Dmak 13

O Pipatireng ci Parnapasan aci Sawloan

1Ira i Antiyok a kiwkay ko papinapina a pali'ayaway to sowal no Kawas ato pasifana'ay a tamdaw ci Parnapas ato ci Simiyon (Kohtingay hananay a tamdaw) aci Lukius no Kirini ato slal ni Hiroti o mikomoday a hongti ci Manain aci Sawlo. 2Yo mita'ong cangra to Tapang a misaliway i, sowal sa ko Fangcalay 'Adingo i cangraan, <<Patirengen ci Parnapas aci Sawlo a palamatayalay Ako a pakatayal to niparocekan Ako i cangraan,>> saan.

3Saka, misaliway, mitolon cangra. Ta kapaen nangra koya tatosaay. Ta ocor hanto nangra.

O Pipatnak i Sayprus

4Namaocor no Fangcalay 'Adingo koya tatosaay i, tayra sato cangra i Siliukiya. Nanitira pakalonan cangra a tayra i Sayprus hananay a kanatal. 5Tahira cangra i Salamis i, patnak cangra to sowal no Kawas i kasa'opo'opoan a loma' no Yutaya a tamdaw. Ira ci Yohani Maroko a mihaklong cangraan a mipadang.

6Rakaten nangra ko polong noya kanatal. Yo tangasa cangra i Pafos i, malitmoh nangra ko ccay a cikawasay ci Par-Yisu hananay a Yutaya a tamdaw. O pali'ayaway to sowal no Kawas kako saan cingra to tireng ningra. 7Itira cingra i mikomoday toya kanatal ci Serkius Pawloan a maro'. Onini a mikomoday i, o citanengay a tamdaw. Mangalay cingra a mitngil to sowal no Kawas. Saka, tahidangen ningra ci Parnapas aci Sawlo. 8Nikawrira, pacolien ni Ilimas o cikawasay koya tatosaay to saka^caaw paso'lin noya mikomoday. (O Ilimas sanay i, o no Krisiya a ngangan ningra.) 9Nikawrira, mapa'icel no Fangcalay 'Adingo ci Sawlo. O roma a ngangan ningra i, ci Pawlo. Pamotek han ni Pawlo ci Ilimas a minengneng. 10Sowal sa cingraan, <<Aya: kiso o wawa no palafoay, o 'ada no mo^celay a dmak a ma^min kiso, o matomesay no masamaamaanay a tatiihay. Paci^ci sa kiso a mi'akong to so'lin no Tapang. 11O mamatfoc no Tapang kiso. O mamapohaw kiso ta caay paka'araw kiso to cidal to pinapina a romi'ad,>> han ningra i.

Tangsol sa a matahpo no canem ato to'man cingra. Saka, sakapkapkap sato cingra a mikilim to mamikayat cingraan. 12Minengneng tonini a dmak ko mikomoday i, paso'lin sato cingra. Fahka' cingra to nipipasifana' nangra to pakayniay i Tapang.

O Pipatnak i Pisitiyaay a Antiyok

13Nanitira i Pafos pakalonan ca Pawlo a tayra i niyaro' no Pirka no Pamfiliya a pala. I tini a miliyas ci Yohani Maroko cangraan a minokay i Yirusalim. 14Nikawrira, rakat sa cangra nai Pirka a tayra i niyaro' no Antiyok no Pisitiya a pala. Yo Pasla'an a Romi'ad i, micomod cangra i kasa'opoan a loma' no Yutaya a tamdaw a maro' itira. 15Mahrek a miasip to Rikec ni Mosi ato nitilidan no pali'ayaway to sowal no Kawas a cudad i, ocoren no kakrikridan no citodongay to kasa'opoan a papipasowal i cangraan, <<Salikakaaw, ano ira ko sapa'icel namo a sowal tonini a tamdamdaw i, kasomowal,>> han ningra. 16Saka, tireng sato ci Pawlo a mikawih to kamay a somowal,

