद गति आयार!
26गानि ओर्कु मिमेट वेरियमट. मुच्चिसि मत्तव अन्नि पोल्लें बय्यर आंता, तेळियाकोंटा मत्तव अन्नि वस्तुक पलातुक वांतां. 27नना मीकु हीकटते वेहतवुन, मिमेट वेलगुने होंचि वेहट. नना मी केव्कुने वेहतवुन मिमेट येनागर्रापोर्रो एक्किसि वेहट.
28बोर अय्ते मीवा मेंदुल्तुन हव्का परांतुर गानि मी आत्मातुन हव्का परुर ओर्क मिमेट वेरियमट. गानि बोर अय्ते मेंदुल्तुन आनि आत्मातुन नरकमते वाट्सि नासडेम किया परांतोर ओन्के वेरियट. 29रोंडु कोळ्का पिट्टें रोंडु कोत्तांकु अम्मुड दांतां गदा! अय्नागानि पेनबाबाना इच्चा हिल्वा अवुनाल उंदिगुडा बूमिपोर्रो अर्रो. 30मीवा तल्लाता उंदि-उंदि केल्लु लेक्किस मंता. 31अदुनहाटीं वेरियमट! पेनदा मुन्ने मिमेट वेल्लेन कोळ्का पिट्टेंकन्ना बच्चोरो विल्वा मत्तोर आंदिर. 32बोर अय्ते लोकुल्कुना मुन्ने नाकुन एरपाट कींतन इंचि ओप्कुंतोरो, ओन ननागुडा स्वर्गमते मनना पेनबाबाना मुन्ने नावा सिस्युड इंचि ओप्कुंतन. 33गानि बोर अय्ते लोकुल्कुना मुन्ने नाकुन एरपाट किय्योन इंतोरो, ननागुडा ओन नावा स्वर्गमते मनना पेनबाबाना मुन्ने एरपाट किय्योन इंतन.
येसु बारिंक वातोर, अद वेहांतोर
(लूकाल 12:51-53; 14:26-27)
34-35नना इद बूमिपोर्रो सांति हियालय वातन इंचि इनकुनमट. मर्रिनद बाबोनतोनि अर्राकोंटा, मिय्याटद तल्लुनतोनि अर्राकोंटा आनि कोळियाटद पोरळतोनि अर्राकोंटा कियालय नना वातन. इंचि नना सांति हियालय आयो गानि ओर्कुन वेरे-वेरे कियालय वातन. 36मनकना पगातोर ओना लोतोर्के आयानुर.
37बोर अय्ते तल्लुर-बाबोन पोर्रो नाकन्ना एक्को पावरम कींतोर, ओर नावा सिस्युड आयनलायक हिल्लोर. बोर अय्ते मियाह्क-मर्कुन पोर्रो नाकन्ना एक्को पावरम कींतोर, ओरगुडा नावा सिस्युड आयनलायक हिल्लोर. 38बोर अय्ते ओना सतता क्रुस पीसि#10:38 सतता क्रुस पीसि कस्टाल्क अर्रालय आनि हायालयगुडा तयार मनमळ. नावा पज्जो वायोन इंतोर, ओरगुडा नावा सिस्युड आयनलायक हिल्लोर. 39बोर अय्ते ओना जीवातुन पिसागोटालय हूळांतोर, ओर ओना जीवातुन पोगोटकुंतोर. बोर ओना जीवातुन नावाहाटीं पोगोटंतोर, ओन्क जीवा दोर्कंता.
बोनकु इनाम दोर्कंता?
(मरकुस 9:41)
40बोर अय्ते मीकुन दग्गेरा कींतोर, ओर नाकुन दग्गेरा कीतापे. बोर अय्ते नाकुन दग्गेरा कींतोर, ओर नाकुन लोहता पेनदुनगुडा दग्गेरा कीतापे. 41बोर अय्ते पेनदा कबुरतोन, कबुरतोर इंचि ओप्कुंतोर ओन्क पेनदा कबुरतोंकु दोर्कना इनाम दोर्कंता. नीतिमंतुन नीतिमंतुड इंचि बोर ओप्कुंतोर ओन्क नीतिमंतुक दोर्कना इनाम दोर्कंता. 42ओक्कला बोरन्ना, ई सीदा-सादा सिस्युल्कुना लोप्पोटाल वरोंकु, नावा सिस्युड इंचि गिलासमेड सल्लाटेर उनालय हियानय्ते, नना मीक निजम वेहांतन, ओन्क तप्पाकोंटा इनाम दोर्कंता.
Currently Selected:
मत्तयाल 10: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
