Mâk 12

Yesù ə dzày Zə̀zə̌ fə ghě kəfàʼ àbɛbə

(Matìyò 21.33-46; Lukâs 20.9-19)

1Yesù ə̀ dyaŋi kaʼ yə̀ ani dzày fə̀zə̀zə̌ awò ŋgəd tə aghě Dzùdiyà a ghu nə, “Wù lìy kə kwu uswum u we, u zu na tsə ŋkàʼ mə̀ utam ate ghu tyoŋə nə̀ à də̀ ‘Vayìn’, twiy na tsìy yə̀ mbà ate, zəŋi na tsə kə loʼo kə̀ zəŋə kə mənlwù kìy anə mbà i ghà yə̀, byiə na kə sòʼò mfwùə kə̀ kyiŋə kiy awote. U nyə̀ fyi yə̀ awò aghè àliy yiy nə̀ ghu ki faʼa ate ghu ki tsəə bə ighe nə̀ ùkhiy wiy. U ŋwò fyi bwì yə̀ i we yiy anə inaʼ ìŋwô yìy. 2Abù soŋə fiy kpe tsə ani kwà ùtam, u twum tsə wè kə̀fàʼ ə̀ we nə̀ ù zù nìy bə̀ ìtwiʼi utam uwe awò àghě uswum yə. 3Aghee uswum yə fə̀d kwi tsə we, bwad we, dzwùm ŋwò we, u ŋwò nə̀ awo àzwumə yiy. 4Mwe ə̀ ùswum wə kàm twum fəli tsə wè ə̀ kə̀fàʼ ùlìy wìy, ghu bwad we anə kətuw, nyàʼì dzwàb tsə sòʼò we. 5Mwe ə̀ ùswum wə nam twum fəli yə̀ wù kə̀fàʼ ùlìy wìy, ghu wiy màʼà we. Mwe ə̀ ùswum wə twum fəli yə̀ kə ndə̀mə̀ aghè àliy yiy, ghu bwad àliy yiy, wiy màʼà àliy yiy. 6Mwe ə̀ ùswum wə̀ kə kwu kə wa umòʼ ù kə ŋge liə nəniy. U twum gwùŋì yə̀ we akə̀lə̀ aghě uswum yə, mòʼò kə nə̀ ghu kî nyə̀ ŋwòə we nə̀ ŋkwiʼi miy. 7Aghee uswum yə səay tsə anə iwè ighu nə̀, ‘À wə̀ də̌ wà mwe ə̀ ùswum, bù nəniy tə̀ ŋgà wiy maʼà we, a kəli ŋwô ùfyiə wə!’ 8Ghu kwi tsə wa nə, wiy màʼà we, bòʼò màʼà fyi yə̀ ìvəən i we anə ukè u uswum.”

9Yesù ə bəb tsə a ghu nə, “Ghà moʼò nə̀ mwe ə̀ ùswum wə̀ kì bè zəŋə mə̀yə nə̀ àghè yə̀ ghu kə nîy fyi nəniy uswum wə? Ù kì kwu ani bù wiy màʼà àghě uswum yə, ù nìy kə uswum u ghè wə̀ ù nyə̀ yə̀ â wù lìy wìy. 10Ghà kamə kə̀ twoŋə kôʼ àyiə yə anə ŋwàʼà k-a-zə̀ ə̀? Anə lòʼo kə kə dzîy nəniy nə̀,

‘Itay yə aghê bwamə təndaw yiy twe maʼà nə̀ i dzwabə̀ wày,

à kàm də ighe itay ìsoŋə̀ yə̀ i kwi kəli nəniy tsə kə ndaw kiy.

11À kə fàʼ Mwe ə̀ Mbyi ayiə yə,

ŋgà kòʼə tsə nə̀ à də̀ mali kə iyiə.’ ”

12Ŋgəd tə aghě Dzû yìy kə khu tsə̀ dzəd ani kwi Yesù, aŋwòə ghu kə kwu ŋwô nə̀ ù zə̀zə̌ fə̀ ghî dzìy nia azoŋə̀ ghu. À kə kwuni də̀ kə nə̀ ghu kə tsəŋə ŋwàâ kə ghù kə kə də nəniy, ghu na sə tsə we ŋwò yə̀ ighu yiy.

