Markos 13

Suxi ïkiaxdïrï agai xi gï daituda agai go gïï kiupaigadï judidiu

1Dai bhodïrï busaimitadai go Suxi go gïï kiupiañdïrï tai ïmadutai go mamaatïrdami potïtïdai,

—Daiñi maatïtuldiadami, xïï gïïgïrï go ojodai ixtukïdï duñixi go kiupai. Agia xigiamaaxi bhaabhaki— itïtïdai.

2Dai Suxi potïtïdai,

—Kïïga ojoida tudu idi bhaabhaki. Ayimu ixtuigako bïïxi gïn surhigimu gobai. Tomarhi ïmo odai mai bimu daamioma ïmai— itïtïdai.

Suxi aagai ix dukatai pogïduña agai mai kia ugitïkai oidigi

3Bhodïrï laachkïdï Olibos gidana dajatadai go Suxi buidïrï go gïï kiupaigadï judidiu. Daidi go Piduru ïmadï Jakobo ïmadï Juan ïmadï Andïrïxi ïïgi aatagai ïmadï Suxi 4daidi potïtïdai aidï,

—Gïr aagidañi xïïxkadï xatuidi agai go gïï kiupai. ¿Tukïdï maatïkana aatïmï ix ka pogïduña agadagi gobai?— itïtïdai.

5Dai Suxi potïtïdai,

—Gïn aagidamu aanï ixdukatai maatïkana aapimï— itïtïdai. —Naana maaxi pogïduña agai kia daidi ugitimu oidigi. Maiti abïr gïn dagito mïxi gïn bupuirumadagi go gaa. 6Daiñi, dadimu jaa dai Diuxi ojotosadï gïr bhaitï gukakami gïn aagamu ïïgi ïgai. Podukai bupuirumadamu ïgai mui odami. Dïï aapimï abïr mai buaboituda ïgai. 7Dai maiti abïr duduadikuda kajiomakatai xi ka iimïi kokodi no xibhïkai xiïpï xi gïn kokodadan kaitada go xibhïadïrï óídakami. Bïïxi pogïduña agai gobai dïï modukai maiti abïr duduadikuda. Mai kia ugitimu oidigi di. 8Naana maaxi nïijadamu aapimï kia bhaiyoma. Daiñi, ïmo maa ñokadami bui surhigimu jaa ix makïdï ïr ïmamaaxi ñokadami dai podukai ïpï go gobibiernogadï jaa gïn bupui surhigimu ïpï aipakoga. Muiyapïrï gigibukïdamu oidigi dai aipako oidakamu bhiugigai. Dai gokïdï mos utudama aijimi soi ïrhiaragai, kia oidaka agai gïdukamioma soi ïrhiaragai di. 9Gï agadamu xi kïïga gïn nukadakagi aapimï. Daiñi, mui odami gïn kïïdadamu gin aaduñikatai aapimï. Dudunukamiïrï gïn tutusadamu ïgai. Dai kikiupiïrï gïn bapasadamu ïpï dai ami gïn gïbadamu ïgai. Gï agadamu xi baan gukada aapimï gobibierno buidïrï dai reyes buidïrï xi ami aagada aapimï ix tuixidï gin buaboitudai aapimï. 10Mai kia ugitimu oidigi xi ka bïïxi oidigi daama óídakami buitapi gï aituldamu Diuxi ñokidï bhai ïrhiarakami. 11Dai mïx xïïxkadï baan gïn tutusagi buidïrï dudunukami abïr mai buamï ïrhiada mïx tïiyagi. Diuxi gïn soikïdamu aidï. Bïrai mos aagada ïïgi ix makïdï gïn ajiagi tïgibudagai. Mai xu ïïgi aapimï ñokadamu aidï, Diuxi Ibhïadï aba ïgai dai gïn ñokituldiadamu— itïtïdai Suxi.

