Markos 10
10
Suxi jii Judeamu
1Bhodïrï Suxi jii abhiadïrï Kapernaumañdïrï dai ayi basadïrï go gïï aki Jordan tïgidukïdï xako Judea tïgidu oidigi. Dai ami ïpï gïn ïmpagi mui odami xako dajatadai Suxi bai ïgai maa aatagi. Podukai ibuadana ïgai bïï aipakoga.
Suxi aagidi odami sai maitï agai xi dagitoagi ïmoko gï oñiga
2Dai ami dada ïïmadutai go Fariseos agaikïdï dai naana tïkakaimi go Suxi sai bhai tïïgana ixtukïdï gïpiïrï buajagi. Daidi ikaitimi ïgai,
—¿Bhai ix ïr sïïrhi xi ïmo kïïrhi dagitoagi oñigadï?— astïkakai.
3Baidi go Suxi potïtïdai,
—¿Kaiti aidï Moises ojadï sïïrhikami? ¿Tumaxi gïn tïjai ïgai?— itïtïdai.
4Daidi go Fariseos potïtïdai,
—Go Moises gïr maa oigaragai tïxi bhai duñagi ïmo paperhi dai bhodïrï aagidagi gïr ooñiga xi gïr dagitona ïgai mos tïïgidakai aatïmï go paperhi.
5—Ñii tuduidï— itïtïdai Suxi. —Arhiï mai ïïgidaraga aapimï dai kapaka gïn iibhïdaga kaxkïdï podukai gïn maa ïgai oigaragai dai poduu oja— itïtïdai. 6—Dïï gia aidïxi tukamïrï kïi Diuxi oidigi dai idui odami, ïmo kïïrhi ïmadï ïmo oki idui ïgai. 7Kaxkïdï aidï abhiadïrï daadagito kïïrhi dïïdïdï dai oki ïmadï bipiïyi 8xi bhodïrï bhaitiakoga kaxi ïmo odami dukai bipiïyi go oki ïmadï kïïrhi. 9Kaxkïdï, maiti gï agai odami xi ïjïkobai darasagi ix makïdï Diuxi ka ïmapi darai— itïtïdai Suxi go Fariseos.
10Bhodïrï kiiyïrï baa Suxi bai mamaatïrdamigadï gatïkakai go aatagikïdï. 11Dai Suxi potïtïdai,
—Daiñi gin aaduñi, arhiïxi ïr gïïpi soi ïrhiaragai oki bui xudu kunadï dagitoagi dai ïmai ïmadï bipiïyi. Kaxi gïpiïrï kaatïkami bipiïyi go kïïrhi pomaaxi buadatai— itïtïdai. 12Dai oki ïpï xi dagitoagi kunadï dai ïmai ïmadï biiyagi ïgai ïpï kaxi ïr gïpiïrï kaatïkami soi buididitai podukai aduñdï— itïtïdai Suxi.
Suxi oigïdai aarhi
13Ïmo imidagai odami buapaitadai aarhi bai Suxi taatana dai mamaatïrdamigadï Suxi bhagaidi go ix makïdï buapaitadai aarhi. 14Tai Suxi bhaamu mamaatïrdamigadï bui tïïgakai xi daidimi ïgai aarhi daidi potïtïdai aidï,
—Dagitobïrai go aarhi xi dadana dai maiti abïr daidada. Mos ïr ïï aarhi maa tutuigakami go ix makïdï óídaga xako tïanïi Diuxi di. 15Daiñi aanï aagai sai ix makïdï mai aarhi maa tutuigakagi mai baakimu xako tïanïi Diuxi. Aarhi bïïtarï mai xijaiga buaboitudagi Diuxi di— itïtïdai Suxi.
16Bhodïrï Suxi momotoi go arhi dai kokomitu dai aagai ïmo bhai ïrhiarakami ñoki abhana.
Suxi aataga ïmadï ïmo gï bidakami
17Bhodïrï boiyamu imïi go Suxi ïpamu tai ïmo kïïrhi mïï dai buidïrï ayi. Gï totonakïdï kïkiba go kïïrhi Suxi buitapi daidi potïtïdai,
—Aapi maatïtuldiadami gia kïï tuiga kaxkïdï ipïrhidi aanï pïxi gin aagidagi, ¿Ix dukatai duna aanï dai aiyagi Diuxi ïmadï xako kïïgakïrï oidakana ïmoko tomaxtuigako?— itïtïdai go kïïrhi.