Ŋwàʼà kə̀ tsuw kiy â Kaʼisà

(Matìyò 22.15-22; Lukâs 20.20-26)

13Ghab kiy kə̀ fyi nəway, ghu zù twum bə̀ àghě Falàsî nə̀ àghù yə̀ ghu taʼa nəniy nə̀ Helòd nə̀ ghu bû bê kwi Yesù anə ayiə we à dziy yiy. 14Ghu bù dzày yə̀ awe nə̀, “A àtyi dè, ghè kwu ŋwô nə̀ wò də̌ wù ù dzìy nəniy ayiə àsoŋə̀ yìy, wò kòʼò ŋgwòʼò dzə̀ wày aghê àliy yiy, moo kòʼò kè àghè àliy yiy, wò tsəŋə dzə̀ way asə aghù yìy, abu ghu tsəm də kə mə̀yiə. Wò tyi dè dzələ t-a-zə̀ anə ayiə à dzoŋə̀ yìy. Dzay bə̀ nyiə awò ghə̀d, nə̀ i də ŋwô tsitsi â ghə̀d ani tsuw nyə̀ kə̀ŋwàʼà awò Kaʼisà, moo i way tsitsi ə? A tsuw moo a kə tsuw ə?”

15A də̌ nə̀ Yesù mə kwuni kəli nə̀ ghu ŋwamə zəŋə ŋwò, u bəb yə̀ a ghu nə, “Ghà mwamə̀ kòʼò nə̀ìndiə miə ə? Bù nənìy miə nə̀ ùkhiy wiy tə̀ mə kôʼ tsə.”

16Ghu ə bù sòʼò nə̀ ùkhiy wiy, Yesù ə bəb tsə ghu nə, “À də̀ zəŋi kə ndiə ate ə?” Ghu bə̀lì kə a we nə, “À də̀ kə Kaʼisà kìy.”

17Yesù ə dyaŋi bə̀lì kə ghu nə̀, “Nyə yə̀ â Kaʼisà fyiə kə à də nəniy kə Kaʼisà kìy, Ghà nyiə̀ yə̂ soʼò awò Zə̀kìy fyiə kə à də nəniy k-a-zə̀kìy.” Adzwə zwum này yə̀ ghu azoŋə̀ we.

Aghee Sadùsî ə bəbə nə̀ aghê nî zɛ̀mə̀ dyòʼò bə̀ dyòʼò mə̀yə ə?

(Matìyò 22.23-33; Lukâs 20.27-40)

18Aghee Sadùsî à liy yə ghu kə dzîy nəniy nə̀ aghê pfə zɛ̀mə̀ tsə̀ dzə̀ wày, ghu zù bù ani bù bəb ayiə awò Yesù. Ghu bəbə a we nə̀, 19“A àtyi dè, Musîs kə twà na â ghə̀d nə̀, ‘Abu wù pfə na sə tsə wìy we nə̀ ù kə̀ byi nəway wa, àzə̀ ə̀ we nìŋì yə̀ wìy ù te wiy, wà ù səsə wə ghu byi bə̂ nəniy, u dòʼò yə̀ anə̀ izəd i àzə̀ ù pfə̂ wə̀.’ 20Aghê à liy kə də̀ ŋwô, utuw ghu u sèmbe ghu kə də nəniy awizə̂. Ù səsə wə nìy kə wiy bu pfə nə̀ ù wa kə̀ byi nəway. 21Ù wə̀ ù dzwùmì yəə we, u nìŋì yə̀ wìy ù te wiy, bù pfə sòʼò nə̀ ù kə̀ byi nəway wa nə̀ we. Ù lìy wə̀ ù zəŋə yə̂ aghê àti u nìy yə̀ sòʼò wìyəŋi wə, a də̀ kə iyiə ìmoʼo yiy, zəŋi kə ghii tswi kwùm tsə nə̀ ù wə̀ ù zəŋə yə̂ aghê ìsèmbe nə̀ wù ùmòʼ ate kə̀ byi nəway wa nə̀ wìyəŋi wə. 22Anə utuw ghu wə ù sèmbe, wù ùmòʼ ə kə̀ byi nəway wa nə̀ wìyəŋi ùghà wə̀. Wìyəŋi ù ghè wə̀ ə bù pfə dyaŋi yə̀ sòʼò. 23Wìyəŋi wə̀ nì dyòʼò wìy ndìə̀ ate anə uzə u ghù yə̀ àsèmbe ani bu Zə̀kìy zɛmə̀ dzwoŋi bə̂ nəniy aghê ani ipfə?”

