Npfong 10

Bitut bu Kaniliyut

1A̱ntyok a̱yaan a̱ yin shyi Kaisariya ba ku yei Kaniliyut. A̱ yin yet kaptin nsoja na ba yin yei Kamfani Italiya na ni. 2A̱ yin tyong Ka̱za; sa̱rei ba̱nyet ka̱ryi nu ba a̱ tssup Ka̱za. A̱ yin yya nkyang ba̱gingang a̱n brang ba̱nyet dizot ba̱nyet Yahuda ba. Kozan ka̱ram na̱ yya a̱duwa a̱ naai Ka̱za. 3To, ka̱tuk ka̱yaan di tswam tsat a̱ta̱nom ni, na̱ ryi a̱pfong Ka̱za ba̱zizrak na̱ nyyai a̱ bu ku sseng, a̱ ku yei “Kaniliyut!”

4Na̱ tyyi ba̱ byrep a̱ cyang, a̱ hywa, “A̱nzan a̱mi a̱ntyok ka̱ryi?”

A̱pfong Ka̱za nu a̱ hywa da̱ nu, “Ka̱za a̱ hok ansham naai nwan na a̱ bo ryi ka̱sak ka an brang ba̱nyet i, a̱ na̱ yring. 5Naani, se a tom ba̱nyet ba nat Yafa a̱ si yei a̱yanyet ba ku yei Siman Bitut. 6A̱ yet a̱yecen a̱ swat gbang Siman a̱srung a̱kpa, ka̱ryi nu ka a̱ shyi a̱mbeyang kei ka.” 7Wwon a̱pfong Ka̱za nu a̱ ryat ba̱ nu ni a̱ drok a̱ ku wwon; Kaniliyut a̱ si yei ba̱kwwa ka̱ryi nu ba̱hwa bu soja yring, ku yin yet a̱pfong ka̱wun Ka̱za ba̱t, i yet yring i ba̱nyet ba a̱ yin shyi shishrek ba̱ nu ni. 8A̱ ba̱ tyyei kyang a na̱ ryi ni, a̱ ba̱ tun a̱ tom Yafa.

9Ka̱ntson tat ba shyi tssak Yafa, Bitut a̱ wrak tazwa bat a̱ ni yya a̱duwa, a̱ta̱nom yemi. 10Cihywat i ku pyyem na̱ cat ya kyangya. Ka̱ram ka ban shyi jyi kyangya na ni na̱ ryi da̱ shyi ba̱zzak i. 11Na̱ ryi tazwa zi yrang, na̱ ryi kyang ku kyyep nyyai tazwa anye a̱godo ngre naai. 12Tazwa a̱godo iya kozan nyam ka̱yit yin shyi bu nkyang kwang ka̱byen bu na̱non. 13Na̱ hok diwan ti hywa da̱ nu, “Bitut! Ta̱za! Hwak ya!”

14Bitut a̱ hywa “Kaai, ko ba̱cincong, A̱gwam Ka̱za. I swat nzuk a n ka̱n za kyang a yet a̱shishik i ko wi yet a̱zizrak ni ba.”

15Diwan ti bu hywa da̱ nu, “Kyang a Ka̱za ka hywa di ku yet a̱zizrak ni ryok kpo sook ku yet a̱shishik ba.” 16Ba yya a̱mi a̱ bvwa ka̱tat, wwon ba krung a̱godo nu a̱ nat i tazwa.

17To, ka̱ram kani Bitut na̱ shyi i hwa kyang a Ka̱za ka zzek ni tazwa ba̱zzak ka na̱ zzak ni, ba̱nyet ba Kaniliyut na̱ tom ni ba ma̱ ka̱n zzim ka̱ryi Siman ka a̱ si shya. Ba ka̱ si tat a̱ sseng ka̱nu ka̱ryi ka. 18Ba yei a̱ zzim a̱ hywa, “A̱yecen a̱ shyi kyi ban yei Siman Bitut o?”

