Naiˍ htangˍ 7

Saˍteˍhpanˍ ang buinˉ tangˍ maˍ yao ya siˉ jiˉ

1Haeˉ mae beu, yit pa lawˉ hek ang kaeˍ ciˍ jiˍ, Ningˉ mae laˍ nae Saˍteˍhpanˍ na naˉ jiˉ. 2Saˍteˍhpanˍ tawpˍ laeˍ jiˍ yang, Yaˍ changˍ mawngˉ namˉ nae ang vangˉ yawng veuˉ, iˉ yaˍ naˉ beun. Gu beu ang vangˉ Aˍbraˍhamˍ nawˍ, Haˍranˍ vengˍ veu baˍ duingˍ laengˉ suing nae beu, Meˍsoˉpoˉtaˍmiˆ ang meungˉ hkaoˉ veu ca jiˉ. Haeˉ mae beu mun hpungˉ ang huiˍ Hpaˍcaoˍ yang kawngˉ taw laˉ yao ha biˍ jiˍ yang, 3Nang beu ang meungˉ nae nang yaˍ changˍ mawngˉ namˉ uiˉ kawngˉ awkˍ taw aengˉ yao, ga nang na maˍ laˍ naeˍ ang meungˉ hiˉ keung aeˉ voˍ nae yang na ha biˍ jiˍ. 4Haeˉ mae beu, yang Hkaˍlaˍdaeˉ ang meungˉ veu awkˍ taw aengˉ yao, Haˍranˍ vengˍ veu duingˉ aeˉ jiˉ. Yang vangˉ mangˉ siˉ jiˉ nawngˍ veu, Hpaˍcaoˍ yang na hingˉ keung veu piˉ awkˍ taw laˍ laeˍ yao, ya muiˉ nawng duingˉ naeˉ ningˉ meungˉ veu piˉ duingˉ hkai laˉ laeˍ jiˍ. 5Ang meungˉ ningˉ hkaoˉ veu yang na laˍ hkuiˍ nangˍ kyaˍ laˍ mawk nae muiˉ htiˍ ceuˍ ang keungˍ baˍ piˍ. Caˇ, yang ang yaˍ baˍ cangˉ suing nae beu muiˉ, ang meungˉ ningˉ yang na nae yang beu ang luˍ ang han uiˉ na piˍ naeˍ nae, Hpaˍcaoˍ yang na saˉ caˉ chiˉ jiˉ. 6Hpaˍcaoˍ ningˉ mae ciˍ jiˍ yang, Aˍbraˍhamˍ beu ang luˍ ang han uiˉ aˍ, hingˉ meungˉ hkaoˉ veu hkaekˆ changˉ ya hpeuˍ yao, ang meungˉ changˉ hingˉ uiˉ tawngˍ kaˍ veu hanˍ pakˍ pi veu tiˍ hkeu yaˍ cenˍ ya hpeuˍ yao, hao hkanˍ yaˍ chuiˍ yaˍ nae na ya hkamˉ naeˉ. 7Yawng na yaˍ cenˍ piˉ keuˍ jiˍ changˉ hingˉ uiˉ na ga aˉ muˍ tatˆ nae yaˇ. Hingˉ nawngˍ veu, yawng awkˍ taw laˍ yao ningˉ keung veu ga na koˉ koiˍ laˍ naeˍ yaˇ nae Hpaˍcaoˍ ciˍ jiˍ. 8Ang hkaw veu haen naeˉ ningˉ na chaˍ lang naeˉ ka tiˍ saˉ caˉ hingˉ muiˉ Ang suingˉ Hpaˍcaoˍ maˇ Aˍbraˍhamˍ na piˍ jiˍ yaˇ. Haeˉ mae yao yang beu ang yaˍ Iˉcak keutˆ yaˍ lui yao, paetˍ nuing hkeu beu, yang na ang hkaw haen biˍ jiˍ. Iˉcak nawˍ yang beu ang yaˍ kaˍ hpaˍ yaˍ Yaˍkok keutˆ yaˍ lui yao, Yaˍkok