Kisah Para Rasul Uram 14

Paulus ab Barnabas ab Ikonium atei bindoka kurandei uram

14:1-20

1Ikonium atei binmarei ura, er Paulus ab Barnabas ab aryi sun minob ukubmarei to ukuboka sun Yahudi yala nang aryi buluboka Musa Uram eteren ai asi wengbinmarei. Wengbinmareici, Teleb Uram eterebmarei uca, ninyi yubwa-yubwa dib tenebmai. Ara, Yahudi yala nang ababyi yuk yala nang ababyi Er Imtamnyi Uram dib tenebmai. 2Dib tenebmai bok, sun a uram bai donokmai Yahudi yala nang aryi talak doboka kerebmai. Kerebmai uca, sun Er Imtamnyi Uram walwal nang kanya Er Yesus dib tenebmai nang asi yu kubmou. 3Kubmou bok, uki mikbaryi ara er Paulus ab Barnabas ab sun akatei dib tenen nang ab tonkwa kunmai. Tonkwa kunmaici, sunci Er Imtamnyi bisi dib tenebmarei deyok aryi, sunci ilil kum asa aryi Er Imtamnyi Uram etererandei. Etererandei ba, Er Imtamnyi mikib deib aryi ilil tenen dinyi ilinto kiknirandei. 4Ukurandei bok, sun akatei nang nirya ara lulubdandoka deici bitinyi kibmai. Ura, ton nang ara sun Yahudi yala nang asi milibmai. Ba, ton nang ara sun Teleb Uram eterebde barandei nang asi milibmai. 5Ura, sun Er Imtamnyi Uram walwal nang ab, sun Yahudi yala nang ab, ton sun akatei menengna nang ab antaniboka uram touboka, “A nang asi duboka keil aryi molokoka yongobkwayeb,” ebdanmai. 6Ura, sun eterebde barandei nang aryi a uram toubmai asi kekebmarei ura, sunci anaboka Likaonia mutuk kuboka atei si Listra ab Derbe ab atei dam mutuk ab bindoka kisibdobmarei. 7Kisibdobmareici, sunci akatei nang ababyi Teleb Uram etererandei.

8Listra atei ara ninyi tentok yan deneamwe bok, deiaminyi ton kuramwe. Anyi bira yibana yan ninikoka mikib yaboka yibinman kum kuramunyi kuramwe. 9Anyi bira er Paulus biryi Teleb Uram eterenmou asi kekebmouci, “Kwetebnute,” tenen Er Imtamnyi bisi dib tenebmou. Tenebmou asi, er Paulus biryi ersi asing eiboka, “Dib tenebmar,” tenen bikmou. 10Bikmou ura, er Paulus biryi uram weik doboka, “Katabum eboka tikokdum,” ebmou. Ebmou ba, er yan deneamunyi biryi ninikum eboka tikoka yibarkiringmou. 11Ba, sun a bulubmai nang aryi asing eibmaici, sunci ngolokoka sun uram ara Likaonia uram deib aryi, “Nai e, ninyi sun du bisi ninyi kiboka nun kankan dam lak kiboka yanmaring,” ebmai. 12Ebmai cok, sunci er Barnabas bira sun moloraminyi ninyi sun du si Zeus tenebmai. Ba, er Paulus bira sun du Hermes tenebmai. Er Paulus bira uram erkarenanyi kibmou ati, sunci ersi Hermes eboka si dobmai. 13Ebmai ba, er Zeus bisi naboka moloramunyi bira baitam kuboka kwemdeina molon ai aryi kuboka yanmou. Ara, “Moloboka karebkwayeb,” tenen erci sapi ab kerketa ab atei bisik bublan dam boyanmou. 14Ura, er Barnabas ab Paulus ab a kekebmareici, sunci sun ongon aling kwilikloboka ato eboka uram dobmarei. 15“Ni kwit yabwe, sun una kunmarum do? Nunda ninyi sirik sun ton nang kununum. Nunda Er Imtamnyi biryi ebmou Teleb Uram asi etereryanmasinim. Ara, sunci sun du molon dinyi takoka Er Imtamnyi bisi molobdarur. Anyi bira kam kururnyi biryi im dangna tukwe dangna me kwan tam ab, a kurur dinyi nirya kiknibmounyi kurur ati, ebmanim. 16Minob talak ara sun im dangna tukwe dangna yala yuk-yuk sun talyi molon dinyi moloramnyi ba, Er Imtamnyi biryi sunsi bisik kum sengnamwe. 17Bisik kum sengnamwe asi Er Imtamnyi biryi Erdamnyi sunsi lak kimdaramwe ba, sunsi kum tangloramwe. Ara, kisal dakoka imtam aryi kuboka mo kareramuryok, Er kisal deib aryi kwaning ilinto nong kurdeiriramwe. Ara, Erci sunsi yina kareboka bourdeiransiryok, Erci sun kanya asi kilkil kurdeiriransir,” ebmarei. 18Sun Teleb Uram eteren deyok nang aryi ato ebmarei bok, sun akatei nang aryi, “Nun du yabwe asi kareboka molobkwayeb,” tenen kanya boboka, “Kum takwayeb,” tenebmai. “Kum takwayeb,” tenebmai bok, er Paulus ab Barnabas ab aryi tabak-tabak eboka, “Mem,” enmarei ba, takmai.