24Yesù ə bə̀lì kə ghu nə, “Ghà dzîy ŋgwalə ŋwò! À də̀ yəə ghà də kwu way ayiə yə ŋwàʼà k-a-zə̀ kìy dzîy nəniy, kwu dyaŋi sòʼò way yəə daʼa k-a-zə̀ kìy faʼà nəniy ate. 25I də nə̀ ani bu Zə̀kìy nî zɛ̀mə̀ dzwoŋi bə̂ nəniy aghê yìy, ghu nî kàm nìy sòʼò wày iwee yiy. Ghu nî dyòʼò tə à də tsə̀təndii t-a-zə̀ an-a-vələ. 26Kùmə̀ yə̀ nə̀ ìzɛ̀mə̀ dzwoŋi yiy anə ipfə, ghà kamə kə̀ twoŋə kôʼ ŋwàʼà kə Musî kìy ə̀, anə bə̀d kə̀ kə dzîy àyiə uvə̀lə̀ ù byaʼa wiy anə fəkàʼ ə̀, yəə Zə̀kìy kə dzîy â Musîs nə̀ ‘Mə də Zə̀ kə Ablàhâm, də̌ Zə̀ kə Ayzìk, də̌ Zə̀ kə Dzàkôb? 27I dê tsə nə̀ ù wày dzə Zə̀ kə aghè pfə kiy, ù də̌ Zə̀ kə aghù yə̀ ghu muə. Ghà mə ŋge fwəd.

Lâŋ kə̀ kə tsîy fyi nəniy

(Matìyò 22.34-40; Lukâs 10.25-28)

28Wù lìy wìy anə aghè tyi dee ulàŋ wìy ə zù bù zuw tsə yəə ghu kə zwaʼà nəniy. U zuw kəli tsə nə̀ Yesù mə bə̀lì dzwàb ə ghu. U bəb yə̀ â Yesù nə̀, “À baa tsìy fyi lâŋ kə̀ ghaa kiy anə ulàŋ wə̀ ùdzə̀m ə?”

29Yesù ə bə̀lì kə nə̀, “Lâŋ kə̀ kə tsîy fyi nəniy anə ulàŋ wə̀ də̌ nə̀, Zuw nənìy aghee Islàel, Mwe ə̀ Mbyi, Zə̀ kə ŋgàŋ, à mày kə we Mwe ə̀ Mbyi.” 30Liə tsə Mwe ə̀ mbyi Zə̀ kiə̀ kìy nə̀ fòŋ yə̂ idzə̀m, nə̀ ìmùə̀ yə̂ yìy ìdzə̀m, nə̀ ìmòʼ yiə̀ ìdzə̀m, nə̀ dàʼa kiə̀ kìy kə̀dzə̀m.’ 31Kə̀ liy kiy də nə̀, ‘liə yə̀ aghè àdzə̀m anə yiə yə wò liə nəniy uwe niə̀ wìy ate.’ Lâŋ kə̀ liy kiy way dzə kə tsîy fyi nəniy ù wəə ùbè.”

32Wù ù tyi dê ùlàŋ wə̀ ə bə̀lì kə nə̀, “Wò mə dzày dzwàb a àtyi dè! Anə yiə yə wò dzày nəniy nə̀, Zə̀kìy də kə kə̀ mòʼ nə̀ Zə̀kə̀ liy kiy kâm wày dzə à mày kə we. 33Wə̀ dzày dzwàb ŋwò nə̀ wò kwu ani liə Kəzə̀ nə̀ fòŋ yə̂ ìdzə̀m, nə̀ ìmùə̀ yə̂ yìy ìdzə̀m, nə̀ ìmòʼ yə̂ yìy ìdzə̀m, nə̀ daʼa kiə̀ kìy kə̀dzə̀m. Wò dzày dzwàb sòʼò ŋwò nə̀ wò kwu sòʼò ani liə aghê àdzə̀m anə yiə yə wò liə nəniy uwe niə̀ wìy ate. Ulâŋ wə̀ tsîy fyi ŋwô ayiə à pyaʼa nyiə ufyiə wiy nə̀ àyiə à sâ ufyiə wiy â Zə̀kìy.”

34Abù Yesù kòʼ tsə nə̀ ù mə bə̀lì dzwàb, u dzày tsə we nə̀, “Wò mə swəd mà bə̀ a loʼo kə Zə̀kìy saʼa nəniy ate.”