18Daidi Suxi potïtïdai,
—¿Tui pïxi kïï tuigakami gin aagai? Ka mos arhi ïmadugaba kïï tuigakami dai ïgai ïr Diuxi. 19Aapi maatia ïrhiadan kaiti ixdukatai kïïgakïrï oidakagi tomax tuigako dïï mos ka kïïga maatï aapi ix kaiti Diuxi ojadï sïïrhikami di. Ïgai gïr tïtïdai sai, Maiti abïr gaïxiada oñigadï ïmai, dai maiti gakodada, dai maiti gaïïxiada gabuxtuidaga, dai maiti yaatagïda, dai maiti gabupuirumada gïn aaduñi. Dai xadutuadabïrai gïn ojoga ïmadï gïn dïï. Potudu kaiti Diuxi ojadï sïïrhikami— itïtïdai Suxi go gï bidakami.
20—Gin maatïtuldiadami, kaxi an kïï ïïgi bïïxi go maaxi arhidukatai abhiadïrï— ikaiti go kïïrhi.
21Dai Suxi oigïda tïï go kïïrhi daidi potïtïdai,
—Aidï gia mosïkaxi biïga pïxi gaagaragi gï buxtuidaga dai óídagi go tuminxi go soi titiigami pai gï biidakagi aapi aïkai Diuxi ïmadï tïbagiïrï. Poduñi aapi dai gokiïrï dibia dai gin oijada— itïtïdai Suxi.
22Dai mai bhaigïrhi go kïïrhi kaïkai aatagidï Suxi. Mos soi gï ïrhiatugai jii ïgai abhiadïrï tïtïitoitai buxtuidadï. Gï bidakami ïgai kaxkïdï. 23Suxi aipako nïnïaba daidi potïtïdai mamaatïrdami,
—Gia xijaiga gïn bipidakami bïïtarï urabakagi Diuxi aaduñdï xako Diuxi kïïgakïrï tïanïi dai nukadai— itïtïdai.
24Ka mai tïï mamaatïrdamigadï Suxi ix dukatai gïn tïtïgitoagi kaïkatai aatagidï. Daidi Suxi apia aatagaimi ïmadï daidi potïtïdai,
—Daiñi gin aaduñi— itïtïdai. —Odami ix makïdï tïtïitoi buxtuidadï dai mai xu Diuxi tïtïitoi ïgai arhiï xijaiga gïn bïïtarï urabakagi Diuxi aaduñdï xako Diuxi kïïgakïrï tïanïi dai nukadai. 25Kïï maatï aapimï sai arhiï xijaiga ïmo gïï kameyo bïïtarï ix baakiagi ïmo oyi dïgadïamu sïïrhi dai aanï aagai sai bamioma ïr xijaiga odami bïïtarï ix makïdï gï bidaka ix gïn aaduntudagi ïmadï Diuxi— itïtïdai Suxi.
26Dai go mamaatïrdami ka mai tïï ixdukatai gïn tïtïgitoagi kaïkai aatagidï Suxi daidi potïtïdai,
—Xi ïr buaboikagi gobai ix duu aagai aapi aidï gia ¿Xorai aïna Diuxi ïmadï?— ikaiti mamaatïrdami.
27Dai Suxi kabami nïnïidi mamaatïrdami dai potïtïdai,
—Xadïrï ixtuidana odami xi ïïgi aiyagi Diuxi dïï gia Diuxi bïïtarï mai tipu xijiakami. Ïgai gia kïï bhaiga xi kïïgakïrï bubaidagi odami xi ïmadï óídakana— itïtïdai Suxi.
28Daidi Piduru potïtïdai go Suxi aidï,
—Kaxi aatï dagito gïr kiiki ïmadï bïïxi ixtuma biakatadai aatïmï gï oida ïrhiditai— itïtïdai.
