Matta 16

Ba cat ryi kyang ka̱hat

(Markut 8:11-13; Luka 12:54-56)

1Ba̱nyet Farisa a̱yaan bu ba̱nyet Sadusi a̱ nyyai a̱ ba di Yesu a̱ bu nwa ku tssem, a̱ hywa di ba cat na̱ ba̱ tyyei kyang ka̱hat nyyai Tazwa ba ga shim a̱ yet a̱ntyok tyyei ba̱ryat Ka̱za. 2Yesu a̱ hywa da̱ mba, “Ki nom bu kwei yi hywa, ‘Ka̱bvwa ka a̱ ni yet, rot a̱ninyyan na a̱ shong.’ 3Ki yi ma̱n shyek a̱ta̱ntson yi hywa, ‘Ka̱bvwa ka a̱ ni byyi za, rot a̱ninyyan na a̱ shong a̱ tung ba̱t.’ Yi bvwo cam a̱ninyyan tazwa na, ma yi ni maai i bvwo a̱lama nkyang a nwai ka̱ram kani ni ba. 4Ba̱ka̱tuk ba̱nyet zamani bani a̱ wi pfong ka̱wun Ka̱za ni a̱ cat ba ba̱ tyyei kyang ka̱hat. To, kyang ka̱hat na ba ni ba̱ ryi ni nkpa ni yet a̱lama Yunana nu.”

A̱ drok a̱ ba̱ wwon ka̱bvwa ka.

Yisti ba̱nyet Farisa bu ba̱nyet Sadusi

(Markut 8:14-21)

5Na̱won pfong Yesu na ba bu byek a̱ nat ka̱ma̱nyyi kei ba̱shekwot ka, a̱ bring sook kyangya mba na. 6Yesu a̱ hywa da̱ mba, “Yi ta̱rwam bu yisti ba̱nyet Farisa nu bu ba̱nyet Sadusi na.”

7Ba nwa ryat mba-mba a̱ hywa, “Hywak a zin wi breng kyangya na ni, nkpa nbyyi na̱n dyat a̱mi.”

8Yesu a̱ bvwo kyang a ba ryat i a̱ ba̱ zzim, a̱ hywa, “A̱nzan a̱n byyi yin dyat bu ba̱yaan ba̱ryat wi breng kyangya? Tyyi ndya na ya zzak o? 9Hat ba̱nyying yi ka̱n bvwo baa? Yi yring ka̱ram ka n yin sam a̱kukwang burodi a̱pfon na, ba̱nyet ncyi kop tsson a̱ ya a̱ swei, har yi tung nkpikpit a, na̱nshang na̱mang yi yin hywaai? 10A̱kukwang a̱tiyring a ba̱nyet cyi kop nyaai ba ba yin za ni hwa? Yi bvat hywaai na̱nshang na̱mang? 11To, a̱nzan a̱n byyi yin wi bvwo di ba̱ryat kyangya n dyat ba? Yi ta̱rwam bu yisti ba̱nyet Farisa nu bu ba̱nyet Sadusi na.”

12Na̱won pfong a a̱ si bvwo di yisti u ba tyei an kyangya na a̱mi na̱ ryat ba ta̱rwam i ba, ma di ba ta̱rwam bu zzek ba̱nyet Farisa na bu ba̱nyet Sadusi na.

Bitut a̱ wrak ka̱nu

(Markut 8:27-30; Luka 9:18-21)

13Yesu na̱ bu nwa ka̱byen Kaisariya Filibi, a̱ zzim na̱won pfong nu na, a̱ hywa, “Ba̱nyet ba a̱ nan yei Ka̱won A̱neywu ka a̱nyan?”

14Ba hya? “Ba̱yanyet a̱ na̱ yei Yohana A̱ntyok Yya Baptisma, ba̱yanyet a̱ na̱ yei Iliya, ba̱yanyet a̱ na̱ yei Irimiya, ba̱yanyet a̱ na̱ yei a̱ntyok tyyei ba̱ryat Ka̱za a̱yaan.”

15Na̱ ba̱ zzim a̱ hywa, “To, nyin hwa, yi na n yei a̱nyan?”

16Siman Bitut a̱ hywa, “Nwan a̱mi yet Kristi nu, Ka̱won Ka̱za a̱ntyok nsso.”

17Yesu a̱ hywa da̱ nu, “Siman, a yet a̱ntyok ka̱nu-a̱tan ka̱won Yohana, rot a̱yin a̱mi a̱ na̱ tyyei ba. A shya bvwo nani nyyai da̱ A̱tyyi nzuk u a̱ shyi Tazwa ni. 18Nkpa n na̱ tyyei Bitut, a yet kpang. Tazwa nkpang kani n nin tuk coc nzuk ji, di dikwu ti ni maai i sseng ba̱ njii ba. 19Nwan a̱mi n ni na̱ ryi na̱won a̱kwado Dityok Tazwa na. Kyang a a rak i ka̱sa ka ni, ba ni kpo rak Tazwa, kyang a a shim i ka̱sa ka ni ba ni kpo shim Tazwa.”

20Yesu a̱ gbang na̱won pfong nu na di ba ryok tyyei a̱yin da̱ nu a̱ yet Kristi nu ba.

Yesu a̱ tyyei ka̱bvung ka na̱ ni sswa hat bu dikwu ni

(Markut 8:31--9:1; Luka 9:22-27)

21Nyyai ka̱ram iya Yesu a̱ nwa tyyei na̱won pfong nu na ba̱zizrak a̱ hywa, “Dolet n nat Urushalima n si sswa ka̱bvung a mbvak ba̱nekwo bu ba̱cecet ba̱gado Ka̱za bu ba̱malam Truwang ba. Ba ni n hywat, ma ka̱tuk nom a̱mba̱tat n bo ni ta sso n ta̱za.”

22Bitut a̱ ku kwwat a̱ nat a̱za̱gbang a̱yring a̱ si nwa ku byat a̱ hywa, “A̱gwam njit, bring ba̱ryat iya! Kyang ni na̱ shya ba.”

23Yesu a̱ brak a̱ hywa da̱ nu, “Tyong kyi n wwon, Ka̱ta̱nyrang. A tyyi kyang ka̱grap da̱ nzuk. A̱huhwa nwan nupa n na̱ tyyei Bitut, a yet kpan a̱ yet a̱nying ba̱nyet, ba a̱nying Ka̱za ba.”

24Yesu a̱ hywa di na̱won pfong nu na, “A̱yin nu a̱ cat ba ba̱ nzuk ni, dolet na̱ jing diccu nu a̱ cot ka̱teyang nu a̱ n tssup. 25Rot a̱yin nu a̱ cat san sso nu ni a̱ ni za̱ wai, ma a̱yin nu a̱ jing sso nu ni a̱ ga n tssup ni, a̱mi a̱ ni za̱ shya. 26A̱yin a̱ nin nat ka̱ssok ki a̱ shya sa̱rei ka̱sa ka ma a̱ wai sso ji e? Ko ba̱cincong! Kyang n shyi a̱yin na̱ nin wrak a̱n san sso nu ji ba. 27Rot nzuk Ka̱won A̱neywu n ni ba i Dityok A̱tyyi nzuk ti bu ba̱pfong Ka̱za nzuk ba, a̱wwon n si wrak koyan zang nu ba̱cicrak bu kyang a na̱ yya ni. 28Ka̱ryong n ya tyyei: ba̱yanyet ka̱yat nyin ka a̱ sseng kyi ni a̱ ni kwu ba se ba ryi brek nzuk Ka̱won A̱neywu i dityok.”

Currently Selected:

Matta 16: kaj

Highlight

Copy