muiˉ ang yaˍ htiˍ cheˍ nyiˍ hu keutˆ yaˍ lui jiˉ. Yawng ngaˍ gu beu ang puˉ htiˍ cheˍ nyiˍ hu uiˉ hpeuˍ laˉ jiˉ. 9Ang puˉ hingˉ uiˉ yawng ang hpaeˉ Yoˉsaep na hkoiˉ yao, Eˉjiˆtuˆ ang meungˉ veu yang na kawngˍ yaˍ jiˉ. Caˇ, Hpaˍcaoˍ yang kawngˉ ca yao, 10yang ya tuk ya hpan jiˉ hkaˉ hko laˉ hko hkaoˉ veu ya caeˉ jiˉ. Eˉjiˆtuˆ ang suingˉ Hpaˍrawˉ tawngˍ naˍ veu Yoˉsaep aeˉ beu, Hpaˍcaoˍ yang na ang buinˉ lapˍ sawngˍ nae nyanˍ pingˍ nyaˍ piˍ jiˍ pa nae, ang suingˉ maˇ Eˉjiˆtuˆ ang meungˉ hkaˉ hko laˉ hko nae hawˉ hingˉ na muiˉ Yoˉsaep na piˉ up jiˉ. 11Haeˉ mae beu, Eˉjiˆtuˆ ang meungˉ nae Hkaˍnanˍ ang meungˉ hkaˉ hko laˉ hko hkaoˉ veu baeˍ naeˍ suˍ naeˍ uiˉ hpeuˍ laˉ jiˉ pa nae, ang tuk ang hpan ya hkamˉ jiˉ. Haeˉ mae yao, gu puˉ uiˉ aˍ caˍ keungˍ saˉ yao baˍ ya. 12Caˇ, Eˉjiˆtuˆ ang meungˉ veu kaw ang ca nae Yaˍkok ya kyaˍ yao, ang puˉ uiˉ na kaˉ huˍ veu htiˍ cangˍ yang sa yao aeˉ biˍ jiˍ. 13Yawng nyiˍ cangˍ htiˍ cangˍ aeˉ laeˍ beu, Yoˉsaep nawˍ yang pawngˍ yang aiˉ uiˉ na yang ang to hingˉ piˉ bae yao, Hpaˍrawˉ mangˉ muiˉ Yoˉsaep beu yumˉ changˉ uiˉ na ya bae jiˉ. 14Hingˉ nawngˍ veu, Yoˉsaep nawˍ yang vangˉ nae ang ceuˉ canˉ hkaˉ hko laˉ hko uiˉ na piˉ suingˍ lui jiˍ. Yang beu ang ceuˉ canˉ hkaˉ hko laˉ hko uiˉ cetˍ cheˍ nae ngaˍ hu ca jiˉ. 15Yaˍkok muiˉ Eˉjiˆtuˆ ang meungˉ veu aeˉ yao, yang ang to muiˉ gu beu ang puˉ uiˉ muiˉ hiˉ keung veu siˉ hko jiˉ. 16Yawng beu ang to hingˉ na Seˍhkinˍ vengˍ veu pa laengˉ laeˍ yao, Seˍhkinˍ vengˍ changˉ Haˍmawˍ beu ang luˍ ang han uiˉ kawngˉ Aˍbraˍhamˍ hpuˉ piˍ yao vuiˉ chiˉ jiˉ hkawngˍ chawˍ veu hyang jiˉ. 17Hpaˍcaoˍ Aˍbraˍhamˍ na ka tiˍ piˍ yao chiˉ saˍ biˍ jiˍ ang nyamˍ puing ngangˉ laˉ beu, Eˉjiˆtuˆ ang meungˉ veu gu beu changˉ ceuˉ uiˉ huiˍ laˍ byaˍ laˉ jiˉ yaˇ. 18Yoˉsaep na baˍ bae nae uiˉ ang suingˉ htiˍ hu taw laˉ beu hkeu, yawng byaˍ laˉ jiˉ. 19Ang suingˉ hiˉ maˇ, gu beu changˉ ceuˉ na koiˍ yao, ang yaˍ keutˆ yaˍ suiˍ uiˍ baˍ ya teˍ yaˍ taw naeˉ uiˉ saˍ laiˍ, gu beu ang puˉ uiˉ na hkanˍ yaˍ chuiˍ yaˍ yao ang yaˍ htiˍ baˍ uiˍ na piˉ yuˉ taw lae jiˍ. 20Haeˉ mae beu, Hpaˍcaoˍ tawngˍ naˍ veu hu buiˍ sutˆ nae Moˉseˍ htiˍ hu keutˆ yaˍ lui jiˉ. Awˍ ha sumˍ ha veu htiˍ hkeu yang vangˉ yumˉ hkaoˉ veu yang na po jiˉ. 21Kaˉ nawngˍ veu yang na paek nga beu, Hpaˍrawˉ beu ang yaˍ hkaˍ ba yaˍ mangˍ kaw buˉ yao yang beu ang yaˍ laˍ mae sawnˉ yao po jiˉ. 22Moˉseˍ nawˍ Eˉjiˆtuˆ changˉ uiˉ beu pingˍ nyaˍ hkaˉ hko laˉ hko ya henˍ yao, hkaˍ muˍ hkai naeˉ hkaoˉ veu na baˍ upˍ, kanˉ vaˍ naeˍ hkaoˉ veu na baˍ upˍ, kaˍ ca yaeˉ sutˆ nae hpeuˍ laˉ jiˉ. 23Yang a sak hanˍ cheˍ pi hkeu beu, yang beu yaˍ changˍ mawngˉ namˉ Iˉsaˍreˍlaˆ changˉ ceuˉ uiˉ na hu hpa naeˉ uiˉ saˍ laiˍ, yang nuing ba hkaoˉ veu kuitˆ taw laeˍ jiˍ. 24Yang beu changˉ htiˍ hu na hao hkanˍ yaˍ naeˍ na yang ya myangˉ beu, yang beu changˉ uiˉ na pawngˍ yao, hkanˍ yaˍ yao ca naeˉ Eˉjiˆtuˆ changˉ mangˉ na yang tuiˍ saeˍ jiˍ. 25Hpaˍcaoˍ yang na cuˉ yao, yang beu changˉ ceuˉ uiˉ na pawngˍ van yao ca naeˉ na yang beu yaˍ changˍ mawngˉ namˉ uiˉ ang bae kuˍ baˇ nae Moˉseˍ kuitˆ yao muiˉ, yawng baˍ bae. 26Hingˉ nuing nawngˍ veu, yang beu changˉ ceuˉ nyiˍ hu yaˉ yetˍ si lang yao ca naeˉ na ya myangˉ yao, Ang changˍ yawng veuˉ, naˉ yetˍ aˍ yaˍ changˍ mawngˉ namˉ lang naˇ. Ba ceuˉ ha yao htiˍ hu nae htiˍ hu si lang ga naeˇ nae ha biˍ yao yaˉ yetˍ na tawpˍ laeˍ jiˍ. 27Yang beu ang changˍ mangˍ na aˍ saeng mangˉ Moˉseˍ na naengˍ htanˍ yao ha biˍ jiˍ yang, Gu htaˍ veu ang suingˉ maˇ aˉ muˍ tatˆ bu nae aˍ sangˍ nang na chiˉ langˍ ngaeˇ. 28Mi kawngˉ Eˉjiˆtuˆ changˉ na nang saeˍ jiˍ laˉ mae, ga na muiˉ saeˍ laˍ siˉ laˍ nae, Moˉseˍ na ha biˍ jiˍ. Gu hta veu, naˇ ang suingˉ nae aˉ muˍ tatˆ naeˉ uiˉ changˉ hpeuˍ naeˍ baˍ aˍ. 29Ciˍ tangˍ hingˍ na Moˉseˍ ya kyaˍ beu, yang Meˍdiˍanˍ ang meungˉ veu caw aeˉ jiˉ. Yang hiˉ keung veu hkaek changˉ laˉ mae ca beu ang yaˍ kaˍ hpaˍ yaˍ nyiˍ hu ya saˍ jiˍ.

