Matìyò 18

Wù wə̀ ù tsìy fyi nəniy a lòʼo kə Zə̀kìy saʼa nəniy ate

(Mâk 9.33-37; Lukâs 9.46-48)

1A sòŋə fə ghè fə̀ tsə̀təndii tiy bù a kə̀lə̀ Yesù, bəbə a we nə̀, “À ba tsìy fyi ndiə a lòʼo kə Zə̀kìy saʼa nəniy ate ə?”

2Yesù ə twoŋə bə̀ ànìsə̀ a kə̀lə̀ we, u təmi na bə̀ anə uzə u ghu. 3U dzày yə̀ a ghu nə, Mə ndzəmə̀ dzìy bə̀ ŋwò nə̀, “À mày kə nə̀ ghà kwuni kə ŋwô dòʼò tsə yəə à də ànìsə̀ wə̀, ghà nî zù kòʼ wày a lòʼo kə Zə̀kìy saʼa nəniy aghee we yiy ate. 4Ì yû dè tsə nə̀, wù wə̀ ù nìy tswi tsə imuə̀ iwe yiy yəə à də ànìsə̀, ù nì dyòʼò wù ù nè nè wìy a lòʼò kə Zə̀kìy saʼa nəniy aghee we yiy ate. 5Wù wə̀ ù ŋgwam na nəniy ànìsə̀ yəə à də ù wə̀ anə izəd yam, ù ghî ŋgwam na sòʼò mìə̀.”

Imwâm kòʼ yə̀ i zəŋə nə̀ wù zəŋi ibɛb

(Mâk 9.42-48; Lukâs 17.1,2)

6Abu wù lìy wìy zəŋi nəniy nə̀ ànìsə̀ ù mòʼ anə nìsə̂ yə̀ ghu bɛmə nəniy â mìə̀ nə̀ ù zəŋi bɛb, ù kpe kə yəə ghu ni kwù tsə itay ìgwuə ì nê yìy anə umwìy u we, ghu zû kwuŋi màʼà yə̂ we anə an-a-ntəm anə dzwî ì nè yìy. 7Mfəm lyimə àghě mbyi yə, aŋwòə ayiə yə a də ate a zəŋə nə̀ aghê tyaŋì bvə̀ anə ibɛb, ayiə yə ghii a kwu ani fyi, ndzòʼò mfəm yə ì kwunə lyimə wù wə ù niyebə nyiə̀ nəniy aghê yìy nə̀ ghu ki zəŋə ayiə àbɛbə, ì ŋge fyìà ŋwò.

8Bəə wo kiə̀, moo wuu kiə̀ kìy zəŋə wô nə̀ wò ki zəŋə ayiə àbɛbə, khǐ màʼa tsə. I dzwâbə̀ nə̀ wò zû kəli imuə itsà nə̀ wo kiy kəmòʼ, moo nə̀ wuu kiy kəmòʼ tsìy fyi â wò ani kwu awo yiy àbè, nə̀ àwuu yiy ibè wò zû anə uvə̀lə̀. 9Abu isə yiə̀ yìy zəŋə nə̀ wò ki zəŋə ayiə àbɛbə yiy, kyali ŋwòə fyi bə, wò maʼà yə̂. À dzwàb â wò ani zù nyi itsâ nə̀ isə yiy imòʼ, tsìy fyi â wò ani kwu asə abè wò zû anə uvə̀lə̀.

Zə̀zə̌ fə ndzwù yə̀ ì kə nây

(Lukâs 15.3-7)

10Ghà nîy ìyèmì kəə ghà nə̀ koʼò kê nəniy anîsə̂ yìy, aŋwòə tsə̀təndii tə ghu tiy də anə səkə Təli wam an-a-vələ. 11Wà Wù kə bù ani bù bii fyi aghû yə̀ ghu nây dòʼò nəniy anə sə k-a-zə̀.

