Luka 22
22
A Yar Shing kwaan Yesu
(Mat 26.1-5,14-16; Mar 14.1-2,10-12; Yoh 11.45-53)
1Ayisang Lakng ryaan Pampam ng kǝ Iyis ta rak, mang kaa tokghaaki ka Lakng Nyera, taa yaa pyet. 2Amushorin maa sungwarin Vitor ɗaa angaa maksan shiiring Musa a yar shiin ka kaa wuu sok Yesu wun ara ɓukghaa, nzup ɗǝ kaɓan a shii wopng maa sum.
Yahuda Mung kǝ Cir Yesu Ryap
(Mat 26.14-16; Mar 14.10-11)
3Pang Shetan lǝr ta aɗoo Yahudaa mang kaa tokghaa maa ka Iskaryoti, gaat ta kǝshii maa angaa byaa mee ware nyar mɓaa pana. 4Yahuda niyang pang ta lǝng nung ɗaa mushori maa sungwarin Vitor ɗaa mushorin maa angaa shakng lokng Vitor gwarshii kǝ cira Yesu ryapɓa yen ma. 5Pang a shii katla maa aɗoo, shee a lǝng ka yen naa ma pyar. 6Ng kǝ Yahuda yal ˈyee ki, Shee yar gwarshii kǝ cira Yesu ryapɓa yen ma, ara ɓukghaa, kǝ muɗakghai yokghai rak.
Kasan Lakng Awura Ryaan Nyera ki
(Mat 26.17-25; Mar 14.12-21; Yoh 13.21-30)
7Shee ayisan Lakng ryaan Pampam ng kǝ Iyis ta rak taa gang, ta ayisa kyaa ni pang a naɓa Fan cakng mang Lakng Nyera. 8Yesu ton Biturus ɗǝ Yohana, shee ka, “Naan kǝ yin ta kasa war maa awura ryaan Lakng Nyera ki koo rii ta.”
9A yiɓǝn ma ka, “Pee ni pang a ruɗaki koo ta kasa paa?”
10Yesu pal yen ta ka, “Ng yin ni lǝr ta ndar kyaa, yin shama ɗǝ sum yen ɗǝ dǝrǝng min shii myaa, byaan ma kǝ yin nak ta lokng kǝ lǝr ta. 11Kǝ yin ɓan mu lok ki ka, ‘Mu maksa ni yiɓǝnaki ka, kǝshii maa Sheeni mang kǝng ryaa awura ryaan Nyera ta ɗaa angaa byaa min pee?’ 12Mulok ki wura tura yin lokng toora, kǝ zhakgha yin banji kǝshii mang kaa ɓwak fur araa ɗaa yaa ta. Kǝ yin Kasa war ma awura ryaa ki ta tang.”
13Biturus ayen Yohana nak ta ndar kyaa, a naa ta Sokghai kan kee awung kǝ Yesu ɓan yen ki. Pang a kasa Awuran Nyera ki ta tang.
Ryaa maa Awura ryaan Nyera
(Mat 26.26-30; Mar 14.22-26; 1Kor 11.23-25)
14Kǝ dǝtng sheemi ki shii, Yesu ɗaa wan tokghaa mee ɗa ara gaatɗa ka kaa rii awura ryaa. 15Shee ɓan yen ka, “Kukomng ryaan awuran Nyera mari ɗǝ yin wun mi yaa ɗakghai ka koo rii kaa pang kǝng bung. 16Ng ɓana yin ka, ng yaa ryaa Awuran Nyera ta rak shee ayen ni shiil ma ta tǝruun Vitora.”
17Pang Yesu cir kulatng min Inabi#22.17 kǝtǝr Inabi: kǝtǝr ni ta ndar Isaraila kaa ɗǝ zora min dugur mee kaa swaaki., shee shii katla maa aɗoo Vitor maa pang shee ka, “Yelan mari, kǝ yin kaɓshii ta tǝshii yina. 18Ng ɓana yin ka, ng yaa swaa min Inabi ɗǝ yin ta rak shee naskǝng kǝ tǝruun Vitor ni tari.”
