Dmak 16

O Nipikapot ni Timoti ci Pawloan aci Silasan

1Nanoya, tahira ca Pawlo i Tirpi ta tayra i Listra. Ira itira ci Timoti hananay a nisawawaan. O mitooray ci Kristoan a Yutaya a tamdaw ko ina ningra. O Krisiya a tamdaw ko mama ningra. 2O nga'ayay ko lihaf ni Timoti itira i salikaka no Listra ato Ikonium. 3Mangalay ci Pawlo to nipihaklong ni Timoti i cingraan. Saka, do^doen ningra ko krit a lisin a mikrit ci Timotian. Nawhani mafana' ko i tiraay a Yutaya a tamdaw a ma^min to nika o Krisiya a tamdaw ko mama ningra. 4Yo mirakat cangra to niyaroaro' i, patoroden nangra i mitooray ci Kristoan koya nihapinangan no i Yirusalimay a tarokos ato ciwlo a limo'ot. Papi'imeren nangra cangra tonini. 5Orasaka, mapa'icel ko piti'er no mitooray ci Kristoan a kasakiwkay. Matongal a matongal to romi'ami'ad ko nika 'aloman no tamdaw.

O Pitahidang no Makitoniya a Tamdaw

6Nanoya, lalangen no Fangcalay 'Adingo cangra. <<Aka pasowal to sowal no Kawas i Aciya,>> han Ningra cangra. Saka, pakayra sato cangra i Frikiya ato Kalatiya a pala. 7Yo mingata cangra i Mysiya i, sakatayraan cangra i Pitiniya a pala. Nikawrira, lalangen no 'Adingo ni Yis cangra. 8Saka, taliyok#16.8 taliyok -- ano ^ca i, ta'lif. sato cangra i Mysiya a tayra i Troas. 9Toya dadaya i, ma'araw ni Pawlo i mapolosi ko ccay a Makitoniya a tamdaw. Tomireng cingra a mingitangit ci Pawloan, <<Pilacal a tayni i Makitoniya a mipadang i tamiyanan!>> saan. 10Nama'araw ni Pawlo konini a mapolosi i, tangsol sato kami a mipatala to sakatayraaw i Makitoniya. Nawhani o nipitahidang no Kawas i tamiyanan konini a papipatnak to Nga'ayay Ratoh i cangraan saan ko faloco' niyam.

O Nika Fohat no Faloco' ni Litiya

11Saka, pakalonan sato kami nai Troas a pafsoc a tayra i Samotraki. Cila a romi'ad i, tahirato kami i Niyapolis. 12Nanitira tayra kami i Filipi. Onini a niyaro' i, itira i saka ccay a kowan no Makitoniya hananay a pala. O nisaniyaro'an no Loma. I tini tonini a niyaro' kami to pinapina a romi'ad. 13Yo Pasla'an a Romi'ad i, talapapotal no niyaro' kami a tayra i lawac no 'alo. Latek ira ko pitolonan no Yutaya a tamdaw itira sa kami. Aro' sa kami a pasowal to masa'opoay itira a fafahiyan. 14Ira a mitngil ko ccay a nanitiraay i Tiyatira ci Litiya hananay a fafahiyan. O pacakayay cingra to maloloay a kiradom. O mita'ongay to Kawas a fafahiyan cingra. Mafohat no Tapang ko faloco' ningra saka, misongila' cingra a mitngil to sowal ni Pawlo. 15Ta mapaino' cingra ato paro no loma' ningra. Ikor i, milongoc cingra i tamiyanan, <<O so'linay a mitooray to Tapang, ano saan ko harateng namo i takowanan i, katayni i loma' ako a milafin,>> saan cingra a mifo'ot i tamiyanan.

O Nika Rofo i Filipi

16Nanoya, yo tayra kami i pitolonan i, malitmoh niyam ko ccay a fafahiyan a koli, o maaro'ay no palafoay. Pakayni tonini a palafoay ko sakafana' ningra a mi'daw to aira a dmak. Saka, pakayni i cingraan ko sakaadihay no ^tan no tawki ningra. 17Mitoor cingra ci Pawloan ato tamiyanan. Cli' saan cingra a somowal, <<O matayalay no Isatakaraway a Kawas konini a tamdaw, o patnakay i tamowanan to ka'oripan a lalan!>> saan. 18Rarid saan cingra to pinapina a romi'ad a mihaen to sowal. Ma'samento ci Pawlo. Saka, pasayra sa cingra toya palafoay a somowal, <<Pakaynien ako i ngangan ni Yis Kristo ko pipalimo'ot i tisowanan! Kasadak nai cingraan!>> han ningra i, tangsol sa a masadak koya palafoay.

