Luka 21

Kwot ka-kyang

(Markut 12:41-44)

1Yesu a̱ brak a̱ ryi ba̱nyet nzwa ba shyi i kwot ka-kyang, ka̱bvwa tung krum bat Ka̱za na. 2A̱ bo ryi a̱ra̱mbyring dizot u a̱ntyok nu nu na̱ ka̱n kwu ni na̱ ma̱ nyyai a̱ bu krok kobo hwa. 3Yesu a̱ hywa da̱ mba, “Yi cyang, kyang a a̱mbyring dizot u a̱ntyok nu nu na̱ ka̱n kwu ni na̱ wrak ni ku ra̱u nying kpikpit ba̱nyet a. 4Rot mba ba bvei ka̱yat nzwa ka ba byyi ni, ma nu a̱ wrak kyang a na̱ byyi i swat ka̱sa nu na ni sa̱rei.”

Ka̱sak ka bat Ka̱za na ku nin hwwei ni

(Matta 24:1-2; Markut 13:1-2)

5Ba̱yanyet ka̱yat na̱won pfong nu na a̱ shyi i ryat tazwa bat Ka̱za ka, a̱ cin shisham nkpa ji bu na̱sham nkpang a, nta̱mak bu ka-kyang na ba̱nyet ba ba kwot i. Yesu a̱ hywa da̱ mba, 6“Yi cyang nkyang ani sa̱rei na, nom yaan bai ko kpang jring bu ni swrang ka̱bvwa shyi nji ka ba. Ba ni za̱ wop sa̱rei nji.”

Ka̱bvung ka ba̱nyet tssup ba ni sswa ni

(Matta 24:3-14; Markut 13:3-13)

7Ba ku zzim, “Malam, a̱nzan ka̱ram nkyang ani nan bai? A̱nzan zi ni ryi n bvwo ka̱ram ka a̱ yya?”

8Yesu a̱ hywa, “Yi cam ansham ho ba bu ya raai. Rot ba̱nyet ba̱gingang a̱ ni ba i diyrek nzuk a̱ hywa, ‘Nzuk n yet nu!’ a̱ bo ba a̱ bu hywa, ‘To, ka̱ram ka a̱ yya!’ Yi ryok ba tssup ba. 9Ka̱ram ka yin hok nkhang nzwang bu ssek swat i, yi ryok hok ka̱wun ba. Nkyang iya dolet na yet ka̱son. Ma ba bu ba nna na a̱mi ni tyyei la̱llei a̱ngbom ka̱ram u a̱ bya shishrek ba.”

10A̱ bo ya ka̱son a̱ hywa, “Yi ni ryi na̱byen na kwan bu na̱yaan, a̱tityok a̱ ya yet. 11Na̱bvwa ba̱gingang i ka̱sa ka a̱ ni trim a̱ ta̱ruk, zong bu nhywu koke. Yi ni cyang nkyang ka̱wun bu nkyang ka̱hat na wwut nyyai a a̱ninyyan. 12Ma nyyai nkyang ani na ka̱n ba ba ba ni ya pyyem yi sswa ka̱bvung, ba ni ya yya shirya ka̱yat a̱bat a̱duwa a̱ ya tyei a jaru. Ba ni nat ba̱ nyin a̱ta̱ssi ba̱cecet ba̱gwam i hywak nzuk. 13Ka̱ yemi yi nin shya diwat ba̱ tyyei Ka̱sham Ba̱ryat ka. 14Yi sook a ndya nyin na ryok tyyi a̱huhwa a nkyang a yi ni ryat n san a̱ccu nyin ni ba. 15Rot n ni ya ryi a̱za̱ncyi na ba̱ a̱nyyi ba̱ryat a yi ni tyyei ba̱ra̱ndwan nyin ba ba wi ton ni. 16Ba̱tyyi nyin, bu ba̱wumbeyang nyin, bu ba̱nyet nyin, nta̱mak bu ba̱rywai nyin a̱ ni ya wrak a mbvak ba̱gwam, ba hywaai ba̱yanyet nyin. 17Ba̱nyet ba̱gingang a̱ ni rak ya ryi rot yi n tssup. 18Ma ko tswa dicat jring ni brik a a̱ccu nyin ba. 19Yi sseng di cet, a̱mi yi nin shya sucet nyin na.”

