Рындоря 8

Гонисарэн патикунэн

1Савло подритярэлас кода, со умардэ Стэфанос.

Кола вряматар ашыле тэ гонисарэн иерусалимско кхандири, и всаворэ роспрастаепэ пай Иудея и Самария. Качи апостолоря ашылепэ андо Иерусалимо. 2Дэвлэкунэ мурша гаравдэ Стэфанос тай фартэ ровэнас пала лэстэ. 3Ай Савло розмарэлас пэ котора и кхандири. Вов захукэлас андэ чера, выцырдэлас муршэн тай жувлян тай шолас андо баруно.

Филипо пхэнэл Радосаво Лав андэ Самария

4Ай кола, савэ сас росшутэ, роспхэнэнас Радосаво Лав, каринг онэ тэ на жан. 5Филипо авиля андэ екх Самариятиро форо и ашыля тэ роспхэнэл котэ палав Христосо. 6Бут мануша мишто ашунэнас кода, со вов пхэнэлас. Онэ всаворэ сар екх ашунэнас лэс и дикхэнас шпэры, савэ вов терэлас. 7Колэсти со бутэндар манушэндар выжанас найжужэ духоря барэ цыпимаса, ай бут, савэ на пхирэнас пэрнэнца, и бангэ састярэнаспэ. 8И андо кодва форо сас бари лош.

9Андо кодва форо сас мануш, савэс акхарэнас Симоно. Вов майанглал драбатярэлас и калэса дивосарэлас манушэн андэ Самария. Вов выдэлас пэс палав варисаво баро мануш. 10Всаворэ мануша, и чёрорэ, и барвалэ, ашунэнас лэс дивоса и пхэнэнас:

— Када исин бари зор Дэвлэстири.

11И мишто ашунэнас лэс колэсти, со вов бут вряма дивосарэлас манушэн пэстирэ драбатиримаса. 12Нэ кала онэ патяйле лэ Филипости, саво роспхэнэлас палав Тхагаримос Дэвлэско и алав Исусоско Христоско, бут мурша и жувля болдэпэ. 13Симоно кадя ж патяйля и приля болдимос. Вов всавори вряма пхирэлас палав Филипо, диволаспэ шпэрэнди и барэ чюдонэнди.

14Кала апостолоря андо Иерусалимо ашундэ пала кода, со андэ Самария прилинэ лав Дэвлэско, онэ бишалдэ лэндэ Пэтрос и Иоанос. 15Онэ авиле и манглепэ Дэвлэс, кай кола, савэ обрисайле кав Дэл, тэ прилэн Свэнтонэс Духос, 16колэсти со инке ни пэр кастэ лэндар Духо на сжалас, онэ качи сас болдэ андо алав Раеско Исусоско. 17Тунчи Пэтро и Иоано тховдэ пэр лэндэ и васта, и онэ прилинэ Свэнтонэ Духос. 18Кала Симоно дикхля, со Духо дэлпэ, кала апостолоря тховэн и васта, вов процырдя лэнди ловэ 19тай пхэндя:

— Дэнтэ и манди кацави зор, кай кодва, пэр кастэ мэ тхава и васта, тэ лэл Свэнтонэ Духос.

20Нэ Пэтро пхэндя:

— Мэк тиро руп хасавэла екхэтанэ туса, сар ту гындос, со тинэса даро Дэвлэско палай ловэ. 21Тутэ нинай кацаво право тэ терэс кадва рындо, колэсти кай о води тиро найчячюно англав Дэл. 22Каисав андо кадва бэзэх и манг Раес, кай Вов тэ эртисарэл тути, со ту гындосас андо тиро води. 23Мэ дикхав, со ту пхэрдярдо кэрконя завистяса и спхангло лэпунзэнца, саво исин найчячимос.

24Симоно пхэндя:

— Мангэн пала мандэ Раес, кай манца тэ на терэлпэ нисо, со тумэ пхэндэ.

25Кала апостолоря пэрэашыле тэ допхэнэн и тэ роспхэнэн котэ лав Раеско, онэ жыле палпалэ андо Иерусалимо, ай пав дром роспхэнэнас Радосаво Лав андэ бут самаряниностирэ гава.

Евнухо андай Эфиопия прилэл Радосаво Лав

26Ангело Раеско пхэндя Филипости:

— Жа по юго, по дром, саво андярэл пай мал андав Иерусалимо андэ Газа.

27Филипо вщиля и жыля. Андэ кодья ж вряма котэ сас эфиопско евнухо, рай Кандакияко, ла тхагарняко эфиопонэнго, саво дикхэлас палай всавори сартари. Вов авэлас тэ тэлёл Дэвлэсти андо Иерусалимо 28и икхатар рисавэлас черэ. Вов бэшэлас андэ пэско урдон и бинэлас лил лэ пророкоско Исаяско. 29Духо пхэндя Филипости:

— Поджа кай кадва урдон и жа паша лэстэ.

30Филипо поджыля кай урдон и ашундя, со котэ бинэлпэ лил пророкоско Исаяско:

— Ту полэс кода, пала со бинэс? — пушля Филипо.

31— Сар манди тэ полав, кала манди нико на подпхэнэла? — пхэндя евнухо и акхардя Филипос тэ зажал и тэ бэшэл лэса андо урдон.

32Ай бинэлас вов кадва тхан Пистросаримаско:

«Сар бакро, Вов сас андярдо по зашынимос,

и сар бакроро ашэл мулком англай кола, савэ стрижын лэс,

кадя ж и Вов на отпхэрнавэлас Пэстирэ ушта.

33Вов сас лажавардо, и Лэсти на динэ чячюно сындо.

Ко роспхэнэла пала Лэско родо?

Ай лэско жувимос залэлпэ пхувьятар».

34Евнухо мангля Филипостар:

— Пхэн манди, пала кастэ катэ пхэнэл пророко, пала пэстэ чи пала кастэ аврэстэ?

35Тунчи Филипо ля тэ роспхэнэл акалэ тханэстар Пистросаримастар и пхэндя лэсти Радосаво Лав палав Исусо. 36-37Онэ майдур традэнас и подтрадиле кав паи.

— Дикх, акэ паи, — пхэндя о евнухо. — Со манди на дэл тэ прилав болдимос?#8.36-37 Андэ коисавэ гречески манускрипторя инке исин кацавэ лава: «Филипо пхэндя: "Сар патяс всаворэ водеса, то болдэпэ". Евнухо пхэндя: "Мэ патяв, со Исусо Христосо — када Шаво Дэвлэско"».

38Вов тэрдярдя о урдон, лэдуй онэ, Филипо и евнухо, зажыле андо паи, и Филипо болдя лэс. 39Ай кала онэ выжыле андав паи, Духо Раеско андярдя Филипос, и евнухо майбут лэс на дикхля. И лошаса лагля майдур пэстирэ дромэса. 40Ай Филипо попэля андо форо Ашдодо. Вов роспхэнэлас Радосаво Лав пай всаворэ фороря, сар на авиля андэ Кесария.

Currently Selected:

Рындоря 8: СРБ

Highlight

Copy

Want to have your highlights saved across all your devices? Sign up or sign in

This work is licensed under the Creative Commons Attribution Non-commercial No-Derivatives 4.0 license. http://creativecommons.org/licenses/by-nc-nd/4.0/

Learn More About Библия пэ влахицко романи шыб