Matay 22

O Tinako to Pararamoday a Tahka

(Luka 14.15-24)

1Miliyaw haca ci Yis a patinako i cangraan, sowal sa, 2<<O Kitakit no Kawas i, matiya o pipatala no ccay a hongti to tahka a pararamod to wawa ningra. 3Ocoren ningra ko koli a micoracor toya namitahidangan ningra a mamitahka a lafang. Nikawrira, caay kakahi cangra a tayra. 4Saka, ocoren haca ningra ko roma a koli a papipasowal toya namitahidangan a lafang. <Matokadto ako ko kolong ato maso^soay a pina'orip. Makairairato ko maamaan. Mapatalato ako ko tahka. Kataynito a mitahka,> han a pasowal, han ningra koya koli. 5Nikawrira, caay pilingwalingwa koya namitahidangan a lafang. O roma a tamdaw i, tayra i omah. O roma a tamdaw i, tayra i pipatiyaman ningra. 6O romaroma a tamdaw i, rpeten nangra koya kolikoli a mikari'ang a mipatay i cangraan. 7Saka, kter sato koya hongti. Ocoren ningra ko sofitay a papipatay toya mipatayay a tamdaw, ato miiloh to niyaro' nangra. 8Itiyasato pasowalen noya hongti ko kolikoli ningra, <Mapatalato ko tahka ako. Nikawrira, awaay ko ^poc toya i 'ayaway a nanitahidangan a lafang. 9Orasaka, katayra kamo i tata'angay a lalan. Tahidangen a ma^min ko malitmohay a tamdaw a patayni i pitahkaan,> han ningra. 10Ta tayra sato koya kolikoli i lalan. Ano tatiihayto a tamdaw, ano nga'ayayto a tamdaw ko ma'araway nangra i, hamhamen nangra a ma^min. Saka, tomes sato ko lafang i pitahkaan.

11<<Itiyasato micomod ko hongti a minengneng to lafang i, ma'araw ningra itira ko ccay a tamdaw to caay ka ciriko' to saka^res a riko'. 12Saka, pasowal sa koya hongti i cingraan, <Idangaw, nawiro caay ka ciriko' kiso to saka^res a riko' a micomod i tini saw?> han ningra i, trep sa cingra. 13Itiyasato pasowalen noya hongti ko koli ningra, <Paliten ko kamay ato wa'ay ningra a mifahkol i to'manay i papotal. Ta itira cingra a tomangic a mingric to wadis,> han Ningra.

14<<O sakasaan Ako a somowal tonini i, 'aloman ko matahidangay a tamdaw. Nikawrira, caay ka 'aloman ko mapili'ay,>> han ni Yis.

O Pakayniay i Pipasata to Hongti no Loma a Licay

(Maroko 12.13-17; Luka 20.19-26)

15Itiya i, liyas sato ko Farisay a tamdaw, <<Maanen ita ko pipamoraraw to sowal ni Yis a misa'fit?>> saan cangra a masasowasowal. 16Ocoren nangra ko no tireng a nisawawaan a malahaklong to masakapotay ni Hiroti a tayra i ci Yisan a papilicay. Saka, sowal sa cangra, <<Singsiaw, mafana' kami to nika o so'linay a tamdaw Kiso. Ano masamaamaan ko piharateng no tamdaw i, o so'linay ko pipasifana' Iso to tamdaw to sowal no Kawas, nawhani caay paska Kiso to cimacima a tamdaw. 17Pasowalen kami, masamaan ko harateng Iso, o pisongila' a pasata i hongti no Loma#22.17 hongti no Loma -- o no Latin a sowal i, Kaysar han, o tatodong nonini i, o hongti no Loma sanay. i, o maliyangay to Rikec ita haw?>>

18Mahapinang ni Yis ko nika tatiih no faloco' nangra. Saka, sowal sa, <<Kamo o misamangahay a tamdaw, nawiro sapisa'fitan kamo i Takowanan saw? 19Patiri'en Kako to sapasata a tinali,>> han Ningra.

Patayra han nangra i ci Yisan ko ccay a tinali. 20Itiya i, licayen ni Yis cangra, <<O nima a faco konini saw? O nima a tilid konini saw?>> han Ningra.

21<<O no hongti no Loma,>> han nangra a paca'of.

Saka, pasowal sato ci Yis i cangraan, <<O no hongti no Loma a maamaan i, paflien i hongti no Loma. O no Kawas a maamaan i, paflien i Kawas,>> han Ningra.

22Safahka' sa cangra a mitngil tonini a sowal. Saka, liyas sato cangra i Cingraan.

