Matay 25

O Tinako to Mamo^tepay a Limecedan

1<<Toya romi'ad, o Kitakit no Kawas i, matiya onini a kongko. Ira ko mamo^tepay a limecedan a nitatoyay to dawdaw a tayra a militmoh to papararamoden a fa'inay. 2Onini a mamo^tepay i, o mafolaay ko lalima. O mafana'ay a miharateng ko lalima. 3Oya mafolaay a limecedan i, mitatoy to dawdaw, caay pihawikid to simal cangra. 4Oya mafana'ay a miharateng a limecedan i, mitatoy to dawdaw, mihawikid to pinapina a talid no simal cangra. 5Caay ka ranikay a tayra koya papararamoden a fa'inay saka, pacmet sa a mafoti' cangra a ma^min.

6<<Nikawrira, yo lafiito i, <Irato koya papararamoden a fa'inay. Kasadakto a militmoh cingraan,> ira ko sanay a micli'. 7Saka, lowad sato koya limecedan a ma^min a misongila' to dawdaw no tireng. 8Sowal sa koya mafolaay i mafana'ay a miharateng a limecedan, <Palada'en kami to simal namo. Nawhani sakapadengan ko dawdaw niyam,> saan cangra. 9Paca'of sa koya mafana'ay a miharateng a limecedan a somowal, <Na'ay. Ano palada'en kamo i, caay ko mama^deng kita. O nika tayra namo i patiyamay a micakay to simal namo ko nga'ay,> han nangra. 10Saka, yo tayra cangra a micakay i, irato koya papararamoden a fa'inay. Lahaklong sato koya mipatalaay a limecedan atoya papararamoden a fa'inay a micomod i pitahkaan no pararamoday. Ta 'def hanto ko fawahan.

11<<Nanoya, irato a tayra koya mafolaay a limecedan. <Tapangaw, tapangaw, fawahenho kami a pacomod!> saan cangra. 12Nikawrira, paca'of sa koya papararamoden a fa'inay, <So'linen ako a somowal kamo, caay ka fana' kako tamowanan!> saan cingra,>> han Ningra.

13Sowal sa ci Yis, <<Mahaenay saka, kapalal kamo. Nawhani caay ko kafana'an namo ano hacowa a maraod koya romi'ad atoya tatokian.>>

O Tinako to Toloay a Koli

(Luka 19.11-27)

14<<O dmak no Kawas a mikowan i, matiya o dmak no lalomowad a palafang a tamdaw. Yo lalomowad i, tahidangen ningra ko koli ningra a paconoh i cangraan to dafong ningra. 15Pakaynien ningra i tatodong no fana' nangra a matayal ko pipatorod to payso ningra i kahaccaccay nangra. I ccay a tamdaw i, lima a talanto#25.15 talanto -- tiri'en i Matay 18.24.. I ccay a tamdaw i, tosa a talanto. I ccay a tamdaw i, ccay a talanto. Mahrek cingra a patorod i, lomowad cingra a palafang. 16Oya nipatorodan a tamdaw to lima a talanto i, tangsol a lomowad a mipakatayal toya payso saka, ci^tan cingra to lima a talanto. 17Mahaen koya nipatorodan a tamdaw to tosa a talanto. Saka, ci^tan cingra to tosa a talanto. 18Nikawrira, oya nipatorodan a tamdaw to ccay a talanto i, lowad sato a mikarkar to sra a misimed toya payso no tawki ningra.

19<<Nanoya, halafinto i, irato a minokay koya tawki noya kolikoli a misa'osi to nitayalan nangra. 20Itiya i, tayra i tawki ningra koya nipatorodan a koli to lima a talanto a patiri' to roma a lima a talanto. Sowal sa cingra, <Tawkiaw, patorod kiso i takowanan to lima a talanto. Nengnengen, ci^tan haca kako to lima a talanto,> han ningra. 21Pasowal sa koya tawki, <O nga'ayay, o karahkeran a koli kiso. Malalok kiso i mamangay a dmak saka, patoroden ako kiso a papisimaw to adihayay a dafong ako. Katayni, kihatiyaen kako a lipahak,> han ningra.

22<<Oya nipatorodan a koli to tosa a talanto i, tayra i tawki ningra a somowal, <Tawkiaw, patorod kiso i takowanan to tosa a talanto. Nengnengen, ci^tan haca kako to tosa a talanto,> han ningra. 23Pasowal sa koya tawki, <O nga'ayay, o karahkeran a koli kiso. Malalok kiso i mamangay a dmak saka, patoroden ako kiso a papisimaw to adihayay a dafong ako. Katayni, kihatiyaen kako a lipahak,> han ningra.

24<<Nikawrira, oya nipatorodan a koli to ccay a talanto i, tayra i tawki ningra a somowal, <Tawkiaw, mafana' kako to nika o ca^desay a tamdaw kiso. Caayay pipaloma kiso to maamaan i, militod kiso. Caayay pifolsak kiso to maamaan i, misa'opo kiso to kinaira. 25Matalaw kako saka, simeden ako koya payso iso i sra. Nengnengen, inito koya payso iso,> han ningra.