12Abu wù lìy kwu nəniy ndzù tìy fəbwaam, ìmòʼ này tsə ate, ù kì zəŋə mə̀yə? Ù kì wa nia sə tsə tə̀ tuu mə̀mvəm imbwùkə nə̀ ghe tiy ibwùkə anə udoŋ ani zù kaw ì yù ì này dòʼò nəniy ə? 13Mə ndzəmə̀ dzìy bə̀ â ghà nə̀, abu ù zù kaw kôʼ tsə nəniy, ù də ani dwiʼi nə̀ ì ghè yə̀ tsìy fyi tə liy tə mə̀mvəm imbwùkə nə̀ ghe tiy ibwùkə tə də kə nây. 14À də̀ ighəd Təli ghi an-a-vələ, ù də liə way nə̀ ànìsə̀ umòʼ ù này an-a-sə̀àŋì.

Abu wù lìy zəŋi tsə ibɛb yiy anə uzə ghi

15Abu àzə̀ yiə̀ zəŋi tsə wô nə̀ iyiə ìbɛbə yiy, zù kway yə we, wò dê yə̂ ayiə yə ù zəŋi byɛbi nəniy.Wò kwuni kwu ani dè yə̀ ayiə aghè yə̀ nə̀ à də̀ kə wò nə̀ we. Abu ù zuw nəniy ayiə yiə̀ à dzǐy yiy, à kì də nə̀ wò mə kwùm ŋwò fyi bə̀ we. 16Abu ù kwuni twe màʼà nəniy ayiə yə wò dzày nəniy, niy kə wù ùmòʼ moo aghê àbè wò zû nə̀ ghu, tə̀ à ki də nə̀ wò mə fàʼ yə̀ ayiə yə ŋwàʼà k-a-zə̀ kìy dzîy nəniy, nə̀ wò kwu ani bù nə̀ àghè bè, moo aghê àti ani dzày nyə̀ idzwə yiə̀. 17Abu ù nam twe təŋ yə̂ kə ŋwô ani zuw ayiə ghu à dziy yiy, dzày nyi yə anə dzəŋə kə aghè ə Kəzə̀. Abu ù də kə̀ nam zuw soʼò ayiə dzəŋə kə aghè ə Kəzə̀, ghà fâʼ nə̀ we yəə à də wù wə̀ ù də kə̀ bɛmə nəway Zə̀kìy, moo wù wə̀ ù khii ŋwàʼà kə̀tsuwkiy.

Ayiə yə Ghà də ani twe màʼà nə̀ àyu Ghà də ani bɛmə na

18Mə ndzəmə̀ dzìy bə̀ ŋwò nə̀ Iyiə yə ghà kì twe myiʼà fə anə mbyi, à ki də ì yuu mə twe na dzə̂ an-a-vələ, iyiə yə ghà bɛmə fə anə mbyi, à ki də ì yuu mə bɛmə na dzə̂ an-a-vələ.

19Mə kâm dzây fwuli bə̂ ìyiə ìsoŋə̀ yìy â ghà nə̀ abu aghê àbè anə uzə ghi bɛmə dzəŋə kə anə iyiə ì liy yiy fə anə kəmbvə̀dintsə, gwùŋə̀ bə̀ ate, Təli wam wə ù də nəniy an-a-vələ ù kì byìlə̀ bə̀ ghu ate. 20Aŋwòə loʼo kə aghê àbè moo aghê à tii ghu təmdzəŋi doʼò anə izəd yam, mə ki də awo nə̀ ghu.

Zə̀zə̌ fə wù liy ù kə də kwu way mwuli kə̀ kwoʼò kiy

21Pità ə zù bù a kə̀lə̀ Yesù bəbə a we nə, “A Mwe ə̀ mbyi, à də nsòŋə insə̀ki mə kwu nəniy ani nìyzə̀ wù wə̀ ù zəŋi nəniy miə nə̀ ayiə àbɛbə yiy ə? À də̌ nsòŋə insèmbe ə̀?”

