योहान 19

येसुंक हामुर सिक्‍सा हींतुर

1अस्‍के पिलातुस येसुन दोर्कापीसि पोट्‍टे देब्बां तना वेहतोर. 2सिपाइल्क बारे, उंदि हाह्कुना वेलितुन किरिटम कीसि, येसुना तल्‍लक तासतुर. तासि ओन्क नेळि पंडि रंगुना कपडिं केराहतुर. 3केराहता पजा, “यहुदिल्कुना राजांक जय” इंचेके ओना सेंपापोर्रो तंतुर.

4पिलातुस मरुंदि मल्का पलाते पेय्सि, “हुळाट, ओन्क सिक्‍सा हियालय, नाकु ओनालोप्‍पो बतले कसूर दोर्काहिल्‍ले, इद मीकु तेळियना इंचि नना ओन मीहेके पलाते तच्‍चंतन,” इंचि वेहतोर. 5पजा येसु हाह्कुना किरिटम, नेळि पंडि रंगुना कपडिं केरसि पलाते पेय्‍स्‍तोर. अस्‍के पिलातुस, “हुळाट ई मनकन,” इंचि ओर्कुन इत्‍तोर. 6येसुन हूळसि, पेद्‍दा पेर्मालोर आनि गुळितगा कावेल कियानोर, “ओन क्रुसुनपोर्रो वेलाड वाटा, ओन क्रुसुनपोर्रो वेलाड वाटा,” इंचि वरगेयतुर. अस्‍के पिलातुस ओर्कुन, “ओन ओसि मिमेटे क्रुसुनपोर्रो वेलाड वाटट, नाकु ओनालोप्‍पो बदे कसूर दोर्काहिल्‍ले,” इंचि इत्‍तोर. 7अद केंजसि यहुदिल्क इल्‍हा जवाब हीतुर, “माकु उंदि नियम मंता. ओर, नना पेनदा मर्रिन, इंचि इत्‍तोर. अदुनहाटीं मावा नियम परकारम ओर हायमळे गावाले,” इत्‍तुर. 8ओर अल्हा इन्‍मळतुन केंजसि, पिलातुस वेल्‍लेन वेरियतोर.

9अस्‍के पिलातुस येसुन मर्रा राजवाडाते ओसि, “निमे बगाटाल वातिन?” इंचि पूसकीतोर. गानि येसु बतले जवाब हिया हिल्‍लोर. 10अदुनहाटीं, पिलातुस येसुन, “निमे नातोनि बारि वळ्कसेक हिल्‍लिन? नीकुन होळसियना आनि क्रुसुनपोर्रो वेलाड वाटना अदिकारम नाके मंता, इंचि नीकु एर्का हिल्‍लेना?” इंचि पूसकीतोर. 11अस्‍के येसु, “पोर्रो मनना पेन आ अदिकारम नीकु हीता, अचोने! हिलाकोंटे नीकु नावापोर्रो बतले अदिकारम हिल्‍ले. अदुनहाटीं, नाकुन नीवा कय्‍दुक अप्पजेपतोंके एक्‍को पापम दल्‍गंता,” इंचि इत्‍तोर.

12अस्‍केटाल पिलातुस, येसुन होळसालय वेल्‍लेन कोसिस कीतोर. गानि यहुदिल्क, “ओक्‍कला निमे ओन होळसियानय्ते, निमे कैसर#19:12 कैसर इद राजाना पोरोल आयो. रोम सरकारते अन्‍निटकन्‍ना पेद्‍दा पदवि आंद. राजाना दंटातोन आयिन. इंका नना राजान इंचि इनना हरेक मनकल, महाराजाना विरोदमते वळ्कतोर आंतोर,” इंचेके वरगेयालय दल्‍गतुर. 13अव पोल्‍ले केंजसि, पिलातुस येसुन मर्रा पलाते तत्‍तोर. तच्‍चि, न्‍यायम कियनेंके उद्‍दना कुर्सिते उद्तोर. अद कुर्सि मनना जेगातुन, इब्रानि बासाते, गब्बाता#19:13 गब्बाता इत्‍ते बंडां तारता जेगा इंचि अर्तम. इंतुर. 14अद रोज, दाटसि होनना पंडुगुना तयारिं कियना रोज आंद. अस्केळ्क, पन्‍नेंड एगसि मत्‍ता. अस्‍के, “इद हुळाट, मीवा राजाल!” इंचि पिलातुस यहुदिल्कुन इत्‍तोर. 15अस्‍के यहुदिल्क, “ओन लक्‍कु ओम, ओन लक्‍कु ओम! ओसि क्रुसुनपोर्रो वेलाड वाटा,” इंचि वरगेयालय दल्‍गतुर. अय्ते पिलातुस, “बतलु! नना मीवा राजान, क्रुसुनपोर्रो वेलाड वाटकना?” इंचि ओर्कुन पूसकीतोर. अस्‍के पेद्‍दा पेर्मालोर, “माकु कैसर राजान होळसिसि वेरे बोरे राजाल हिल्‍लोर,” इंचि वरगेयतुर. 16पजा पिलातुस, येसुन क्रुसुनपोर्रो वेलाड वाटालय ओरा कय्‍दुक अप्पजेपतोर अय्ते, ओर येसुन ओतुर.