O Pakayniay i Nika Lomowad a Ma'orip nai Patay a Licay

(Maroko 12.18-27; Luka 20.27-40)

23Toya romi'ad tayra i ci Yisan a milicay koya, <<Awaay ko lomowaday a ma'orip nai patay a dmak,>> sanay a Satukay a tamdaw. 24Sowal sa, <<Singsiaw, o sowal ni Mosi i, ano mapatay ko tamdaw yo caho ka ciwawa i, o kakalafafahien no safa ko nano fafahi no kaka ningra a pawawa to malotloc no kaka ningra, saan. 25Ira i 'ayaw i tamiyanan ko papitoay a malikaka to matiniay ko dmak. Cifafahi ko sakakaay. Caho ka ciwawa i, mapatayto. Saka, siday hanto koya maponengay i safa ningra. 26Nanoya, mahaen ito a ma^min koya sakatatosa, sakatatolo, tangasa i sakapapito. 27Ta saikoray sato i, haloya a fafahiyan a mapatay. 28Tona o cifafahiay cangra a ma^min toya fafahiyan saka, ano kalomowadanto a ma'orip nai patay i, cima noya papitoay ko cacifafahi toya fafahiyan saw?>> han nangra.

29Paca'of sa ci Yis i cangraan, <<Moraraw ko harateng namo, nawhani mafokil kamo to Fangcalay Cudad, caay haca kafana' to 'icel no Kawas. 30Ano lomowadto a ma'orip nai patay ko tamdaw i, caayto ko caciramod. Matiyato o i kakarayanay a coyocoyoh ko 'orip nangra. 31Oya nanisowalan no Kawas i tamowanan to pakayniay i kalomowad no tamdamdaw a ma'orip nai patay i, caho ka asip namo saw? 32Sowal sa ko Kawas, <O Kawas ni Apraham, o Kawas ni Isak, o Kawas ni Yakop Kako,> saan. O tatodong nonini a sowal i, o Kawas no ma'oripay, caay ko Kawas no mapatayay,>> han ni Yis.

33Safahka' sa ko finawlan a mitngil tonini a nipipasifana' ni Yis.

O Kakalimlaan a Limo'ot

(Maroko 12.28-34; Luka 10.25-28)

34Matngil no Farisay a tamdaw ko nika awato ko sapaca'of no Satukay a tamdaw i ci Yisan saka, masa'opo cangra. 35O sapisa'fitaw nangra ci Yisan saka, milicay ko ccay no pasifana'ay to Rikec a tamdaw, 36<<Singsiaw, i tini i Rikec ni Mosi i, i cowaay ko kakalimlaan a limo'ot saw?>> han ningra.

37Paca'of sa ci Yis i cingraan, << <Sarocoden ko faloco' iso, sarocoden ko 'orip iso, sarocoden ko harateng iso a maolah to Tapang a Kawas iso,> saan. 38Onini ko sakakaay a limo'ot, malalen a o tadakakalimlaan haca. 39O saka tosa a limo'ot i, malcad tonini ato kakalimlaan. <Samatiyaen o nika olah iso to tireng ko nika olah iso to tao,> saan. 40Mahawop nonini a tosaay a limo'ot ko Rikec ni Mosi a ma^min ato nipasifana'an no pali'ayaway to sowal no Kawas,>> han ni Yis.

O Pakayniay i ci Kristoan a Licay

(Maroko 12.35-37; Luka 20.41-44)

41Yo masa'opo ko Farisay a tamdaw i, licayen ni Yis cangra, 42<<Maan saan ko harateng namo to pakayniay i ci Kristoan saw? O nima a tloc Cingra saw?>> han Ningra.

Paca'of sa cangra, <<O tloc ni Tafiti Cingra,>> han nangra.

43Pasowal sa ci Yis i cangraan, <<Ano hatira i, nawiro ngiyangien no Fangcalay 'Adingo ko faloco' ni Tafiti a papipasowal to <O Tapang> ako sanay saw? O sowal ni Tafiti i,

44<Pasowal ko Tapang to Tapang ako,

Kamaro' Kiso i kawanan Ako,

tangasa i papihinokopan Ako to 'ada Iso i pasaripa'an Iso,> saan.

45Orasaka, ano <O Tapang> han ni Tafiti Cingra a mitahidang i, maanen ni Kristo a malatloc ni Tafiti saw?>> han ni Yis.

46Awaay ko pakapaca'ofay ci Yisan to ccaccay aca a sowal. Nanitiya a paskato ko tamdaw a milicay i ci Yisan to talolongay a salicay.

Currently Selected:

Matay 22: AMIS2019

Highlight

Copy