19Shee cir pampam shii katla maa aɗoo Vitor maa pang popsar ma shee nayen, shee ka. “Mari ndus min ni, mang kǝng na tung yin. Kǝ yin ɗǝkǝ shaa kaɓan tung gida ɗǝ mak ta.”
20Dǝbarin kaa kǝd ryaa maa wura ryaa ki, pang Yesu cir kulatng min Inabi tǝkwak, pang shee ka, “Mari min Inabin ˈyeenan ˈyaan pashii ni mang kǝ Vitor puk ma ɗǝ nggii min, ng kaa furayang tung yin.#22.20 1Kor 11.25. 21Nzup ɗǝ kaɓan, mung kǝ cira mi ryapɓak wo ta ryaa kyaa ta ara gaatɗa ɗǝ mee. 22Fan Sum kwaak kan kee mang kǝ Vitor ɓwak shee yaa pan, nzup ɗǝ kaɓan nakghaa awuu visa ni ta mung kǝ cir ma ryap!” 23Pang angaa byaa mee ki lǝr yibsǝna aɗakghai yen ka, nani ta kǝshii waraa pang shaa awuu mari paa?
Shibshiilan Nung Shin Tǝmushoryaa
24Angaan byaan Yesu lǝr shiibshiilan nung shiin mung kǝng mushori ta kǝshii yena. 25Shee Yesu pal yen ta ka, “Aruun maa angaan kaa ɗa Yahudu ni rak, a zhakgha angaa yen shadnan tǝruu. Angaan tǝruu ki a tokghaa shii yen ka amarng maa sum. 26Nzup ɗǝ kaɓan kun kǝ yin shii kaɓan rak. Mung kǝng mushori ta kǝshii yinaa, kun kǝ nak kan kee mung kǝ ɓyak njot ta kǝshii yinaa, mung wura yin kǝ nak kan kee kori ri. 27Nani mung kǝng mushori paa? Mung kǝng ɗaaki shiin jii yaa kǝng ryaaki nyaa koo mung kǝng kaɓsa awura ryaa nyaa? Ng taka mung Kǝng ɗaaki shiin jii yaa kǝng ryaaki ni rakghaa? Nzup ɗǝ kaɓan ng ta kǝshii yinaa kan kee mung kǝng kabsa yin maa ri. 28Yini angaan kǝ yin Shambal dǝbari mina ta ayisang kaa vǝvǝran myaa. 29Ng shiir yin maa shiini kǝ yin shii tǝruu, kan kee aruu ri, kan kee mang kǝ Dǝ min shiiring maa shiini kǝng shii tǝruu kan kee Ruu ri. 30Ta kaɓana, yin ryak, yin swaak ɗǝ mak shiiin jiin tǝruun mina, yin ɗaa ta jiin toora, kǝ yin kom nung ta shii maa tǝlǝm ware nyar mɓaa mang Isaraila.”
Biturus Ryaa nung ka Mee Yok Yesu rak
(Mat 26.31-35; Mar 14.27-31; Yoh 13.36-38)
31Pang Yesu ɓan Siman Biturus ka, “Siman, Siman, ɓee! Shetan sok gwarshiin yaa ka kǝ kam yin, ka kǝ piɓi yin kan kee piɓan yom ni. 32Nzup ɗǝ kaɓan, Siman ng kwarshii Vitora tung mu, ka kǝ naan maa ɗoo mu kǝ shiishii rak. Pang ng woni shiiɓǝl aɗoo mu taa ta makghaa, ka shadn kurung maa zaa mu.”
33Biturus shee ka, “Mulok, ng shama kǝng bii ku kǝshii lok ma morom ma koo kuushii war wok.”
34Yesu palta ka, “Biturus, ng ɓana ku, ɓari a ryaa nung ka, a yok mi rak, ɓol taat kaa pang kǝ gwannakuri foo nung pee kanas.”
Awung Kaa Warang Shin Yeswaa Shilak
35Pang Yesu yiɓǝn yen ka, “Kǝng ton yin mee, ɗǝ zaring pyar rak ɗǝ awukuɓol rak ɗǝ zukuluk rak, yin ta sok awen rakghaa?”
