Marko 12
12
DEŠ‐U‐DUY
1Tay lya te sityarel le paramičentsa. Phendya, “Sas ekh manuš. Sadil ekh struguroski rez tay kerel ekh zido truyal. Hunavel ekh groapa kay tyidenas le struguri. Tay may kerel vi ekh turno kay bešen le karavuli ande leste. Atunči del la vuni gaženge te arakhen la leske. Mišto, žaltar and aver them. 2Tay kana patyile le struguri kača gazda bišalel ekha slugas ka le gaže te lel nište struguri, 3No, len les kodola tay maren les tay traden les palpale khančesa. 4May yekh data bišalel avrya slugas. Numa kodoles řanin ando šero tay keren les lažav. 5Vi avres may bišalel tay mudaren les. Bišalel avres tay avres tay vi avres. Buten bišalel. Numa sa kadya. Maren vuni anda lende tay mudaren avren. 6Kana, inke yekh sas les, ekh drago šav. Tay ande vurma, vi kodoles bišalel lende. Phenke, ‘Sar te na pačan muŕe šaves.’ 7Numa, so keren kodola manuš? Mothon yekh avreske, ‘Kado kerdyol e gazda. Te mudarasa les, avel amenge kača rez.’ 8Tay astaren les tay mudaren les tay šuden les avri.
9So kerel akana e gazda? Si te žal tay te mudarel kodole gažen tay dela e rez kavrenge. 10-11Či dyindyan ande le rama le svuntsi.
‘O bar kay gindin le zidarya ke bi‐khančesko‐lo
kerdilo o may zuralo baŕ ando kher.
Kadya kerdya o Del
tay amenge če čuda si.’ ”
12Tay zumavenas te astaren les ke žanenas ke pa pende sas e paramiči. Numa darayle le gažendar tay, anda kodya, mekline les tay gelinetar.
13Tay bišalde leste vuni Fariseyuri tay Herodiyaya te xoxaven les te falil‐pe kana delas duma. 14Avile tay mothodine leske. “Raya, žanas mišto ke san čačo manuš tay ke sam savoŕe ekh fyalo tuke ke nay khanči tuke pe soste mezil ekh manuš numa vorta sityares o drom le Devlesko. Slobodo amenge te potyinas le portsiyi le Amperatoske, le Kayzeroske, vay niči? 15Si ame te potyinas vay niči?” Numa žanglya mišto lengo xoxayimos tay mothodya lenge, “Soste zumaven ma? Anenta mange ekh rupuno lovo te dikhav pe leste.” 16Ande les tay mothodya lenge o Isus, “Kasko muy tay kaski pečata si kakale?” Mothodine, “Le Kayzaroske.” 17Tay phendya vo, “So si le Kayzarosko, den les le Kayzaroske. Tay so si le Devlesko, den les le Devleske.” Tay čudisayle.
18Vi vuni Sadakayuri avile leste. Kodole phenen ke naštil te žuvindil‐pe o manuš anda le mule. Pušline lestar, 19“Raya, ramosardya o Moze ke kana merel ekhe manušesko phral tay te mekel ekha řomnya, kodo manuš si te lel la řomnya tay vi te baryarel le šavoŕen. Si te kerel kadya peske phraleske. 20No, sas yefta phral. Lel peske o pervo ekha řomnya. Atunči, merel vo bi‐šavoŕengo. 21O duyto lel la řomnya tay vi vo merel bi‐šavoŕengo. Sa kadya o trito, 22tay vi savoŕe ži ka o yeftato. Khonik anda lende či mekel či savoŕen. Tay ande vurma merel vi e řomni. 23Kana žuvindina‐pe kaski řomni si, ke line la le yefta sar řomni?”
24Mothodya lenge o Isus, “Nay ande kadya ke falintume, te na žanen le rama tay na žanen e putyarya le Devleski? 25Ke kana žuvindina‐pe anda le mule, či ansurin‐pe tay či meretin‐pe numa avena sar le andželya. 26Tay phenav tumenge pa le mule ke žuvindin‐pe. Či dyindyan ande kniga le Mozeski kay phenel‐pe pa e tufa? Mothodya leske a Del, ‘Me sim o Del le Abramosko tay o Del le Izakosko tay o Del le Yakovosko.’ 27Nay o Del le mulengo numa o Del le žuvindengo. Sa falin‐tume.”
28Tay avilo yekh anda le Zakonarya tay ašunelas so phenenas tay dikhlya ke mišto delas anglal o Isus. Tay pušlya les, “Savi porunka si e angluyi e may bari?” 29Dya anglal o Isus, “E may bari si, ‘Ašun, Izrayele, o Ray si amaro Del. Numa yekh Ray si, 30ay te volin le Raske tumare Devleske, sa le ilesa, sa le duxosa sa la godžasa tay la zorasa.’ 31E duyto si kadya, ‘Te volin avrenge sar kay volin tume korkoro’.” 32Phendya leske o Zakonari, “Mothos vorta, Raya. Čačes mothodyan ke feri yekh Del si tay nay aver numa vo, 33Ay te volisaras leske sa amare ilesa, sa la godžasa tay sa la zorasa tay vi te volisaras avrenge sar volisaras ame korkoro. Kodya si prya may feder sar sa le dařuri pabule tay dařuri mudardine.” 34Kana dikhlya o Isus ke dya mišto anglal, mothodya leske, “Nay san dur katar e Amperatsiya le Devleski.” Tay pala kodo, khonik či tromaylo te zumavel les.
35Kay sityarelas ando templo, phendya, “Sar mothon le Zakonarya ke o Kristo si o šav le Davidosko? 36Vi o David, anda o Svunto Duxo, mothodya, ‘O Ray mothodya muŕe Raske, beš pe muŕi čači rig ži kay či thos tye dušmayen tela tye punře.’ 37Vi o David akharel les o Ray tay, anda kodya, sar t'avel lesko šav?”
But žene sas tay savoŕe voyasa ašunde les. 38Kay sityarelas, mothodya, “Arakhen‐tume p'el Zakonarya ke drago lenge te phiren hurade ande le kepanyaguri le lunžone tay te bandžon angla lende le žene and el foruri. 39Drago lenge vi le may laše skamina and el sinagogi tay ka'l pačiva. 40Čoren le kher katar le phivlya tay atunči te keren‐pe laše, may but rudžin‐pe. Avela lenge ekh may baro tyinuimos.”
41Tay bešlya tele paša e lada le lovengi tay dikhlya pe le žene kay thonas love ande late. But barvale žene thonas bare love. 42Atunči avili ekh čoŕi phivli tay thodya duy kotor xurde love. 43Sikadya peske vortačenge so kerdyasas e phivli tay mothodya, “Vorta mothav tumenge, kodya čoŕi phivli thodya ande lada le lovengi may but de sar thodine sa le aver and ekh than. 44Dine von kadale love kay či trobul lenge, numa kača, vi ke čoŕi‐la, sa dya, vi kodya kay trobul la te trayil.”
Currently Selected:
Marko 12: Kald71
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