19Bitut na̱ ri shyi i cat bvwo kyang a na̱ ryi ka̱yat ba̱zzak ka ni, Tswa Ka̱za i hywa da̱ nu, “Cyang, ba̱nyet a̱ yemi ba̱ mba ba̱tat a̱ na̱ cat. 20Se a kyrek si ba̱ shya i nat ba̱ mba. Ryok hwa kyang ba, rot nzuk a̱mi n ba̱ tom.” 21Bitut a̱ kyrek a̱ si hywa di ba̱nyet iya, “Nzuk a̱mi yi cat. A̱nzan a̱ ba da̱ nyin?”

22Ba hywa, “Kaptin Kaniliyut a̱mi a̱ za tom. A̱ yet a̱tsatsak a̱yin, a̱ tssup Ka̱za di ka̱ryong; sa̱rei ba̱nyet ba a̱ yet ba̱nyet Yahuda ni a̱ pfong shok nu ba̱t. A̱pfong Ka̱za a̱yaan a̱ ku ku tyyei na̱ tom a̱ na̱ yei gbang nu a̱ hok kyang a a ni hywa ni.” 23Bitut a̱ tyyi ba nwa a̱ tsswa se ka̱ntson tat.

Ka̱ntson a̱ wo tat na̱ nat ba̱ mba. Ba̱nyet tssup ba̱yaan nyyai Yafa ka a̱ nat ba̱ nu. 24Ka̱ntson a̱ wo tat na̱ nwa Kaisariya, ka̱rek ka Kaniliyut na̱ swat a̱ ku tot bu ba̱wumbeyang nu bu ba̱rywai ba shyi shishrek ba̱ nu ni, bu ba̱nyet ba na̱ yei ni. 25Bitut na̱ bu na nwa na Kaniliyut a̱ wruk a̱ si mon ba̱ nu a̱ myyi ka̱byen a̱ta̱ssi nu a̱ ku byyek. 26Ma Bitut a̱ ku yrek, a̱ hywa da̱ nu, “Ta̱za, nzuk n wa ma̱n yet a̱neywu.” 27Bitut a̱ ya ka̱son a̱ ryat bu Kaniliyut hat ba si nwa ka̱yat ka̱bvwa ka ba̱nyet ba ba yin tung a̱ ba̱ tot i. 28Na̱ hywa da̱ mba, “Nyin ma yi bvwo ka̱sak ka tssup ba̱nyet Yahuda na kun bvwo koyan nu a̱ yet a̱ntyok ba̱nyet Yahuda ni na̱ mon bu nwap nzaan. Ma Ka̱za a̱ hywa da̱ nzuk di n dyok cyang a̱yin na̱ yet a̱shishik, a̱ wi yet a̱zizrak ba. 29Rot a̱mi ka̱ram ka an tom n yei ni n dak ba, ma naani n cat n hok kyang a a ni n yei ni.”

30Kaniliyut a̱ hywa, “Nnom ntat naani, n shyi i yya a̱duwa ka̱yat ka̱ryi nzuk, da̱ni di tswam tsat ni, a̱ta̱nom, n bu swat n dyi a̱yin na̱ sseng a̱ta̱ssi nzuk bu ba̱tro ba ya a̱ssi. 31Na̱ hywa da̱ nzuk, ‘Kaniliyut, Ka̱za a̱ hok a̱duwa nwan, a̱ bo ryi ka̱sak ka an brang ba̱nyet ni. 32Se a tom a̱yin na̱ nat Yafa, a̱ si yei a̱yanyet ba ku yei Siman Bitut, a̱ yet a̱yecen ka̱ryi a̱yanyet a̱ srung a̱kpa ba ku yei Siman, ka̱ryi ka shyi a̱mbeyang kei.’ 33N ma̱n tom meyang ba bu na̱ yei, a yya ansham n ba. Ba̱nyying zi shyi a̱ta̱ssi Ka̱za i hok kyang a Ka̱za ka tyyi ka̱nu nwan a bu za tyyei ni.”