A pal ma ta ka, “Wo Sokghai.”
36Yesu ɓan yen ka, “Nzup ɗǝ kaɓan zheri nzup mung kǝng ɗǝ zarin pyar kǝ ciri, mung kǝng ɗǝ zukuluk kǝ ciri. Mung kǝng ɗǝ mbaram rak kǝ cir kǝrɓǝt mee ryap kǝ ryap ta. 37Ng warangaa ni ka, ‘A koora ma kǝshii maa angaa shaan ram ma.’ Ng ɓana yin ka, awuna mari nak dab ni kaa shii ma ta shii mina. Ng kaɓan ni, awun kaa warang ta shii mina shiilak kan kee mang kaa warang ri.”
38Angaa byaa mee ki a shee ka, “Ɓee, Mulok, wo ɗaa mbaram mɓaa tii.”
Shee ɓan yen ka, “Kalan mban.”
Yesu Kwarshii Vitor shiin Agenakng Zetuna
(Mat 26.36-46; Mar 14.32-42)
39Yesu war niyang shiin angenakng Zetuna kan kee mang kǝng ɗǝ shaaki ri, shee angaa byaa mee bii ma. 40Ng kaa ta gang taa ara kyaa, shee ɓan yen ka, “Kwarsan Vitor tung kǝ yin piri kǝshiin kamaa rak.” 41Yesu shii nggena ɗǝ yen njot, shee karang pang ng kwarsa Vitor, 42Ng sheeki ka, “Dǝ min, ng woni ruɗaki, kaa porang maa ɗǝ kulatng bungaa mari ta shii mina, nzup ɗǝ kaɓan awung kǝng ruɗaki ni pang a byaa rak, kǝ nak ta mamwaa.” 43Pang Fan tokghaan zar mang Vitor war toora taa shadn maa kurung. 44Kǝ Yesu ta kǝshii shiirka maa aɗoo yaa ɗǝng, kwarshii dǝ mee Vitor ɗǝ nzup maa ɗoo mee mang kǝ ryak kaa raa pyaa wari ta ndus myaa kee nggii ri pang ng kyok kyokghaa jiraki ndaa.
45Kǝ nanzu ta aran kǝng ta kwarsa Vitor ta, shee por ma nak taa angaa byaa mee ya, ta sok yen kaa niyaa mor, shama wun yena tung shiirka maa ɗoo. 46Pang Yesu yiɓǝn yen ka, “Yeni ryak pang yin naa mor paa? Nanzwan kǝ yin kwarshii Vitor tung ka kǝ yin piri kǝshii kamaa rak.”
A Kap Yesu
(Mat 26.47-56; Mar 14.43-50; Yoh 18.2-11)
47Kǝ Yesu yakghai ta sheenin nungaa, shee aɓum maa sum taa gang, shee sum mang kaa tokghaa ma Yahuda Iskaryoti, mang gaat ta kǝshii maa ware nyar mɓaa kyaa, mee ni lǝr yen nggena. Shee nak pyet ɗǝ Yesu ka kǝ shee waryaa ɗǝ kwaɓsan ndus Yesu maa. 48Tung kaɓan Yesu yiɓǝn ma ka, “Yahuda, a ryapɓa Fan Sum ɗǝ waryaang kwaɓsan ndus nyaa?”
49Kǝ angaa byaan Yesu ɓee awun kǝng nanzwaki, a yiɓǝn ma ka, “Mulok, wo shamma kwasara yen ɗaa mbaram koo ɗǝ mee yaa?” 50Gaat ta kǝshii ma angaa byaa mee kyaa kwam kutun tǝshen koring mushori maa sungwarin Vitor ɗǝ mbaram mee.
51Nzup ɗǝ kaɓan Yesu palta ka, “Kalan mban!” Shee gunji kutun sum ki pang por ɗǝ kutu ki taa raa.
