Luka 3

1Ghati ya mwaka wa ikumi na misano wa kutoria kwakwe Kaisari Tiberio, Pontio Pilato ekinaoke mchili wa Uyahudi, na Herode ekinaoke mfumwa wa Galilaya, na mundwawo Filipo ekinaoke mfumwa wa Iturea na isanga la Trakoniti, na Lusanio ekinaoke mfumwa wa Abilene, 2na Hana na Kayafa wekinaoke wakara wabaha, kiteto cha Izuwa kikamzia Yohana mwana wa Zachariya ishighati. 3Akaza mbai jose ja Yardeni, ekitinda lubatizo lwa kuchwa muti hena kuwushijiwa ng’oki, 4sandu itamiwe ghati ya kitamo cha viteto vya mroti Isaya,

Ighonda lakwe eiya ghati ya ishighati,

Areheni zia ya Mzuri,

Rongesheni mavetio makwe.

5Mawongo mose meneizujwa,

Ma nduwi jose na matuwi mose jinesejwa,

Na kila kigwie kinerongeshwa;

Na zia jina mawongo jinerongeka.

6Na kyose kina muri kinewona lukio lwa Izuwa.

7Akawawurra matorano wefumie ishighati nesa mabatizwe naye, Unwi irika la nyoka, niani ambonya kumatuka oro ineza? 8Amu iyo eteni ndunda jiwe kuchwa muti, nete musiwoke kuteta ngoroni, Tuna apa wetu Ibrahimu: amu mi namburra, ti Izuwa aidima kumwarehia Ibrahimu waana hena mabwe ama. 9Ingeriaha izoka laidivika kugerwa kikoloni cha muti, na muti ose usigera ndunda jedi utemwa uwiritiwe motoni. 10Matorano wakambujanya, wekiteta, Tuketeze ingeriaha? 11Akawatalua akawawurra, Ula ena kanzu mbiri amghawie mughenji esina; na ula ena kidjo, akete huwo. 12Weuhia lushango nawo wakaza wabatizwe, wakamburra, Mlosha, tuketeze? 13Akawawurra, Musiuha kukela wundu muaghanyiwe. 14Wakambujanya nawo wabwange, wekiteta, Na uswi tuketeze? Akawawurra, Musiitushe mundu, nete musilinganye; nawa muhoiwe hena mshahara wenyu.

15Na wandu wose wekigheshijia, wekikusara ngoroni hawo mburi ya Yohana, ngea ti niye Masihi; 16Yohana akatalua akawawurra wose, Mi namubatiza na mbombe, kake eza mwenye zinya kukela mi, nete siidima kumterua mkwa wa kiratu chakwe: ye enemubatiza hena Ngoma Mshenete na hena moto; 17mkononi hakwe kihadjo, enehaiya kiwaza chakwe, enewunganya ngano kilaloni hakwe, kake makekeshwa enemashota na moto Usijimika.

18Na viteto viingi vingi akawawondja ekiwatindia wandu Sumu yedi; 19kake Herode tetrako, ebohiwa niye hena lwa Herodiade mche wa m’dwawo, na hena lwa viwiwi vyose Herode eareha, 20wangawa ya vyose akaongeja, akamchunga Yohana gerezeni.

21Ikaoka, wandu wose wekibatizwa, na Yesu naye ekibatizwa, na ekiomba, wanga ikajughuka, 22Ngoma Mshenete akamseia hena fwano la kimuri sa ibeta, ighonda likafuma wanga, likiteta, We niwe mwana wangu, mkundwa wangu; naizihirwa nawe.

23Akaoka Yesu mwenye, ekinawoke, sa miaka makumi matatu, ekioaka (sandu egheshijiwe) mwana wa Yusuf, wa Eli, 24wa Matati, wa Lawi, wa Melki, wa Jana, wa Yusufu, 25wa Matatia, wa Amos, wa Nahum, wa Esli, wa Nagai, 26wa Maathi, wa Matatia, wa Simeini, wa Yosek, wa Yoda, 27wa Yohana, wa Resa, wa Zorobabel, wa Salatheil, wa Neri, 28wa Melki, wa Addi, wa Kosam, wa Elmadam, wa Eri, 29wa Isa, wa Eliezer, wa Yorim, wa Matati, wa Lawi, 30wa Sumeon, wa Yuda, wa Yusuf, wa Yonam, wa Eliakim, 31wa Melea, wa Menna, wa Matatha, wa Nathan, wa Daud, 32wa Yese, wa Obedi, wa Boaz, wa Salmon, wa Nahason, 33wa Aminadab, wa Arni, wa Esrom, wa Fares, wa Yuda, 34wa Yakob, wa Isaak, wa Ibrahimu, wa Tara, wa Nahor, 35wa Saruhu, wa Ragau, wa Faleg, wa Eber, wa Sala, 36wa Kainan, wa Arfakasad, wa Shem, wa Nuhu, wa Lamek, 37wa Metusala, wa Enok, wa Yaredi, wa Mahaleleel, wa Kainan, 38wa Enos, wa Sethi, wa Adamu, wa Izuwa.

Currently Selected:

Luka 3: TAVETA

Highlight

Copy