26<<Paca'of sa koya tawki i cingraan, <O tatiihay a matokaay a koli kiso. Caay pipaloma cingra to maamaan i, militod cingra. Caay pifolsak cingra to maamaan i, misa'opo cingra to kinaira. 27Ano saan ko nika fana' iso to pakayniay i takowanan i, nawiro caay na'angen iso ko payso ako i kingko#25.27 kingko -- o no Ripon a sowal, pina'angan to payso a loma'. saw? Ta tangasa i pinokay ako i, ciwawato koya payso ako a mapatiko i takowanan,> han ningra koya koli. 28Saka, pasowal sa koya tawki, <Alaen nai cingraan kora talanto a pafli i mitatoyay to mo^tep a talanto. 29Nawhani o iraay ko nitatoyan i, matongal a matongal a mapafli a marafas. O awaay ko nitatoyan i, halonitatoyan ningra a mamangay a ma'afas. 30Oya caay ka ci^poc a koli i, fahkolen i to'manay i papotal. Ta itira cingra a tomangic a mingric to wadis,> han Ningra.

O Saikoray a Pisawkit

31<<Ano taynito koya mamalaHongti a Wawa no Tamdaw a malahaklong ato coyocoyoh a ma^min i, o mamamaro' Cingra a malatadamaanay a mikowanay. 32O mamasa'opo i ka'ayaw Ningra ko finawlan no hkal a ma^min. Itiya i, o sasamatiyaen Ningra o nipipalacidek no pakaenay to siri ato lalifanohen a siri ko pipasasiiked Ningra i cangraan. 33I kawananen Ningra ko siri. I kawilien Ningra ko lalifanohen a siri. 34Itiya i, o papasowal koya Hongti toya i kawananay a tamdaw, <Katayni kamo o mapalmeday no Wama Ako a tamdaw. Milayap toya nipatalaan to saki tamowanan nai satapangan no nipisanga' to hkal a Kitakit. 35Nawhani yo macahiw Kako i, pafli kamo to kakaenen i Takowanan. Yo maso'aw Kako i, pananom kamo i Takowanan. Yo palafang Kako i, papilafin kamo i Takowanan. 36Yo mawacay Kako i, pariko' kamo i Takowanan. Yo adada Kako i, miliso' kamo i Takowanan. Yo marofo Kako i, tayra kamo i Takowanan,> wa han Ningra.

37<<Itiya i, o papaca'of koya mo^celay a tamdaw a somowal, <Tapangaw, i hakowa a ma'araw niyam ko nika cahiw Iso, ta pafli kami to kakaenen i Tisowanan saw? I hakowa a ma'araw niyam ko nika so'aw Iso, ta pananom kami i Tisowanan saw? 38I hakowa a ma'araw niyam ko nipalafang Iso, ta papilafin kami i Tisowanan saw? I hakowa a ma'araw niyam ko nika wacay Iso, ta pariko' kami i Tisowanan saw? 39I hakowa a ma'araw niyam ko nika adada Iso ato nika rofo iso, ta miliso' kami i Tisowanan saw?> sasaan cangra. 40Itiya i, o papasowal koya Hongti, <So'linen Ako a somowal kamo, yo mihaen kamo tonini a dmak i ccay nonini a sasafaay a salikaka no Mako i, o mihaenay kamo to dmak i Takowanan,> wa han Ningra.

41<<Ta o papasowal koya Hongti toya i kawiliay a tamdaw, <Kamo o mama'kak#25.41 mama'kak -- o roma i, mamasmamatay (ka'amis), mamapalafo. a tamdamdaw, piliyas i Takowanan. Picomod kamo i mida'ocay a namal, oya nipatalaan to saki Palafoay ato coyocoyoh nira. 42Nawhani yo macahiw Kako i, caay pafli kamo to kakaenen i Takowanan. Yo maso'aw Kako i, caay pananom kamo i Takowanan. 43Yo palafang Kako i, caay papilafin kamo i Takowanan. Yo mawacay Kako i, caay pariko' kamo i Takowanan. Yo adada Kako, yo marofo Kako i, caay piliso' kamo i Takowanan,> wa han Ningra.

44<<Itiya i, o papaca'of cangra a somowal, <Tapangaw, i hakowa a ma'araw niyam ko nika cahiw ato nika so'aw ato nipalafang ato nika wacay ato nika adada ato nika rofo Iso, ta caay padama kami i Tisowanan saw?> o sasaan cangra. 45Itiya i, o papasowal koya Hongti i cangraan, <So'linen Ako a somowal kamo, caay pihaen kamo to dmak i cimaanan nonini a sasafaay a tamdaw saka, o caay pihaen kamo to dmak i Takowanan,> wa han Ningra. 46Ta o matiniay a tamdaw i, o mamapatayra i mida'ocay a pisemseman. Nikawrira, o mo^celay a tamdaw i, o mamicomod i mida'ocay a 'orip,>> han ni Yis.

Currently Selected:

Matay 25: AMIS2019

Highlight

Copy