प्रेरितुल्कुना कबाह्क 4
4
पत्रुन, योहानुन पंचादिता मुन्ने निलाहमळ
1पत्रु आनि योहान लोकुल्कुनतोनि वळकसेके मननेंके पेर्मालोर्क, गुळिता कावेल कियानोरा दरोगाल आनि सदुकिर ओरगा वातुर. 2येसु बल्हा अय्ते हातोरा लोप्पोटाल मर्रा जीवाते तेदतोर, अल्हेने हातोर मर्रा जीवाते तेदंतुर इंचि पत्रु आनि योहान लोकुल्कुंक कराहमळतुन हूळसि ओर्कु इरगा होंग वाता. 3पजा ओर ओर्कुन पीतुर गानि पोळ्दु होत्ता इंचि इंकुंदि रोजुनदाका ओर्कुन जेलने बंद कीसि इरतुर. 4गानि बोर अय्ते ओरा पोल्लें केंजतुरो, ओराव्टेटाल वेल्लेन मंदि येसुनपोर्रो विस्वासम कीतुर. विस्वासम कीतोरा लोप्पोटाल मांड्सा दग्गेर-दग्गेरा हेय्युं वेयकुनदाका आतुर.
5इंकुंदि रोजु यहुदि पेद्दाल्क, राज्येम कियानोर आनि दर्मसास्त्रम कराहना गुरुल्क#4:5 दर्मसास्त्रम कराहना गुरु ईर दर्म नियमते मनना पोल्लें कराहंतुर. येरुसलेमते जमा आतुर. 6इंका पेद्दा पेर्माल हन्नाल ओना जीवातोर कयपाल, योहान, सिकंदर आनि ओना लोतुर अंटोर अगा मत्तुर. 7ओर पत्रुन आनि योहानुन ओरा नड्डुम निलाहचि, “मिमेट बद ताकतते, बोना पोरोलते इव कबाह्क कीतिर?” इंचि ओर्कुन पूसकीतुर.
8-9अस्के पत्रु पवित्र आत्माते निंडसि इल्हा वळकालय दल्गतोर. ए लोकुल्कुनपोर्रो राज्येम कियानोरिटा अल्हेने पेद्दाल्कुरिटा! इय्याला वरोन कुंटिन बेस कीताहेंके, ओर बल्हा बेस आतोर, इंचि माकुन तल्कसेक मंतिर. 10अय्ते मीकु अंटोर्क आनि इस्राएलता लोकुल्कुंक, नासरेत नाटेना येसु किरिस्तुना पोरोलतेन ई मनकल बेस आसि मी मुन्ने नित्तिसि मंतोर इंचि तेळियमळ गावाले. मिमेट, मीवा लोकुल्क, येसु किरिस्तुन क्रुस पोर्रो मोल्लां कोहकिसि हव्कतिर गानि पेन ओन हातोरा लोप्पोटाल मर्रा जीवाते तेहता 11“मिमेट लोन दोहालय कबळ्क वायो इंचि पोहता बंडे, इंदके लोतुक अव्सरमाता बंडा आता, इंचि दर्मसास्त्रमते रासि मंता. अदे बंडा ई येसु आंदुर.#बजन संहिता 118:22 12येसुना पोरोल तप्पा मब्बुना हिळु मनानोरा बोना पोरोले मनाकुन पापमताल पिसागोट्टो, इंका बोरे मनाकुन पिसागोट्टोर,” इंचि वेहतोर.
13ओर पत्रुन आनि योहानुन हूळसि इस्कुल करियवोर, सादा मनकालोर आंदुर इनकुत्तुर, गानि ओरा दैरनेम हूळसि इचंत्रम आतुर. अस्के ईर येसुनतोनि मत्तोर आंदुर इंचि ओर्कुन एरपाट कीतुर. 14बेस आता कुंटि ओरतोनि नित्तिसि मत्तद हूळसि ओर्कु अड्डम बतल वळका पराहिल्लुर. 15अदुनहाटीं ओर पत्रुन आनि योहानुन इगेटाल पलाते होंट इंचि इत्तुर आनि वरोंक-वरोर विचारम कियालय दल्गतुर गदा, 16ई मनकालोर्कुन मनम बतल कीकोम? येरुसलेमते मनानुर अंटोर्क ईर कुंटिन बेस कीता चिन्ह एरपाटे, अदुन मनम निजम आयो इंचि इना परोम. 17गानि इद पोल्ले एक्को लोकुल्कुंक तेळियामन्नि इत्ते ओर्कुन मनम, मिमेट येसुना पोरोल इंका बोना मुन्ने एतमट, इंचि वेराहकोम, इत्तुर. 18अस्के ओर्कुन मर्रा केय्सि, “मिमेट येसुना पोरोलते बतले वळ्कमट, बतले कराहमट,” इंचि आदेस हीतुर.
