Luk 11

Ekpewa tsɛ Jisɔs ɔbanga ka Atɨm

1Igwu zan Jisɔs ɔnɔ ɔzɔm atɨm kɔ ɔwang gwan, sɛ katim okera ubuwinnam wan oben-ɛ abɛ, “Ɔvaar, kpew mana otse kwɛ ma anzɔm atɨm otse kwɛ Jɔn okpew abuwinnam pɛ.” 2Ɛma oben bɛ abɛ, “Ibe rɛ abanga ma azɔm atɨm, aben abɛ,

“ ‘Adere,

ana akpowa etse tsɔ,

ttɛ ɛvaar tsɔ ikwu.

3Nang mana utsapfɛ pfi igwu kazan kazan.

4Bɨna nang mana ki ilom ra amana,

otse kwa abba ana bɨna anang anang pa assi ilom anang mana.

Tɨm mana ananga antto ke eyoma.’ ”

5Jisɔs okoro oben abuwinnam abɛ, “Odesɛ ɔnang wan ubɨna otto kew oyogudɨkko ki irɨng tem obenɛ abɛ, ‘Oyogudɨkko, for-m akpara atan pa abrɛd. 6Ukwurabɛ oyogudɨkko kwam napro ukwu owem ko osenga, ɔttɔg ko ode fɛ mɨ nang-ɛ utsi.’ 7Oyog kwu unɨng kɛ ɛtanga ɔpɔn-ɛ abɛ, ‘Nang-m udɨg ayag. Kɔ ɔtsɔm nkpaga ɔttara uva pam aba ayɨm amabɛ ki iwakpa. Mɨnke nbɨna nnang-ɔ ɔttɔg fidede.’ ” 8Jisɔs oben bɛ, “Nteg banga ɔkwɔna ɔnanukka ubɨna abɛ ɔnang oyogudɨkko abrɛd masɛ ode oyogudɨkko, ukwur sɛ udwunɨng nwo ɔyag-ɛ udɨg kidam, ɛma nu ubɨna ubɨna ɔnang-ɛ abrɛd otse kwɛ oror.

9“Nɨn nteg banga abɛ, bɔw, abɛ na anang-ɔ ɔnang, ror na sose, kpɔg, ɛkpaga ne egwonga-ogwonga ɛnang-ɔ. 10Ɔnang kwidede gwɔ ɔbɔw, ɔkama; ɔnang kwo oror ose, ɔnang kwɔ ɔkpɔg, ɛkpaga egwonga ɛnang-ɛ.

11“Anɛwɔ unɨng mama kwo ode otte, odesɛ unwa kwɔ ɔbɔw-ɔ eten tsa assi, ɔma sɨma anang-ɛ izɔw? 12Ɔmanga uda abɛ ɔbɔw ɛnɔn si, ɔma anang-ɛ inɨnang? 13Odesɛ abangama kwɛ na assi ilom asong otse kwɛ abanga na nang uva ɛnanga ɔkkatsɛ, Atte kwu unɨng kɛ ɛrang mussi ɔyɔnga ma ukwurabɛ nɔ ɔnang ɔkpakpa kwu Ubɨnɔkpaabyi ka anang pa ɔbɔw-ɛ!”

Jisɔs ɔttara ko Sɛtan

14Jisɔs wɔ unu ukuw akpakpa pyuwa pyi nisi ɔnang ɔkpɛma, ibe ra akpakpa pyuwa mbyo ibɨn irɨg-ɛ udwunɨng nwo otitso kɔ ɔtɔnga, akwɛ okkona ayoganang. 15Ayog ban aba ben abɛ, “Jisɔs unu utɨm ɛffa tso Sɛtan, ovaar kwa akpakpa pyuwa, ukuw akpakpa pyuwa ka anang.” 16Ayog ban ayom-ɛ Jisɔs abɛ ɔkɔg bɛ ikkikkona dɨg ri ibɨn kɛ ɛrang.

17Jisɔs osong nttem ra abɛ, oben abɛ, “Ɛvaar tsidede tsa atsɛ ekew atsɛma oyen abɛ atsɛ ki illɨga, ɔtsɔm kwo okew-okew akwɛ no ottotto. 18Odesɛ Sɛtan okew, uruma ɛma oyen abɛ, ɛvaar tsɛ missi yan ebe? Amma ntɔng itɔnga nda ukwurabɛ abanga aben abɛ amma nkuw ɔkpakpa pyuwa kɛ ɛffa tsa Sɛtan. 19Masɛ amma nɨkuw akpakpa pyuwa kɛ ɛffa tsɛ Sɛtan, abuwinnam pa abanga abɛ na akuw kɛ ɛffa tsa anɛ? Abɛma bɔ ma apong-ɔ. 20Odesɛ amma nkuw akpakpa pyuwa kɛ effa tsu Ubɨnɔkpaabyi, abanga songa abɛ Ɛvaar tsu Ubɨnɔkpaabyi ki ikwa etor banga.

