Lucas 5

Atska pescädukunata Pedro tsarinqan

Mateo 4.18-22; Marcos 1.16-20

1Uk kutiñam Genesaret qoćha#5.1 Galilea qoćhapa waklä kućhunćhömi käqan Genesaret marka. Tsë markaćhö täkoq runakunam Galilea qoćhataqa “Genesaret qoćha” ñiyaqpis. kućhunćhö Jesús yaćhatsikïkaptin kićhkiypa runakuna qorikäyäqan Teyta Diospa willakïninta wiyayänanpaq. 2Tsë qoćha kućhunćhömi ishkë büquikuna këkaqta Jesús rikaskëqan. Pescaq runakunaqam büquinkunapik yarquskir mällankunata mëllëkäyäñaq. 3Tsëmi Simónpa#5.3 Simónpa uknin shutinmi Pedro käqan. kaq büquinman Jesús eqarkur rugaköqan qoćha kućhunćhö büqui këkaqta mas ćhöpinman wititsiyänanpaq. Büquiman uchïkurmi runakunata yaćhatsikamöqan.

4Yaćhatsiyta ushaskirñam Simónta ñëqan: “Kananqa mas ćhöpin kaqman büquikita apayë. Tsëćhö mällëkikunata itayë pescädukunata tsariyämunëkipaq” ñir.

5Simónñam ñëqan: “Teytë, kanan paqas warat pesquëkarpis mana ni ukllëllatapis tsariykuyätsu. Qam ñiyämaptikeqa mälläkunata mä yapë itayäshaq”.

6Tsënö ñirmi mällankunata chumaq mashtëkur alläpa atskata pescädukunata tsariyämöqan mällankunapis raćhinäranqanyaq. 7Tsëñam ukllan büquićhö pescaq masinkunata qemllar qayakuyäqan orqötsir yanapayänanpaq. Ćhëkurmi ishkan büquinkuna hundinanqanyaq pescädukunata rakiyäqan.

8Tsëta rikëkurmi Simón Pedro Jesúspa ñöpanman qonqurikïkur ñëqan: “Teytë, ñoqapik witikullë. Ñoqaqa utsasapa runam kä” ñir. 9Alläpa atska pescädukunata tsariykurmi pescaq masinkunawan alläpa mantsakar Simón tsënö ñëqan. 10Tsëćhöllam mantsakäkuyäqan Zebedeupa tsurinkuna Santiaguwan Juanpis. Pëkunaqa Simónpa pescaq masinkunam. Tsënö mantsakäyaptinmi Simónta Jesús ñëqan: “Ama mantsakëtsu. Pescäduta pescayämunqëkinömi kananpikqa runakunata qoriyämunki Teyta Diospa munëninćhö kayänanpaq”.

11Tsënö ñiptinmi büquinkunata qoćhapik orqaskamur imëkankunatapis itaskir Jesúswan ëwakuyäqan.

Leprawan qeshyaqta Jesús kutikätsinqan

Mateo 8.1-4; Marcos 1.40-45

12Uk markaćhö Jesús këkaptinñam leprawan qeshyakoq uk runa ćhäqan. Jesústa rikëkurñam urkunpis patsaman töpanqanyaq kitiykur ñëqan: “Teytë, munarqa kë qeshyënëpik kutikätsimë” ñir.

13Tsënö rugakuptinñam Jesús yatëköqan: “Kananpikqa kutikaskinkiñam”.

Tsënö ñiptinmi tsë hörapik lepra qeshyënin illakäñaq. 14Ñirkurñam Jesús ñëqan: “Kutikätsinqaqta ama pïtapis willakunkitsu. Tsëpa rantinqa kutikanqëkita rikäshunëkipaq cüraman ëwë. Ñiykurña kutikashqaña kanqëkita llapankuna musyayänanpaq templuman apë Moisés qellqanqanćhö ñinqannö purificäkunëkipaq ofrendëkita” ñir.#5.14 Lepra qeshyëwan qeshyaq runakuna kutikarkur imata rurananpaq kaqkunapik masta musyanëkipaq liyinki Levítico 14.1-32.

15“Ama willakunkitsu” ñiykaptinpis mëćhö tsëćhömi runakuna musyaskiyäqan. Tsëmi atskaq qorikäyäqan yaćhatsikunqankunata wiyayänanpaq y qeshyëninkunapik kutikätsinanpaq. 16Jesúsqa imëpis tsunyaqkunaman ëwëkurmi Teyta Diosman mañakoq.

Mana puriyta puëdeq runata Jesús kutikätsinqan

Mateo 9.1-8; Marcos 2.1-12

17Uk wasićhömi Jesús yaćhëkätsiptinmi tsëćhö uchurëkäyäqan fariseukuna y ley yaćhatsikoqkuna. Pëkunaqa shayämushqa kayäñaq Galilea provinciapa mëtsë markankunapik, Judea provinciapik y Jerusalénpik. Qeshyaqyashqakunata kutikätsinanpaqmi Teyta Diospa poderninwan Jesús käqan. 18Tsëmanmi runakuna quirmawan wantushqa ćhätsiyämöqan puriyta mana puëdeq runata. Pëkunaqa imëkanöpis Jesúspa ñöpanman yëkatsiytam munayäqan. 19Alläpa runakuna kićhkishqa kayaptinmi imanö këtapis mana puëdiyäqantsu. Tsëmi wasi ananman eqarkatsir wasi ananta ućhkuskir waskawan watarkur kaćhäyäqan quirmantinta Jesúspa ñöpanman. 20Tsë runakuna pëman confiayanqanta musyarmi tsë qeshyëkaq runata Jesús ñëqan: “Llapan utsëkikunapik perdonashqam kanki” ñir.

