Aposel 7

Stiven napapra ke osep kaunsil ina amtarsak

1Deka gute loulou ina ka mgo pmi Stiven langane. “Osep ane urok sinngen elio lokono koke aurou?” 2Deka Stiven koli wai langane. “Sipmi e silivou umo-klingen lou pelengon ane. Oglou ari udo apa Abraham dong ke omur Meso-potemia e ari iye dau la ke omur Haran kovok. Deka Ida Tapolngon ka ila arit omba polou ke iye. 3E wai ine langane. ‘Omnogrum lem omur e lem osua ane deka amla ompolou ke omur ka ma nganis wom ine.’ 4Abraham klingen Ida Tapolngon ila pelengon deka so-ngon omur Kaldia e la polou ke omur Haran deka dong ine. Iye dong ine la lama timla mete. Timla mete kodong deka Ida Tapolngon pagei iye songon omur Haran deka iye me polou ke omur ane ka eknikane itodong ine. 5Alo ari Ida Tapolngon dau kar taklak sasi boto gesa ke Abraham kovok. Aurou. Ida Tapolngon wai promis vala langane. ‘Mase ma taklak ane ka omdong ine polou ngap taklak e lem napak-ngan ka ma time batne inarak taklak.’ Alo ka Ida Tapolngon wai ke Abraham langane iye dau divir otno kene gesa kovok. 6Ida Tapol-ngon wai ke Abraham langane. ‘Ma lem napakngan ka ma time batne isak kla tidong ke omur silang blang ka urok omur kovok. Deka ma osep matamur tiplau isak e tidue elio ka opru isak e tiboko langka wokboi nating la lama iding ke tobor 400 mela yagos. 7Mase ma ngaules osep ka tiplau lem napakngan. Deka ma lem napakngan tisongon omur tonari e ma tilotuim ngong ke omur ane.’ 8Deka Ida Tapolngon wai ila promis dagar ke Abraham. E elio ulangngan ina nisngen ke promis dagar tonari. Mase Abra-ham divir otno arang Aisak. Aisak dong ma ina oklou lumeklu deka Abraham ulang Aisak otne. Aisak dong deka mase divir otno arang Jekop. Jekop dong deka mase divir titno arang songotno orwo ka udo seia.”

9“Mase udo seia aitno lisak rim ke inarak aiver Josep e tidue burong ke iye. Deka osep leklou tikli iye e tipaur iye la duru ke omur Isip deka osep Isip ina tikli iye blang. Lama iye dong ke omur Isip Ida Tapolngon dau dong kap iye. 10E lua iye ke elio ka opru iye deka elio tonari yagos. Alo ka Josep polou ke Fero ka vri mgo ke omur Isip bitna Fero aitno itau ke Josep kesua Ida Tapolngon kar iye ila elio itau e ila ilengen omba. Deka Fero rere Josep ma iye polou omur Isip ina plaungan e Fero ila wan keniye ina plaungan.”

11“Mase sapanga ombatno polou ke omur Isip e omur Kenan e opru osep ari. Deka udo seia ka tidong ke omur Kenan tikaranga tipado inarak ngangon kovok. 12Ari Jekop klingen omon langka ngangon dong ke omur Isip. Deka iye pagei udo seia tiduru ke omur Isip aling kene ina ma tikli inarak ngangon. 13Mase tiduru ke omur Isip aling orwo ina ma tikli inarak ngangon blang. Tipolou ke Josep bitna deka iye bisi iye ke isak kovok e wai ke isak langane. ‘Ngong upu aiver Josep.’ Deka tile omur ine. Mase Fero vati isak deka ile omur isak Josep ila osua. 14Deka Josep wai ke ina titovro langane. ‘Uma-bauluk umopolou ke livou Jekop deka umawai ke iye langane. “Ipem aiver Josep wai wom omgosok lem osua keniye umosongon lumu omur ari deka umoduru umodong ke omur ane.”’ Alo ari Jekop ila osua keniye inarak sasa 75. 15Deka Jekop songon omur Kenan e la duru ke omur Isip deka dong ine. Iye dong ine la lama iye gosok udo seia timete ke omur Isip. 16Mase osep tikalke pampamu lisak tibauluk kla ke omur Sekem. Deka tiyas isak ke denga ka oglou Abraham klie ke gute Hamor titno arang ka tidong ke omur Sekem.”

17“Alo ka Ida Tapolngon ila promis ka oglou iye wai ke Abraham isuk boto ma polou lokono osep Yuda ina dau tidong ke omur Isip e tires tipolou pula kodong. 18Alo ari gute oku vri mgo ke omur Isip e ile wan gesa ke Josep kovok. 19Deka iye yak udo osua e due agegeng ka opru isak. Iye wai dagar ke isak langane. ‘Umodue lumu keke timunu ke dogur e umapani isak kovok.’ Iye wai dagar langane kesua iye waiki isak keniye timete.”