12Dai Suxi oi gï aatagi daidi potïtïdai go odami aidï

—Naana maaxi bamioma pogïduña agai kia mai kia ugitïkai oidigi— itïtïdai. —Mui odami ix makïdï mai buaboitudai mos kïïdada agai go ix makïdï gia buaboitudai, ix makïdï ïr Diuxi aaduñdï tudu. Mos kïïdada agai tomaxi ïr gïn aaduñikagi miadïrï. Ïïmoko asta gïn susukurhi xiïpï gïn xixïgi tïïgidamu mïx kodada. Dai jaa tïïgidamu ïïgi gïn maamara dai ïïgi gïn dïï mïxi kodada ïpï. 13Aapimï gïn kïïdadamu bïïxi oidigi daama óídakami gin aaduñikatai aapimï. Dïï gia ix makïdï mïï ugidagïrï ukami mo ïxi kabakami gukakagi, ïgai gia kïïgakïrï bubuakimu— itïtïdai.

Suxi aagai sai dibiagai ïmo xigalnaxkami parunaragai maaxi

14Apia aatagai Suxi ïmadï odami daidi potïtïdai,

—Daiñi, nïijadamu aapimï go ix makïdï Parunadami Xigalnaxkami tïgidu xi kïkibamu xako maiti gï agai ix kïïkiada ïgai (kïïga abïr tïgito kaï idi ñoki). Xudu nïijada aapimï gobai, aidï gia odami ix makïdï tami Judeïrï darakagi gï agadamu ix bopiagi tutubidakiana — itïtïdai.

15—Dai ix makïdï baaki daama darakagi amaxi gï agadamu xi otoma bopia ïgai mai bubaidakai buxtuidadï tukabidïrï. 16Dai xi dïjoana ajiopada ïmoko gï agadamu xi mai kiiyañdïrï bhïiya ïgai gï yukuxi. 17Xïï soi taadakamu aidï oki ix makïdï nonoakagi xiïpï biakagi xiixïdami, tomax dukai biakamu ïgai xi bopiagi— itïtïdai. 18—Daanïdabïrai tudu Diuxi xi mai toomoko aiyagi go gïï soi ïrhiaragai gobai. 19Mai pokaki soi taadakana odami aidïxi abhiadïrï ix kïi Diuxi oidigi di. Dai tomarhi ïmo imidagai mai pokaki soi taadakamu ïpamu. 20Xi dagitomudai Diuxi ix apia imïdamudai go soi ïrhiaragai, aidï gia bïïxi koimudai oidigi daama óídakami. Dïï Diuxi kïï oigïdai aaduñdï ix makïdï ïko bubaitu ïgai. Kaxkïdï ka dáí ïgai xi otoma kugaidamu gobai— itïtïdai Suxi.

21Bhodïrï Suxi aagai go yaatabogami ix makïdï dadi agai mai kia ugitïkai oidigi dai potïtïdai,

—Aidïpïrï mui odami gïn yaatagididamu aagaitai xi gïn tïïgida agai ïmai xibhïako ix makïdï ïr Diuxi otosadï gïn bhaitï kïakamiga. Bïrai mai buaboituda aidï— itïtïdai. 22—Dai dadimu jaa ïpï daidi tïimu saidi ïr Diuxi otosadï daidi ïr gïn bhaitï kïakamiga. Dai jaa tïimu saidi ïr aituldadami Diuxi ñokidï odami buitapi ïpï. Naana maaxi iduñimu ïgai ix makïdï odami ïïgi xadïrï ixtuidana dai podukai maaxituda agai xïï gupuka ïgai. Podukai buirumada agai mui odami. Dai asta go ix makïdï Diuxi ïko bubaitu katoma buaboituda agai ïpï dïï ïgai gia xadïrï gïn buirumadana go yaatabogami. 23Kïïga abïr gïn nukadaka tudu. Kaxi an ïkiaxdïrï gïn aagidi ix dukatai pogïduña agai xudu ugiti agadagi oidigi— itïtïdai.