Abù Yesù bə̀lì mà tsə wù wə̀, aghee tsəŋə ani kàm bəb we nə̀ ìyiə yiy.

Kə̀litò də̀ kə ŋwô wà tuu kə Devìd kìy ə̀?

(Matìyò 22.41-46; Lukâs 20.41-44)

35Abù Yesù tyi dê nəniy àyiə yiy a ndàw Kə̀zə̀, u bəb tsə nə̀, “Aghê tyi dee ulàŋ yìy fədə̀ dzìy nə̀ wù wə̀ Zə̀kìy sûw kyili na an-a-dòŋ də̌ wà Devìd iyî kìə̀?” 36Zwàykə̀zwekiy kə zəŋə tsə awò Devìd nə̀ ù dzày tsə nə̀,

“Mwe ə̀ Mbyi Kəzə̀ kə dzày yə̀ awò Mwe ə̀ Mbyi wam a we nə,

‘Dòʼo tsə anə ukwe wam ù nyiə wiy

tə̀ mə kiy nîy na bə̂ aghù yə̀ ghu bâ nəniy wô a təŋə ifwe yə̂.’

37Devìd nə̀ ùwe u we wiy kə twoŋə fyi bə̀ we nə̀ à də mwe ə̀ mbyi, Wù wə̀ Zə̀kìy sûw kyili na an-a-dòŋ sì kàm də̌ mə̀yə ani dòʼò wà tu kə Devìd ə?” Ndə̀mə̀ àghě yə̀ ghu kə zwulə àyiə yə ù tyi dê nəniy, ghu ə də nə̀ dwiʼi kiy anə təfòŋ.

Yesù ə twe maʼa yə̀ ayiə aghè àtyi dě ulàŋ wìy

(Matìyò 23.1-36; Lukâs 20.45-47)

38Abù Yesù tyiə dê nəniy ayiə yiy u dzày tsə nə̀ “Ghà nîy ìyèmì nə̀ àghè tyi de ulàŋ wìy, ghu liə ani bwìy tsə̀ nə̀ ùbalaŋ wiy, liə sòʼò nə̀ aghê si tyoŋə zuw ghu anə bekəivən. 39Ghu liə kə ani dòʼò anə ukwe ù nê wìy anə ndaw tə udzəŋə tə ghě Dzû, nə̀ loʼò tə̀ soŋə̀ tìy anə loʼo tə̀ inyi. 40Ghu koʼò kè ise ə mpfənsə, bii ŋwò ndaw tə ghu, liə tsə kə ani gwùŋì gwùŋì tə̀dabə tiy, ani dè ìwe. Ghu nî kyilə mfəm ì sòŋə̀ yìy.”

Inyiə̀ i wìyəŋi ə mpfənsə

(Lukâs 21.1-4)

41Yesù ə dòʼò tsə akə̀lə̀ loʼo kə ghu kwoʼo zê kwee nəniy ukhiy wiy ate a ndàw Kə̀zə̀, fwə̀lə̀ kə àghù yəə ghu bê kwe nəniy ukhiy wiy. Ndə̀mə̀ àghè ə kumə yiy kwoʼo kwee ndə̀mə̀ tə ukhiy; 42Wìyəŋi ə̀ mpfənsə ù lâ wìy ə kwoʼ bù kwe mà tsə nyàŋə fə ukhiy fə we, nə̀ fə kə bwòʼ wày ivən i yiə i liyiy. 43Yesù ə twoŋə tsə tsə̀təndii tə we nə̀ ghu bu a kə̀lə̀ we, dzày yə̀ a ghu nə, “Mə ndzəmə̀ dzìy bə̀ ŋwò nə̀ wìyəŋì mpfənsə ù lâ wə̀ mə kwe ukhiy wiy a fə tsìy fyi aghê àdzə̀m ghu kwoʼ kwe nəniy ukhiy fəə a Ndàw Kə̀zə̀.” 44Aghê ə̀ kumə yə àdzə̀m, ghu nîy fyi kə fə̀nyàŋə anə ndə̀m ə̀ ìkum ighu, wìyəŋì mpfənsə wə̀ kwuni nyə̀ mà bə̀ fyiə kə ù kwu nəniy ani mùə̀ ate.

Currently Selected:

Mâk 12: isu

Highlight

Copy