22Yesù ə bə̀lì kə we nə, “À kaʼi wày dzə nsòŋə insèmbe, àkwuni də mə̀mvəm insèmbe, nsòŋə insèmbe soʼo.#18.22 Ùŋwàʼà ùliy wiy kwu soŋə insèmbe soŋə insèmbe. 23Ayiə yə Zə̀kìy saʼa nəniy aghê yìy ate à də̀ yəə à də dòŋ kə̀ liy kiy ù kə liə nəniy ani bəb ùkhi u we awò àghě kəfàʼ a we. 24U kaʼ tsə nə̀ wù səsə wə ù kə kwu we nə̀ ndàŋ kìy yəə à də̀ bwam fə ndâŋgàŋ. 25Wù wə̀ kə̀ kwu way ukhiy wiy ani tsə ndàŋ kə̀ ate. Yəə i kə də nəniy a ghii, dòŋ kə dzày nə̀ ghu nî fê fyi we nə̀ wìy we nə̀ àwa we yiy, nə̀ ùfyiə u we wiy udzə̀m tə̀ ghu tsə bə̂ ndàŋ kə ighe. 26Wè kə̀fàʼ wə nə̀ŋì yə̀ a təŋə̀ dòŋ kə̀ nə̀ wokə̀ bwoʼo kiy nə̀ ù mə nyaʼa dòʼò, a we nə, ‘Zə̀ŋi təmi tsə kə ŋwô, mə kî tsəə bə̀ kə ŋwò ndàŋ kiə̀ kìy kə̀dzə̀m!’ 27Dòŋ kə kàm kwoʼ nə̀ mwulikiy azoŋə̀ wè kə̀fàʼ wə̀, nìyzə̀ we, nyili màʼà yə̀ ndàŋ kə̀ awò we, dzày yə̀ a we nə̀ ù zù ŋwò.”

28“Wù wə ə dyaŋi ŋwò fyi yə̀ zù kpe tsə nə̀ wè kə̀fàʼ ùlìy ù kə kwu soʼo nəniy we nə̀ ndàŋ kìy yəə à də təkaam ivəm, u tsəb kòʼ yə̀ wù wə̀, zù kwiy kam kəli nyi yə̀ wè anə umwìy a we nə, ‘Zàŋi tsə bə̀ ukhiy wam wiy nyiə̀!’ 29Wù wə̀ soʼo, u nyaʼa tsə a təŋə̀ we, bwoʼ sòʼò we nə̀ wo kiy ghii a we nə, ‘Təmi tsə kə ŋwô mə kî tsəə bə̀ kə ŋwò ndàŋ kiə̀ kìy!’ 30Wù wə̀ ə kwuni twe, zù fè na yə̀ we a ndàw ntsaʼ dzìy nə̀ ù kì fyiə kə nə̀ ù mə tsə ndàŋ kə ighe kiy. 31Aghee kəfàʼ à liy yə̀ kòʼ ayiə yə wù wə̀ zəŋi nəniy, ayiə yə ə fyimi này yə̀ ghu. Ghu ə zù dzày yə̀ àyiə ghà yə̀ awò dòŋ kə̀. 32Dòŋ kə kàm twoŋə nyi bə̀ we a ndaw, dzày yə̀ a we nə, ‘Wò tòʼò də wù kə̀fàʼ ù bə̂bɛbə̀ wìy. Kəkwə̂d yə də̀ wô! Wò kə bwoʼ miə nə̀ wokiy mə nìyzə̀ màʼà yə̀ ndàŋ kə̀ awò wò. 33Wò kə̀ kwu ani dè yə̀ sòʼò kə̀mwuli awò àzwə̀ ighəd anə yəə mə kə dê nəniy â wò.’ 34Dòŋ kə̀ ə ŋge fwu này yə̀ nə̀ fòŋ anə iyiə i ghà yə̀, u nìy kwe yə̀ sòʼò wè kə̀fàʼ wə̀ a ndàw ntsaʼ dzìy nə̀ ù kì fyiə kə̀ nə̀ ù mə tsə ndàŋ kə ighe kiy soʼo.”

35Yesù ə dzày kəd tsə nə̀, “À yù də̀ yəə Təli wam wə ù də nəniy an-a-vələ ù nì faʼà soʼò nə̀ ghà abu ghà də nìyzə̀ wày bɛb tə aghù tìy anə fôŋ tii.”

Currently Selected:

Matìyò 18: isu

Highlight

Copy