29Dai Suxi potïtïdai,
—Oidakamu ïïmadutai dai gïn aagakai aituldamu gin aatagi bhai ïrhiarakami jaa odami buitapi. Dai aagadamu xi dagitoagi ïgai gïn kiiki dai gïn susukurhi dai gïn xixïgi dai gïn dïï ïmadï gïn oga dai asta gïn maamara dai gïn dïdïbïraga ïpï pobuadatai. Pobai iduñimu ïgai gin buaboitudaitai. 30Daiñi, aanï agai sai ix makïdï podukai dagito ïmo kii ïgai biakamu ïmo ciento bhaabhaki tami oidigi daama. Dai podukai ïpï ix makïdï dagitoagi susukurhi dai xixïgi xiïpï dïïdï dai maamaradï dai dïbïradï ïgai ïmo ciento biakamu go maaxi ix makïdï dagito dïï gia odami soi buidida agai. Dai aïkai gïmai oidigïrï tomax tuigako oidaka agai. 31Mui odami ix makïdï bamioma tïanïi xibi abïr ïgai dai bamioma mai tïanïda agai aidï gïmai oidigïrï. Dai ix makïdï bamioma mai tïanïi xibi ïgai gïï tïanïda agai amïka— itïtïdai Suxi go Piduru.
Suxi ïpamu aagai sai gï agaitadai ix mukia ïgai
32Ïmo imidagai mïï daana Jerusalenamu imïitadai Suxi ïmadï mamaatïrdami dai Suxi bhaitï kïïkigi. Dai go mamaatïrdami naana maaxi tïtïitoi boiyamu iimïitai dai jaa odami oidi ïpï. Duduadimutugai ïgai mai maatïkatai xi pogïduña agai. Dai Suxi ïko báí go bhaibuxtama dan goka mamaatïrdami dai aagida agai ixdukatai ïpïduñagai ïgaikïdï, Suxikïdï tudu.
33Dai potïtïdai ïgai,
—Kaïkabïrai aapimï— itïtïdai. —Aanï ïr Diuxi otosadï ix makïdï aagai Diuxi ïïki dai odami gin tïïgida agai go dudunukami mïï Jerusalenïrï xako iimïdami aatïmï mïtai gin tïañi agai muaragai dai gin tïïgida agai xibhïadïrï óídakami. 34Dai go xibhïadïrï óídakami gin parunada mïagai dai saasasa agai gin tukuga dai gin xixibada agai dai gin mua agai. Dïï mos baika tasai kaatïkamu aanï koidadï saagida dai bhodïrï ïpamu duakamu aanï— itïtïdai.
35Dai bhodïrï go Jakobo ïmadï Juan miadïrï gukiba go Suxi daidi potïtïdai,
—Maatïtuldiadami, gï tañia rïrhidi aatïmï ïmo ixtumaxi paidi duña aapi— itïtïdai.
Go Jakobo ïmadï go Juan ïr maamaradï ïmo kïïrhi Sebedeo tïgidukami.
36Taidi go Suxi potïtïdai aidï,
—¿Tumaxi gin tañia ïrhidi aapimï?— itïtïdai.
37Dai Jakobo ïmadï Juan potïtïdai,
—Kïï maatï aatïmï sai ayimu ixtuigako bhïimu aapi gï sïïrhikamiga. Aidï gia maaxituldamu aapi xïïxi ïr gïdukami aapi. Gïr maakañi tudu oigaragai tïxi aidïpïrï gï abhana daraibagi aatïmï, ïmoko gï sïïrhixapadïrï dai go gïmai gï ogixapadïrï. Podukai tudu gï sonoïrï gukakamikamu aatïmï dai aatïmï ïpï gïdukami bhïimu sïïrhikami— itïtïdai.
38Dai Suxi potïtïdai aidï,
—Aapimï mai maatï ix tumaxi gin tanïi. Daiñi ix makïdï ïr gin sonoïrï gukakami ka agai agadamu xi gin ïmadï taatagi soi ïrhiaragai ïpï. ¿Bhai ix ixtuidana aapimï xi taatagi go baaxi soi ïrhiaragai ix makïdï taata iñagai aanï?— itïtïdai.
39—Ïjï, kïï bhaiga aatïmï— ikaiti go Jakobo ïmadï Juan.
Dai Suxi potïtïdai,
—Buaboi aba ix dukatai aagai aapimï. Taatamu aba aapimï go baaxi soi ïrhiaragai ix makïdï taata iñagai aanï. 40Dïï mos tomax dukai maiti gin ajïga xi darasagi ix makïdï gin sonoïrï daraiba agai baakïkai aanï gin sïïrhikamigïrï. Ïïgi gin oga ajïga xi darasagi ïgai— itïtïdai go Suxi.
