Markos 9

1Go Suxi apia maakaitadai ñoki go mamaatïrdami ïmadï go gaa odami daidi potïtïdai,

—Aanï pokaiti sai ïïmadutai aapimï kia daraka agai oidigi daama xi ayimu ixtuigako Diuxi gubukan dukai tïanïda agai dibiakai ïgai— itïtïdai.

Suxi gï ïmapïdui baika mamaatïrdami buitapi

2Bhodïrï abhiadïrï naadami tasaikïdï go Suxi baidaja go Piduru ïmadï Jakobo dai Juan ïmo tubidaki daama dai ami tubidakïrï ïmapïdui go Suxi buitapi go ix makïdï oi. 3Daidi Suxi yukuxidï kabami mos tonorhi maa tioditu dai kabami totoatu ix maaxi toja kïbai. Mai tipu bakuanadami oidigi daama dai pomaaxi totoatudai yukuxi. 4Bhodïrï gïn buitapi gïn maaxitu Elias ïmadï Moises. Ïgai bïï goka ïkioma ka koitadai baidi gaatagai ïmadï Suxi. 5-6Daidi go ix makïdï oi go Suxi arhiï duduadimu tïïgakai go Elias ïmadï Moises. Go Piduru mai tïtïgaitadai ix tïiyagi duadimukatai daidi potïtïdai go Suxi,

—Maatïtuldiadami, xïïxi ïr kïïga xi tami daraka aatïmï gï ïmadï— ikaiti. —Tïtai iduñi baika uukusai, ïmoko aapi Suxi gï bïïtarï dai ïmai Moises bïïtarï dai ïmai Elias bïïtarï— ikaiti Piduru duadimukatai.

7Dai bhodïrï ïmo ikomai iña oidigi ami xako daraja ïgai dai Diuxi ño abhai ikomai saagidañdïrï daidi ikaiti,

—Idi Suxi ïr gin maara dai kïïgakïrï oigïdai aanï. Tïgito abïr kaï ñokidï ïgai— ikaiti Diuxi ikomai saagida dakatai.

8Daidi oton aipako nïnïaba go ix makïdï oi go Suxi dai xibi mosïkaxi Suxi ïmadï dajatadai. Go Elias ïmadï Moises ka mai tiputa.

9Bhodïrï aidïxi ka tïapañimi ïgai tubidakiañdïrï tai Suxi potïtïdai go ix makïdï oiditadai,

—Xibi abïr mai kia aagada mïx tuma tïï tubidakïrï— itïtïdai. —Dïï gia mukimu aanï ix makïdï ïr Diuxi otosadï ix makïdï aagai Diuxi ïïki dai ka duakai aanï abïr gia aagada mïx tuma tïï xibi— itïtïdai.

10Kaxkïdï go ix makïdï oiditadai go Suxi mai aagidi tomarhi ïmadutai dïï mos ïïgi gïn tïkakaiña ïgai aipako ix tïiya ïrhidi Suxi potïkai ïgai ix duaka agai.

Suxi pokaiti sai ka dibiatadai go Elias

11Daidi gatïkakai ïgai go Suxi,

—Tuixidï ikaiti go maatïtuldiadami sïïrhikami saidi Elias ïpïga biakatadai ix dibiagi xi aapi— itïtïdai go ix makïdï oiditadai.

12-13Taidi go Suxi potïtïdai,

—Buaboi aba ix dukai aagai ojadami ïïki sai gï agai xi ïpïgioma dibiagi Elias dai bïïxi bhaiduñagi ix tuma aagadagi dai gokiïrï sai dibiagai Diuxi otosadï ix makïdï aagai Diuxi ïïki. Daiñi aanï tudu ïr go aanï ïr Diuxi otosadï dai aanï aagai sai go ix makïdï Elias dukai dibia agaitadai ka dibia dai óídakami mos ipïldakai soi buididi. Dai ka ojixi ïpï ansai bia aanï xi gïïpi soimaaxi taatagi aanï ïpï dai xi soi dukai gin nïijada agai ïïmo óídakami— itïtïdai Suxi go ix makïdï oiditadai.

