योहान 17
17
येसु सतताहाटीं पारतना कींतोर
1-4इव अन्नि पोल्लें वेहमळ आतस्के, येसु पोर्रो स्वर्गमताहेके हूळसेक इल्हा पारतना कियालय दल्गतोर. “बाबा, अंटोर लोकुल्कुनपोर्रो निमे नाकु अदिकारम हीतिन. दीनहेंदाल निमे बोर्कुन अय्ते नाकु हीतिनो, ओर्क अंटोर्क नना बस्केळ्क पिस्सना पिस्वर हीकन. निमे वरोने सत्तेम पेनदुन आंदिन, बोर अय्ते नीकुन, निमे लोहता येसु किरिस्तुन एरपाट कींतुरो ओर्के आ बस्केळ्क पिस्सना पिस्वर दोर्कंता. निमे नाकु बव कबाह्क अय्ते कियालय हीतिनो, अवुन पुरागा कीसि, नना बूमिपोर्रो नीवा महिमा कीतन. इंदके नावा वेला एव्ता. अदुनहाटीं निमे नाकु कदर हीते, नना नीवा महिमा कींतन. 5बाबा, दुनिया पुट्टका मुन्ने नना नीतोनि मननेंके बसोंटा महिमा मत्तानो, असोंटा महिमा इंदकेगुडा नी मुन्ने हीम.”
येसु ओना सिस्युल्कुनाहाटीं पारतना कींतोर
6“ई दुनियाताल निमे नाकु हीता लोकुल्कुंक, नना नीवा पोरोल्तुन हुपिस्तन. ओर बस्केळ्क नीवोर्के आंदुर. ओर्कुन निमे नाकु हीतिन. ओर नीवा पोल्लेपोर्रो ताकतुर. 7निमे बतल अय्ते नाकु हीतिनो, अव अन्नि निहेंदाले दोर्कतव इंचि इंदके ओर्क तेळियता. 8बारित्ते बव पोल्लें अय्ते निमे नाकु हीतिनो, अवुन नना ओर्क एविच्तन. ओर अवुन ओप्कुत्तुर. नना निजम निहागटाले वातन, नाकुन निमेन लोहतिन इंचि ओर विस्वासम कीतुर. 9ईराहाटींगे नना पारतना कीसंतन. दुनियाताहाटीं आयो. निमे बोर्कुन अय्ते नाकु हीतिनो, ओर नीवोरे इंचि ओराहाटींगे नना पारतना कीसंतन. 10नहगा मनना अन्नि पोल्लें नीवंगें आंदुं, नीवां अन्नि पोल्लें नावां आंदुं. अवुनहेंदाल नाकु महिमा दोर्कता. 11इंदकेटाल नना इद दुनियाते मनोन. नना निहगा वासंतन. गानि ईर ई दुनियाते मनंतुर. पवित्र बाबा! इंदके मनम उंदि आसि मत्ताप, ईरगुडा उंदि आसि मनालय, निमे नाकु हीता नीवा पोरोलता ताकतते ईरकुन कापाळा. 12नना ई दुनियाते ईरतोनि मननेंके, निमे नाकु हीता नीवा पोरोलता ताकतते ओर्कुन कापाळतन. सिराप, दर्मसास्त्रमते रासता पोल्ले पूरा आयनाहाटीं बोर अय्ते नासडेम आयना मत्ता ओन होळसि, वेरे बोरे नासडेम आया हिल्लुर, नना ओर्कुन कापाळतन. 13नना इंदके निहगा वासंतन. गानि नावा आनंदम ओरा लोप्पो पुरागा आयना इंचि, इव पोल्लें नना इद दुनियाते मननेंकेन वेहंतन. 14नीवा पोल्ले नना ईरकु वेहतन. नना इद दुनियातोन आयोन. अल्हेन ईरगुडा इद दुनियातोर आयुर. अदुनहाटीं ई दुनियातोर ईरकुन हय्सेक हिल्लुर. 15निमे ईरकुन इद दुनियाताल ओम इंचि नना पारतना कीसेक हिल्लेन, गानि पेद्दा देय्यमताल#17:15 पेद्दा देय्यमताल इत्ते, करेब इनना देय्यमता कय्दाल. ईरकुन कापाळा इंचि पारतना कीसंतन. 16नना ई दुनियातोन आयोन, अल्हेन ईरगुडा ई दुनियातोर आयुर. 17नीवा पोल्ले सत्तेम आंद, नीवा सत्तेमते ओर्कुन पवित्र कीम. 18बल्हा अय्ते निमे नाकुन ई दुनियाते लोहतिन, अल्हेन नना ईरकुन दुनियाते लोहंतन. 19नीवा सत्तेमते ओर पवित्र आयगोम इंचि, नावद ननेन उंदि पवित्र मोक्कुनलेह्का आतन.”
अंटोर विस्वासुल्कुनाहाटीं येसु पारतना कींतोर
20“नना सिराप ईराहाटींगे पारतना कीसेक हिल्लेन, गानि बोर अय्ते ईर वेहना पोल्लेतुन केंजसि नापोर्रो विस्वासम इर्रंतुर, ओराहाटींगुडा नना पारतना कीसंतन. 21बाबा! बल्हा अय्ते निमे नहगा, नना निहगा उंदि आसि मंतोमो, अल्हेन ओरगुडा उंदि आसि मननाहाटीं पारतना कीसंतन. नाकुन निमेन लोहतिन, इंचि दुनियातोर विस्वासम कियना इत्ते, ओरगुडा मनांटे उंदि आयापींता. 22-23निमे ना लोप्पो मंतिन, नना नी लोप्पो मंतन. निमे नाकु हीता कदरतुन नना ओर्क हीतन. मनम इंदके बल्हा उंदि आसि मंतोमो, अल्हेन ओरगुडा उंदि आसि मंदना. अल्हा मत्तेने, नाकुन निमे लोहतिन आनि नाकुन पावरम कीताप ओर्कुनगुडा पावरम कीसंतिन, इंचि दुनियाक एरपाट आयापींता.”
24“बाबा! बोर्कुन अय्ते निमे नाकु हीतिनो, ओर निमे नाकु हीता कदरतुन हूळानाहाटीं, नना बगा मत्ते अगा ओरगुडा मनना इंचि, नना पारतना कीसंतन. बारित्ते इद दुनिया पुट्टका मुन्नेन निमे नाकुन पावरम कीतिन. 25बाबा! निमेन नीतिमंतुन आंदिन. ई दुनिया नीकुन एरपाट किय्यो. गानि नना एरपाट कींतन. अल्हेन नाकुन निमेन लोहतिन इंचि ई सिस्युल्क एरपाट कींतुर. 26ना पोर्रोटा नीवा पावरम ओरा लोप्पो मननाहाटीं आनि ननागुडा ओरा लोप्पो मनना इंचि, नीवा पोरोल्तुन ओर्क एरपाट कीसीतन. इंका मुन्नेगुडा एरपाट कीसि हीसेक मनंतन,” इंचेके येसु पारतना कीतोर.
Currently Selected:
योहान 17: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