20“Alo ari Moses tna divir iye. Iye keke ka itau lokono e Ida Tapolngon aitno itau lokono ke iye. Deka timla e tna tipani iye la lama ina taiko polou eklu. 21Ina taiko polou eklu deka tidue la ke dogur. E Fero otopmang polou ke iye deka due e kere Moses eriar langka iye otno arang. 22Moses dong kap apmang tonari e osep Isip ina tiparere iye itau ke urok elio. Ari Moses arit iye ke ila pelengon e ila elio.”

23“Moses dong la lama ina tobor polou isapanal deka aitno mter langane. ‘Ma ngala ngavati sipmi ka osep Israel ina.’ 24Deka iye la polou ke isak. E iye vati gute Isip ina due agegeng ke gute Israel ina. Deka aitno mter ma iye lua gute Israel ina e koli gute Isip ina ila elio deka Moses mke gute ma iye mete. 25Moses due elio langane kesua aitno mter sisrok tile omur Ida Tapolngon rere iye ma iye mgo ke isak deka ma timole osep Isip ina. E isak dau tile omur ine kovok. 26Oklou silang Moses polou ke sisrok blang e vati sisrok orwo timke pulu. E iye waiki lua isak deka wai langane. ‘Osep. Ina lange umemke umu pulu kesua lumu osua kene?’ 27Deka gute ka due agegeng ke ila aten sodung Moses la deka wai langane. ‘Sei rere wom ma ommgo ke imi e amwade imi? 28Aitno lugom lange? Amwaiki omdue burwa ke ngong eriar langka narep omdue ke gute Isip ina?’ 29Moses klingen gute tonari ila pelengon engil deka ulou tarna deka iye ulou la. Iye ulou la e songon omur Isip deka la dong ke omur Midian vala. Alo ka iye dong ke omur Midian iye gi esna deka divir titno arang orwo.”

30“Moses dong ke omur Mi-dian tobor isapanal. Deka oklou gesa iye dong ke omur ka dong adai vala ka dong olwo boto ke gigri Sainai. E Ida Tapolngon ila ensel gesa polou ke iye ke eiou ka neliplip ke akai tetna gesa e dau ngene kovok. 31Moses vati eiou tonari deka aitno mter langane. ‘Elio ane ina poloungon batne lange?’ Deka iye la polou olwo boto ke eiou deka Ida Puda wai ke iye langane. 32‘Ngong lem seia Inarak Tapolngon. Ngong Abraham e Aisak e Jekop Inarak Tapolngon.’ Moses klingen ila pelengon deka iye nakarkar omba e waiki bitna vati omur kovok kesua iye lim ke iye. 33Deka Ida Puda wai langane. ‘Emkles lem su kesua taklak ka emvri ine ane ngau taklak itau ka ngarere. 34Ngavati agegeng ka osep Isip ina tidue ke ngau osep. Ngaklingen tingangir ine e ngaduru ma ngalua isak ke inarak agegeng. Eknikane omo ma ngapagei wom ambauluk ke omur Isip deka ma omlua isak.’”

35“Moses ka Ida Tapolngon wai ke iye io iye gute ka oglou ari osep Israel ina tipli iye e tiwai ke iye langane. ‘Sei rere wom ommgo ke imi e amwade imi?’ Moses iye gute ka Ida Tapolngon pagei ke osep Israel ina ma iye plau isak e lua isak. Ari ensel gesa polou ke iye ke akai daudeng ka marak dong ine e palongo ila ke ila bokongon. 36Moses mgo ke osep Israel ina deka iye paur isak tisongon omur Isip. Alo ari iye due elio arit ina ke omur Isip e ke aki Edimor deka ke omur ka dong adai vala la lama iding ke tobor isapanal mela yagos. 37Gute Moses iye gute ka wai ke osep Israel ina langane. ‘Mase ma Ida Tapolngon due lumu aten gesa polou gute napaprangan ina eriar langka oglou iye due ngong.’ 38Alo ari Moses gosok osep Israel ina tidong pulu ke omur ka dong adai vala. Iye dong ine kap udo seia. Ari iye tito la ke gigri Sainai deka ensel gesa wai Ida Tapolngon ila pelengon ka dong aling aling ke iye ka lua ite. Moses duru ke gigri tonari deka kare ke osep deka pelengon tonari dong kap ite.”

39“E udo seia talsak klingen Moses ila pelengon kovok. Aurou. Tingelek ila pelengon e silang tingale omur Isip e aitno lisak mter tiwaiki tibauluk tidong ine blang. 40Deka tiwai ke Aron langane. ‘Omdue sapingen leklou ka isak ida tapolngon deka timgo ke ite. Kesua Moses ka oglou mgo ke ite e paur ite itosongon omur Isip iye dong ge? Iteile ine kovok.’ 41Deka ari tidue sapingen langka bulmakau otno deka tidue elio opmu ina ine e aitno lisak neser pula ine batne aitno lisak itau ke urok sapingen ka isak tona tidue. 42Deka Ida Tapolngon pul dogur ke isak ma tilotuim oklou e taiko e gigimo. Elio ane eriar langka pelengon ka dong ke buk ka oglou osep napaprangan ina tisogo ine. Tisogo langane.