19Ura, Antiokhia atei ab Ikonium atei ab kuramnyi Yahudi yala nang ton yandoka sunci sun Listra nang asi, “Paulus ab Barnabas ara malyi uram eteren nang,” ebmai. Ebmai uca, sun Listra nang aryi er Paulus bisi keil doboka yongobmai. Sirya yongobmai ura, sunci, “Er Paulus sirya dibmar,” tenen ersi kiliboka baitam dobkwetebmai. 20Tenebmai bok, sun dib tenen nang aryi yandoka er Paulus bisi aknaboka tingmai bok, er Paulus bukokaburyi, atei dam binmou. Mabmai ani, berekwe ura, er Paulus ab Barnabas ab tonkwa Derbe atei binmarei.

Er Paulus ab Barnabas ab Siria mutuk aryi kuboka Antiokhia atei tamurbinmarei uram

14:21-28

21Ura, sun Paulus Barnabas ab aryi Derbe atei bindoka Teleb Uram eterebmarei ba, ninyi ilinto aryi Er Imtamnyi bisi dib tenebmai. A sirya ura, sunci tamuryandoka Listra atei ab, Ikonium atei ab, Pisidia mutuk aryi kuboka Antiokhia atei dam yanmarei. 22Yanmarei ura, sunci sun akatei kuboka dib tenen nang asi ebnin yanmarei cok, sun kanya katabum ebdeibmarei. Ara, sunci sunsi, “Tanglona mem. Er Yesus bisi dib tenebdarur,” eboka, “Ninyi aryi nunsi mambul dinyi ilinto kurdeiriransing biriman aryi nunda Er Imtamnyi amwetam kun nang kibdobkwayeb.” Ato eboka sunci akatei kuramnyi dib tenen nang asi eterebnin binmarei. 23Eterebnin banmarei cok, er Paulus ab Barnabas ab aryi sun dib tenen nang asi kalikwamnyi nang asi tikeibmarei. Ara, Er Imtamnyi bisi moloboka yina si tebmai cok, a wibmarei nang asi Er Imtamnyi urasin dam erebdeibmarei. 24A sirya ura, er Paulus ab Barnabas ab anaboka barandei ani, Pisidia mutuk aryi kuboka Pamfilia mutuk binmarei. 25Binmarei ura, a mutuk aryi kuboka Perga atei binmarei ura, Teleb Uram eterebmarei ura, Atalea atei binmarei. 26Atalea atei akiryi anabdobmareici, co ngun-ngun bukoka me kwan deici banmarei ani, Siria atei aryi kuboka Antiokhia atei tamuryanmarei. Akatei ara sun dib tenen nang aryi er Paulus ab Barnabas ab asi, “Er Imtamnyi biryi sunsi teleb kuboka milibsici ba, Teleb Uram eterebdurum,” eboka yuma bokdonokmai. Ati, ukuryok Teleb Uram sirya eterebde barandei ani, akatei asi tamuryanmarei. 27Yanmarei ura, sunci sun dib tenen nang asi nabmarei ura, sun kurandei to nungmarei. Ara, sunci, “Er Imtamnyi nunsi miliransir ba, bublan kukeibmou uca, sun yuk yala nang ababyi Er Yesus bisi dib tenebkaliraming,” ebmarei. 28Ebmarei ura, er Paulus ab Barnabas ab sun Antiokhia atei kuramnyi dib tenen nang ab tonkwa kuboka uki ilinto kuramnyi.

Currently Selected:

Kisah Para Rasul Uram 14: MTG

Highlight

Copy