Ba̱ryat Bitut ba

34Bitut a̱ nwa ba̱ryat a̱ hywa, “Ba̱nyying n bvwo ku yet ka̱ryong Ka̱za a̱ breng ba̱nyet ba̱cicrak assi nka. 35A̱yin nu a̱ pfong ka̱wun Ka̱za a̱ bo yya kyang a yet i, kozan nwap na̱ yet, Ka̱za a̱ ni pfong ansham nu. 36Yi bvwo pfong a na̱ yin tom di na̱won Isreila na a̱ ba̱ tyyei Ka̱sham Ba̱ryat myyi rya ka a̱ bai an bvak Yesu Kristi ni; nu a̱mi a̱ yet a̱gwam ba̱nyet sa̱rei. 37Yi bu bvwo a̱cecet nkyang u ba nwa yya i ka̱byen Galili a̱ si bo yya sa̱rei ka̱byen Isreila ka ni, nyyai ka̱ram wa'azi baptisma ka Yohana na̱ yin yya ni. 38Yi ka̱n hok nkhang Yesu a̱ntyok Nazarat u, ka̱sak ka Ka̱za kan ku tssa a̱ ku ryi Tswa nka ji bu cet, na̱ nwai koke a̱ yya a̱tsatsak nkyang a̱ bo creng ba̱nyet ba a̱gwam a̱ka̱tuk tswa na̱ yin yya da̱ mba ni sa̱rei. A̱ yin maai yya na a̱mi rot Ka̱za a̱ yin shyi ba̱ nu. 39Zi yet shaida nkyang ji na̱ yya i ka̱byen ba̱nyet Yahuda ka ni nta̱mak bu Urushalima. Ba ku hywat tazwa ka̱teyang. 40Ma na̱ yya nnom ntat Ka̱za a̱ bo ku shyek nyyai a̱yabyen, a̱ tyyi ba̱nyet a̱ ku ryi. 41Ba ba̱nyet ba sa̱rei a̱mi a̱ yin ku ryi ba, seko njit ba̱nyet ba Ka̱za ka ka̱n tssa zi yet shaida nu ji ni. Ka̱ram ka na̱n ta̱za nyyai a̱yabyen ka ni zi ya i bu sswa ba̱ nu. 42Na̱ za tyyi zi yya ba̱nyet ba wa'azi Ka̱sham Ba̱ryat ka ni, i shaida ka̱sak ka nu a̱mi Ka̱za ka tssa na̱ ni yya shirya ba̱nyet ba a̱ ka̱n kwi ni bu ba̱nyet ba a̱ ri yet ba̱cet ni. 43Sa̱rei ba̱nyet tyyei ba̱ryat Ka̱za ba a̱ yin tyyei ryang nu, a̱ tyyei ka̱sak ka na̱ nin tssu sa̱rei ba̱nyet ba a̱ wrak ka̱ryong da̱ nu ni a̱ka̱tukyya mba nu, rot diyrek nu ti byyi cet.”

Nwap nzaan san Tswa Ka̱za

44Nyyai Bitut na̱ ri shyi i ba̱ryat ba, Tswa Ka̱za i kyrek tazwa sa̱rei ba̱nyet ba a̱ yin swat a̱ pfong Bitut ni. 45Ba̱nyet Yahuda na yet ba̱nyet tssup ba ni a̱ yin ba bu Bitut nyyai Yafa ka ni a̱ nwa yya ka̱hat ka̱sak ka Ka̱za ka ma̱n tssa ba̱nyet ba a̱ yet ba̱nyet Yahuda ni ba, a̱ ba̱ ryi za̱nang Tswa nka ji. 46Rot ba hok ba ryat a nwap nzaan, a̱ dyep shii Ka̱za. Bitut a̱ yrek diwan nu ti a̱ hywa, 47“Ba̱nyet bani a̱ shya Tswa Ka̱za ka̱sak ka njit zi ma̱ ka̱n shya ni, a̱yin a̱n shyi a̱ nin bvwo ba ba̱ yya baptisma di ba̱shekwot o?” 48Na̱ tyyi ba ba̱ yya baptisma i diyrek Yesu Kristi. Ba ku naai na̱ yen swrang a̱ bvwa nnom ba̱ mba.

Currently Selected:

Npfong 10: kaj

Highlight

Copy