21“Odesɛ ɔnang kwɔ ɔkpɔg irɨma odo ɛkpakpa tsɛ okker ɔtsɔm kwɛ, ekpo pyɛ nɛ ɛnanga ɔnanga. 22Ibe rɛ ɔnang ɔdwag kwɔ ɔkpɔg ɛffa ɔyɔng-ɛ uruma abɛ, okema, ɔtaga ekpong kpo pyɛ, ukwu ɔtaga okpowaga mbyo okew ɔnanga ayog.

23“Ɔnang kwɔ ɔna ammabɛ nu nɨnga oyogikwan kwam wɔ, ɔnang kwɔ ɔna kano otora ntowa, ɔnɔ tsarɔtsara.

24“Ibe rɔ ɔkpakpa pyuwa uyɨn urɨg ɔnang, osenga ɔbawa ɔwang kwu ugwugwu ono oror ɔwang kwɛ mu unɨnga fɨnu ussa. Okwo oben abɛ, ‘Amma nɨn mang innam kɔ ɔtsɔm kwu nbɨn.’ 25So oto owem, ose ɔtsɔm ngwo abɛ ka akwɛ atanga akwɛ uwur, aba addo kwɛ atsog. 26Ɔkpakpa pyuwa ngwo ɔttɔ taga akpakpa pyuwa asenaffa pa pyuw ayɔnga ɛma utɨma abubɛ ɛnwa ɔnang nwo. Akpen pɔ ɔnang nwo urɨg mama zizan aba apyuw ayonga pu utitso urɨg.”

27Masɛ Jisɔs nɔ tɔnga idɨg nda, ukwanɨng kwu nɨng ɔtar bɛ ma ɔtɔnga ɛmang kɛ ɛrang, “Udɨrada ode ɔkka nwo kwɔ ɔmang-ɔ ɔttara utɨm-ɔ.” 28Jisɔs ɔpɔn-ɛ abɛ, “Udɨrada mode kwa anang pa awang ɔtɔnga kwu Ubɨnɔkpaabyi aba assi otse kwɛ ɔtɔnga oben.”

Ɛkɔga si ibɨn ku Ubɨnɔkpaabyi

29Masɛ anang akwa asaw, Jisɔs oben abɛ, “Anang pa arɨg mamazizan aluloma bɔ, abɛ na aror ɛkɔga, ɛkɔga zan zan tsɛ mɨn nang kede oyonga ɛkɔga tsɛ Jona. 30Masɛ Jona ode ɛkɔga tsa anang pa Ninivɛ, otse ngwo gwɔ Unwa kwu Udwunɨng mo de ma kɔ ɔyagbɨn nwa. 31Ɔvaar kwanɨng kwɛ Shɛba nu ubɨn obe ki ibe ri iponga ru Ubɨnɔkpaabyi ɔttara ka anang pa atsema okɔga bɛ idɨg ra abɛ assi nizuwa ukwurabɛ ema ubɨn ke eden tsi uwuruwur ɔkwɔ ɔkɔm esonga tsɔ Ɔvaar Sɔlɔmɔn, mamazizan ɔnang kwɔ ɔyɔnga Sɔlɔmɔn unɨng mama. 32Anang pɛ Ninivɛ aba na abɨn abɛ ki igwu tsi iponga ɔttara anang pɛ etsema, aba akɔga bɛ idɨg ra aba assi nizuwa ukwurabɛ aba tte ɔbɔg ki idɨg pyuwa ra abɛ nassi kɔ tɔnga kwu Ubɨnɔkpaabyi kwɛ Jona ɔtɔng ɔnang bɛ, mama ɔnang kwɔ ɔbar ɔyɔnga Jona unɨng mama.

Ekpon tsɛ ɛkpakpa

33“Ɔnang ko ode kwɛ mo oyen ekpon ko ottewikang ɔtaga uduwuduw, pɛrɛ ataga efege ubuwa, no oyen ekpon ɔtaga otsog kɔ ɔwang kwa abɛ na arena fasɛ anang abɛ na ase ekpon sa abɛ na anwa kɛ ɛtanga. 34Atsen pɔ bɔ ade ottewikang pɛ ɛkpakpa. Odesɛ atsen pɔ azuwuzuw, ɛkpakpa tsɔ ede ekpon. Odesɛ atsen pyɔ ipyuwupyuw ɛkpakpa tsɔ ibɨng ede ugwutwar. 35Songa abɛ ekpon si inɨng-ɔ ugwutwar sang. 36Odesɛ ɛkpakpa tsɔ ibɨng ede ekpon, ɔwang ko ode kwu upyɨnupyɨn, ɛkpakpa tsɔ ibɨng atsɛ ne ede masɛ otewikang kwo ono oyen-ɔ.”

