2 Timoteo 2
2
Sc'oplal ti jun lequil soldado yu'un ti Jesucristoe
1Ti jech c'ot ta atojol yutsil slequil yo'nton ti Diose, ti vo'ote, jnich'on, paso me tsatsal xchi'uc ti bu xa c'alal xu' avu'une. 2Ti c'u s'elan laj ava'i lichanubtasvan ta sba ta sat ti epal rexticoetique, ja' me jech xavac'be sbain ti buch'utic oy slequil yo'ntonique, ti xu' yu'unic ta xchanubtasel ti yane.
3Ta sventa ti jech c'otemot ta jun lequil soldado yu'un ti Jesucristoe, ts'icuc cuchuc avu'un ti avocole. 4Ti ta sc'an ti lec x'ile yu'un ti banquilal jpas-mantal ti jun soldadoe, sc'an ti mu xba stic' sba ta yan abtele. 5Ja' jech xtoc ti buch'u ta x'och ta tajimole, mu xu' ta xich' smoton mi mu xch'un c'u s'elan smantalil ti tajimole. 6Ti buch'u ta x'abtej ta yosile, xu' ta stsac ba'yel ti c'usi ta xloc' ta yosile. 7Nopbo ava'i smelol ti va'i s'elan laj cal ti ox tos taje, scotol ta xac'bot ana' ti Cajvaltique.
8Vuleso ta ajol sc'oplal ti Jesucristo snitilul ti ajvalil Davide. Laj yich' cha'cuxesel, yu'un ja' jech ta xac' ta na'el ti colebal lequil ach' c'op ti yacalun ta yalele. 9Ta sventa ti lequil ach' c'op ti yacalun ta yalele, ta xquich' jvocol yu'un, ti co'ol s'elan jun jmilvanejun chuculun ta cadena yu'une. Ja'uc ti lequil ach' c'op yu'un ti Diose, mu'yuc chucul ta cadena taq'uin. 10Jech o xal un, ta jts'ic ta jcuch jvocol yo' jech lec oyic ti buch'utic t'ujbilic yu'un ti Diose, yo' jech ti stuquique ta staic scolelic sventa sbatel osil ti jun yutsil ta j'ech'ele, ta sventa ti oyotic ta stojol ti Cristo Jesuse.
11Melel ma' ti a'yej li'e:
Mi jmoj lijchamotic xchi'uque, jmoj ta xijcuxiotic xchi'uc.
12Mi mu'yuc stsic' co'ntontic yu'un ti vocole, ta jchi'intic ta pas mantal.#1 P 5.1.
Mi ta jmuc ta co'ntontique, ja' no'ox jech ta xismucotic ta yo'nton ec.#Mt 10.33; Lc 12.9.
13Mi mu junuc co'ntontic ta stojole, ti stuque staoj yav jun yo'nton,
yu'un mi ja'uc syanijes sba ti stuque.
Sc'oplal ti jun j'abtel ti laj sta ti lec x'ilee
14Ta sba ta sat ti Diose, t'abbo ya'iic, vulesbeic ta yo'ntonic ti va'i s'elan laj calbot ava'ie ti yictaicuc ta svulilanel sbaic ta jeche' c'opetic ti mu'yuc c'usi xtun oe, yu'un ja' no'ox ta soc xchi'uquic ti buch'utic ta xa'iique. 15Paso tsatsal ta yalel ta jamal ti lequil ach' c'op ti ja' melele yo' jech ta xc'ot ava'an aba ta stojol ti Diose jech c'u cha'al jun j'abtel ti mu xq'uexave, ti lec ti yabtele. 16Mu xats'etan ani' achiquin ta ya'yiel c'opetic naca sventa banomil ti mu'yuc c'usi ta xich' tael yu'une, yu'un ti buch'utic oy ta ye ta sti' ta yalolanele, yantic xa x'uninatic yu'un ti mulil ti mu stac' albel sc'oplale. 17Yu'un ti c'usi ta xchanubtasvanique ta xpuc batel jech c'u cha'al junuc bate' chamel. Yu'un jech laj spasic ti Himeneoe xchi'uc ti Filetoe. 18Yu'un ti stuquique laj xa svalopatinic comel ti bu ja' melele. Ta xalic ti ech' xa la yorail ti cha'cuxiele. Ti jech taje, oy jlom chibaj xa yo'ntonic ta xch'unel ti Cajvaltique. 19Ac'o mi jech ta xc'ot ta pasel un, ti Diose jbel sc'oplal xi laj sbejan ta alele: “Ti Cajvaltique ta xojtiquin ti buch'utic ja' yu'untaque.#Nm 16.5; Jn 10.14; 1 Co 8.3. Scotol ti buch'utic xvocoletic ta stojol ti Cristoe, tsots sc'oplal ta sjip ta stenic comel ti mulile.”
20Ta jbej muc' ta nae, ma'uc no'ox oy trasteetic meltsanbil ta oro, ta plata. Oy xtoc trasteetic meltsanbil ta te', ta lum. Oy jlom tsots sc'oplal ti ta xtune. Oy jlom ta xtun sventa yav c'a'ep. 21Mi ta jc'antic lec ta xijtun yu'un ti Cajvaltique, sc'an mu xcac' jbatic ta bolibtasel. Ja' to jech ta xijtunotic ta spasel ti c'usi leque.
22Mu jechuc xc'ot ta avo'nton ta spasel jech c'u cha'al ta spas ti yan queremetique. Ja' ac'bo yipal ta spasel ti c'usi leque, ti c'otemuc lec ta avo'nton ta xch'unel ti Cajvaltique, ti oyuc syail xc'uxul avo'ntone, ti jechuc avo'nton jech c'u cha'al ti buch'utic jun sjol yo'ntonic xvocoletic ta stojol ti Cajvaltique. 23Mu xats'etan ani' achiquin ta ya'yiel c'opetic ti ch'abal smelole, ti ch'abal yutsile, yu'un xana' lec ti ja' jliquesej c'op taje. 24Yu'un ti jun yaj'abtel Diose, ma'uc yabtel ta sliques c'op. Ja' ta sc'an oyuc slequilal yutsilal yo'nton yu'un scotol. Ta sc'an xtoc ti tojobuc xchanubtasvane, ti oyuc smuc'ul yo'ntone, 25ti ta yutsiluc slequilaluc yo'nton ac'o stojobtas ti buch'utic jtoyobbaetique, ti smalauc ya'i ac'o jeltabatuc yo'nton yu'un ti Diose, 26yo' jech ta xojtiquinic ti bu ja' melele, ti colicuc loq'uel talel ti bu chucbilic ta pets' yu'un ti pucuje ti ta spasbeic c'usi ta sc'an ti yo'ntone.
Currently Selected:
2 Timoteo 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000