30Hanˍ cheˍ pi punˍ na langˉ yao, Siˉnaˆ miˉ kuingˍ htang changˍ kawngˍ veu chiˍ kuˍ mup miˍ htawˍ caw yao ca beu, miˍ htawˍ uitˍ naeˍ hingˉ hkaoˉ veu buingˍ htaˍ naiˍ htangˍ htiˍ hu na yang ya myangˉ jiˉ. 31Moˉseˍ hingˉ na ya myangˉ beu, yang manˍ yao, maenˍ nae hu yaeˉ ceuˉ nae ang htang veu sat htaeˉ aengˉ jiˉ. 32Ang suingˉ Hpaˍcaoˍ beu ang tangˍ taw laˉ yao, Gaˇ nawng ang puˉ uiˉ beu Hpaˍcaoˍ, Aˍbraˍhamˍ, Iˉcak, Yaˍkok yawng beu Hpaˍcaoˍ mangˍ yaˇ nae ha biˍ jiˍ. Haeˉ mae beu Moˉseˍ hkae did did yao, ba hu laeˍ caw nae ca jiˉ. 33Ang suingˉ Hpaˍcaoˍ yang na ciˍ sangˍ jiˍ yang, Nang beu hkiˉ naw hingˉ chawt ngangˉ laeo, a mae yao nae baoˇ, nang cung yao ca naeˉ nuingˉ chaˍ hingˍ nga ang seungˍ sangˉ nuingˉ chaˍ yangˍ, 34Eˉjiˆtuˆ ang meungˉ hkaoˉ veu ga beu changˉ ceuˉ uiˉ na hao hkanˍ chuiˍ yaˍ nae na ga hkaemˍ nae myangˉ nga yao, yawng buinˉ haoˉ naeˉ ang tangˍ na muiˉ ga ya kyaˍ byaˇ. Yawng na caeˉ biˍ naeˍ uiˉ saˍ laiˍ ga lungˍ nga luingˉ byaˇ. Ya muiˉ laˉ bao. Ga nang na Eˉjiˆtuˆ ang meungˉ veu piˉ aeˉ laˍ naeˍ yaˇ nae ha biˍ jiˍ. 35Moˉseˍ hiˍ mangˉ na yawng paek nga saˍ yao ciˍ jiˍ yang, Ang suingˉ nawˍ aˉ muˍ tatˆ naeˉ uiˉ hpeuˍ vo nae aˍ sangˍ nang na pukˆ langˍ ngaeˇ. Caˇ, yaˇ upˆ peungˍ naeˍ mangˉ nae htaiˍ awkˍ naeˍ mangˉ hpeuˍ laˉ naeˉ nae, chiˍ kuˍ ang mup ang hkaoˉ veu yang ya myangˉ jiˉ buingˍ htaˍ naiˍ htangˍ na Hpaˍcaoˍ cuˉ yao, Moˉseˍ na piˉ aeˉ jiˉ. 36Moˉseˍ nawˍ Iˉsaˍreˍlaˆ changˉ uiˉ na Eˉjiˆtuˆ ang meungˉ hkaoˉ veu chuingˉ awkˍ jiˍ. Chaˍ maeˍ langˍ ba ang naeˉ hkaoˉ veu na baˍ upˍ, hanˍ cheˍ pi veu hkeu changˍ kawngˍ ang kui veu na baˍ upˍ, yawng manˍ kyaˍ naˍ mek laek hkaˍ naˍ htiˍ baˍ uiˍ na vaˍ jiˍ. 37Moˉseˍ niˍ maˇ, Iˉsaˍreˍlaˆ changˉ uiˉ na ha biˍ jiˍ yang, Nawng beu ang ceuˉ canˉ hkaoˉ veu ga laˉ mae uiˉ pa rawˉ hpaet htiˍ hu nawng saˍ laiˍ Hpaˍcaoˍ sa luiˍ laˍ naeˍ yaˇ nae ha biˍ jiˍ. 38Moˉseˍ niˍ maˇ, Siˉnaˆ miˉ kuingˍ veu yang na hkaˍ muˍ hkai biˍ jiˍ buingˍ htaˍ naiˍ htangˍ na baˍ upˍ, gu beu ang puˉ uiˉ kawngˉ na baˍ up, changˍ kawngˍ veu ca naeˉ ang muˉ uiˉ kawngˉ changˉ htiˍ hu hpeuˍ jiˍ yaˇ. Gu na piˍ laˍ naeˍ uiˉ saˍ laiˍ, yaˇ teˍ yaˍ yao ca naeˉ uiˉ ciˍ tangˍ hingˍ na hap yuˉ jiˉ yaˇ. 39Gu beu ang puˉ htiˍ baˍ uiˍ, yang beu ang tangˍ na baˍ naˍ yuˉ nae yang na paek taw jiˉ. Yawng ngaˍ Eˉjiˆtuˆ ang meungˉ veu lae laeˍ siˍ naeˇ hingˉ nuing ba naˇ ca jiˉ. 40Yawng Aˍronˍ na hkai biˍ jiˍ. Kaˉ hu veu gu na chuingˉ laˍ naeˍ uiˉ saˍ laiˍ, gu saˍ laiˍ hpaˍcaoˍ htiˍ baˍ uiˍ taeng lao. Aˉ mae yao nae baoˇ, gu na Eˉjiˆtuˆ ang meungˉ hkaoˉ veu chuingˉ awkˍ laˍ naeˍ Moˉseˍ htiˍ hu aˉ mae hpeuˍ naeˍ na, gu baˍ bae nae hkai biˍ jiˍ. 41Ang nyamˍ hingˍ hkaoˉ veu yawng ngaˍ, aˍ myangˍ yaˍ ang hop htiˍ mangˍ taeng jiˉ hpaˍcaoˍ ang hop hingˉ mangˉ na tanˍ jiˍ. Nae yao yawng laˍ puˍ nae taeng yao chiˉ jiˉ hingˉ kanˉ na mawnˍ yao ca naeˉ. 42Caˇ, Hpaˍcaoˍ yawng na hpap nga saˍ yao awˍ guiˍ uiˍ na koˉ koiˍ naeˍ uiˉ saˍ laiˍ yawng na poiˉ biˍ naeˍ. Ningˉ lawˉ yaˇ, Hpaˍcaoˍ beu pa rawˉ hpaet uiˉ beu ang laiˍ hkaoˍ veu ningˉ mae taemˉ saˍ jiˍ.