52Pang Yesu ɓan naa mushori maa sungwarin Vitor ɗaa mushori maa angaan kaa shaa shakng lokng Vitor, ɗaa mushoring ndar, mang kaa taa kaɓa ma ka, “Ng mushori maa awan wuu ni pang yin taa yara mi ɗaa mbaram ɗaa koɓaa? 53Kǝng ɗǝ yin nzup maa yira ta kǝshii lokng Vitora, yin kap mi rak. Nzup ɗǝ kaɓan vii yin ni ɓari mang kǝ Shetan mushorin maa angaa tǝbiibi shaa awuu mee ɗǝ shadnan visa.”
54Shee a kap Yesu pang a wunak ma ta lokng banjin mushori maa sungwarin Vitora. Biturus shii ta byaa yen dǝbaryaa yang yang. 55A dǝshai pip rwaa yaa kaa pisaki ta tǝɗoong karin lokng banjin mushori maa sungwarin Vitor kyaa. Biturus ta ɗa ɗǝ yen. 56Fai yen kǝng kori ni, ɓee ma kǝ taa ɗa nggǝr rwaa kǝng pisaki shee ɓasa ma ɓee kun kun, shee ka, “Sum mari a mee ɗǝ Yesu!”
57Nzup ɗǝ kaɓan Biturus rii nung ta shee ka, “Yii ri, ng yok ma rak!”
58Kaa fedn mon njot, muɗakghai ta kǝshii yen ɓee Biturus pang shee ka, “Wokghai maa a gaat ta kǝshii yena ni.”
Shee Biturus palta ka, “Sum, mani rak!”
59Kǝ gang pyet dǝtsheemi, shee sum yen por shee tǝkwak ka, “Kǝduk-dukghaa sum ni a ɗǝ mee ni, tung ka ng mu Galili ni.”
60Biturus palta ka, “Sum ri, ng yok awung kaa sheeki ri rak!” Kǝng ta shee kyaa kaɓan, shee gwannakuri foo nung. 61Mulok Yesu ɗoo shiiɓǝl yis pang ɓee Biturus ta. Shee Biturus gidak ɗaa wung kǝ Mulok Yesu ɓan ma ka. “A ryaa nung ka a yok mi rak ɓol taat kaapang kǝ gwannakuri foo nung peeng kanas.” 62Shee wari kaaryaa pang shiidn yal yal.
A Rinza Yesu
(Mat 26.67-68; Mar 14.65)
63Angaa kaa ˈyii yen shakng Yesu a ɗǝ kǝ rinza ma pang a ɗǝ mokghaa ma lem. 64A shiir maa yis ɗǝ kǝrɓǝt, pang a yiɓǝn ma ka, ɓan war. “Mung kǝ mok ku lem!” 65A shii ta shee nung kǝ ryakghaa Yesu tǝsak rak.
Yesu Nggen maa Angaa Komang Nungaa
(Mat 26.59-66; Mar 14.55-64; Yoh 18.19-24)
66Kǝ ara tashii, amushori maa sum, amushori maa sungwarin Vitor ɗaa angaan maksan shiiring Musa a taa sham shii. Shee a wunak Yesu ta nggen yena. 67A shee ka, “Ɓan war! Woni Kǝristi kyaa?”
Yesu pal yen ta ka, “Ng mani ɓan yin, yin yala ˈyee ki rak. 68Ng mani yiɓǝn yiin. Yin palang mi ta rak. 69Nzup ɗǝ kaɓan, kǝ kap zheri, Fan Sum ɗaa ta kwakng tǝshen Vitora, Mung kǝ Ɓyak Shadna Nzup.”
70Pang nzup yen a yiɓǝn ma ka, “Woni Fan Vitora?”
“Palta ka, ˈyee, mani.”
71Pang a shee ka, “Yeni ryak pang wo yara angaa swaan ɓii ta shii myaa tǝkwak paa? Wo ɓwak yiri yaa ta nung myaa!”
Currently Selected:
Luka 22: (Boi) Tiyaa
Highlight
Share
Copy
Want to have your highlights saved across all your devices? Sign up or sign in
©️2022 Luke Initiative for Scripture Translation