येसुन क्रुसुनपोर्रो वेलाड वाटंतुर

(मत्‍तयाल 27:32-44; मरकुस 15:21-32; लूकाल 23:26-43)

17येसु ओना क्रुसुन कांजसेक, “तला बोरसेम” इनना जेगातगा होत्‍तोर. इब्रानि बासाते, अद जेगातुन गोलगोता इंतुर. 18अगा ओना काल्क-कय्‍कुंक मोल्‍लां कोह्‍किसि ओन क्रुसुंक वेलाड वाटतुर. येसुन नड्‍डुम इरसि ओना रोंड बाजकुंक इंकिव्वुर्कुन क्रुसुंक वेलाड वाटतुर. 19अस्‍के पिलातुस, “नासरेत नाटेना येसु, यहुदिल्कुना राजाल,” इल्‍हा उंदि बल्‍लापोर्रो कसूर रासि, येसुना क्रुसुंक कोह्का वेहतोर. 20येसुन वेलाड वाटता जेगा सहरकु दग्‍गेरा मत्‍ता. अद बल्‍लापोर्रो इब्रानि, लटिन आनि युनानि बासाते रासि मत्‍ता. अदुनहाटीं वेल्‍लेटोर यहुदिल्क, आ कसूरतुन हदवुंदुर. 21पजा यहुदि पेद्‍दा पेर्मालोर पिलातुसनगा होंचि, “यहुदिल्कुना राजाल इंचि रासमा. दान जेगाते, नना यहुदिल्कुना राजान, इंचि ओर इत्‍तोर, इल्‍हा रासा,” इंचि वेहतुर. 22अस्‍के पिलातुस, “नना रासतन! रासतन. अचोने!”

23सिपाइल्क येसुन क्रुसुनपोर्रो वेलाड वाटतंका, ओना कपडिं तेंडकुत्‍तुर. तेंडकुंचि, वरो-वरोंक उंदि-उंदि हिस्सा वायना हिसाबते, नालुं पाल्क कीतुर. ओना अंगितुनगुडा तेंडकुत्‍तुर. अद अंगि पोर्रोटाल हिळुदाका पोळ्‍गुंक-पोळ्‍गु कुट्‍टु वाटाकेन मत्‍ता. 24अदुनहाटीं सिपाइल्क, “दीन मनम हराहमन्‍नि, गानि सिट्‍टिं वाटकोम. अस्‍के अद बोर्क दोर्कंतनो हूळकोम,” इंचि ओर-ओरे इनकुत्‍तुर. “ओर नावा कपडिन हिस्सां कीसि, नावा अंगिहाटीं सिट्‍टिं वाटंतुर,”#बजन संहिता 22:18 इंचि दर्मसास्‍त्रमते रासि मत्‍ता पोल्‍ले पुरागा आयनाहाटीं अल्हा जर्गता. सिपाइल्कगुडा अदुनहाटींगे अल्हा कीतुर.

25येसुन वेलाड वाटता क्रुसुना दग्‍गेरा, येसुना यावल, ओना यावाना हेलड, कोल्‍पाना मुत्‍तो मरियम, आनि मगदलेनि नाटेना मरियम इव निलसि मत्‍तां. 26येसु, ओना यावल आनि ओर बोन अय्ते पावरम कीतोर आ सिस्युड, ओना दग्‍गेरा निलसि मत्‍तद हूळसि, येसु ओना यावन, “यावा, ईर हूळा नीवा मर्रि!” इंचि वेहतोर. 27पजा आ सिस्युनहेके हूळसि, “इद हूळा, नीवा यावल!” इंचि वेहतोर. अस्‍केटाल आ सिस्युड दान ओना यावल इंचि लोन ओतोर.

येसु जीवा होळसंतोर

(मत्‍तयाल 27:45-56; मरकुस 15:33-41; लूकाल 23:44-49)

28पजा, ओर बद कबळहाटीं वातोर, अद कबळ पूरा आता, इंचि ओर एरपाट कीसि, दर्मसास्‍त्रमते रासि मत्‍तद पूरा आयनाहाटीं, “नाकु दूपा आसंता,”#बजन संहिता 69:21 इंचि इत्‍तोर. 29अगा उंदि अळका मत्‍ता, अव्टे मुरगिसि होत्‍ता अंगुर पंडिना पानकम मत्‍ता. ओर अद अळकाते दूदि मुळाहतुर आनि हिस्सोप इनना मराता कोम्मक कळाह्‍चि, येसुना तोळदागा ओतुर. 30येसु आ मुरगिसोत्‍ता अंगुर पंडिना पानकमता रुसि हूळसि, “पूरा आता,” इंचि इत्‍तोर. अल्हा इंचि, हिळु तला वराहचि जीवा होळ्‍सतोर.

