Luka 24

Yesu Kuu pang Por Nanzu

(Mat 28.1-10; Mar 16.1-8; Yoh 20.1-10)

1Ɗǝ pee kanas viin Ladyaa, ayii kyai cir noong kaa kasak pang a nak ara kun kyaa. 2A taa sokghai kaa ɓwak ton tǝtar kaa puk nung maa ara kun kyaa ta. 3Ng kaa lǝri ta kǝshii maa ara kun kyaa, a sok tǝpun Mulok Yesu rak. 4Kaa ta kǝshiin koora maa aɗoo ya ta shii kyaa, asum mɓaa taa shambal nyee ɗaa kǝrɓǝt kal sǝtuk kǝng nyendalaki kan kee vii ri, ta nggǝr yena. 5Ayii kyaa wop kap yen shee a ryak shii yen ndaa. Amorom kyaa ɓan yen ka, “Tung yeni pang yin yara mung Kǝng wom kǝshii maa angaa kuusaa paa? 6Ng ta tii rak. Nanzu yaa! Gidan ɗaa awung kǝ ɓan yin mee, kǝng mee Galiliyaa. 7Shee ka, ‘Fan Sum a naa ma kwak maa angaan rama, a gwomza maa koning gandalangaa, kǝshii yisa taatɗaa nanzwak!’ ” 8Pang ayii kyai a gidak ɗaa awung kǝ Yesu ɓan yen mee.

9Yeni kaa por kala ara kun ki, pang a ta ɓan angaa byaa mee ware nyar gaat ki, ɗaa dǝs maa sum, awung kǝ wari. 10Ayiing kaa ɓan angaa byaan Yesu awuna ki, a yeni a Maryamu mang kǝ war Magadala ɗǝ Yowana ɗǝ Maryamu nakng Yakub, ɗaa dǝs maa yiin kaa ɗǝ yen. 11Nzup ɗǝ kaɓan awan tokghaan Yesu na aɗoo ta awung kǝ ayii ki shee rak, ta ɓyaa yena ɓet ni pang ayii kyaa sheeki. 12Nzup ɗǝ kaɓan Biturus nanzu mang ɗaa ɓol pang nak ta ara kun kyaa. Pang karang shee foo yis ta kǝshii kyaa, pang ɓee pǝri ki kaa karkaɗa ara gaatɗa. Pang por lokghaa ɗǝ ndus shiisa shiin maa awung kǝ wari.

Yesu ɗaa sum Mɓaa Shin Imuwaswaa

(Mar 16.12-13)

13Vii pana asum mɓaa ta kǝshii maa angaan byaan Yeswaa a ta sǝra naa kyaa fan ndar yena kaa tokghaaki ka Imawus. Soran Urushalimaa ɗǝ Imawus gang koran shii ware nyar gaat. 14A ta nungaa ɗaa ɗakghai shiin nzup maa awung kǝ wari. 15Kaa ta nungaa ɗǝ gida maa aɗoo ya ta shii maa awen kyaa, pang Yesu ɗǝ shii mee taa war yen maa, pang ng sǝraki ɗǝ yen. 16Nzup ɗǝ kaɓan a yok ka mee ni rak.

17Pang yiɓǝn yen ka, “Nung yeni pang yin sheeki ɗaa ɗakghai kǝ yin ta sǝra kyaa paa?”

Pang a shambal yis yen zhak ka aɗoo yen yarsa ni. 18Gaat ta kǝshii yena, mang kǝ tǝsak mee ka Kiliyobas, pal ma ta ka, “Woni sheeni ta Urushalimaa ˈyeenaa, kaa yok mu awung kǝ wari ta ayisa ryaa rakghaa?”

19Shee yiɓǝn yen ka, “Yeni wari paa?”

A pal ma ta ka, “Awung kǝ sok Yesu mu Nazarat. Ng mu fwan nung Vitor ni, mu shedna ni kǝshii awung kǝng ɗǝ shaaki ɗǝ sheen nung nggen Vitora ɗaa nzup maa sum. 20Amushori maa sungwarin Vitor ɗaa mushorin war, a kap ma na Bilatus, pang kom maa toorng kwaa, a gwomji ma koning gandalangaa. 21Wo mee ˈyaa aɗoo ta ka mee ni taa ɓwakghaa Isaraila fwak. Mee ni, ɓari yisa taat ni ri kaa awuu mari wari. 22Dǝbarin kaɓan ayii dǝshai ta kǝshii waraa a ɓan war awung wop yen. Ng kaa war ta ara kun kyaa ɗǝ pee kanas, 23nzup ɗǝ kaɓan a ta sok tǝpun mee rak. A taa ɓan war ka amor shee yen yis pǝla. A ɓee awan tokghaan zarng Vitor, kaa ɓan yen ka ng ta wom. 24A dǝshai ta kǝshii waraa, a nakghai pang a ta Sokghai kaɓan ni duk, kan kee mang kaa yii kyaa taa shee, nzup ɗǝ kaɓan a ɓee ma rak.”

