Markos 8

Suxi maakoba mirhi odami bhibhi

1Dai aidïpïrï mui gïn ïmpagi odami ami xako dajatadai Suxi. Dai mai biakatadai go odami ixtuma ugiagi. Taidi go Suxi báí mamaatïrdamigadï daidi potïtïdai,

2—Soi gin ïrhidi nïiditai idi odami, kaxi ayi baika tasai ix tami gin ïmadï daraja gobai dai mai bia ixtuma ugiagi. 3Ix mai ugakai otosa aanï sai nonoigïna gobai susuikitu antaada gobai. Ïïmoko arhiï mïkaxdïrï dada di— ikaiti go Suxi.

4Tai go mamaatïrdami potïtïdai,

—¿Borai bhibhidana mosïïki odami tanai xako mai tipu ixtumaxi tomarhi óídakami?— ikaiti go mamaatïrdami.

5—¿Mïki pan bia aapimï?— ikaiti Suxi.

—Kubarakami aatï bia— ikaiti go mamaatïrdami.

6Taidi Suxi tïjai go odami sai dïbïrapi daraibana. Dai bhïiyi ïgai go pan dai aagai ïgai xïï bhai gï ïrhidi Diuxikïdï gï oiditai go pan dai saasarai ïgai dai maa go mamaatïrdami bai ïgai takogi go odami. 7Dai biakatadai ïgai chïki batopa ïpï. Dai aagai Suxi ix xïï bhai gï ïrhidi Diuxikïdï go batopakïdï ïpï dai bhodïrï gatïjai takoidaragai ïpï. 8Bïïxkatai gauu dai gïn tataxkobai. Dai gokiïrï tutubi ïgai bidadï dai susuda kubarakami asarai sasakigadï. 9Parï maakoba mirhikana go odami ix makïdï gauu. 10Dai ka ugakai tai Suxi aagidi sai nonoigïna dai bhodïrï tïsai go Suxi ïmo barkoana dai jii abhiadïrï ïmadï mamaatïrdamigadï dai ayi xako Dalmanuta tïgidu oidigi.

Go fariseos gaagai ïmo maaxidaragai

11Tai ami dada go fariseos dai ñokidimi go Suxi bui daidi ikaitimi,

—Gïr duiñdañi aapi Suxi ïmo maaxidaragai maaxi. Mïï daana tïbagiañdïrï gubukadakïdï gïr duiñdañi ïmo gïdukami aaduindagai. Aidï gia nïijadamu aatïmï sa bhai gï buaboitudana aatïmï— ikaitimi.

12Taidi go Suxi gïïgïrï sobhïbïi daidi ikaiti,

—¿Ix tuixidï xibi óídakami mai buaboitudai ix mai nïijada ïgai ïmo maaxidaragai ïpïga? Daiñi, aanï aagai sai xibi óídakami bïïtarï mai tipuka agai tomarhi ïmo maaxidaragai— ikaiti.

13Dai anaaxi bia ïgai go odami dai ïpamu tïsai barkoïrï dai jii basadïrï go gïï sudagi.

Suxi aagai go fariseo kopodakarugadï

14Dai go mamaatïrdami mai tïgito ix bhïkiagi kuadagai dai mos arhi ïmo pan bhïkati barkoïrï. 15Taidi go Suxi potïtïdai,

—Kïïga abïr gïn tïgito nïida xi mai bhïiya aapimï go fariseo ïmadï go Rey Erodïxi kopodakarugadï, mai kïïgadu gobai— itïtïdai.

16Baidi go mamaatïrdami aipako gïn aatagaimi daidi ikaiti,

—Mai bia aatïmï pan kaxkïdï pokaiti gobai— ikaiti ïgai.

17Taidi go Suxi máí ix kaititadai ïgai daidi potïtïdai,

—¿Tuimïxi pokaiti mïsai mai bia pan? ¿Maiti mïx kia maatï kaï ix makïdï gïn aagidi aanï, dai ix makïdï ibuayi aanï mïx mai tïgito nïidi ïpï? Xïï kaapaka gïn momo— itïtïdai. 18-19—¿Ix tuixi mai tïtïgito nïayi aapimï? ¿Maiti mïx bupujï? ¿Dai ix tuixi mai tïtïkaidaga? Naanaka aapimï di. ¿Kaxi mïx mai tïgito xi aanï saasarai taama pan dai ïgaikïdï bhibhi taama mirhi odami? ¿Mïtïïki asarai ïmpagi sasakigadï aidï?— itïtïdai Suxi.

—Bhaibuxtama dan goka— ikaiti mamaatïrdamigadï aidï.

20—Dai aidïxi kubarakami panakïdï bhibhi aanï maakoba mirhi odami ¿Mïtïïki asarai susudakami ïmpagi sasakigadï?— itïtïdai.

—Kubarakami— ikaiti mamaatïrdamigadï.

21Taidi Suxi potïtïdai,

—¿Bïïxkïrï mïx mai maatï kaï ixtumaxi gïn tïtïïgidimi aanï?— itïtïdai.

Ïmo kïïrhi mai nïadami Betasaidïrï oidakami

22Dai gokiïrï ayi ïgai Betsaidïrï, mïtai ami buapi ïmo kïïrhi mai nïadami, dai daañimi sai taatana. 23Taidi go Suxi nobiañdïrï bhïiyi go kïïrhi dai baidaja ugidana Betsaida. Dai bhodïrï bupuidïrï tïi Suxi xixibaradï dai bupuidïana taata noonobikïdï. Dai bhodïrï tïkakai sa bhai nïayi.

