Dmak 15

O Nika Lomaoc i Yirusalim

1Ira ko papinapina a tamdaw nai Yutaya a tayra i Antiyok. Pasifana'en nangra ko salikaka. Sowal sa, <<Ano caay pido^do kamo to Rikec ni Mosi a makrit i, caay ko mamapa'orip kamo,>> han nangra. 2Orasaka, mapalowad na Pawlo aci Parnapas ko tata'angay a kacacolicoli ato cangra itira. Saka, kton sato ko 'alomanay to sowal to sapiocoraw ci Pawloan aci Parnapas ato papinapina a salikaka no i tiraay a kiwkay a patayra i Yirusalim to sakasasowasowalaw ato tarokos ato ciwlo to pakayniay tonini a rawraw.

3Saka, patono hanto no salikaka cangra. Pakayra cangra i Foinikiya ato Samariya a tayra. Caferen nangra ko i tiraay a paratoh to nika sasiyor no faloco' no roma a finacadan a pasayra i Kawas. Saka, salipahak sa ko salikaka a ma^min. 4Tahira cangra i Yirusalim i, hamhamen no kiwkay ato tarokos ato ciwlo cangra a militmoh. Saka, pakafana'en na Pawlo cangra to pakayniay i pikapot no Kawas cangraan a matayal. 5Nikawrira, tireng sa ko papinapina no misaFarisayay a mitooray ci Kristoan a tamdaw. <<Aka ka ^ca ka kriten ko roma a finacadan a papi'imer to Rikec ni Mosi,>> saan cangra a somowal.

6Saka, masa'opo ko tarokos ato ciwlo to sakalalicalicayaw to pakayniay tonini a dmak. 7Mahrek a malaliyaliyang a macacolicoli i, tireng sa ci Pitiro a somowal, <<Salikakaaw, mafana' kamo, o nipili'an no Kawas kako i ti:yaho nai tamowanan to mamipatnak to Nga'ayay Ratoh i roma a finacadan to sakanga'ay nangra a mitngil ta paso'lin. 8Matiya o nipipafli no mafana'ay to faloco' no tamdaw a Kawas to Fangcalay 'Adingo i titaanan ko nipipafli Ningra to Fangcalay 'Adingo i roma a finacadan a pahapinang to nipilayap Ningra i cangraan. 9Saka, awaay ko pisakakinih no Kawas i titaanan ato cangra. Pakayni i nipiti'er nangra ci Kristoan ko sakapikorac no Kawas to faloco' nangra. 10Ano hatira i, nawiro patamorongen namo koya nisawawaan a roma a finacadan to caay ka fawa no tato'asan ita ato caay ka fawa ita a 'inorong a milifet to Kawas saw? 11Caay! O nano mikomi no Tapang ci Yis ato pipaso'lin ita ci Kristoan ko saka mapa'orip kita. Matiraayto cangra,>> han ningra.

12Saka, trep sato ko finawlan a ma^min. Ta tngil sato cangra to nipisahci ni Parnapas aci Pawlo a pasowal to nano dmak no Kawas i cangraan a papidmak to kafahka'an a dmak a pahapinang i roma a finacadan. 13Mahrek a pasowal koya tatosaay i, sowal sa ci Yakop, <<Salikakaaw, tngilenho ko sowal ako. 14Masahci ni Simon a pasowal ko pakayniay i limla no Kawas i 'ayaw to roma a finacadan. Pili'en Ningra cangra a palacidek to maloNingra. 15Malcad tonini ko sowal no pali'ayaway to sowal no Kawas. Mato nika tilid toya,

16<O sowal no Tapang i,

i ikor nonini i, o mamiliyaw Kako a tayni a mipalowad to kitakit ni Tafiti a matiya o pipatireng to maplengay a loma'.

O laliyawen Ako koya maplengay a loma' a patanektek.

17Nga'ay milongoc i Takowanan o Tapang ko polong no tamdaw oya nipili'an Ako to malo no Mako a roma a finacadan a ma^min,

18saan koya pakafana'ay tonini a dmak naniti:yaho a Tapang.>

19<<Orasaka, o harateng ako i, aka pakarorayen koya pasasiyoray a pasayra i Kawas a roma a finacadan. 20Patilid han aca to saka^caaw ka komaen nangra to nipacakatan i samiyay ato kaackan a kakaenan, ato saka^caaw ka 'odang, ato titi to ni'mecan a mipatay a 'a'adopen ato rmes. 21Nawhani naniti:ya aca a ira ko patnakay to Rikec ni Mosi i kasaniyaroaro'. Maasip konini to paslasla'an a romi'ad i kasa'opo'opoan a loma' no Yutaya a tamdaw,>> han ningra.

