Aposel 8
8
Gute Sol due agegeng ke osep ka aitno lisak dagar ke Yesus
1Sol vati osep tidue burwa ke Stiven e aitno kene ine. Deka ke oklou tonari osep tidue agegeng pula polou ke Ida Tapolngon ila osep ka tidong ke Jerusalem. Deka isak keniye tidardar kla ke armok armok ka tidong ke omur Judia e omur Samaria. Isak keniye tisongon armok kla e osep aposel vala dau tidong ke Jerusalem. 2Ari osep leklou ka urok elio isuk isuk itau tidue Stiven pampamu ine e tiyase e tikngis omba kesua aitno lisak soulu ke Stiven ina metengen. 3E Sol aitno amnga iye lokono ke osep ka aitno lisak dagar ke Yesus e iye waiki due agegeng ke isak keniye. E iye la ke urok ninu kene kene deka kis osep arang e apmang dagar e due isak kla tisep ke kalabus deka tidong ine.
Gute Filip la duru ke armok Samaria
4Ari osep ka aitno lisak dagar ke Yesus tidardar kla tilila ke omur pula batne ke agegeng tonari e tinapapra Ida Tapolngon ila pelengon ke osep. 5Alo ari Filip songon Jerusalem deka la duru ke armok kene ina ke omur Samaria. Iye polou ine e napapra Yesus ka Krais ina basikngen ke osep ari. 6Deka osep pula pula ari tiklingen Filip ila pelengon e tivati elio arit ina ka iye due e aitno lisak kene ke ila pelengon. 7Ari iye sapir angelo soulu ke osep pula e angelo soulu tonari tidaiku alo ka tisongon osep ka tidue isak manga manga. Silang iye lua osep pula ka kamsak soulu e kamsak timete deka tipolou itau blang. 8Deka osep pula ka tidong ke armok are aitno lisak neser pula ine.
Gute Saimon ka iye gute muso ina
9Alo ari gute gesa angaine Saimon dong. Iye gute muso ina e oglou due elio pula ka osep Samaria ina tidigrik ine. E iye kakai iye tona angaine tito la egim e wai langane. “Ngong gute ka maroni ka ngamgo ke osep pula.” 10Deka osep ka pula keniye ka agau e ka ngongle isak arit isak ma tiklingen ila pelengon e tiwai langane. “Gute ane ila arit ombatno kesua Ida Tapolngon ila arit ombatno dong ke iye.” 11Osep tonari tiklingen itau ke ila pelengon kesua tauni kodong tivati ila elio bitna bitna ka iye due e tidigrik ine. 12Mase Filip napapra pelengon itau ka la ke omur ka Ida Tapolngon ma plaue e Yesus Krais ila omon itau blang ke isak. Deka ari osep arang e apmang pula aitno lisak la dagar ine deka tidue elio paunimngen ina. 13Saimon aitno dagar ke Filip ila pelengon deka tipaunim iye blang. Tipaunim iye yagos deka iye lila kap Filip e vati elio arit ina bitna bitna ka Filip due e aitno mter pula ine.
14Osep aposel ka tidong ke Jerusalem tiklingen osep Samaria ina aitno lisak la dagar ke Ida Tapolngon ila pelengon deka tipagei Pita orwo Jon tisongon Jerusalem e tiduru kla ke omur Samaria. 15Deka isak orwo tilua osep ka aitno lisak dagar ke Yesus e tiwai itau ke Ida Tapolngon ma iye kar Ano Itau ke isak. 16Kesua Ano Itau dau sep ke aitno lisak kovok. Tididi elio paunimngen ina ke Ida Puda Yesus angaine vala. 17Deka Pita orwo Jon limsak tiduru tikai isak deka Ano Itau sep ke osep tonari aitno lisak.
18Saimon vati Ano Itau sep ke osep aitno lisak alo ka Pita orwo Jon limsak tiduru tikai osep deka iye waiki kar isak mani ma mter aitno lisak ine. 19E iye wai ke isak langane. “Umodue mani ane deka ma umakar arit ke ngong ma osep seisei ka lungu duru kai isak ma Ano Itau sep ke aitno lisak.” 20Iye wai langane deka Pita koli wai langane. “Ai aitno lugom lange ma amwaiki lem mani kli wan ka Ida Tapolngon soro ine ke ite? Ma agegeng due wom kap lem mani deka ma wom yagos. 21Eknikane emneklep ke imi e omdong ke limem bokongon ane kovok. Ida Tapolngon vati aitno lugom e ile aitno lugom dau orwo ke iye. 22Eknikane ambauluk aitno lugom ke lem elio soulu ane. Empmi Ida Tapolngon ma iye sak lem elio soulu lama elio ane vri ke wom e munu pes wom. 23Eknikane ngavati aitno lugom ngale Ida Tapolngon ila wan e ngap puda elio epmes ina.” 24Deka Saimon koli wai langane. “Amwai ke Ida Puda lama elio ka amwai ine polou ke ngong.”