24Dai go kïïrhi nïnïaba daidi potïtïdai,

—Nïidi aanï odami dai ajiopai dïï mos uxi tutukami ïrhiada maaxi— ikaiti.

25Taidi Suxi noonobikïdï ïpamu taata bupuidï go kïïrhi dai go kïïrhi kïïga gï tïgito nïidi dai xibi gia ka bhai gï dui nïadagadï dai bïïxi aïkatai nïidi kïïga. 26Taidi Suxi aagidi sai noragïna daidi potïtïdai,

—Maiti baaki Betasaidïrï toma lachi dai mos noragiñi gï kiiyamu— itïtïdai.

Piduru aagai sai Suxi ïr go Kristo

27Bhodïrï jii go Suxi ïmadï mamaatïrdamigadï dai aipako ajiopai xako Cesarea Filipo tïgidu oidigi. Ami dadijitadai ïgai aarhi kiiki. Boiyamu iimïitadai ïgai taidi go Suxi potïtïdai mamaatïrdamigadï,

—¿Borai gin aagai odami?— itïtïdai.

28Tai go mamaatïrdami potïtïdai,

—Ïïmoko pokaiti pïsaidi ïr go Juan ix makïdï bapakonaiña odami dai jaa pokaiti pïsaidi ïr Eliaskaru, dai jaa pokaiti pïsaidi ïr ïmo ñokituldiadamigadï Diuxi— itïtïdai.

29Tai Suxi potïtïdai aidï,

—¿Aapimï porai gin aagai?— itïtïdai.

Dai Piduru potïtïdai,

—Aapi ïr go Kristo agaikïdï. Aapi ïr Diuxi otosadï gïr bhaitï kïakamiga tudu— itïtïdai.

30Dai Suxi dáí go mamaatïrdami ix mai aagidana tomarhi ïmadutai xorai ïgai.

Suxi ïkiaxdïrï aagai sai muki agai

31Dai bhodïrï Suxi maa ñoki gï mamaatïrdami. Daidi potïtïdai,

—Aanï ïr Diuxi otosadï ix makïdï aagai Diuxi ïïki dai gï agadamu xi naana maaxi biakagi aanï soi ïrhiaragai gin abhana— itïtïdai. —Daiñi, go gupudagai bipiakami ïmadï bhaitï gukakamigadï go daxdadami ïmadï go maatïtuldiadami sïïrhikami bïïxkatai potïimu xi aanï maiti ïr soiñi dai gajiadïrï gin biamu ïgai— itïtïdai. —Dai gï aagadamu xi gin muatuda ïgai dai bhobai baika tasaikïdï ïpamu duakamu aanï— itïtïdai.

32Bïïxi sïïrhi aagai ïgai ixdukatai pogïduña agaitadai ïgaikïdï. Daidi go Piduru ïko baidaja go Suxi dai bhagaimi,

—Maiti gï agai xi pomaaxi ñokada aapi— itïtïdai.

33Taidi go Suxi ajako kïkiba dai nïnïidi go gaa gï mamaatïrdami. Dai bhagaimi ïgai go Piduru,

—Maigobai kïkiba aapi Diabora— itïtïdai. —Odami tïgibudadï adaimïi aapi dai mai xu Diuxi tïgibudadï— itïtïdai.

Suxi aagai ix dukatai óídaka agai ix makïdï oidatukuda ïrhiada

34Amaxi go Suxi báí mamaatïrdamigadï ïmadï go gaa odami ix makïdï ami darajatadai sai miadïrï gukakana daidi potïtïdai,

—Xi ïmadutai gin oidatukuda ïrhiada gï agai xi mai ïïgiada ïgai ïïgi tïgibudadï dai gï agai xi bhai gï dukamikagi ïgai ix gï muatudagi jaa kuruxiabha gï xixakai. Ix makïdï bhai gï dukamikagi podukai gï agai xi gin oidatukuda. 35Daiñi, odami ix makïdï mos ïïgi gïn nukadatai óídaga, mos ugida agai tomax dukai dai mai kïïgakïrï óídaka agai. Dïï gia ix makïdï gupurtudagi gïn iibhïdaga dai gin oijada agai dai buaboida agai go bhai ïrhiaraga ñoki, tomaxi gïn koda agadagi jaa, ïgai gia kïïgakïrï óídaka agai. 36¿Tumaxi ïr soiñikagi xi ïmo odami gamaitïagi bïïxi go oidigi dai ïïgi ibhïadï gï xia duadiagi? 37¿Ixtukïdï aa namïidana ïmoko xi gï aa noraidana gï ibhïdaga di? 38Xibi óídakami arhiïxi ïr soimaaxi buadami dai adaimïi ïgai jaa ix makïdï didiuxi aagai ïgai. Daiñi, aanï ïr Diuxi otosadï ix makïdï aagai Diuxi ïïki dai ayimu ixtuigako dibiamu aanï tïbagiañdïrï ïmadï Diuxi tïtïañikarudï dai Diuxi gubukadagakïdï. Aanï aagai sai tomax tuma oidakami xibi ix makïdï xaïradagi aanïkïdï dai gin ñokikïdï aanï ïpï xaïrogidamu ïgaikïdï dibiakai aanï— itïtïdai Suxi.

Currently Selected:

Markos 8: NTP

Highlight

Copy