O Sapatilid to Mitooray ci Kristoan a Roma a Finacadan

22Orasaka, nga'ay konini saan ko faloco' no tarokos ato ciwlo ato kiwkay a ma^min. Saka, pili' han nangra nai cangraan ko mamikapot ca Pawloan aci Parnapasan a tayra i Antiyok. Oya nipili'an i, ci Parsapas hananay a tamdaw ci Yuta aci Silas, o kangodoan no salikaka cangra. 23Matini ko nipatorodan i cangraan a tilid.

<<Nga'ayho saan kami o salikaka namo a tarokos ato ciwlo a milicay i tamowanan o i Antiyokay, o i Siriyaay ato i Kilikiyaay a roma a finacadan a salikaka niyam. 24Ira a matngil niyam ko sowal to nika ira nai tamiyanan ko tayraay i tamowanan a somowal a miorat a miparawraw to faloco' namo. Onini i, caay ko nipalimo'otan niyam cangra. 25Orasaka, masa'opo kami a mipalaccay to faloco' a mipili' to papinapina a tamdaw to mamikapot to kaolahan ita a salikaka ci Parnapasan aci Pawlo a tayra i tamowanan. 26O kinafalahay to 'orip nangra ci Parnapas aci Pawlo a matayal to saki Tapang ita ci Yis Kristoan. 27Orasaka, ocoren niyam ci Yuta aci Silas to mamito^to i tamowanan a pakafana' tonini a dmak. 28O nihapinangan niyam ato Fangcalay 'Adingo i, caay ko mamipatamorong kami i tamowanan to maan aca a kartengay a 'inorong. Deng o pinapina a kakalimlaan a dmak ko papatamorongen i tamowanan. 29Aka ka komaen kamo to nipacakatan i samiyay a kakaenen ato rmes ato titi no ni'mecan namo a mipatay a 'a'adopen. Aka ka 'odang kamo. Ano sawaden namo konini i, o nga'ayayto. Sanga'ayen ko namo,>> saan ko tilid nangra.

30Saka, ocor hanto no i Yirusalimay cangra. Ta tayra sato cangra i Antiyok. Tahidangen nangra ko mitooray noya sa'opo a ma^min a mipatorod i cangraan toya tilid. 31Miasip cangra tonini i, mahinom ko faloco' nangra. Saka, salipahak sato cangra. 32O pali'ayaway to sowal no Kawas ca Yuta aci Silas. Saka, adihay ko nipihinom nangra a pa'icel to salikaka. 33I ikor no nika itira nangra to pinapina a romi'ad i, sanga'ayen ko rakat han no salikaka cangra a patono. Ta patiko cangra a minokay i miocoray cangraan a tamdaw.#15.33 Ira ko katlangay a cudad matongal i 34 a tosir Nikawrira, mikton ci Silas a itira saho a milafin.

35Ca Pawlo aci Parnapas i, itira saho i Antiyok a mikapot to 'alomanay a tamdaw a pasifana' a patnak to sowal no Tapang.

O Nika Licinowas ni Pawlo aci Parnapas

36I ikor no pinapina a romi'ad i, somowal ci Pawlo ci Parnapasan, <<Masamaan tayra kita i nipatnakan ita i 'ayaw to sowal no Tapang a niyaroaro' a miliso' to salikaka a minengneng to nika masamaanto cangra,>> han ningra. 37Mangalay ci Parnapas a papihaklong ci Yohani Marokoan. 38Nikawrira, o harateng ni Pawlo i, caay ka tatodong ci Yohani Maroko a mihaklong. O nika ^ca papihaklong ko nga'ay. Nawhani nano miliyasay cingra titaanan i 'ayaw i Pamfiliya, caay pakalahci cingra a mikapot titaanan a matayal, saan. 39Saka, macacoli cangra ta licinowas sato cangra. Lahaklong sato ca Parnapas aci Maroko a pakalonan a tayra i Sayprus. 40Pili'en ni Pawlo ci Silas, patorod hanto no salikaka cangra i mikomi no Tapang a papidipot, ta liyas sato cangra. 41Rakaten nangra ko Siriya ato Kilikiya a pala a patanektek to piti'er no faloco' no kasakiwkay a salikaka.

Currently Selected:

Dmak 15: AMIS2019

Highlight

Copy