31अद नोमकेम आनि दाटसि होनना पंडुगुना तयारिं कियना रोज मत्‍ता. अद रोजुने पीनगुल्कु क्रुसुनपोर्रो वेलाड मनमळ यहुदिल्कुंक इस्‍टम हिल्‍ले. अदुनहाटीं यहुदि पेद्‍दाल्क पिलातुसनगा वासि, “ओरा काल्‍कुन उराहचि, सेत्‍तातुन हिळु रेहा वेहा,” इंचि पूसकीतुर. 32अस्‍के सिपाइल्क वासि, येसुनतोनि क्रुसुनपोर्रो वेलाड वाटसि मत्‍ता इव्वुरा काल्‍कुन उराहतुर. 33पजा ओर येसुनगा वासि हूळतस्‍के, येसु हासे मत्‍तोर, इंचि ओना काल्क उराह हिल्‍लुर. 34गानि ओराव्टेटाल वरोर सिपाइ येसुना संका हिळु, गोर्काते कोह्कतोर. अय्ते कोह्कता कोह्कुळे नेत्‍तुर आनि एर पोंगता. 35अदंता बोर अय्ते हूळतोर ओर, मिमेटगुडा विस्वासम कियगोम इंचि ओना गवाइ वेहतोर. ओर वेहता गवाइ निजम आंद. ओर सत्‍तेम वेहचंतोर इंचि ओन्क एरपाट. 36-37“ओना बोक्‍कानाल उंदि बोक्‍किंका उंरुंगो,” इंकुंदि जेगाते, “ओन कोह्कतोनहेके हूळानुर”#निर्गमन 12:46; गिनति 9:12; बजन संहिता 34:20 इंचि दर्मसास्‍त्रमते रासि मत्‍ता पोल्‍लें पुरागा आयगोम इंचि, इल्‍हा जर्गता.

येसुन बोंदाते तासंतुर

(मत्‍तयाल 27:57-61; मरकुस 15:42-47; लूकाल 23:50-56)

38अवंता आतंका, अरिमताइ नाटेना योसेप इनानोर, पिलातुसनगा होंचि, “येसुना पीनगुन हीम,” इंचि पूसकीतोर. पिलातुस ओम इत्‍तस्के ओर येसुना पीनगुन ओतोर.#19:38 ई योसेपगुडा येसुना वरोर सिस्युडे, गानि ओर यहुदि पेद्‍दाल्कुंक वेरियसि, लोप्पो-लोप्पो विस्वासम कियुंदुर. 39उंदि मल्का नर्कटा वेलाक वासि येसुंक कलियता निकोदेमसगुडा योसेपुनतोनि वातोर. ई निकोदेमस, दग्‍गेर-दग्‍गेरा मुप्‍पै (30) किलोना “बोलम” आनि “अगर” इनना गमागमा गब्‍बु वायना वस्‍तुक पीनगुंक होकालय पीसि वातोर. 40ओर इव्वुर कूळसि, यहुदिल्कुना गति कियना रिवाज परकारम, आ गमागमा वायना वस्तुकुनंता येसुना मेंदुल्क होकतुर. होकसि, येसुना पीनगुन उंदि पूना पोळ्‍गु कप्पिडते हुटतुर. 41येसुन क्रुसुंक वेलाड वाटता जेगाक दग्गेरेन उंदि तोटा मत्‍ता. आ तोटाते उंदि पूना बोंदा मत्‍ता, अद बोंदाते अदवेरदाका बस्‍केने बोनदे पीनगुन इर्रा हिल्‍लुर.#19:41 अद बोंदाते अदवेरदाका बस्‍केने बोनदे पीनगुन इर्रा हिल्‍लुर यहुदिल्क बोरन्‍ना हाते, ओन बूमिते पोक्‍का तव्‍सि बोंदा तासुर. उंदि बंडातुन तुलाह्‍चि अव्टे ओना पीनगुन इर्रंतुर. 42अद बोंदा दग्‍गेरा मत्‍ता, अचोने आयाका अद यहुदिल्कुना दाटसि होनना पंडुगुना तयारिं कियना रोज मत्‍ता. अदुनहाटीं ओर येसुन अदे बोंदाते इरतुर.

Currently Selected:

योहान 19: esg-Deva

Highlight

Copy