Jisɔs ɔkɔga abɛ Afarisi ɔttara akpewinyɨna ra Mosis na atora

37Ibe rɛ Jisɔs kɔ ɔtanga ngwo ukka, farisi wan ojer-ɛ abɛ ɔta ga kɔ ɔtsɔm aba ta tsi utsapfɛ. Osenga ɔta oto unɨnga ɛyer abɛ utsi ɔttɔg. 38Farisi nwo ose abɛ Jisɔs mbɔg nokpowa, otse kwɔ ɔmmana dɨg kwa abɛ oben, pɛrɛ utsi utsapfɛ, akwɛ okkon-ɛ.

39Ɔvaar Jisɔs oben-ɛ abɛ, “Abangama Afarisi abanga na kan omonwa ki iyan ɔttara ke efege, kɛ ɛtanga igwɔra dɔ iffu banga ɔttara ki idɨg pyuwa. 40Abangama akwungkpa anang; ɔnang kwu ussi iyan ema sang ussi ɛtanga? 41Nang apkukpora ɔttɔg pfa apfu unɨng kɛ ɛtanga tso omonwa ɔttara ka afege, ɔttɔg pfidede apfɛ nuwuruwur ɔnang-ɔ.

42“Upyuw ɔnang banga afarisi, abanga anang Ubɨnɔkpaabyi wan kwa zow pye ekpo pyɛ ini issi utsapfɛ olew ɔttara ka akwong tɔng pya agwa abanga manga asama udɨg ɔkka ɔttara ididaga ru Ubɨnɔkpaabyi. Ɔbanma kwɛ abanga ma assi idɨg ndo ibɨng.

43“Upyuw ɔnang banga afarisi, ɔnɔ ɔdag banga aba abanga anɨnga ka akpokoro tso kɔ ɔdappa ɔttara aba asɨm banga kɨ nsha.

44“Upyuw ɔnang banga ukwurabɛ abanga ade tsɛ kwɛ eppekwur tsa aba anasong, anang asenga ma kɛ ɛrang sa aba nasong.”

45Ɔnang wan kwo song inyɨna ɔbɔw-ɛ abɛ, “Okpew nnwer, ibe rɔ ɔma atɔng ɔtɔnga ngwa, ɔma agba reng aba nkpar ɔttara.”

46Jisɔs ɔpɔn-ɛ abɛ, “Abangama akpewinyɨna, nupyuw ɔnang banga ukwurabɛ abanga na aye ɔnang ɛtɔga tsi ititam abɛ ɛtɔga, abangama oyen abanga bɛ ɔbɔg make.

47“Nu pyuw ɔnang banga, ukwurabɛ abangama na ammɨn nppekwur pyi izuwuzuw abanga akpowa ategnkkawa pu Ubɨnɔkpaabyi pa aba atte pa abanga aba afɔ. 48Abangama ade attɛnsɛ attara atsera ki idɨg ra aba atte assi. Aba affɔ ategnkkawa pu Ubɨnɔkpaabyi, abangama ammɨn bɛ appekwur pyi izuwuzuw abanga akpowa ategnkkawa pu Ubɨnɔkpaabyi. 49Ukwur idɨg nda ra abanga nassi Ubɨnɔkpaabyi ke esonga tsɛ oben abɛ, ‘Amma nɨtɔm ategnkkawa pu Ubɨnɔkpaabyi ɔttara ka atɔmɔtɔm, ayog ban abɛna afɔ bɛ ɔfɔ, nboga abɛ na nang bɛ irem.’ 50Anang pɛ mamazizan abɛ na anang bɛ irem masɛ affɔ ategnkkawa pu Ubɨnɔkpaabyi so titso ko okpe kwa assi ɔyagbɨn. 51Aba atitso sa aba afɔ Ɛbɛl oto owem ki ibe ra aba affɔ Zakariya kwa aba afɔ ko ottekwɛ kɔ ɔwang kwa abɛ na affɔnɛzza ɔttara Ɔwang kwu Uwuruwur. Ku udɨg ɔkka anang pɛ mamazizan abɛ na anang bɛ irem.

52“Nupyuw ɔnang banga, abangama akpewinyɨna tsɛ Mosis, ukwurabɛ abanga kɔ ɔgbɔgɔrɔ kwe esonga ataga. Abangama oyen na anwa, abanga akpa anang eden pa abɛ na ben ba anwa.”

53Ibe re Jisɔs ubɨn muma afarisi ɔttara ka akpewinyɨna tsɛ Mosis aba atitso aba akkar-ɛ ɛmma kidam ɔttara abɛ abɔw-ɛ ashɔg. 54Fasɛ aba pfuw-ɛ ku udɨg kwɛ mɔ ɔtɔnga.

Currently Selected:

Luk 11: mfn

Highlight

Copy