Markut 10
10
Kam nyreng
(Matta 19:1-12; Luka 16:18)
1Yesu a̱ bu drok ka̱ yemi, a̱ nat ka̱byen Yahudiya, a̱ byyek ncen Urdun na. Ba̱nyet ba̱gingang a̱ bo tung, na̱ nwa ba̱ zzek da̱ni na̱ nan yya ni.
2Ba̱nyet Farisa a̱yaan a̱ nyyai a̱ ba da̱ nu, a̱ cat ku tssem. Ba hywa da̱ nu, “Da̱ni da̱ a̱n bvwo digado njit ti ni, ku myyim a̱yin a̱ nyying a̱mbyring nu o?”
3Yesu a̱ ma̱ ba̱ zzim, “Musa a̱ yin hywa di yi yya ni?”
4Ba hywa, “Musa a̱ yin wwon ba wrak a̱ra̱mbyring u kpa a̱ ku nying na̱ nat.”
5Yesu a̱ hywa da̱ mba, “Musa a̱ yin bvwo wipfong nyin na. Nkpa yin byyi na̱ yin ya jem a̱mi ka. 6Ma nyyai ka̱ram ka Ka̱za ka yin yya ka̱sa ka ni, ba hywa, ‘Ka̱za a̱ ba̱ yya ba̱ mba ba̱hwa, a̱ra̱ntyok ba̱ a̱ra̱mbyring. 7Nkpa a̱n byyi a̱ra̱ntyok na̱ nin wwon a̱tyyi nu ba̱ a̱naa nu a̱ brak a̱ bu ya ta̱maat ba̱ a̱mbyring nu. 8Ba tyyi bu kyang yring.’ Ba bo yet ba̱nyet ba̱hwa ba, se a̱tuba yring. 9Kyang a Ka̱za mbvak nka ka mon ni da̱ a̱yin a̱ ryok kpo wop ba.”
10Ba brek a̱ nat ka̱ryi, na̱won pfong nu na a̱ ku zzim na̱ bo ba̱ kok ba̱ryat nyreng ba. 11Yesu a̱ hywa da̱ mba, “A̱yin nu a̱ nying a̱mbyring nu a̱ bo bvwa a̱yaan ni a̱ yet a̱ntyok kan a̱naan ba̱ a̱mbyring a̱hwai u na̱ bvwa ni. 12A̱mi meyang a̱ra̱mbyring u a̱ tyong a̱ nat nyreng hwai i a̱ yet a̱mbyring kan a̱naan ba̱ a̱ntyok a̱hwai u.”
Yesu a̱ pfwa a̱cwwang na̱mawon nda
(Matta 19:13-15; Luka 18:15-17)
13Ba̱yanyet a̱ ba bu na̱mawon di Yesu na̱ ba̱ pfwa nda, ma na̱won pfong Yesu na a̱ bun ba̱ nying. 14Yesu a̱ ba̱ ryi a̱ hok diryen, a̱ hywa di na̱won pfong a, “Yi ryok n nying na̱mawon na ba da̱ nzuk a ba, rot Dityok Ka̱za ti yet ti nyyi ntaka̱i mba na. 15Se yi bvwo, a̱yin nu a̱ ni san Dityok Ka̱za di ka̱bawon ni ba, a̱ ni maai ta̱ nwa ba.” 16Wwon a̱ si yei na̱mawon na na ba da̱ nu, na̱ bu ba̱ krum ba̱ yayring a̱ ba̱ pfwa nda sa̱rei mba.
A̱ntyok nzwa a̱ ba di Yesu
(Matta 19:16-30; Luka 18:18-30)
17Yesu a̱ bo bu drok a̱ naat, a̱ntyok a̱yaan a̱ hyok ncyi a̱ bu ta̱gbok a̱ta̱ssi nu, a̱ hywa da̱ nu, “A̱tsatsak Malam, a̱nzan n ni yya n ni shya sucet wi tyak?”
18Yesu a̱ hywa da̱ nu, “A̱nzan a̱n byyi a ni n yei a̱tsatsak a̱yin? Ka̱za ba̱diyin nka a̱ yet a̱tsatsak. 19A bvwo nkyang a Ka̱za ka ya tyyei ni: ‘Ryok hywat a̱yin ba; ryok yet a̱kan-a̱naan ba; ryok zzing tsang ba; ryok bvei diraa ba; ryok bvuk ba̱nyet ba; tyong a̱tyyi nwan ba̱ a̱naa nwan.’ ”
20A̱ntyok a̱ywu a̱ hywa, “Malam, nkyang iya, n na̱ yya sa̱rei nyyai n yet ka̱seyang.”
