Kisah Para Rasul Uram 13

1A talak ara sun Antiokhia atei kuboka Er Yesus bisi dib tenen nang kankan aryi Er Imtamnyi Uram ebdeibmaca etereramnyi nang ton kuramnyi. A nang si ara Barnabas ab, Simeon uruma si Bol Mirinyi ab, Lukius Kirene ateinyi ab, Menahem bira Herodes ab neik susuk nebmareinyi ab, Saulus ab kuramnyi. 2Kuramnyi ani, uki tentok tum neika buluboka yina si teboka Er Imtamnyi si weik enmai bok, Er Imtamnyi Kanya Roh Kudus aryi sunsi ato ebmou, “Niryi er Barnabas ab er Saulus ab ati, ‘Ni wa ibkwanding,’ tenen nabmase ati, sunci tikeibdarur,” ebmou. 3Ebmou ura, yina si teboka Er Imtamnyi bisi molobmai cok, sunci Barnabas ab Saulus ab asi taruk erebdeiboka tikeibmai ura, “Ur birurum,” eboka bokdonokmai.

Saulus ab Barnabas ab Siprus mutuk binmarei uram

13:4-12

4Ura, Er Imtamnyi Kanya Roh Kudus aryi arukmou ba, Barnabas ab Saulus ab Seleukia mutuk bindoka, “Siprus mutuk binkwayeb,” tenen weik co ngun-ngun bukoka me kwan deici banmai. 5Banmai ani, Siprus mutuk kuboka Salamis atei binmai. Binmai ura, sunci sun Yahudi yala nang buluboka Musa Uram kekeramnyi ai yuk-yuk asi wekoka Er Imtamnyi Uram eterebde binmarei. Eterebde binmarei ura, er Yohanes bira sunsi miliramwe. 6Eterebde barandei cok, Siprus mutuk doramnyi atei yuk-yuk yibinmai ani, Pafos atei yanmai. Yanmai ura, Yudea mutuknyi si Baryesus a kuramwe. Anyi bira kwemdeina deib aryi ninyi kweteramunyi kuramuryok, Er Imtamnyi si deib aryi tola uram eramunyi kuramwe. 7Kuramuryok, anyi Baryesus bira akatei sienyi si Sergius Paulus er kwit kuramwe. Er Sergius Paulus bira utotoa dinyi diboka bingnanyi kuramwe. Kuramuryok, erci, “Er Imtamnyi Uram kekebtinyi,” tenen er Barnabas ab Saulus ab asi, “Yatiring,” eboka nabmou. 8Yanmarei bok, er kwemdeina si deib aryi kweteramunyi si Baryesus bira Yunani uram deib aryi Elimas eboka namnaminyi biryi, “Bisik sekminikwan,” tenebmou. Ara, erci, “Sienyi bisi Er Imtamnyi Uram dib tenebcei,” tenen ukubdenmou. 9Ukubdenmou bok, er Saulus bira uruma si Paulus eboka namnaminyi bira Er Imtamnyi Kanya Roh Kudus langkibmounyi biryi er Elimas tam er urasin deibmou. 10Deibmouci, erci ersi ato ebmou. “Se, kanda isa sienyi si Iblis milinanyi kurum. Kanda teleb dinyi nirya ati bimsa yarinanyi kurum. Kanci, ‘Tola eboka malyi kubdeibtinyi,’ tenen kanya akwe borandim. Kanci tanglona kum Er Imtamnyi dib en uram asi tola uram kimnandim. 11Ati, ukuryok Er Imtamnyi biryi wenebkici uca, kan asing kubkwamakir ba, kiting sinarya asi asing kum einkwandim,” ebmou. Er Paulus biryi ato ebmou ba, er Elimas asing oba lilibdongobmou ba, er taleblilibmou cok, er boyibankwamnyi nang asi ingkiringmou. 12Ura, akatei sienyi biryi a kubmou dinyi asing eibmou ura, erci, “Nai e,” teneboka Er Imtamnyi Uram asi dib tenebmou.