19गानि पत्रु आनि योहान, “पेनदा पोल्ले केंजाका मीवा पोल्ले केंजमळ इद पेनदा मुन्ने न्यायामेना? मिमेटे वेहाटु. 20बदाय्ते मोमोट हूळतोम, केंजतोम अदुन वेहाकोंटा मनमळ मावातोनि आया परो,” इंचि इत्तुर.
21अगा जर्गुतदुन हूळसि, अंटोर लोकुल्क पेनदा स्तुति कियालय दल्गतुर. अदुनहाटीं लोकुल्कुना वेर्रेक ओर्क सिक्सा हियाका, ओर्कुन मर्रा वेराहचि होळसीतुर. 22बोर मनकल अय्ते चमत्कार आसि बेस आतोरो, आ मनकल नल्पै वर्साना पोर्रो मत्तोर.
पत्रु आनि योहान विस्वासुल्कुनगा मल्सि वातुर
23पत्रुन, योहानुन होळसीतस्के ओर ओरा दंटातोरगा वापस वासि, पेद्दा पेर्मालोर्क, यहुदि पेद्दाल्क इत्ता पोल्लें अंता ओर्कु वेहतुर.
24ओर वेहतद केंजसि, ओर अंटोर कलियसि उंदे पेद्दा आवाजते पेनदुक पारतना कियालय दल्गतुर. “सामि! मब्बु, बूमि, समुद्रम आनि अवुना लोप्पो बतल अय्ते मंता, अवुन निमेन पुटिस्तिन. 25नीवा पवित्र आत्माताहेंदाल नीवा सेवक, मावा एनकटा पेद्दा मनकल दाविद राजाना तोळ्दाल निमे इल्हा वेहतिन गदा, वेरे जाति लोकुल्क बारि लोल्लिं कीतुर? लोकुल्क वट्टिदे अव्सरम हिल्वा पिलानकु बारि कीसेके? 26ई बूमिपोर्रोटा राजालोर पेनदुक अड्डम लडाइहाटीं तयार आतुर. राज्येम कियानोर अंटोर उंदि आसि, पेनदुक आनि दाना किरिस्तुंक अड्डम, आतुर.”#बजन संहिता 2:1-2
27“निजमे, निमे पेरकुंचि लोहचीता नीवा पवित्र सेवक येसुना विरोदमते हेरोद आनि पुंतुस पिलातुसगुडा वेरे जातितोरतोनि, इस्राएल लोकुल्कुनतोनि कलियसि उंदि आतुर. 28बारित्ते नीवा ताकत नीवा इच्चाते इल्हा जर्गना इंचि निमे मुन्नेने निरनायम कीतिन. अल्हेने जर्गसि पूरा आता. 29अदुनहाटीं, सामि! इंदके ओर वेराहसेक हूळा, नीवा पोल्ले दैरनेमते वेहालय सेवाकुल्कुंक बलम हीम. 30रोगाल्क बेस कियालय, नीवा पवित्र सेवक येसुना पोरोलते चिन्हां, इचंत्रमता कबाह्क किया परालय नीवा कय हाहचि बलम हीम,” इंचि पारतना कीतुर.
31पारतना कीतारित्ते, ओर जमा आसि मत्ता जेगा मेदुलता, ओर अंटोर पवित्र आत्माते निंडिसोंचि पेनदा पोल्ले वेरियाकोंटा वेहालय दल्गुतुर.
विस्वासुल्क उंदि आसि मनुंदुर
32विस्वासुल्क अंटोर उंदि मनसु, उंदि जीवा आसि मत्तुर. बोरन्ना आयि बदे सोम्मु, इद नावद इंचि इनाकोंदुर, गानि बोनगन्ना बतलन्ना मत्ते दान तूसकुनुंदुर. 33येसु सामि हासि मर्रा जीवाते तेदतोर, इंचि ओना पेद्दा ताकतते प्रेरितुल्क गवाइ हियुंदुर. इल्हा ओर अंटोरपोर्रो पेनदा कुर्पा मत्ता. 34-35ओरा लोप्पो बोनके बतल तक्को मनाहिल्ले. बूमि, लोहकु मत्तोर, अवुन अम्मिसि वाता कोत्तन तच्चि प्रेरितुल्कुंक हियुंदुर. बोन्क बच्चोर गरज मंता अच्चोर तूसि हियुंदुर.
36साइप्रस दीबेते पुटता योसेप इनना लेवि वंसमतोर वरोर मत्तोर. ओन्क प्रेरितुल्क बरनाबास इंचि पोरोल दोस्तुर. बरनाबास इत्ते “अंटोर्कुन समत कियना मनकल” इंचि अर्तम. 37ओर ओना नेलितुन अम्मिसि वाता कोत्तन अंता प्रेरितुल्कुंक हीतोर.
Currently Selected:
प्रेरितुल्कुना कबाह्क 4: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