21Yesu a̱ ku cyang a̱ hok dizot nu, a̱ hywa da̱ nu, “A bvat bi kyang yring. Nat si zzap sa̱rei zwa nwan ji i ka ba̱nyet dizot krum ji i gi ya tung zwa Tazwa; wwon i ba i n tssup.” 22A̱ntyok a̱ywu na̱ bu hok a̱mi, rya nu na i byyan, na̱ brek a̱ bu shyik a̱ssi, a̱ brak a̱ rot, rot a̱ yet a̱ntyok nzwa.
23Yesu a̱ brek a̱ bu cyang na̱won pfong nu na, a̱ hywa da̱ mba, “Ku ni bvwa dikwu ba̱gingang a̱ntyok nzwa a̱ nwa Dityok Ka̱za.”
24Na̱won pfong nu na ba bu hok a̱mi, ndya mba na i tyyi ba̱ bibyek. Yesu a̱ ya ka̱son a̱ hywa da̱ mba, “Na̱won nzuk, nwa Dityok Ka̱za yet a̱hyom ba. 25Ku ni yet a̱hyom a̱ rakumi a̱ nwa an dan ka̱yrwa di a̱ntyok nzwa a̱ nwa Dityok Ka̱za.”
26Na̱won pfong nu na a̱ bo nwa yya ka̱hat, a̱ nwa ya zzim a̱ yya, “To, a̱nyan a̱ ni maai?”
27Yesu a̱ ba̱ cyang a̱ hywa da̱ mba, “A̱neywu a̱ ni maai ba; ma kozan kyang a̱ yet a̱hyom di Ka̱za. A̱neywu a̱ maai yya kyang ba; ma Ka̱za a̱ yya kyang a ka shim yya ni.”
28Bitut a̱ shot ka̱nu a̱ hywa, “Njit du wwon kozan kyang i ba na̱ tssup ni hwa?”
29Yesu a̱ hywa, “Ee, nkpa n ya tyyei: a̱yin nu a̱ wwon ka̱ryi ko ba̱wumbeyang ko ba̱nap, ko a̱tyyi ko a̱naa, ko na̱won ko na̱byen keyak rot diyrek nzuk bu Ka̱sham Ba̱ryat nzuk ka ni, 30a̱ ni sswa ka̱bvung, ma a̱ bo ni shya ba̱gingang: na̱sa, ba̱wumbeyang, ba̱sam bu ba̱nap, ba̱naa, na̱won, bu na̱byen, nta̱mak bu ka̱bvung. Zamani bai a na̱ bo san sucet wi tyak. 31Ma a̱kpok ba̱nyet u a̱ kwak ka̱son ba̱nyying i mba a̱ ni brek a̱ ba riryim, wwon ba̱nyet ba a̱ wa shyi riryim kani mba a̱ ni cong a̱ bu kwak ka̱son ka.”
Yesu a̱ bo tyyei dikwu nu nkrang a̱mba̱tat
(Matta 20:17-19; Luka 18:31-34)
32Ba bo drok a̱ sook ryen Urushalima, Yesu na̱ kwak ka̱son ka, na̱won pfong nu na ba ku tssup a̱ yya ka̱hat, kpikpit ba̱nyet a kun tssup bu ndya mba na ba̱ bibyek rot kyang a Yesu na̱ ryat ba̱ mba ni. Yesu a̱ kwwat na̱won pfong nu na a̱za̱ gbang a̱yring a̱ bo ba̱ tyyei kyang a ba̱nyet ba ba naat a̱ si ku yya mi ni. 33A̱ hywa da̱ mba, “Zi naat Urushalima naani, ka̱ yemi ba naat a̱ sin pyyem Ka̱won A̱neywu a̱ wrak ba̱cecet ba̱gado Ka̱za bu ba̱malam truwang, ba ka̱ yya sa̱rei na̱kpot a ba byyi a ndya mba ni a̱ tyak. Ba ni ka̱ tyyak shirya dikwu, a̱ si ka̱ sook a̱ wrak ba̱nyet ba a̱ wi yet ba̱nyet Yahuda ni. 34Ba̱nyet iya a̱ ma̱n ku sook a̱ ku hyum ba̱ncwwa, a̱ ku tsot a̱ ku yya sa̱rei taka̱i ryihywat a ba bvwo ni. A̱ngbom u ba ku hywat, ma ka̱tuk nom a̱mba̱tat na̱ ta̱za.”