Suxi aagai sai odami nïida agai tïbagiañdïrï dibiakai ïgai

24Suxi apia maakai ñoki daidi ikaiti,

—Ka daibunukai go gïï soi ïrhiaragai tami oidigi daama bai bhodïrï tukutu agai tasai ïmadï masadai. 25Tïbagiañdïrï surhigimu xixabugai daidi go gubukadagai bipiakami ix makïdï tïbagiïrï óídaga gigibukïdamu. 26Aidï gia gin nïijadamu odami xi dibiamu aanï bïïxi gin gubukadakïdï dai ïïgi gin kudagigakïdï makïdï bia aanï gin abhana. Aanï ïr Diuxi otosadï ix makïdï aagai Diuxi ïïki dai podukai dibiamu aanï. Iikomai saagida dibiamu aanï. 27Bhodïrï bïïxi aipako otosamu aanï gin tïtïañikaru bai ïmpaidana ïgai gin aaduñi ix makïdï ojoida bubaitu aanï. Bïïxi aipadïrï ïmpaidamu ïgai xajadïrï ukami ajïi oidigi ïmadï tïbagi— itïtïdai Suxi.

Go igoxi dïïdï aatagidï

28Bhodïrï Suxi potïtïdai go odami,

—Xibi aagamu aanï go igoxi dïïdï. Kïïga abïr tïgito kaï idi aatagitudu — itïtïdai.

—Daiñi, xuduku ka ipoñikagi go igoxi dïïdï dai ka bubuakïdagi aagadï kaxi gï maatï ix ka miadaimi tïdako. 29Podukai ïpï xi aapimï nïijadagi ix ka ïpïbuimi bïïxi ix makïdï gïn aagidi aanï aidï gia ka maatïkamu aapimï ix karhioga dibia aanï tïbagiañdïrï dai oidigi ka ugitimu.

30Dai aanï aagai sai odami xibi óídakami mai kia ugitimu xi daibuñimu bïïxi ix makïdï aagai aanï. Dai buaboi aagai aanï— itïtïdai. 31—Bïïxi ugitimu tïbagi ïmadï oidigi dïï aanï gin ñoki gia bïïxkïrï ïr buaboikamu. 32Daiñi, mai tipu xorai maatïkagi xudu dibia iñagai aanï, tomarhi ix tuma tasïrï. Diuxi tïañikarudï tïbagiïrï óídakami mai maatï tomarhi aanï ix makïdï ïr Diuxi Maradï mai maatï ïpï, mosïkaxi gin Oga aba ïgai dai maatï. 33Gï aagai mïxi gin tïgito ajiopada tudu gin nïnïrakatai. Aanï ïr Diuxi otosadï ix makïdï aagai Diuxi ïïki dai maiti gï maatï xudu ayimu aanï— itïtïdai.

34—Gïn aagidamu aanï ïmo maaxidaragai ñoki sai maatïkagi aapimï ix dukatai ïpïduñimu xudu ayimu aanï— itïtïdai. —Daiñi, ïmo kïïrhi ix makïdï tïanïi ïmo gïï kii xudu mïkaxi imia agadagi nunukatuldi pipioñi gï kii. Kitaagiña biayi ïgai ïmo nukadakami dai bipidiña ïgai go gaa pipioñi aaduindadï ïïmadutai ïpï— podukai aagai Suxi ïmo aatagi.

35Dai bhodïrï maa ïgai ñoki go mamaatïrdami dai potïtïdai,

—Aanï ïr go tïanïdami dukai go kii— itïtïdai. —Kaxkïdï tudu gï aagai mïxi bhai gïn dukagi mai maatïkatai xudu dibiamu aanï— itïtïdai. —Maitï maatï xi ïmo imidagai urunoko dibiamu aanï xiïpï ïran tukarï, xiïpï kujukai takuku, xiïpï maaxikai oidigi. 36Kïïga abïr tïgito nïida tudu, tadu dibia aanï todian dukai dai aapimï mai bhai gïn dukagi— itïtïdai. 37—Bïïxi odami bïïtarï idi gin ñoki tudu. Bïïxkatai abïr tïgito nïida dai nïnïraka ix dibiagi aanï— itïtïdai Suxi go mamaatïrdami.

Currently Selected:

Markos 13: NTP

Highlight

Copy