25Pang Yesu ɓan yen ka, “Yinaa angaan kǝ yin ɗǝ sakghaɗa rak! Yin ɗǝ yala ˈyee maa awen nyee rak, nzup maa awun kǝ angaan fwan nung Vitor shee ya! 26Yin ɗǝ yokghaki ka ng warangaa ni ka Kǝristi swaa bungaa maa awuna maryai, kaa pang kaa mak ma rakghaa?” 27Pang kap ɓana yen nung shiin shiiring Musa ɗǝ warangaan nzup ma angaa fwan nung Vitor, pǝl yen nzup maa awun kaa warang ta shii myaa kǝshiin nung Vitora.

28Ng kaa gang pyet ta fan ndarng kaa naaki ta, Yesu shii kan kee ng laksaki nggena ni. 29Pang a kwarshii ma ka, “Kusuk, ɗaa ɗǝ war! Kǝryakghan ɓwak shiiyaa, vii piri yaa.” Shee Yesu bii yen ta lǝr ta lok kyaa pang ɗa ɗǝ yen.

30Kǝ ɗaa tung kǝ rii awura ryaa ɗǝ yen, kǝ cir pampam ki pang kwarshii Vitor shee popsar ma pang kapshii yen maa. 31Pang yis yen pǝl tang ni pang a yok ka mee ni. Ɗoo too kala yen. 32Pang a yiɓǝn aɗakghai yen ka, “Aɗoo war wunaki rak nyaa kǝng ɓana war ta gwarshaa, kǝ pǝl war maa awarangaan nung Vitora?”

33Pang a nanzu nyee shee a por niyang Urushalimaa. Pang a naa ta sok angaa byaa mee aware nyar gaat ki ɗaa dǝs maa sum kyai, kaa tokshii ya ara gaatɗa. 34A ɓan asum mɓaa ki ka, “Duk! Mulok nanzu ya, ɓwak zhak shii mee ya ta Simana!” 35Shee asum mɓaa pan shee awung kǝ sok yen ta gwarshaa, ng kǝ popsar pampam tang ni pang a yok ka mee ni.

Yesu ta War Angaa Byaa Mee maa

(Mat 28.16-20; Mar 16.14-18; Yoh 20.19-23; Awu 1.6-8)

36Kaa ta koora nungaa shiin maa awen kyaa, shee a ɓee Yesu ɗǝ shii mee wari taa shambal tǝɗoo yena, ɓan yen ka, “Waryaa.”

37Wop kaɓ yen, ndus yen ɗǝ kǝ nyaa nɗur, a ta ka naangaazhaa ni pang a ɓee. 38Pang ɓan yen ka, “Yeni ryak pang yin shaa wop paa? Yani ryak pang yin na aɗoo yin rak paa? 39Ɓasan akwak min ɗaa kuɓol min kǝ yin ɓee, mani ɗǝ shiimin. Gunzan mi, kǝ yin ɓee. Naangaazhaa ɗǝ nam ɗǝ kukub rak, kan kee mang kǝ yin ɓee ng ɗǝ mee ri.”

40Mee kǝ ɓan yen kaɓan pang zhak shii yen akwak mee ɗaa kuɓol mee. 41Nzup ɗǝ kaɓan a naa aɗoo ta rak, tung katla maa aɗoo ɗǝ awung shiishan ndus. Tung kaɓan yiɓǝn yen ka, “Yin ɗaa wuɗakghai tǝɓii mang ryaa yaa?” 42Pang a kom ma geeshiing kaa shiishii yaa. 43Shee yal pang ri ta yis yena.

44Shee ɓan yen ka, “Mari ni awun kǝng mee ɓaa yin Kǝng mee ɗǝ yin ka, nzup awung kaa warang ta shii mina kǝshiin Shiring Musaa, ɗǝ warangaa ma Angaan Fwan nung Vitor ɗǝ Nɗurng nak dap ni kǝ shiil.”

45Pang pǝlshii yen maa karkǝɗoo yen tung kaa yok warangaan nung Vitor. 46Por ɓan yen tǝkwak ta ka, “Ng warangaa ni kǝshii nung Vitora ka, Kǝristi bungaak, kǝshii yisa taat pora nanzwak kwaa ya. 47Ng warangaa ni tǝkwak ka, kǝshii tǝsak myaa nung shiin shiiɓǝlla maa aɗoo, ɗǝ porsa furayang maa ram, a shee nung ki ta nzup maa tǝlǝm maa para, kǝ kap kǝshii Urushalimaa. 48Yin ni angaan kǝ yin ɓee awuu mari, yin ni naa ta ɓaa a dǝshai. 49Ng tona yin maa awung kǝ Dǝ min ciri ta aɗoo myaa, ka naa yin. Nzup ɗǝ kaɓan shakghan ta kǝshiin Urushalimaa shee Vitor ni ton yin maa shadnan kǝ waraa toora.”

Yesu Turi Niyang Toora

(Mat 16.19-20; Awu 19.11)

50Pang Yesu wuwara yen kǝshii Urushalima wunak yen pyet ɗǝ ndarng Betanya. Pang mwok kwak mee toora shee foo yen maa myak zar. 51Kǝng ta fwaa yen ma myak zaraa, pang kala yen, turi niyang toora. 52Pang a mak ma tǝtang, a por Urushalimaa ɗǝ katla maa ɗoo ɗǝng. 53Kǝ nanzu ta viin nbana nzup maa vii a kǝshiin lokng Vitora, kaa makghaa Vitor.

Currently Selected:

Luka 24: (Boi) Tiyaa

Highlight

Copy