Lucas 15

Oqrakashqa ïshaman iwalatsinqan

Mateo 18.12-14

1Jesús yaćhatsinqanta wiyayänanpaqmi impuestu cobrakoqkunapis utsasapakunapis ëwayäqan. 2Tsëta rikëkurñam fariseukunawan ley yaćhatsikoqkuna burlakur ñiyäqan: “¿Imanartan kë runaqa utsasapakunawanpis qorikëkur mikun?”

3Tsënö ñiyaptinmi iwalatsikïwan yaćhatsikur Jesús ñëqan: 4“Pïpis paćhak (100) ïshankunapik ukta oqrëkurqa ¿manatsuraq wakin kaqkunata dëjëkur asheq ëwanman? 5Tariskirqa kushishqam matankarkur apan. 6Wasinman ćhëkatsirñam yanasankunatapis vecïnunkunatapis qayëkatsir ñin: ‘¡Oqranqä ïshätam tariykamö! ¡Llapantsik kushikushun!’ ñir.

7“Tsë runa ïshanta tariskir kushikunqannöllam ciëlućhöpis kushikuyan uk runallapis utsankunata dëjaskir Teyta Dios munanqannöña kawaptin. Tsënö kushikuyan isqon ćhunka isqon (99) alli ruraq runakunapaq kushikuyanqanpikpis masraqmi.

Oqrakashqa qellëman iwalatsinqan

8“Tsënöllam pï warmipis ćhunka qellëninpik ukta oqrëkurqa ¿manatsuraq aktsita tsarirkatsir tsë höra wasinta pitsapakurnin ashinman tarinqanyaq? 9Tariykurñam reqsinakunqankunata y vecïnankunatapis qayëkatsir ñin: ‘¡Llapantsik kushikushun! ¡Oqranqä qellënëtam tariskëqö!’ ñir. 10Tsënöllam uk runallapis utsa rurëta dëjaskir Teyta Dios munanqannöña kawaptin Teyta Diospa angelninkunapis alläpa kushikuyan”.

Ëwakoq jövinman iwalatsinqan

11Mastam Jesús ñëqan: “Uk runapash ishkë ollqu tsurinkuna kañaq. 12Tsëshi qepa kaq tsurin papäninta ñiñaq: ‘Papä, herenciäta kanan höra rakipëkamë’. Tsënö ñiptinshi ishkan tsurinkunata papänin rakipïkuñaq.

13“Tsëpik uk ishkë unaqllatañash qepa kaq tsurin llapan ćhaskinqankunata rantikuskir tsë qellëwan largu markapa ëwakuñaq. Tsëćhöshi munanqanta rurar llapan qellëninta mana allikunallaćhö ushañaq. 14Tsë witsanshi tsë markaćhö alläpa mallaqnë kañaq. Tsëshi tsë jövin alläpa mallaqnar 15arïta ashiptin tsë markaćhö täkoq uk runa kuchinkunata mitsinanpaq ćhaskiñaq. 16Tsëćhöshi alläpa mallaqnar kuchikunapa mikïnintapis mikïta munañaq. Tsënö mallaqnaptinpis manash pïpis qarañaqtsu.

17“Tsëshi yarpaćhakur ñiñaq: ‘Këćhö mallaqnar këkaptë papänëpa aroqninkunaqa paćhankuna unta mikurćhi këkäyan. 18Kanan kutiykurmi papänëta ñishaq: “Papä, qamta y Teyta Diosta piñatsirmi utsata ruräqö. 19Amaña tsurikitanöqa ćhaskimëñatsu, sinöqa aroqnikitanölla ćhaskiykallämë” ’. 20Tsënö yarpaćhakuskirshi papänin kaqpa kutikuñaq.

“Largulällataraq shamïkaqta rikëkurshi papänin kushikur cörrilla töpaqnin ëwar abrazakurkur mutsañaq. 21Tsëshi tsurin ñiñaq: ‘Papä, qamta y Teyta Diosta piñatsirmi utsata ruräqö. Amaña tsurikitanöqa ćhaskimëñatsu’.

22“Tsënö ñiykaptinshi papäninqa empliädunkunata ñiñaq: ‘Sas allish kaq ratëkunata orqaskamur tsurëta ćhurarkatsiyë. Tsënölla sortïjata y llanqitapis ćhurarkatsiyë. 23Ñirkur wiran torïtuta pishtayë fiestata rurar mikunantsikpaq. 24¡Kë tsurëqa wañunqanpikmi kawarimushqa! ¡Oqrakanqanpikmi kutimushqa!’ Tsënö ñirshi fiestata rurar qallëkuyäñaq.

25“Mayor kaq tsurinñash ćhakraćhö arïkäñaq. Wasinman ćhëkarñash wiyañaq tucaqkunata y tushoqkunata. 26Tsëñash uk empliädunta qayëkur wasićhö ima päsanqantapis tapuñaq. 27Empliädunñash ñiñaq: ‘Öqikim kutimushqa. Allilla ćhämuptinmi papäniki kushikur wira torïtuta pishtatsishqa’ ñir.

28“Tsënö willaptinshi alläpa rabiakur wasinman yëkïtapis munañaqtsu. Tsëñash papänin ëwar yëkunanpaq rugañaq yëkunanpaq. 29Tsëshi papäninta ñiñaq: ‘Atska watañam sirvirniki llapan ñimanqëkikunata imëpis rurëkä. Tsënö sirviykapteqpis manam ni uk cabrallatapis qaramäqonkitsu yanasäkunawan fiestata rurar mikurkuyänalläpaqpis. 30¡Peru kë tsurikeqa prostitütakunawan qellënikita ushaskir kutiykamuptinqam wira torïtutaraq pishtatsëqonki!’ ñir.

31“Papäninñash ñiñaq: ‘Hïju, mana yarqukïpam ñoqawan këkanki. Tsëmi llapan imëkäkunapis qamllapaqña këkan. 32Peru imanö kaptinpis fiestata kushishqa rurashun. ¡Kë öqikeqa wañunqanpikmi kawarimushqa! ¡Oqrakashqa kanqanpikmi kutimushqa!’ ñir”.

Currently Selected:

Lucas 15: qcgPB

Highlight

Copy