41Daidi go gaa mamaatïrdami bhaakoi go Jakobo ïmadï Juan bui kaïkai ix tïtïdai ïgai Suxi. Bhaibuxtamadu ïgai dai bhaakoi. 42Dïï mos go Suxi báí ïgai daidi potïtïdai aidï,
—Aapimï kïï maatï ixdukatai aatabuayi xibhïadïrï óídakami. Ix makïdï ïr gubukadagai bipiakamigadï ïgai arhiï ojoidi xi tïanïdagi aaduñdï. Maiti taata tïanïi ïgai. 43-44Dïï aapimï maiti gï agai xi pomaaxi buadagi. Aapimïkïdï gia ix makïdï ipïrhiadagi xi ïr bhaitï kïakamikagi gï agai xi ïr odami pioñigadï bhaiyoma. 45Daiñi aanï ïr Diuxi otosadï ix makïdï aagai Diuxi ïïki dai aanï mai tïanïda iñagai dai dibia. Bhaiyoma odami pioñigadï aanï. Gobai bïïtarï dibia aanï di. Aanï ïïgi gin tïïgida iñagai mïxi gin mua agai dai podukai kïïgakïrï bubaida iñagai muidutai oidigi daama óídakami xi bhodïrï ka mai gïpiïrï bïïtïkamikana ïgai— itïtïdai Suxi go mamaatïrdami.
Suxi duadi nïadagadï Bartiméo
46Bhodïrï apia boiyamu iimïi go Suxi ïmadï mamaatïrdamigadï dai Jerikoana sïïrhi dïgabusai ïgai xako guka chïki bhaabhaki. Dai gïn ïmadï iimïitadai jaa mui odami ïpï. Ka dagitoimi ïgai Jeriko tai ayi ïgai ïmo soitigami Bartiméo tïgidukami. Boi ugidana dakatai gataanïi ïgai soiñi go iimïdami. Maradï ïgai ïmo kïïrhi Timéo tïgidukami dai mai nïayi ïgai. 47Mos máí ïgai xi ami daibuskimi go Suxi Nasaretañdïrï oidakami tai gïïgïrï iñokidimi daidi ikaiti,
—Aapi Suxi ix makïdï ïr pipiixaradï go Dabidkaru. Soi gï ïlda aanïkïdï— ikaitimi.
48Dai mui ix makïdï ami guka mos bhagaimi go Bartiméo daidi ikaitimi,
—Dodorhi daka— ikaitimi.
Dïï ïgai mos apia bamioma iñokidimi daidi ikaitimi,
—Aapi Suxi ix makïdï ïr pipiixaradï go Dabidkaru. Soi gï ïlda aanïkïdï— ikaitimi.
49Dai Suxi kïkiba boiyana dai dodorhitu go odami dai bhodïrï potïtïdai ïgai go ix makïdï ami guka,
—Aagidabïrai go kïïrhi sai bhaigobai dibiana— itïtïdai.
Taidi go odami abïnaki go Bartiméo daidi potïtïdai,
—Maiti soi gï ïlda dai kïkiba. Gï bapaidimi go Suxi— itïtïdai.
50Dai go Bartiméo máí daitu suadï dai tuarhi daa dai mïï dibia xako kïïka Suxi.
51Daidi Suxi potïtïdai aidï,
—¿Ixtuma ipïrhidi aapi ix gï duiñda aanï?— itïtïdai.
—Aapi maatïkami, ipïrhidi aanï pïxi gin duada aapi gin nïadaga, mai nïayi aanï di— itïtïdai go Bartiméo.
52Daidi go Suxi potïtïdai aidï,
—Ka bhaiga aapi pïx imiagi— itïtïdai. —Kïï buaboitu aapi kaxkïdï ka duayi gï nïadaga— itïtïdai.
Mos potïi go Suxi tai go kïïrhi nïnïaba dai ka mos boiyamu oi ïgai go Suxi.
Currently Selected:
Markos 10: NTP
Highlight
Share
Copy
Want to have your highlights saved across all your devices? Sign up or sign in
Copyright: Ethnos360 Sanford, Florida