‘Umu ka osep Israel ina umoklingen. Oglou umo-dong ke omur ka dong adai vala iding ke tobor isapanal mela yagos. Deka umomluk lumu ongwa e umodue elio opmu ina ine batne ke ngong kovok. 43Aurou. Aitno lumu la dagar ke upu tapolngon Molek ka uma-paur ila sapingen ke ila ninu molo ina kap umu. Silang blang umakalke sapingen langka gigimo ka upu tapolngon Refan ina wan. Deka aitno lumu la ke lumu sapingen ka umodue isak deka umolotuim isak. Umodue langare deka ma ngadue umu umala ke omur Babilon la ine.’”

44“Alo ka Moses dong Ida Tapolngon ila ninu molo ina ka nis isak Ida Tapolngon dong kap isak e dong ke udo seia. Ari tidong ke omur ka dong adai vala. Ida Tapolngon nis Moses ke ila ninu molo ina ina uringen e iye palongo osep ine. Deka osep ari tiurie eriar langka Moses wai ine e Ida Tapolngon ila ninu tonari dong kap isak. 45Ninu molo ina dong kap isak deka mase udo seia tigosok Josua tisongon omur ka dong adai vala e tisep tidong ke omur ka urok omur kovok. Tidong ine e Ida Tapolngon mgo ke isak deka iye sik osep matamur e tiulou kla. Alo ka tisep ke omur ane tipaur Ida Tapolngon ila ninu molo ina kap isak e ninu tonari dong ke omur are la lama iding ke alo ka gute Devit dong. 46Devit dong e Ida Tapolngon due elio itau ke iye e iye wai ke Ida Tapolngon langane. ‘Wom ka Jekop Ina Tapolngon ngawaiki ma ngauri lem ninu oku ina ma omdong ine.’ 47E Devit urie kovok. Aurou. Otno arang Solomon urie vala. 48E Ida Tapolngon ka mole tapolngon ka pula keniye dong ke ninu gesa ka osep tiurie kovok. Aurou. Iye dong ke omur ka egim lokono vala. Oglou gute napaprangan ina gesa wai langane.

49‘Omur ka egim lokono lou omur ka ngadong ine. E taklak ka moli kongu tidong ine. Ma umouri ninu bitna langka lange deka ngadong ine e ka ngamtong ine? 50Umoklingen. Ngong to-na ngatapol wan ka pula keniye deka sei ma uri ninu gesa ma ngadong ine?’”

51Stiven dau wai ke osep Yuda ina langane. “Talapmu klingen pelengon tonari kovok. Aurou. Aitno lumu dagar lokono ke umu tona vala. Lumu elio soulu eriar langka lumu seia urok elio soulu kesua talapmu klingen Ano Itau ila pelengon kovok. 52Oglou lumu seia tidue agegeng ke osep napaprangan ina keniye. Tidue burwa ke osep tonari ka oglou tinapapra ke isak ke gute ka ila elio itau lokono ka ma me. Mase gute tonari me ke umu e umalai iye ina e umodue burwa ke iye. 53Oglou Ida Tapolngon pagei ila ensel ke udo seia deka tikar ite Ida Tapolngon ila pelengon dagar. E umedidie kovok.”

Osep soulu bitna tidue burwa ke Stiven

54Osep tiklingen Stiven ila pelengon deka aitno lisak nevlik amnga lokono ine. 55E Ano Itau due Stiven aitno deka bitna tito nekek ke omur ka egim deka iye vati Ida Tapolngon ila bublongon e Yesus vri ke Ida Tapolngon limla odung. 56Deka iye wai langane. “Umoklingen. Ngavati omur heven noklok e ngavati Gute Ka Polou Langka Osep vri ke Ida Tapolngon limla odung.” 57Iye wai langane deka osep tonari tidaiku omba e limsak kading talsak. Deka isak keniye tisuong tipolou ke iye e tikis iye dagar lokono. 58E tisodung iye e tisapir iye la ke armok dogur deka tidue opmu e timluk iye ine ma iye mete. Osep ka tisin elio vri ke iye tiklok urok molo deka molo dong olwo boto ke gute auram ka angaine Sol. 59Isak dau tiuri opmu e timluk Stiven ine deka iye wai itau ke Ida Puda langane. “Ngau Puda Yesus omdue anngong.” 60Deka iye grum kamla buno deka gene duru e wai dagar lokono langane. “Ngau Puda omkoli osep ane urok elio sakam.” Iye wai langane deka mete.

Currently Selected:

Aposel 7: ANT

Highlight

Copy