Matay 23

O Pitoro' to Pasifana'ay to Rikec ato Farisay a Tamdaw

(Maroko 12.38-40; Luka 11.43, 46; 20.45-46)

1Itiyasato pasowalen ni Yis ko finawlan ato nisawawaan Ningra, 2<<O pasifana'ay to Rikec ato Farisay a tamdaw pala ci Mosiay to tireng a mitadtad to Rikec. 3Orasaka, o a 'imeren namo a mido^do ko nisowalan nangra i tamowanan. Nikawrira, aka pitodong to dmak nangra. Nawhani caay pido^do cangra to sifana' nangra. 4Lkakawaen nangra ko kartengay a 'inorong a pa'orong i 'afala no tao. 'Arawhani, caay kakahi a pakatayal to ccaccay aca to tarodo' no tireng a mi'isal to 'inorong nangra. 5O sapa'araw aca i tamdamdaw ko dmak nangra a ma^min. Sakakahaden nangra ko pipatlian to tatatoyen nangra a cudad. Sakakaya'en nangra ko miramir no riko' nangra. 6Maolah cangra a maro' i tadamaanay a kamaro'an i pitahkaan ato micidekay a kamaro'an i kasa'opoan a loma'. 7Mangalay cangra a ta'ongen no tao i kalali'acaan ato <Singsi> han no tamdamdaw a mitahidang. 8Nikawrira, caay ka nga'ay ano o <Singsi> han no tao kamo a mitahidang. Nawhani ccay ko <Singsi> namo. O malikakaay kamo a ma^min. 9O <Mama> niyam, aka ka saan a mitahidang i cimacimaan i tini i hkal. Nawhani ccay aca ko Wama namo, o <Wama> i kakarayan. 10Caay ka nga'ay ano o <Kakridan> han no tao kamo a mitahidang. Nawhani ccay aca ko kakridan namo oya Kristo. 11O satadamaanay namo i, ka o mamatayal namo. 12O misatakarakaraway a tamdaw i, o mamasapo^ner. O misapo^neray a tamdaw i, o mamapacakat.

O Pitoro' to Misamangahay

(Maroko 12.40; Luka 11.39-42, 44, 52; 20.47)

13<<O cacilafo kamo o misamangahay ko dmak a pasifana'ay to Rikec ato Farisay a tamdaw! Padteng sa kamo i ka'ayaw no tamdaw a mi^def to fawahan no picomodan no tamdaw i Kitakit no Kawas. Caay picomod kamo. Lalangen haca namo ko sapicomodananay a tamdaw!#23.13 Ira ko katlangay a cudad matongal i 14 a tosir O cacilafo kamo o misamangahay ko dmak a pasifana'ay to Rikec ato Farisay a tamdaw. Nawhani samsamen namo ko maponengay. O romasato, 'afasen namo ko dafong nangra. O sapa'araw aca ko pitolon namo to kakaya'ay a pitolon. Saka, caay ko sasamadahen no Kawas ko nipitfoc i tamowanan! (tiri'en i Maroko 12.40 ato Luka 20.47).

15<<O cacilafo kamo o misamangahay ko dmak a pasifana'ay to Rikec ato Farisay a tamdaw. Nawhani taliyoken namo a mirakat ko riyar ato hkal to sapipacomodaw to ccay a tamdaw i pakayraan namo. Mahrek kamo a pacomod cingraan i, sanga'en namo cingra a palamamicomod i pisemseman. Ikakato namo ko nika tatiih ningra.

16<<O cacilafo kamo o mapohaway a mikriday. Nawhani o sowal namo i, <Ano mitoro' ko tamdaw to Fangcalay Pita'ongan a mikton to faloco' i, awaay ko maan. Nikawrira, ano mitoro' ko tamdaw toya tada^kim no Fangcalay Pita'ongan a mikton to faloco' i, caay ka ^ca o dado^doen konini,> saan kamo. 17Kamo o maapaay a mapohaway a tamdaw, i cowaay ko kakalimlaan to tada^kim atoya palafangcalay to tada^kim a Fangcalay Pita'ongan saw? 18O sowal namo, <Ano mitoro' ko tamdaw to pipacakatan a mikton to faloco' i, awaay ko maan. Nikawrira, ano mitoro' ko tamdaw toya nipacakatan i pipacakatan a mikton to faloco' i, caay ka ^ca o dado^doen konini,> saan kamo. 19Kamo o mapohaway a tamdaw, kafana' kamo to nika caay ko nipacakatan ko kakalimlaan. O palafangcalay to nipacakatan i pipacakatan ko kakalimlaan. 20Orasaka, ano mitoro' ko tamdaw to pipacakatan a mikton to faloco' i, o mitoro'ay cingra toya pipacakatan atoya nipacakatan a maamaan. 21O romasato, ano mitoro' ko tamdaw to Fangcalay Pita'ongan a mikton to faloco' i, o mitoro'ay cingra toya Fangcalay Pita'ongan atoya maro'ay i Fangcalay Pita'ongan a Kawas. 22Ano mitoro' ko tamdaw to kakarayan a mikton to faloco' i, o mitoro'ay cingra toya kamaro'an no Kawas atoya maro'ay itira a Kawas.

