Matta 2

Ba̱nyet a̱za̱ncyi nyyai a̱za̱gbang dityin

1Ba yin byin Yesu i ka̱nkrang ka ba yin yei Batalami ni i ka̱byen Yahudiya. Ka̱ram iya Hirudut a̱mi a̱ yin yet a̱gwam u. Ka̱ram ba̱cincong ba̱ntyok ba̱yaan ba̱nyet a̱za̱ncyi ba a̱ twang na̱ta̱ngwat ni a̱ nyyai a̱za̱gbang dityin nu a̱ ba Urushalima, 2a̱ bu zzim, “Ka̱won ka ba byin ka ni yet a̱gwam ba̱nyet Yahuda nu ni a̱ shyi ke? Zi ryi ka̱ta̱ngwat nu ka nyyai a̱za̱gbang dityin, njit ba ka̱ tssup ba ku sook ntong.”

3A̱gwam Hirudut na̱ bu hok a̱mi a̱ tyyi ba̱tai, sa̱rei ka̱nkrang Urushalima ka ma koyan a̱ tyyi ba̱tai. 4Na̱ yei sa̱rei ba̱cecet ba̱gado Ka̱za ba bu ba̱malam truwang ba, a̱ ba̱ zzim ka̱bvwa ka ba nin byin Kristi nu ni.

5Ba hywa da̱ nu, “Batalami i ka̱byen Yahudiya. Kyang a ba̱nyet tyyei ba̱ryat Ka̱za ba ba yin jem ni ku yemi. 6Ba yin hywa,

‘Ko nwan ma Batalami i ka̱byen Yahudiya,

a yet ka̱baan i na̱nkrang Yahudiya ba, ko ba̱cincong,

rot ka̱yat nwan a̱gba̱dang a̱yin na̱ nin hyok

a̱ tsaai ba̱nyet nzuk ba Isreila.’ ”

7Hirudut a̱ si bo yei ba̱necen ba a̱ ba nyyai a̱za̱gbang dityin nu ni i ka̱nrang, a̱ ba̱ zzim a̱cicrak ka̱ram u ban dyi ka̱ta̱ngwat ka ni. 8A̱ si ba̱ tun ba nat Batalami, a̱ hywa da̱ mba, “Yi nat si cat ka̱bawon ka ansham. Ki yi ka̱ shya yi ba bu n tyyei, n ga ma̱n nat n si ka̱ sook ntong.”

9Ka̱ram ka ba bun hok a̱gwam u ni, a̱ drok a̱ pyyem ryen, a̱ bo ryi ka̱ta̱ngwat ka a̱zanson mba, ka̱ yemi ba cyang nyyai dityin ti ni. Ka cong a̱ bu sseng ba̱cicrak bu ka̱bvwa ka ka̱bawon ka ka yin shyi ni. 10Ndya mba na i sai ba̱t, ba gwai ba̱gingang ka̱ram ka ban dyi ka̱ta̱ngwat ka ni. 11Ba nwa i ka̱ryi ka a̱ si shya ka̱won ka ba̱ a̱naa nka nu Maryamu. Ba ta̱gbok a̱ ka̱ sook ntong, a̱ si yrang ba̱doma mba ba a̱ trung za̱nang a̱ ka̱ ka: zinariya, bu turare ndong bu turare mur.

12Ka̱za a̱ ba̱ tyyei i ba̱zzak di ba ryok brek a̱ hyok di Hirudut ba, ba sook ryen yaan a̱ nat ka̱byen mba ka.

Ba tyong bu ka̱won ka a̱ nat i Masar

13Ba̱nyet iya ba bu drok, a̱pfong A̱gwam Ka̱za a̱ hywa di Yusufu i ba̱zzak, “Drok sook ka̱bawon ka ba̱ a̱naa nu yi tyong nat Masar se ka̱ram ka n bu ya tyyei di yi brek ni, rot Hirudut a̱ ni nwa cat ka̱bawon ka a̱ ni hywat.”

14Yusufu a̱ ta̱za a̱ta̱tuk a̱ sook ka̱bawon ka ba̱ a̱naa nu ba tyong a̱ nat Masar, 15a̱ si swat ka̱ yemi se Hirudut na̱ bun kwu.

Ku cong ba ba̱cicrak bu ka̱sak ka a̱ntyok tyyei ba̱ryat Ka̱za a̱yaan na̱ yin hywa, “N yei Ka̱won nzuk n wruk i Masar.”

Ba hywaai a̱cwwang na̱mawon

16Ka̱ram ka Hirudut na̱n bvwo ba̱necen ba nyyai a̱za̱gbang dityin nu a̱ ku raai ni, na̱ fwi diryen a̱ tyyi ba hywaai sa̱rei na̱won na̱seyang a a̱ yet za swa bu ba̱nyet ba a̱ rat a̱mi ni, i ka̱nkrang Batalami bu na̱mankrang a a̱ ba̱ hywot i, i hywak kyang a na̱ yin hok di ba̱nyet ba a̱ yin ba nyyai dityin ti ni i ka̱ram ka ban dyi ka̱ta̱ngwat ka ni.

17Wwon ku cong ba ba̱cicrak bu kyang a a̱ntyok tyyei ba̱ryat Ka̱za nu ba yin yei Irimiya na̱ yin jem ni. 18A̱ yin hywa,

“Ba hok diwan i ka̱nkrang Rama

tinying ka̱nak bu rya byyan.

Rahila a̱mi a̱ kun na̱won nu;

a̱ rak ba ku wram,

rot na bon shyi ba.”

Ba brek nyyai Masar

19Ka̱ram ka Hirudut na̱n kwu ni, a̱pfong Ka̱za a̱ tyyei Yusufu i ba̱zzak na̱ ri shyi Masar ka 20a̱ hywa, “Ta̱za, sook ka̱won ka ba̱ a̱naa nu i brek nat ka̱byen Isreila, rot ba̱nyet ba a̱ yin cat ka̱ hywat a ni a̱ ka̱n kwi.” 21Yusufu a̱ sook ka̱won ka ba̱ a̱naa nu a̱ brek a̱ ba i ka̱byen Isreila.

22Ma na̱ bu hok di Arkilayat a̱mi a̱ sook dityok a̱tyyi nu ti Hirudut, a̱ yet a̱gwam Yahudiya, na̱ hok ka̱wun nat ka ka̱ yemi. Ba ku tyyei i ba̱zzak na̱ seyak a̱ nat ka̱byen Galili. 23Ka̱ yemi na̱ sin swrang i ka̱nkrang ka ban yei Nazarat u ni. Ku cong ba ba̱cicrak bu kyang a ba̱nyet tyyei ba̱ryat Ka̱za ba ba yin hywa ni, “Ba ni ku yei a̱ntyok Nazarat.”

Currently Selected:

Matta 2: kaj

Highlight

Copy