Filip songon armok Samaria
25Pita orwo Jon tinapapra Ida Puda ila pelengon ke osep Samaria ina yagos deka tisongon omur Samaria e tibauluk ke Jerusalem. Alo ka isak dau tididi ekreng ke omur Samaria tinapapra Yesus ila omon itau ke armok pula. 26Filip dau dong ke Samaria e Ida Tapolngon ila ensel palongo ila langane. “Emtito omsongon armok ane e amla ke omur saut e emdidi ekreng ka duru ke Jerusalem e la ke armok Gasa.” Ekreng ka ensel palongo Filip ine munu ke omur ka dong adai vala. 27Filip klingen ensel tonari ila pelengon kodong deka iye songon omur Samaria e didi ekreng tonari. Iye dau didi ekreng e mase soson gute gesa ka omur Itiopia ina. Oglou osep tisok gute tonari lesna ine. Iye apmang ka vri mgo ke omur Itiopia ka osep tisir iye Kandasi ila wan bitna bitna ina plaungan e angaine omba. E iye tito la ke Jerusalem kesua iye waiki lotuim Ida Tapolngon. 28Alo ka Filip soson gute tonari iye la iding ke ila omur batne e dong ke karis ka hos tiririe e iye kis buk ka oglou gute napaprangan ina Aisaia sogoe e iye ritim sogongon tonari. 29Deka Ano Itau wai ke Filip langane. “Amla ompolou ke karis e amla kape.” 30Deka Filip suong la polou ine e klingen gute ka dong ke karis ritim gute napaprangan ina Aisaia ila sogongon. Deka iye pmi gute langane. “Emritim sogongon ane e emile omur ke lana ine koke aurou?”
31Deka gute plaungan ina koli wai langane. “Ai ngadue sua ma ngaile lana ine? Langka gute gesa lua ngong kovok ma ngaile pele-ngon ane lana ine kovok.” Deka iye wai ke Filip ma iye tito dong kap iye. 32Pelengon tonari ka iye ritim langane.
“Osep tidue elio ke iye eriar langka tipaur sipsip ka tiwaiki timke ma mete. E eriar langka alo ka osep tiblou sipsip titno tarna elilo e sipsip tonari tiwai kovok iye wai kovok blang. 33Tiklingen ila pelengon kovok e tipes angaine duru e tiwai iye gute soulu bitna. Deka sei dong ma palongo osep ke ina basikngen e palongo ke elio ka polou ke iye? Kesua tidue burwa ke iye deka iye dong ke taklak kap osep kovok.”
34Gute plaungan ina ritim pelengon ane yagos deka pmi Filip ine langane. “Pelengon ane lana ine la ke sei? Lana ine la ke gute napaprangan ina ka sogoe koke la ke gute silang?” 35Iye wai langane deka Filip nogrum ke pelengon tonari mgo deka palongo ila ke Yesus ila omon itau.
36-37Isak orwo dau tididi ekreng la lama tipolou ke aki gesa e gute plaungan ina wai langane. “Oka aki ane. Ma ngasep ke aki ane e ampaunim ngong koke ngakaranga ngadue langane kovok?”#8.36-37 — Osep leklou ka tile pelengon Grik itau aitno lisak mter langka pelengon leklou dong ke ves ane. Pelengon tonari langane. Deka Filip koli wai langane. “Eknikane langka aitno lugom dagar lokono ke Yesus ka Ngap Tapolngon deka emsep ke aki ane.” Deka gute wai langane. “Aitno lungong dagar lokono ke Yesus Krais iye Ida Tapolngon Otno Arang.” 38Iye wai langane deka due karis tonari la kovok deka Filip orwo gute plaungan ina tiduru tisep ke aki e Filip paunim iye. 39Iye paunim iye yagos deka isak orwo titito ke aki ina dingen batne deka Ida Puda Ano Itau didi ila arit e kakai Filip la ke omur silang e gute plaungan ina vati iye blang kovok. E gute plaungan ina aitno itau lokono deka iye didi ekreng blang. 40E suong lokono Filip polou ke armok Asdot. Ari iye lila napapra Yesus ila omon itau ke armok keniye la lama mase iye polou ke armok Sisaria.
Currently Selected:
Aposel 8: ANT
Highlight
Share
Copy

Want to have your highlights saved across all your devices? Sign up or sign in
copyright 2003 New Tribes Mission, Sanford, FL 32771