21Tsëñam tsëćhö wakin ley yaćhatsikoqkunawan fariseukuna yarpaćhakur ñiyäqan: “¡Pïtan kë runaqa llutallata parlan Diosta piñatsir! Teyta Diosllam utsa ruraqkunataqa perdonan” ñir.

22Tsënö yarpëkäyanqanta musyarmi Jesús kënö tapöqan: “¿Imanartan qamkuna llutallata yarpäyanki? 23Mëqantan mas afán kanman: ¿Runapa utsankunata perdonëku? ¿O qeshyëkaqta kutikätsiyku? 24Runapa Tsurin#5.24 Runapa Tsurinpaq parlarqa kikinpaqmi Jesucristo parläqan. Tsënöpam tantiyatsëqan Daniel 7.13-14-ćhö qellqarëkanqannö Runapa Tsurin kanqanta, kutimunanpaq kanqanta (Lucas 12.40; 17.22-30; 18.8; 21.27) y llapanpaq munëniyoq kanqanta (Lucas 6.5; 22.69). kë patsaćhö munëniyoqmi runakunata utsankunapik perdonananpaq. Tsëtam kanan musyayanki”.

Tsënö ñiskirñam mana puriyta puëdeq runata ñëqan: “Shärir quirmëkita apakurkur wasikipa ëwakï”.

25Tsënö ñiykuptin tsë runañam llapankuna qorirëkäyaptin ñöpankunapik tsinan höra itaranqan quirmanta ñikshakurkur wasinpa ëwaköqan Teyta Diosta alabarnin. 26Tsëta rikarmi llapankuna alläpa mantsakur Teyta Diosta alabayäqan: “¡Pë ruranqantanöqa ni imëpis manam rikäqontsiktsu!” ñirnin.

Discïpulun kananpaq Levíta akranqan

Mateo 9.9-13; Marcos 2.13-17

27Tsëpik ëwëkarñam Jesús rikäqan Leví shutiyoq#5.27 Levípa uknin shutinmi käqan Mateo. impuestuta cobrar uchurëkaqta. Pëtam ñëqan: “Discïpulö kanëkipaq ñoqawan ëwakushun”. 28Tsënö ñiptinmi shärirkur tsëćhö imëkantapis itaskir Jesúswan ëwaköqan.

29Tsëpikñam Jesúspaq Leví wasinćhö fiestata ruratsëqan. Tsëćhömi impuestuta cobraq masinkunawan wakin runakunapis Jesúswan mikïkäyäqan. 30Tsëta rikëkurmi fariseukuna y ley yaćhatsikoqkuna parlëkaćharraq Jesúspa discïpulunkunata ñiyäqan: “¿Imanartan qamkuna impuestu cobrakoqkunawanpis y utsasapakunawanpis qorikar mikuyanki upyayanki?” ñir.

31Jesúsñam ñëqan: “Sänu kaqkunaqa manam ampikoqta wanäyantsu. Qeshyaqkunallaqam ampikoqta wanäyan. 32Ñoqaqa manam utsannaq runakunamantsu shamöqö, sinöqa utsasapakuna utsankunata dëjayänanpaqmi”.

Ayünupaq Jesús tapuyanqan

Mateo 9.14-17; Marcos 2.18

33Tsëpikñam Jesústa tapuyäqan: “Bautizakoq Juanpa discïpulunkuna y fariseukunapa discïpulunkunaqa Teyta Diosman mañakur imëpis ayunayanmi. Qampa discïpulïkikunaqa ¿imanartan ayunayantsu?” ñir.

34Jesúsñam ñëqan: “Casarë fiestaman invitashqakuna ¿ayunëkuyanmantsuraq noviuwan paqta këkar? 35Casaraq noviuta wañutsiyaptinqam ayunayanqa”.

36Tsënö ñiskirñam Jesús yaćhatsikur ñëqan: “Manam pïpis mushoq ratëninta rutuntsu makwa ratëta irananpaq. Tsënö rurarqa mushoq ratëta qorikätsirmi raćhitsinqa. Tsënöllam mushoq ratëpik rutunqan tëla mana chumaqqa rikakanñapistsu makwa ratëćhöqa”.

37“Tsënölla manam pïpis tsëraq roqyatsishqa aswata winantsu shillikëkaq pïñuman. Tsënö karqa masraq shillikätsinmi. Tsënöpam aswapis ićhakaskinman y pïñupis ushakanman. 38Tsëmi tsëraq roqyatsishqa aswataqa alli pïñuman winantsik.#5.38 Makwa ratëta y shillishqa pïñuta Jesús iwalatsëqan unë costumbrinkunamanmi. Mushoq ratëta y tsëraq roqyashqa aswatañam iwalatsëqan kikinpa yaćhatsikïninman. Tsënö iwalatsirmi ñëqan pëpa yaćhatsikïnin mushoq kar unë costumbrinkunaman mana iwalanqanta. [Tsënö ruraptinqa aswapis ićhakantsu ni pïñupis manam pakikantsu]”.

39“Y manam pïpis unëña ćhurarashqa vïnuta malliykur tsëraq rurashqa kaqtaqa upyëta munanñatsu: ‘Unëña ćhurarashqa kaq vïnum mas allish këkan’ ñirnin”.

Currently Selected:

Lucas 5: qcgPB

Highlight

Copy