Suxi duadi ïmo gïrhi biakami ïmo Diabora tïañikarui abhana

14Bhodïrï tïapanakai go Suxi ïmadï ix makïdï oiditadai tubidakiañdïrï tai ayi ïgai xako darajatadai go gaa mamaatïrdami. Dai jaa mui odami kaburhi guka go mamaatïrdami xikorhi dai ïïmoko ix makïdï ïr maatïtuldiadami sïïrhikami bhakokodan kaiti dai ñokidimi go mamaatïrdami bui. 15Go odami mai pobïrhitadai xi kaduku aiyagi go Suxi kia dai kabami bhai gïrhi tïïgakai dai gamo buidïrï boopoi dai biaturhi. 16Daidi Suxi potïtïdai go odami,

—¿Mïx tukïdï bui ñokai aapimï gin mamaatïrdamiga?— itïtïdai.

17Taidi ïmadutai ix makïdï ami daraja potïtïdai,

—Gïr maatïtuldiadami, gï buapi aanï gin maara pai duadana dïï maitï gï tïï. Kabami ïr kokoadï ïgai di. Oidi ïmo diabora tïañikarudï dai mudutu ïgai. 18Go Diabora tïañikarui tomaxako dïbïrapi daitudaiña gin maara dai totostudai tïñidï dai kïkïrïntudai taatamudï. Mos kabakatudai tukugadï dai xibi ka ugitimi gubukarhigadï— itïtïdai. —Aagidi aanï gï mamaatïrdamiga sai bubaidana go Diabora tïañikarudï dïï ïgai mai ñako— itïtïdai ogadï kokoadï go Suxi.

19Taidi go Suxi soi gïrhi daidi potïtïdai go odami,

—Kaxi aanï tïbïpi gin aaga dai gïn maatïturhi dïï modukai mai buaboitudai aapimï. ¿Xïï tïbïpi aagadamu tudu xi gïn ïmadï dakagi aanï kia? ¿Gï agadamu xi mos apia nïnïrakagi aanï xi buaboituda aapimï?— itïtïdai. —Bhaigobai buapa go arhi gïrhi tudu— itïtïdai.

20Mïtai buapi ïgai. Dai go diabora tïañikarui suikiturhi go arhi gïrhi tïïgakai go Suxi bai dïbïrapi gïi ïgai dai aipako xarhimi dai totostuimi tïñidï. 21Daidi Suxi gatïkakai ogadï go kokoadï,

—¿Bïïkidï abhiadïrï pobuayi gobai?— itïtïdai.

—Arhidukatai abhiadïrï— ikaiti ogadï go arhi gïrhi. 22—Go Diabora tïañikarudï muiyoko imidagai taiyïrï xiïpï sudaïrï daitudai gin maara mos mua ïrhiditai. Pïx ixtutiadagi xi duada ïgai soi gïlda aatïmïkïdï dai gïr soiña— ikaiti ogadï kokoadï.

23—¿Dukatai gin tïkakai aapi sa bhai ixtutuidikïi aanï?— ikaiti Suxi. —Daiñi, ix makïdï buaboitudai bïïtarï mai tipu ixtumaxi mai bhaiga, kïï bhaiga bïïxi aïkatai— ikaiti Suxi.

24Dai go kïïrhi otoma mos gïgïrï ñokai daidi potïtïdai,

—Aanï gia buaboitudai. Dïï gia tïgito aanï pïxi gin soiñana xudu mai kïïga buaboitudagi aanï— itïtïdai.

25Mui odami gïn ïmpagi ami nïida ïrhiditai ix tuma ïpïbuimi. Dai Suxi mos tïïgakai xïï mui odami gïn ïmpaidimi otoma bhagaimi go Diabora tïañikarudï ix makïdï arhi gïrhi ïrana daja daidi potïtïdai,

—Aapi Diabora tïañikarudï mai ñokadami dai mai tïkaidakami aanï gï tïanïi pïsai busaiña. Dagitoñi idi arhi gïrhi dai ka mai bapakïda ïpamu idiïrï— itïtïdai Suxi.