19Nikawrira, mahapinangto noya tawki ningra ko nika awato ko pili^tanan nangra saka, rpet hanto nangra ci Pawlo aci Silas a mikidkid a patayra i sifo' no niyaro' a mipakokot i mikomoday. 20Ta patayra han nangra i ka'ayaw no mikomoday a Loma koya tatosaay. Sowal sa cangra, <<O Yutaya a tamdaw konini. O mirawraway to niyaro' ita. 21Mipatnak cangra i titaanan o Loma a tamdaw to caay ko dado^doen ita a lkakawa,>> han nangra a mipakokot. 22Halofinawlan sato a miraod a pacoli toya tatosaay.

Saka, tofific han no mikomoday a Loma ko riko' nangra a micicih. Ta papisti' hanto nangra ko sofitay cangraan. 23Mahrekto a mikari'ang a misti' i ca Pawloan aci Silasan i, pacomod hanto nangra i pirofoan. Ta papisongila' han nangra ko misimaway a papisimaw i cangraan. 24Namapalimo'ot koya misimaway i, pacomod hanto ningra koya tatosaay i cani'iway a pirofoan. Ta pa'atem hanto ningra i kilang ko wa'ay noya tatosaay a mirofo.

25Tnok no lafii i, mitolon, romadiw ca Pawlo aci Silas a pahmek to Kawas. Pasayra sa a mitngil ko marofoay a ma^min. 26Itiya i, fahal sa a ira ko tata'angay a lonen. Mangernger ko paranaan no pirofoan saka, alafawafawah sa ko sa'def no pirofoan. Matdal a ma^min ko sapalit a lonayi' noya marofoay a tamdaw. 27Ckad sa a talipa'lal koya misimaway. Ma'araw ningra ko nika fawah no sa'def no pirofoan i, <<Latek milaliwayto koya marofoay,>> sa ko harateng ningra saka, sodoc sato to fonos a sakinapatayan. 28Itiya i, cli' sa ci Pawlo a pasowal, <<Aka piri'ang to tireng! Iraayto kami i tini a ma^min!>> han ningra.

29Papiala han noya misimaway ko tamdaw to dawdaw. Ta cikay sa koya misimaway a micomod. Mirmir sa cingra a mihinokop i ka'ayaw na Pawlo aci Silas. 30Ta krid hanto ningra koya tatosaay a talapapotal. <<Singsiaw, maanen ako ko dmak ta mapa'orip kako saw?>> han ningra a milicay.

31Sowal sa koya tatosaay, <<Paso'linen ko Tapang a Yis ta mapa'orip kiso ato paro no loma' iso,>> han nangra. 32Ta pasowalen nangra cingra ato paro no loma' ningra a ma^min to sowal no Tapang. 33Toya lafii i, kriden noya misimaway koya tatosaay. Sawsawen ningra ko nano nikasti'an a doka' nangra. Ta tangsol sato a mapaino' koya misimaway ato paro no loma' ningra a ma^min. 34Ta krid hanto ningra ca Pawlo aci Silas a patayra i loma' ningra a patahka cangraan. Salipahak sa cingra ato paro no loma' a ma^min to nika paso'linto nangra to Kawas.

35Yo ta^ngad sato i, ocor hanto no mikomoday a Loma ko tayring a papipasowal, <<Tdalento koya tatosaay,>> han nangra.

36Pasowal han no misimaway ci Pawlo tonini a sowal. <<Ira ko niocoran no mikomoday a Loma a papitdal tisowanan aci Silas. Orasaka, manga'ayto kamo a masadak. Sanga'ayento ko rakat namo,>> han ningra.

37Nikawrira, pasowal sa ci Pawlo toya tayring, <<O Loma a tamdaw kami. Caho ka liclicen kami i, patdo sa kamo a misti' tamiyanan i ka'ayaw no finawlan a pacomod i pirofoan. I matini sato i, nawiro dokdok sa kamo a sapipasadakan tamiyanan saw? Caay ka nga'ay. Cangra o mikomoday a Loma ko to^to sa a tayni a mikrid tamiyanan a pasadak ta nga'ay,>> han nangra.

38Pasowal han no tayring ko mikomoday a Loma tonini a sowal. Matngil nangra ko nika o Loma a tamdaw ca Pawlo aci Silas i, talaw sato cangra. 39Saka, tayra sato cangra i pirofoan a misanga'anga'ay a pasowal. Ta krid han to nangra cangra a papiliyas toya niyaro'. 40Tona masadakto ca Pawlo aci Silas nai pirofoan, tayra sato cangra i loma' ni Litiya, itira a masaso'araw to salikaka, pa'icelen nangra cangra, ta liyas sato cangra.

Currently Selected:

Dmak 16: AMIS2019

Highlight

Copy