Paulus ab Barnabas ab Pisidia mutuk aryi atei si Antiokhia binmai uram

13:13-52

13Ura, er Paulus ab er kwit yabwe ab Pafos atei aryi anaboka co ngun-ngun bukoka me kwan deici banmai ani, Pamfilia mutuk doramnyi atei si Perga binmai. Binmai ura, er Yohanes bira sunsi takloboka Yerusalem atei tamurbinmou. 14Tamurbinmou bok, er Paulus ab Barnabas ab Perga atei aryi kuboka Pisidia mutuk doramnyi atei si Antiokhia yanmai. Yanmai ura, uki ta tum ara wa in kum uki si Sabat tum berekwe ura, sunci sun Yahudi yala nang buluboka Musa Uram eteren ai wengbindoka bukmarei. 15Er Musa kerek sekamwe uram ab sun Er Imtamnyi Uram ebdeibmaci to lak etereramnyi nang ab aryi kerek sekamnyi uram asi nukmai ura, sun Musa Uram eteren ai deyok nang aryi ato eboka sunsi molobmai. Ara, “Ni kwit yabwe, sun a kekenmang nang kanya asi teleb kurdeirin uram eterebkwandanyi sun kankan aryi kubci ura, ur eterebdur,” ebmai.

16Ato eboka molobmai ba, er Paulus tikoka er taruk mobmob ebmou cok, uram ebkarebmou. Ara, erci, “Ni kwit yabwe Israel yala nang ab, ‘Er Imtamnyi bisi milibtibyi,’ tenen nang ab, ni ebkun uram kekenindarur. 17Minob ura, nun Israel yala nang aryi molonubnyi Imtamnyi biryi nun abwe yabwe asi wibdeibmou. Wibdeibmou ura, yuk mutuk Mesir mutuk kuramnyi bok, Er Imtamnyi biryi kisal dangnamwe uca, nun yala nang ara mi yaldangdamnyi. Ura, mikib kuboka Er Imtamnyi biryi leboka sunsi mutuk Mesir aryi bobinmou. 18Bobinmou ura, nun yala nang ara ninyi kun kum mutuk asi kwalina empat puluh baryi kuramnyi ba, Erci sun malyi dinyi asi eiriramwe bok, anmalakoka kum weneramwe. 19Ura, Erci arukmou uca, weik sien nang tabaryi aryi taleramnyi mutuk nang nirya asi obkiribmai ura, Er Imtamnyi biryi Kanaan mutuk sunsi karebmou. 20Karebmou ura, Kanaan mutuk kuramnyi ba, kwalina empat ratus lima puluh baryi bisibmou.

Bisibmou ura, Erci malyi deyok lilin nang yuk-yuk karebmou ani, Erci Er uram ebdeibmaca bobaramunyi Samuel bisi karebmou. 21A sirya ura, sun Israel yala nang aryi Er Imtamnyi bisi, ‘Weik sienyi ara nun kalikwansiranyi karebsurum,’ eboka moloramnyi. Moloramnyi uca, Er Imtamnyi biryi Benyamin yalanyi si Kish mi Saul bisi sunti tikeibmou. Anyi bira kwalina empat puluh baryi sunsi kalingnamwe. 22Kalingnamwe bok, Er Imtamnyi biryi er Saul bisi kisibdonokoka er Daud bisi sunti unuboka tikdeibmou. Anyi Daud biti Er Imtamnyi biryi ato lak ebmou. Ara, Erci, ‘Isai mi Daud bira Ni kanya teleb kurdeiriraniranyi bisi niryi wibman. Erci Ni kanya teleb kubkwanir dinyi ukubkwande,’ ebmou.

23Ura, Er Imtamnyi biryi, ‘Er Daud yala nang aryi ninyi tentok Ninyi Lemsinanyi sun Israel yala nang asi erebdeibkwan,’ eboka ebdeibmou to, Erci kunubmou. A tikeibmounyi ninyi Lemsinanyi bira Er si ara Yesus kurur. 24Er Yesus biryi ninyi lemna kabul talak ara, er Yohanes biryi sun Israel yala nang asi, ‘Sun malyi kun dinyi taklobmunyi ura, Er Imtamnyi kanya teleb kurdeirin dinyi kunubmunyi ba, niryi sunsi me dongobkwansin,’ eboka uram doramwe. 25Doramuryok, er sirya eterebkou tum ara er Yohanes biryi sun Israel yala nang asi, ‘Sunci nira unanyi tenebmanurum do? Nira ninyi Lemnanyi kum kunun. Ninyi Lemnanyi bira ni dongtam yankwandanyi Iya Erebdobnyi kurur ati, niryi Er yan karuk tabwe asi lobman kumnyi kunun,’ ebmou.