Iˉsaˍreˍlaˆ changˉ yawng veuˉ, nawng changˍ kawngˍ ang kui veu hanˍ cheˍ pi ca beu, cenˍ mangˍ uiˍ na saeˍ yao ka baˍ ka ceuˉ uiˉ ga na tanˍ laˍ naeˍ baˍ aˍ. 43Nawng koˉ koiˍ naeˍ uiˉ saˍ laiˍ taeng jiˉ Mawˉloˍ hpaˍcaoˍ nae maengˉ jiˉ yi changˉ hingˉ na hpuingˍ yao Reˍhpanˍ hpaˍcaoˍ beu awˍ guiˍ hingˍ na nawng chiˍ hta yao paˍ cangˉ ngangˉ ngaeˉ laˍ. Hingˉ pa nae, ga nawng na Baˍbuˆlonˍ vengˍ hingˉ pakˍ kyaˍ kaˍ seu tiˍ hkeu suiˍ awkˍ laˍ naeˍ yaˇ nae taemˉ saˍ jiˍ.

44Gu beu ang puˉ htiˍ baˍ uiˉ aˍ, changˍ kawngˍ veu hpaˍcaoˍ ca naeˉ yi changˉ ang ca. Moˉseˍ yang sai lawng na ya myangˉ jiˉ lawˉ ya ha naeˉ nae Hpaˍcaoˍ ciˍ yao chiˉ jiˉ laˉ mae yang chaw yao chiˉ jiˉ Hpaˍcaoˍ ca naeˉ yi changˉ hpeuˍ naeˍ yaˇ. 45Gu beu ang puˉ uiˉ htiˍ baˍ tawngˍ naˍ veu Hpaˍcaoˍ nawˍ Changˉ ceuˉ htiˍ baˍ uiˍ na kaˍ taw jiˉ. Hingˉ nawng veu, gu beu ang puˉ yawng ngaˍ, Yawˉsuˆ kawngˉ htuˍ yaˍ laˉ mae ang meungˉ ningˉ hkaoˉ veu awngˉ laˉ beu, ang hpaenˉ yi changˉ hingˉ na yuˉ awngˉ nga langˉ jiˉ. Ang hpaenˉ yi changˉ hingˉ ngaˍ Daˍvet cawˍ veu nae ca saˍ jiˍ. 46Daˍvet nawˍ, Hpaˍcaoˍ nuing ba capˆ naeˉ uiˉ changˉ hpeuˍ jiˍ. Yaˍkok beu Hpaˍcaoˍ saˍ laiˍ ca kyaˉ yumˉ chaw naeˉ uiˉ aˉ hkvangˍ paˉ yao muiˉ, 47Hpaˍcaoˍ beu yumˉ yaˍ chaw jiˉ maˇ Sawˉlaˆmunˍ yaˇ. 48Caˇ, huiˍ mawng yaeˉ sutˆ nae Hpaˍcaoˍ nawˍ changˉ chaw jiˉ yumˉ uiˉ beu duingˉ naeˉ baˍ aˍ. Hpaˍcaoˍ beu pa rawˉ hpaet ciˍ saˍ jiˍ lawˉ,

49Buingˍ htaˍ hingˍ nga, ga beu paˍ langˍ hpeuˍ naeˍ yaˇ. Nuingˉ chaˍ ningˍ nga ga laˍ hkuiˍ boeˉ kyaˇ hpeuˍ naeˍ yaˇ. Ga saˍ laiˍ nawng aˉ mae uiˉ yumˉ chaw naeˇ. Ga saoˍ kyaˍ yangˍ aˉ keung veu. 50Ningˉ hkaˉ hko laˉ hko ningˉ ngaˍ ga taeng jiˉ uiˉ baˍ la nae Hpaˍcaoˍ ciˍ jiˍ.