<<Kamo o finacadan ako o Israil ato mita'ongay to Kawas a roma a finacadan, pitngil. 17O nipili'an no nita'ongan no finawlan no Israil a Kawas ko tato'asan ita. Yo i tiraho cangra i Icip i, palatadamaanen no Kawas cangra a pacakat. Pakaynien Ningra i ci'icelay a dmak Ningra ko nipikrid i cangraan a pasadak nanitira i Icip. 18Ma^deng spat a polo' a mihcaan a mihadidi#13.18 mihadidi -- ira i roma a katlangay a cudad a matilid, midipot. ko Kawas i cangraan itira i kohkohan. 19Nanoya, tkopen Ningra ko pitoay a finacadan i Kanan a kanatal. Ta paflien Ningra ko finawlan Ningra toya sra to malonangra. 20Ma^deng spat a so'ot ira ko lima a polo' (450) a mihcaan cangra ta malahci konini.

<<Nanoya, patirengen no Kawas ko kakitakitaan to mamidipot cangraan tangasa i kairaan ni Samuil o pali'ayaway to sowal no Kawas. 21Nanoya, milongoc cangra to sakacihongtiaw. Saka, patirengen no Kawas ko ccay no ngangasawan ni Pinyamin o wawa ni Kis ci Sawlo a palahongti nangra to spat a polo' no mihcaan. 22Nanoya, palasawaden no Kawas ko nika lahongti ningra. Ta patirengen no Kawas ci Tafiti a palahongti nangra. O sowal no Kawas to pakayniay ci Tafitian i, <Matama Ako ko wawa ni Yisi ci Tafiti. Matatodongay i faloco' Ako cingra. O mamilahci cingra to nafaloco'an Ako a ma^min,> saan. 23Do^doen no Kawas ko niktonan Ningra a sowal. Patirengen Ningra ko tloc ni Tafiti ci Yis to papa'orip to Israil. 24I 'ayaw no nika pisatapang ni Yis a patnak i, patnak ci Yohani i polong no finawlan no Israil a papipasasiyor to faloco' a pasayni i Kawas a papilayap to ino'. 25Yo mamalponto ko tayal ni Yohani i, sowal sa cingra to finawlan no Israil, <Pakocima kamo i takowanan saw? Caayay koya nitalaan namo a tamdaw kako. Nikawrira, o aira a tayni i ikor ako Cingra. Caay ka tatodong kako a mitdal to kaos no cokap Ningra,> saan.

26<<Salikakaaw, kamo o tloc ni Apraham ato mita'ongay to Kawas a roma a finacadan, mapafli i titaanan konini a sapa'orip a sowal. 27Nikawrira, caay ka fana' ko i tiraay i Yirusalimay a tamdamdaw ato kakrikridan nangra to nika o pa'oripay ci Yis. Caay ka fana' cangra to tatodong no niasipan nangra to paslasla'an a romi'ad a sowal no pali'ayaway to sowal no Kawas. Pasteken nangra i raraw ci Yis. Saka, malahci ko nipali'ayawan no pali'ayaway to sowal no Kawas. 28Awaay a matama nangra ko sakapatay a raraw ni Yis i, paci^ci sa cangra a mingitangit ci Pilatoan to sapipatayaw Cingraan. 29Mado^do nangra ko polong no matiliday i Fangcalay Cudad to pakayniay ci Yisan. Mahrek nangra konini a dmak i, ^pod hanto nangra Cingra nai ciwcika a mina'ang i tadem. 30Nikawrira, palowaden no Kawas Cingra a pa'orip nai patay. 31Kinapinapina a pa'araw ci Yis toya mikapotay i Cingraan nai Kalili a tayra i Yirusalim. Anini i, onini a tamdamdaw ko pawacayay i finawlan to pakayniay ci Yisan. 32O paratohay kami to nga'ayay ratoh i tamowanan toya niktonan no Kawas i tato'asan ita a sowal. 33Palowaden no Kawas ci Yis a pa'orip nai patay. Pakayni tonini ko nipilahci Ningra tonini a niktonan a sowal i titaanan o tloc nangra. Mato nika tilid i saka tosa a 'Olic toya,

O Wawato Ako Kiso.

MalaWamato Iso Kako anini, sanay.