26Taidi go Diabora tïañikarudï gïïgïrï iiña busaikai dai sakobi tukugadï go arhi gïrhi. Mukiadï duu bia ïgai. Mui odami ix makïdï ami guka pokaititadai ix ka muu. 27Dïï go Suxi nobiañdïrï bhïiyi go arhi gïrhi dai ïpamu bañigi bai kïkiba ïgai. 28Bhodïrï Suxi baa ïmo kiiyïrï dai aaduñdï ix makïdï oidatukïiña ïkobai atagai ïmadï dai ikaiti,

—¿Ix tuixi maiti ixtui aatïmï xi busaidagi idi tïañikarudï Diabora ix makïdï biakatadai go arhi gïrhi?— ikaiti.

29Taidi Suxi potïtïdai,

—Idi Diabora tïañikarudï arhiï xijaiga busaidaragai. Gï agai xi daanïdagi Diuxi. Ïma dukai xadïrï bubuakia gobai— itïtïdai.

Pokaiti Suxi ïpamu sai gï agaitadai xi mukia ïgai

30Bhodïrï Suxi ïmadï mamaatïrdami iji abhiadïrï dai Galileana sïïrhi dïgabusai. Suxi maiti ipïrhiditadai xi jaa odami maatiagi xako daraja ïgai. 31Dai Suxi gamaakaitadai ñoki go mamaatïrdami daidi potïtïdai,

—Daiñi, aanï ïr Diuxi otosadï ix makïdï aagai Diuxi ïïki. Mïtai gin tïïgida agai odami dai gin mua agai ïgai, dïï aanï bhobai baika tasaikïdï ïpamu duakamu— itïtïdai.

32Dai go mamaatïrdami mai maatï kaï aatagidï daidi gatïkaka ïrhidi dïï mos dodorhi bii ïgai duduadimukatai.

Suxi aagai xorai ïgai dai bamioma namïga Diuxi bïïtarï

33Bhodïrï Kapernaumïrï ukami ayi Suxi ïmadï go mamaatïrdami. Dai bapakïkai ïgai kiiyïrï tai Suxi potïtïdai go mamaatïrdami,

—¿Mïx tuma aatagaimi aapimï boiyañdïrï iimïitai?— itïtïdai.

34Dïï mos dodorhi bii go mamaatïrdami. Gïn bupui ñokaitadai ïgai boiyaiñdïrï aagaitai ix makïdï ïgai bamioma ïr namïakami kaxkïdï xaïrai ïgai dai mai ñokai bii. 35Taidi go Suxi daiba dai báí go bhaibuxtama dan goka gï mamaatïrdami daidi potïtïdai aidï,

—Xi ïmadutai aapimï ipïrhiadagi xi ïr bhaitï kïakamikagi, gobai gï agai xi kïï dumarhikami bhïiyagi tïgibudagai dai gï agai ïgai xi ïr pioñigadï dukamikagi bïïxi oidakami— itïtïdai.

36Bhodïrï Suxi bhïiyi ïmo arhi odami ix makïdï ami kiiyïrï dajatadai dai ami buitapi mamaatïrdamigadï kïi dai potïtïdai ïgai go mamaatïrdami,

37—Daiñi xi ïmadutai oigïda nïijadagi ïmo arhi odami gin xadutuada ïrhiditai, ïgai kaxi aanï gin oigïda tïï ïpï mos pobuadatai. Dai xi kïïgakïrï gin oigïda nïijadagi ïmoko ïgai kaxi oigïda tïï Diuxi ïpï. Diuxi otosadï aanï di— itïtïdai Suxi.

Diuxi aa namïida agai aaduindadï odami

38Ïmo imidagai go Juan aataga ïmadï Suxi daidi potïtïdai,

—Maatïtuldiadami— itïtïdai. —Tïï aatïmï ïmo kïïrhi no xibhïkai dai gabubaiditadai Diabora tïtïañikarudï ix makïdï oiditadai odami. Agaitadai gï tïtiaraga bubaiditai diabora tïtïañikarudï dai aatïmï dáí. Maiti gïr urabaka ïgai kaxkïdï dáí aatïmï— itïtïdai Juan.