51Nawng ngaˍ ang tuˍ ang kaenˍ maˍ manˉ jiˉ. Nawng nuing ba suiˍ hingˍ nga, Ang suingˉ Hpaˍcaoˍ beu ang tangˍ na kyaˍ naeˍ uiˉ saˍ laiˍ, laˍ pangˍ pangˍ ngaˍ jaˇ. Nawng ngaˍ aˉ luˍ beun muiˉ Ang hkawˍ laˉ ang seungˍ sangˉ na haenˉ tap naeˉ. Nawng beu ang puˉ uiˉ ha saˍ jiˍ laˍ mae, nawng ngaˍ ha yao ca ngaeˉ jaˇ. 52Nawng beu ang puˉ uiˉ baˍ hkanˍ baˍ chuiˍ yaˍ nae, Hpaˍcaoˍ beu pa rawˉ hpaet aˉ mangˉ ca jeuˇ. Ang suing pawng changˉ htiˍ hu lui naeˉ awˍ lawng na hkai biˍ yao pa rawˉ hpaet uiˉ na yawng saeˍ byaˇ. Ya muiˉ muiˉ hingˉ lawˉ, ang sui pawng changˉ hiˉ mangˉ htiˍ hu na nawng satˉ caˉ tiˍ kangˍ yao saeˍ byaˇ. 53Buingˍ htaˍ naiˍ htangˍ uiˍ laˍ puˍ hkaoˍ veu ang liˍ ang kawngˍ na nawng ya yao muiˉ, nawng baˍ na yuˉ nae yawng na ciˍ sangˍ jiˍ.

Saˍteˍhpanˍ na law ba paek saeˍ jiˍ

54Ciˍ tangˍ ningˍ uiˉ changˉ ang byaˍ uiˍ ya kyaˍ beu, yawng yang na nuing ba inˍ chuiˍ chuiˉ yao, chaˍ hpaeˍ chaeˍ yinˍ nae ha laeˍ jiˍ. 55Haeˉ mae beu, Saˍteˍhpanˍ nawˍ Ang hkawˍ laˉ ang seungˍ sangˉ htiˍ puing ang ca yaˇ. Buingˍ htaˍ veu hu laeˍ beu, Hpaˍcaoˍ beu mun hpungˉ na muiˉ, Hpaˍcaoˍ beu laˍ maˍ kaˍ seu Yeˍsuˆ cung naeˉ na muiˉ, ya myangˉ yao ciˍ jiˍ, 56Hu bao, buingˍ htaˍ hingˍ hpawng luiˍ yao, Hpaˍcaoˍ beu laˍ maˍ kaˍ seu Changˉ cung yao ca naeˉ na ga myangˉ ngaeˉ yaˇ nae yang ciˍ jiˍ. 57Haeˉ mae beu, yawng kaˍ haenˍ nae haoˉ yao, aˍ sangˍ yang beu laˍ suingˍ hingˍ na vap laeˍ jiˍ. Htiˍ chitˍ nae, yawng htuˍ yaˍ laˉ mae Saˍteˍhpanˍ kawngˉ huinˍ awngˍ nga aengˉ jiˉ. 58Peunˉ na yao, vengˍ ang ngiˉ veu yang na seu taw aengˉ yao, law ba yatˍ paek lang jiˉ. Sak seˍ hkamˉ naeˉ uiˉ yawng muiˉ, hkaˍ tawng beu hkaˍ lao hingˉ hae laeˍ yao Sawˉluˆ nae maengˉ jiˉ yaˍ hkaˍ mangˍ laˍ hkuiˍ htang veu chiˉ chawnˉ lae jiˉ. 59Yawng Saˍteˍhpanˍ na law ba paek yao ca beu, yang ang buinˉ paˉ yao, Ang suingˉ Yeˍsuˆ veuˉ, ga beu ang hkawˍ laˉ ningˉ na hap yuˉ lao nae yang ciˍ jiˍ. 60Haeˉ mae beu, yang hpaˍ tuˍ laˍ hku nae ha yao, Ang suingˉ Hpaˍcaoˍ veuˉ, naˍ hokˍ ningˍ yawng htaˍ veu baˍ chiˍ bi jo nae, ang tang kaˍ haengˍ haoˉ jiˉ. Haeˉ mae ciˍ peunˍ yao yang siˉ jiˉ.

Currently Selected:

Naiˍ htangˍ 7: pyy

Highlight

Copy