26Ati, ni kwit yabwe nun abwe Abraham yala nang ab, tonda sun yuk yala nang aryi, ‘Er Imtamnyi bisi milibtibyi,’ tenerandum nang ab kekendarur. Er Imtamnyi biryi ninyi lebkwansir en uram Erci nunsi eterebmurubsou. 27Sun Yerusalem atei nang ab sun menekoka, ‘Ato kubkwayeb,’ en nang ab aryi Er Yesus bisi dib kum teneboka Ersi obmai. Obmai bok, sunci ato kuboka sun Er Imtamnyi Uram ebdeibmaci to lak etereramnyi nang aryi kerek sekamnyi to kunubmai. Ara, wa in kum uki si Sabat tum tuba-tuba kekeraming uram kunubmai. 28Ati, sunci, ‘Er Yesus bisi obtibyi,’ tenebmai bok, Erci malyi kubmou deyok ton kum eibmai ati, sunci er Pilatus bisi bindoka, ‘Er Yesus bisi obdeibsurum,’ eboka molobmai. 29Ura, sunci sun Er Imtamnyi Uram ermururamnyi nang aryi kerek sekeiamnyi to nirya kunubmai ura, sunci Er Yesus bisi co lase deici aryi loboka tukwe dongobmai. 30Dongobmai bok, Er Imtamnyi biryi Ersi kam bukeibmou. 31Kam bukeibmou ura, Er Yesus biryi sun Galilea mutuk kuboka Er ab tonkwa Yerusalem atei binmai nang asi bindoka, ‘Ni sirya kam bukokman,’ eboka lak kimbinmou. A nang ara kam bukokmounyi ab ebdanmai nang aryi sun Israel yala nang asi, ‘Kam bukokmou,’ eboka etereransing. 32Ati, ukuryok nunci sunsi Teleb Uram eteresunub. Ara, Er Imtamnyi biryi nun abwe yabwe asi minob ebdeibmou uram ati ebman. 33A ebdeibmou uram ara Er Imtamnyi biryi Er Yesus bisi kam bukeibmou cok, nun abwe yabwe yala nang asi kunubdeibsou. Ara, Mazmur bitinyi dinyi aryi mot libmounyi biryi Er Yesus biti kerek sekamwe to, kunubmou. Ara, Er Imtamnyi biryi Er Yesus bisi ebmou to kerek sekmou ara.

‘Kanda Ni Mi kurum. Arub aryi Niryi Kansi si doboka Ni Mi ebkwinkin,’ sekmou. (Mazmur 2:7)

34Er Imtamnyi biryi Er Yesus bisi ato ebmou to, dib kunubmou. Ara, Er Imtamnyi biryi Er Yesus bisi kam bukeibwe ura, tubto kum dibkwande. A deyok aryi, Er Imtamnyi biryi Erti ato ebmou.

‘Niryi er Daud bisi diboka kisal dangnanse ato, kanbabyi diboka kisal dakwankin,’ ebmou. (Yesaya 55:3)

35A deyok ati, yuk Mazmur mot umbura aryi ato ebmou.

‘Nira Kan wibmanumunyi kunun ati Kanda Imtamnyi biryi, “Er nong lubcei,” tenen iya kam bukeibkwanirim,’ ebmou. (Mazmur 16:10)

36Er Daud kuramwe talak aryi erci Er Imtamnyi teleb teneramwe to kunuramwe ani, sirya dibmou ura, er abwe yabwe tukwe dongoramnyi ai asi tukwe dongobmai. Dongobmai ura, er Daud nong asi lubmou ati ebman. 37Er Daud nong lubmou bok, Er Imtamnyi biryi kam bukeibmounyi Yesus bira Er nong ara kum lubmou. 38Ati, ni kwit yabwe, a deyok aryi, sunci bikdarur ara Er Yesus biriman aryi Er Imtamnyi biryi sun malyi kun dinyi ati, ‘Kilibkwansin,’ eboka eteresurur. Sunda er Musa kerek sekamwe uram deib aryi kilibman kum dinyi ababyi Er Imtamnyi biryi, ‘Nirya kilibkwansin,’ eboka eteresurur. 39Ara, unanyi-unaner aryi Er Yesus bisi dib tenebingnyi nang nirya asi Er Imtamnyi biryi sun malyi kun dinyi kilibkwansir. 40Ati, sunci Er Imtamnyi Uram dib tenebmunyi ba, sun Er Imtamnyi Uram ebdeibmaci to lak etereramnyi nang aryi kerek sekamnyi to sunti kunubsicei. Ara,

41‘Sunda ina ngilingnanurum nang se, sunci asing eibmamuncok, “Nai e,” tenebmunyi ura, ur dibdarur.

