Dmak 14

O Pipatnak i Ikonium

1Mahaenay haca ko dmak noya tatosaay i Ikonium. Micomod ci Pawlo aci Parnapas i kasa'opoan a loma' no Yutaya a tamdaw. Ci'icel ko pipasowal nangra. Saka, 'aloman ko malamitooray ci Kristoan a Yutaya a tamdaw ato roma a finacadan. 2Nikawrira, paororen no caay paso'lin a Yutaya a tamdaw ko roma a finacadan a pakatlii to salikaka. 3Nikawrira, halafin itira koya tatosaay a milafin. Caay paska cangra a pasowal to sowal to pakayniay i Tapang. Paflien no Tapang cangra to 'icel to sapidmak to kafahka'an a dmak a pahapinang to nika o so'linay ko sowal nangra to pakayniay i mikomi no Tapang. 4Itiya i, malatosa ko finawlan noya niyaro'. O roma a tamdaw i, mikitira i Yutaya a tamdaw. O roma a tamdaw i, mikitira i tarokos.

5Itiya i, mapolong ko roma a finacadan ato Yutaya a tamdaw ato kakrikridan nangra a misahalaka to sapikari'angaw to tarokos a mitkol to fokloh. 6Mafana' koya tarokos tonini a dmak, laliw sato cangra a tayra i Listra ato Tirpi hananay a niyaro' no Likaoniya ato i taliyokay a pala. 7Pararid cangra itira a patnak to Nga'ayay Ratoh.

O Pipatnak i Listra ato i Tirpi

8Ira i Listra ko ccay a mapi'iway a tamdaw. O nai kahofocanho ningra a mapi'iw. Aro' saan. Caayho pitanatanam cingra a romakat. 9Mitngil konini a tamdaw to sowal ni Pawlo. Saka, pamotek han ni Pawlo cingra a minengneng i, mahapinang ningra ko nika paso'lin noya tamdaw to sakaadahaw ningra. 10Saka, cli' sa ci Pawlo, <<Katomireng! Fiyacen ko wa'ay iso!>> han ningra i, takod sa cingra a tomireng ta rakat sato. 11Minengneng ko finawlan to dmak ni Pawlo i, lkal sa cangra a misanoLikaoniya a somowal, <<Citireng to no tamdaw ko kawakawas a ma^pod a tayni i titaanan!>> saan. 12<<Ci Cius,>> han nangra ci Parnapas a mitahidang. O makimaday ci Pawlo saka, <<Ci Hirmis,>> han nangra cingra a mitahidang. 13Ira i lawac no niyaro' ko pita'ongan ci Ciusan a kawas. Alaen no citodongay to ta'ong nonini a pita'ongan ko pinapina a okang a kolong ato nisacangawan a hana a patayra i 'adawang no niyaro'. Onini i, to sapikapotaw ningra to finawlan a mipato'aya toya tatosaay a tarokos.

14Matngil ni Parnapas aci Pawlo konini i, cinas sa cangra to riko' nangra ta cikay sa a tayra i finawlan, cli' sa a somowal, 15<<Kamo a mapolong, nawiro matini ko dmak namo saw? Malcadayto kita a o no tamdawan. O tayniay kami a patnak i tamowanan to Nga'ayay Ratoh a papiliyas tonini a awaay ko ^poc a samiyay, a papipasasiyor to faloco' a pasayra i ma'oripay a Kawas, oya misanga'ay to kakarayan ato sra ato riyar ato i laloma'ay nonini a maamaan a ma^min. 16I ti:yaho i, pakonira han no Kawas ko dmak no tamdamdaw no kasakitakitakit. 17Ano hatiratira i, pakaynien Ningra i nga'ayay a dmak Ningra ko nipipahapinang to tireng Ningra. Tfaden Ningra nai kakarayan ko 'orad. Paflien Ningra kamo to kinaira i pilitodan a romi'ad. Paflien Ningra kamo to kakaenen a palipahak to faloco' namo,>> han nangra a somowal. 18Saka, mato malalangay sa ko pipato'aya no finawlan i cangraan.

19Ira a tayra ko nai Antiyokay ato nai Ikoniumay a Yutaya a tamdaw. Kayhiden nangra ko finawlan a mitkol ci Pawloan to fokloh. <<Mapatayayto cingra,>> saan ko harateng nangra saka, kidkid hanto nangra ci Pawlo a pasadak i papotal no niyaro'. 20Nikawrira, yo likoten no nisawawaan ci Pawlo i, lowad sa cingra ta patiko a tayra i niyaro'. Cilasato a romi'ad i, tayra cingra aci Parnapas i Tirpi a niyaro'.

O Pinokay i Siriyaay a Antiyok

21Patnak cangra to Nga'ayay Ratoh itira toya niyaro'. Palanisawawaen nangra ko 'alomanay a tamdaw ta patiko cangra a tayra i Listra, i Ikonium, i Antiyok. 22Pa'icelen nangra ko faloco' no nisawawaan to sakararidaw nangra a miti'er to Kawas. Sowal sa, <<Caay ka ^ca ka ira ko adihayay a pades ita ta manga'ay kita a malafinawlan no Kitakit no Kawas,>> han nangra. 23Pili'en nangra a patireng ko ciwlo itira i kasakiwkay. Mahrek a mitolon, misaliway ca Pawlo i, patorod han nangra koya ciwlo i niti'eran nangra a Tapang.

24Nanoya, pakayra cangra i Pisitiya a tayra i Pamfiliya. 25Mahrek a pakimad cangra i Pirka i, maloklon cangra a tayra i Ataliya. 26Nanitira pakalonan cangra a minokay i Antiyok. Onini a Antiyok i, o pipalowadan cangraan i 'ayawto a papilahci tonini a tayal, ta mapatorodto cangra i mikomi no Kawas itiya.

27Yo tahira cangra i, sa'opoen nangra ko salikaka no i tiraay a kiwkay a mipakafana' i cangraan to pakayniay i nipikapot no Kawas cangraan a matayal ato nipifohat no Kawas to fawahan no pipaso'lin no roma a finacadan. 28Ta sahalafin sa cangra itira a mikapot to nisawawaan.

Currently Selected:

Dmak 14: AMIS2019

Highlight

Copy