Ka̱sak ka ba nin byyan Urushalima ni

(Matta 24:15-21; Markut 13:14-19)

20“Ka̱ram ka yin dyi ba̱nyet nzwang ba tyong a̱ krang Urushalima ni yi bvwo ba ni hwwei ka̱nkrang ka. 21Wwon ba̱nyet ba a̱ shyi Yahudiya ka ni, dolet ba tyong a̱ nwa an tsutsok ji; ba̱nyet ba a̱ shyi ka̱yat ka̱nkrang ka ni, dolet ba tyong a̱ wruk; ba̱nyet ba a̱ wruk a̱ shyi i na̱yit i ba ryok brek a̱ nwa ka̱yat ka̱nkrang ka ba. 22Rot nom iya a̱mi i yet nom shirya Ka̱za na, ku gi ba ba̱cicrak bu kyang a ba̱ryat Ka̱za ba ba hywa ni. 23Kaito ba̱nyring ba a̱ shyi bu na̱hwa i nom iya ni; a̱mi meyang ba̱nyring ba a̱ zzwa zwak na̱won ni. Ka̱bvung a̱ ni nwa ka̱byen ka, shirya Ka̱za si kyrek tazwa ba̱nyet ka ni. 24Ba ni hywaai ba̱yanyet di ka̱krong A̱kpat, a̱ pyyem ba̱yanyet a̱ cong a̱ tyei i ba̱jaru i na̱byen ba̱gingang. Kpikpit nwap a i nwa i shai Urushalima si tat ka̱ram ka ba ba̱ sak i ni.”

Ka̱ram brek Ka̱won A̱neywu

(Matta 24:29-31; Markut 13:24-27)

25“Yi ni ryi a̱lama a nom bu hywan bu na̱ta̱ngwat. Ka̱sa ka sa̱rei a̱ ni hok ka̱wun a̱ tyyi ba̱kinkyai, ka̱ram ka ban hok a̱yuywu ba̱shekwot na̱ gwat a̱ tang za̱ngum ni. 26Ba̱nyet a̱ ni tsseng a̱ kwi bu ka̱wun ka̱ram ka ban shyi i tot nkyang a bai ka̱sa ka ni; rot a̱cecet nkyang u a̱ shyi a a̱ninyyan ani ba ni na̱ zun. 27A̱wwon nzuk Ka̱won A̱neywu n si n hyok a a̱ninyyan na n bai bu cet bu shii dityok nzuk a. 28Ki yi bu ryi nkyang ani na nwa cong, yi yrek a̱ssi nyin na tazwa, rot ka̱ram ka ba nin ya san ni a̱ ba shishrek.”

A̱lama i ka̱kon a̱bvap

(Matta 24:32-35; Markut 13:28-31)

29Yesu a̱ bo ryat ba̱ mba a̱za̱n misali a̱ hywa da̱ mba, “Yi cyang ka̱kon a̱bvap ka bu kpikpit na̱kon na sa̱rei. 30Ka̱ram ka yin dyi na truk ni yi bvwo dikwei ba shishrek. 31A̱mi meyang, ka̱ram ka yin dyi nkyang ani ni, yi bvwo Dityok Ka̱za byya shishrek bu ba.

32“Ka̱ryong n ya tyyei: nkyang ani ni ba ba̱yanyet ka̱yat ba̱nyet ka a̱n shyi naani ni ba ri shyi a̱cet. 33Tazwa bu ka̱byen ni tyak, ma ba̱ryat nzuk ba a̱ byyi tyak ba.”

Koyan a̱ cam

34“Koyan a̱ cam, yi ryok krok na̱nu nyin i song ba̱swa bu sswa nkwwa ba, i ryok wwon a̱huhwa ka̱sa a̱ni a̱ sswa cet nyin ba; ki yi rak nom iya bu ya bvwa mbring. 35Nom iya ni ryi di a̱grung ni, rot ku ni ba a̱zi ba̱nyet ka̱sa ba sa̱rei. 36Se yi cam ansham i yya a̱duwa kozan ka̱ram i gi shya cet a yi nin maai sseng bu nkyang a ni ya ba ni i gi bu maai sseng a̱ta̱ssi Ka̱won A̱neywu.”

37Yesu a̱ tyak nnom iya na̱ zzek ka̱yat bat Ka̱za ka. Ki ka̱tuk ka a̱ kwwat, na̱ wrak a̱ si tsswa tazwa dihwan ti ban yei Zeitun nu ni. 38Kozan ka̱ta̱ntson sa̱rei ba̱nyet ba a̱ tung i bat Ka̱za na a̱ pfong zzek nu na.

Currently Selected:

Luka 21: kaj

Highlight

Copy