Naai Yakubu bu Yohana
(Matta 20:20-28)
35Wwon Yakubu bu Yohana, ba̱hwai Zabadi, a̱ nyyai a̱ ba di Yesu a̱ bu hywa, “Malam, ka a shim zi cat naai kyang da̱ nwan.”
36Yesu a̱ hywa, “A̱nzan yi cat n ya yya mi?”
37Ba hywa, “Zi cat, ka̱ram ka an wrak swrang i dityok nwan ti ni, zi swrang ba̱ nwan, a̱tuba a̱yring mbvuk yak, a̱yanyet mbvuk myin.”
38Yesu a̱ hywa da̱ mba, “Yi si wu bvwo kyang a yi naai ee? Yi ni maai i si sswa ka̱bvung ka ba̱ nzuk o? Ki yi ni maai ba ya yya baptisma nu ba ni n yya mi ni?”
39Ba hywa, “Zi ni maai.”
Yesu a̱ hywa da̱ mba, “Yi ni sswa ba̱ nzuk i bu san baptisma a̱yring ba̱ nzuk. 40Ma ba̱ryat swrang mbvak yak bu myin a̱ yet ba̱ nzuuk ba, se ba̱nyet ba Ka̱za ka sak ba nin swrang ni.”
41Kpikpit na̱won pfong a bi hok ba̱ryat bani a̱ nwa yya diryen bu Yakubu bu Yohana. 42Yesu a̱ si bo ba̱ yei ka̱bvwa ka̱yring, a̱ hywa da̱ mba, “Ba̱nyet ba a̱ ya yei ba̱gwam ni a̱ byyi ba̱nyet ba a̱ ba̱ tssup i, ba̱gwam ba a̱ ma̱ ba̱ breng. 43Ma a̱mi n nin cat yi ya breng ba. Ka̱ a̱yin a̱ cat digba̱dang ka̱yat nyin, se na̱ ya brak a̱ yet a̱kwwa di kpikpit a. 44Ka̱yat nyin, a̱yin nu a̱ ma̱n cat yet a̱kwak ka̱son ni, se na̱ yya kpikpit a dikwwa. 45Nzuk Ka̱won A̱neywu, n ba ba̱nyet a̱ n yya dikwwa ba, ma nzuk n yya ba̱nyet dikwwa hat n bu n tyyi sso nzuk, n ga n san ba̱nyet n tun a a̱ka̱tukyya mba.”
Yesu a̱ tat Bartimawat a̱ssi
(Matta 20:29-34; Luka 18:35-43)
46Ba nyyai a̱ si nwa Yariko, ba̱nyet ba̱gingang a̱ tung. Ka̱ram ka ban wwut Yariko ka ni, a̱ntyok a̱tutwan a̱yaan a̱n shyi ka̱ yemi. Ba ku yei Bartimawat, a̱hwai Timawat, na̱ swat a̱mbeyang a̱zi ryen a̱ shyi naai. 47Na̱ bu hok nkhang di Yesu a̱ntyok Nazarat a̱mi a̱ swrap, na̱ yrek diwan, a̱ yei a̱ hywa, “Yesu, ka̱mbvon Dawuda, hok dizot nzuk!”
48Ba̱yanyet ba̱gingang a̱ nwa ku tssap di na̱ tyyi nyong. Na̱ si wa yrek diwan nu ansham, a̱ bo yei, a̱ hywa, “Ka̱mbvon Dawuda, hok dizot nzuk!”
49Yesu a̱ sseng a̱ hywa, “Yi tyyi na̱ ba kyi.”
Ba hywa da̱ nu, “A̱ na̱ yei. Tyyi rya nwan yring i ta̱za nat.”
50Na̱ tun a̱godo nu nu a̱ ta zan a̱ ta̱kwang a̱ nat di Yesu.
51Yesu a̱ si ku zzim a̱ hywa, “A̱nzan a cat n na̱ yya mi?”
A̱ntyok a̱tutwan nu a̱ hywa, “N cat a̱ssi nzuk a a̱ yrang.”
52Yesu a̱ hywa da̱ nu, “Da̱ nat, rot a wrak ka̱ryong, nkpa n byyi an creng.”
Bu hywa na a̱mi a̱ssi nu na a̱ yrang, na̱ nwa cyang, a̱ brak a̱ tssup Yesu.
Currently Selected:
Markut 10: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