23<<O cacilafo kamo o misamangahay ko dmak a pasifana'ay to Rikec ato Farisay a tamdaw. Mado^do namo a pacakat to ccay no mo^tepay a sapafangsis a hakka ato inon ato komin#23.23 hakka ato inon ato komin -- o no Ripon a sowal. hananay. Kirami, o kakalimlaan a dado^doen a Rikec to mo^celay a dmak ato adayayay a faloco' ato so'linay a faloco' i, malacaayay pido^do kamo. Onini ko kakalimlaan a dado^doen namo. O romaroma to i, caay ko lalawaen. 24Kamo o mapohaway a mikriday i, sefsefen namo ko likes#23.24 fafonget -- o roma i, diwal (ka'amis), tatomok, ^pel (Fata'an). a mifalah. Nikawrira, mroen namo a komaen ko lakota.

25<<O cacilafo kamo o misamangahay ko dmak a pasifana'ay to Rikec ato Farisay a tamdaw! Koracen namo ko papotal no takid ato sala. Nikawrira, matomes no coos ato 'anof ko laloma' nonini. 26Kamo o mapohaway a Farisay a tamdaw! I 'ayawenho a mikorac ko laloma' no takid, ta halopapotal a makoracto.

27<<O cacilafo kamo o misamangahay ko dmak a pasifana'ay to Rikec ato Farisay a tamdaw! Matiya o nisakohcalan a mirnaf a tadem kamo. Makapah a nengnengen ko papotal. O laloma' i, matomes no 'okak no mapatayay a tamdaw ato maponi'ay a maamaan a kaackan. 28Mahaenay kamo. Mo^celay a nengnengen ko papotal namo, nikawrira, matomes no mangah ato tatiihay ko laloma' no faloco' namo.

O Pipali'ayaw to Pitfoc to Farisay a Tamdaw

(Luka 11.47-51)

29<<O cacilafo kamo o misamangahay ko dmak a pasifana'ay to Rikec ato Farisay a tamdaw! Sakapahen namo a misanga' ko tadem no pali'ayaway to sowal no Kawas. O romasato, sanga'en namo a mipatireng ko 'otoc to piharatengan to mo^celay a tamdaw. 30O sowal namo i, <Ano iraay kami itiya yo ma'oripho ko tato'asan niyam i, caay ko mamikihatiya kami cangraan a mipatay to pali'ayaway to sowal no Kawas,> saan kamo. 31Onini i, o nipipatalahkal namo to nika o tloc no mipatayay to pali'ayaway to sowal no Kawas kamo. 32Orasaka, dada. Kamoto ko mamilpon toya caayho ka lpon no tato'asan namo a raraw. 33Kamo o cisawarakay a 'oner ato wawa no cisawarakay a 'oner, awaay ko piliyasan namo to pitfoc no Kawas i pisemseman. 34Pitngil kamo. O a ocoren Ako a patayra i tamowanan ko pali'ayaway to sowal no Kawas ato citanengay ato pasifana'ay to Rikec. Ira ko mamapatay namo, ira ko mamapacek namo i ciwcika, ira ko mamapalo namo i kasa'opoan a loma'. O mamalaplap cangra nai ccay a pala a tayra i roma a pala. 35Ano hatira i, o mamatfoc kamo to nano dmak namo a mipatay to awaay ko raraw a 'alomanay a tamdaw, onini a tadah no rmes i, nanitiya i nipipatay ci Apilan o awaay ko raraw a tamdaw, tangasa i wawa ni Pirikiya ci Cakaliyaan, oya nipatayan namo itira i la'ed no Fangcalay Pita'ongan ato pipato'ayaan. 36So'linen Ako a somowal kamo, onini a raraw a ma^min ko sakatfoc no aniniay a tamdaw.

O Tangic to Saki Yirusalim

(Luka 13.34-35)

37<<Aya: kamo o Yirusalim a tamdaw, patayen namo ko pali'ayaway to sowal no Kawas. Tkolen namo to fokloh a mipatay ko niocoran a patayra i tamowanan a tamdamdaw. Kinapinapi:nato Kako a mangalay a misa'opo to finawlan namo a matiya o pisa'opo no tawinaan to ciwciw i laloma' no sapikpik nira i, caay kakahi kamo. 38Orasaka, o mamaforifor a mafalah ko pita'ongan namo. 39Sowalen Ako kamo, caayto ko mama'araw namo Kako tangasa i nika somowal namo toya <Nanay mapakalmed no Kawas ko niocoran no Tapang pakayni i ngangan Ningra,> sanay a sowal,>> han ni Yis.

Currently Selected:

Matay 23: AMIS2019

Highlight

Copy