34Pakayni to nika piliyaw Ningra a ma'orip nai patay a caay ko mamapatay a dmak i, sowal sa ko Kawas,

<O papaflien Ako kamo to nano nisowalan Ako ci Tafitian a fangcalay a karahkeran a mikomi,> saan.

35O roma sato masowal haca no nitiliday to 'Olic, toya

<Caay ko mamihayda Kiso to nika poni' no so'linay ko faloco' a matayalay Iso,> saan.

36Yo ma'oripho ci Tafiti i, do^doen ningra ko nafaloco'an no Kawas. Mapatayto cingra i, mapakapot i tato'asan ningra a matadem. Saka, poni' sato cingra. 37Nikawrira, caay ka poni' ko nipalowadan no Kawas a pa'orip nai patay. 38Orasaka, salikakaaw, kafana' kamo to nika pakayni tonini a tamdaw a mapatnak i tamowanan ko sakahpol no raraw. Oya caay ka filo no Rikec ni Mosi a mitdal a raraw a ma^min i, 39pakayni i nipipaso'lin tonini a tamdaw ko sakatdal. 40Orasaka, pina'on kamo to saka^caaw ka lahci i tamowanan koya nisowalan no pali'ayaway to sowal no Kawas a dmak toya,

41<O mi^pecay to Kawas a tamdaw,

nengnengen, kafahka', kapatay kamo!

Nawhani midmakan Ako i rayray no 'orip namo i,

ano samaamaanen no tamdaw kamo a misahci a somowal tonini i,

caay ko papaso'lin kamo sanay,> >> han ningra.

42Yo miliyas ca Pawlo aci Parnapas to kasa'opoan a loma' i, sowal sa ko 'alomanay a mingitangit cangraan, <<Piliyawho a tayni ano roma a Pasla'an a Romi'ad a pakimad i tamiyanan to matiniay a dmak,>> han nangra. 43Maliwasak ko finawlan i, tooren no 'alomanay a Yutaya a tamdaw ato micomoday to Yutaya a pakayraan a roma a finacadan ci Pawlo aci Parnapas. Saka, pa'icelen noya tatosaay cangra a pasowal to sakararidaw nangra a miti'er to mikomi no Kawas.

44Romasato a Pasla'an a Romi'ad i, makrih#13.44 makrih -- o roma i, matatood (Cangping). a masa'opo ko polong no finawlan no niyaro' to sapitngilaw to sowal no Tapang. 45Nikawrira, ma'araw no Yutaya a tamdaw ko finawlan i, tata'ang ko 'inap nangra. Saka, pacolien nangra ko sowal ni Pawlo a milokes a somowal. 46Nikawrira, caay paska ci Pawlo aci Parnapas a somowal. <<O ai'aya'ayawen aca kamo a pasowal to sowal no Kawas. Nikawrira, mana'ay kamo a mitngil. Kamo ko miktonay to saka^caaw pilayap namo to mida'ocay a 'orip. Saka, pasayrato kami i roma a finacadan. 47Nawhani o nipipalimo'ot no Tapang i titaanan i,

<O nipatirengan Ako kiso to malolikat no roma a finacadan.

Ta matnak i cowacowa no hkal ko pakayniay i pipa'orip Ako saan,> >> han ni Pawlo.

48Mitngil ko roma a finacadan tonini a sowal i, salipahak sa cangra a pahmek to sowal no Tapang. Saka, paso'lin a ma^min koya nipili'an no Kawas to mamilayalayap aca to mida'ocay a 'orip a tamdaw.

49Saka, matnak ko sowal no Tapang tonini a pala a ma^min. 50Nikawrira, paororen no Yutaya a tamdaw ko tapatapang no niyaro' ato tadamaanay a mita'ongay to Kawas a roma a finacadan a fafahiyan a papikari'ang ci Pawloan aci Parnapasan. Saka, laplap hanto nangra koya tatosaay nanitira toya pala. 51Saka, pasayra sato koya tatosaay i cangraan a mitihtih to alafoh no saripa' nangra. Ta tayra sato cangra i Ikonium. 52Matongal a matongal ko lipahak ato pipa'icel no Fangcalay 'Adingo to i Antiyokay a nisawawaan.

Currently Selected:

Dmak 13: AMIS2019

Highlight

Copy