39Dai Suxi potïtïdai,

—Maiti abïr daidada— itïtïdai. —¿Maiti ix maatiga maaxi sai ix makïdï ibuadagi podukai aaduindagai gïdukami aanï gin gubukadakïdï kaxi gin abhana kïakami ïgai? Xadïrï pobuadagi ïgai dai bhodïrï oton ñokadana ïgai gin bui— itïtïdai. 40—Odami ix makïdï maiti gïr bui bïïtïkamikagi kaxi gïr bhaan gukakami di— itïtïdai.

41—Daiñi, aanï aagai sai Diuxi kïïgakïrï aa namïidamu odami ix makïdï gin oigïdaitai óídagi tomaxi mosïka lïïchi sudagi ïmadutai aapimï maatïkatai xi gin aaduñi aapimï. Ix makïdï pomaaxi ibuadagi biakamu ïmo bhai ïrhiaragai abhana— itïtïdai Suxi.

42Dai bhodïrï apia aatagai go Suxi ïmadï mamaatïrdami daidi potïtïdai,

—Xi ïpïduñada ïmo odami tïïgidagi soimaaxkami tïgibudagai ïmoko idi aarhi ix makïdï tami daraja dai podukai gïpiïrï daitudan duñagi, aanï aagai sai ix makïdï pomaaxi buadagi gia gïïpi biakamu gïgïbidaragai abhana. Xioma ïr kïïgaitadai ïgai bïïtarï mïx kuxiboana burhidagi ïmo gïï mouturui dai bhodïrï daitudagi go gïï sudaïrï ïrana— ikaiti. 43-44—Dai xi gï nobikïdï gïpiïrï gïxiagi aapi soimaaxi ibuadatai ïgaikïdï paidi guikuta ïgai— itïtïdai. —Xioma ïr kïïga ix mos arhi ïmo nobikagi aapi dïï gia Diuxi ïmadï oidakagi dai mai xu ix gokadukagi gï noonobi dai Diuxi gïï taiyïrï gï daitudagi. Ami mai ugiatïi batopadagai dai tomax tuigako mïïkana tai— itïtïdai Suxi.

45-46—Dai xi gï ïkasokïdï gïpiïrï gïxia agadagi aapi soimaaxi ibuadatai paida guikuta gobai ïpï. Xioma ïr kïïga xi mos arhi ïmo ïkaso aapi dïï gia Diuxi ïmadï oidakagi dai mai xu ix bïï goka biakagi aapi gï ïïkaso dai Diuxi taiyïrï gï daitudagi. Ami mai ugiatïi batopadagai dai tomax tuigako mïïkana tai—. 47-48—Dai gï nïadaga podukai ïpï. Xi ïgaikïdï gïpiïrï gïxia agadagi aapi pai busaida. Xioma ïr kïïga xi ïmo bujikïdï oidakagi aapi xako tïanïi Diuxi dai mai xu ix gokadukagi gï bupuji dai taiyïrï gï daitudagi. Ami mai ugiatïi batopadagai dai tomax tuigako mïïkana tai— ikaiti Suxi. 49—Daiñi— ikaiti, —Odami ix makïdï Diuxi taiyïrï daitudagi tomax tuigako mos taata agai soi ïrhiaragai— ikaiti.

50—Gïïpi abïr soiñi go maa onai yoobamada bïïtarï kuadagai. ¿Dïï ix ka ugitiagi gubukarhigadï go onai aidï tumaxi ïr soiñi gobai? ¿Dukatai duna ïmoko sai gubukatudana gobai ïpamu? Daiñi aapimï abïr gin mamaatïrdamiga dai onai dukami aapimï oidigi daama óídakami bïïtarï. Aapimï soikïi xi kïïgakïrï óídaka ïgai di. Kaxkïdï abïr abokan duu óídaga tuduidï— ikaiti Suxi. Podukai maa ïgai aatagi go mamaatïrdami.

Currently Selected:

Markos 9: NTP

Highlight

Copy