Sun kam tuba kuramun ba, niryi ilil tenen dinyi kiknibkwan.

A kiknibkwan dinyi ara ninyi aryi sunsi liliboka lak eterebsingnyi bok, sunci dib kum tenebkwanurum.’” (Habakuk 1:5)

Ato eboka Paulus biryi eterebmou. 42Er Paulus biryi ato eboka eterebmou ura, er ab Barnabas ab anabmarei ba, sun kekebmai nang aryi sunsi, “Wa in kum tum tubto kubci ura, neik deyok eboka eterebsururum,” eboka molobmai. 43Ura, Er Imtamnyi eterena uram sirya kekebmai ura, Yahudi yala nang ilinto ab yuk yala nang ab aryi, “Er Imtamnyi bisi milibtibyi,” tenen nang ab er Paulus ab Barnabas ab asi milibmai. A nang ara sun ab uram sisingmai ura, er Paulus ab Barnabas ab aryi sunsi, “Er Imtamnyi biryi sunsi kisal dangsurur ati, sunci Ersi tuba-tuba milibdarur,” eboka ebdeibmarei.

44Kunmai ani, o wa in kum tum berekwe ura, akatei nang nirya Er Imtamnyi Uram kekeryanmai. 45Ninyi yubwa-yubwa kekeryanmai asi sun Yahudi yala nang aryi asing eibmaici, sunci yu kanya boboka er Paulus ab Barnabas ab aryi ebmarei to ati, “Malyi uram aca,” eboka kerebmai. Kerebmai cok, sunci Er Imtamnyi si yan yanibmai. 46Yan yanibmai bok, sun Paulus ab Barnabas ab aryi ilil kum asa aryi ato ebmarei. “Er Imtamnyi uram Teleb Uram ara sunda Yahudi yala nang asi yuma eterebsitinimyi bok, sunci, ‘Iya kam kun dinyi nun li,’ tenen bai donokmarum ati, sun yuk yala nang asi bindoka eterenunum. 47Ara, Er Imtamnyi biryi nunsi ato eboka aruksou,

‘Niryi kansi sun yuk yala nang asi berengdeirinanyi tikeibmakin.

Ara, kanci sun im dangna tukwe dangna nang asi lebkwandim ati, tikeibmakin,’” ebmarei. (Yesaya 49:6)

48Ura, sun yuk yala nang aryi a ebmarei uram kekebmai ura, sun kanya kilkil kuboka Er Imtamnyi si weik ebmai. Ebmai cok, sun kankan aryi Er Imtamnyi biryi minob wiamwe nang aryi Er Imtamnyi Uram dib tenebmai. 49Dib tenebmai ura, Er Imtamnyi Uram ebde baramnyi uca, a mutuk nang nirya kekebmai. 50Kekenmai bok, sun Yahudi yala nang aryi yu kuboka sun akatei kuboka, “Er Imtamnyi bisi milibtibyi,” tenen sien nang nerabwe ab, sun akatei nang sien nang ab asi bindoka er Paulus ab Barnabas ab ati, “Malyi kun nang,” eboka talak dobmai. Talak dobmai ura, sun akatei nang aryi, “Obtibyi,” tenen sunsi a mutuk aryi bai yakdonokmai. 51Yakdonokmai ba, er Paulus ab Barnabas ab aryi sun yan akatei yanibmarei tukwe kilibloboka atei si Ikonium bindobmarei. 52Bindobmarei bok, sun Antiokhia atei dib tenen nang ara sun kanya kilkil kuramwe ba, Er Imtamnyi Kanya Roh Kudus sunsi tuba-tuba langkiramwe.

Currently Selected:

Kisah Para Rasul Uram 13: MTG

Highlight

Copy