Lukâs 19

Yesù kə zù a ndàw Zàkiyùs

1Yesù ə nyi yə̀ a Dzèlikò, tsìy fyiə dyaŋə yə̀. 2Wù lìy kə də̀ awote ghu kə tyoŋə nəniy we nə̀ à də̌ Zàkiyùs. Ù kə də̀ kətuw anə aghù yə̀ ghu khii nəniy ŋwàʼà kə̀tsuw kiy. U ŋge kwumə sòʼò. 3U liə ani kòʼ wù wə̀ Yesù də nəniy we. Zàkiyùs kə kwuni də̌ wù ù təbə̀ wìy, u nìà kè kwoʼo kə ani kòʼ Yesù bòʼ ŋwàâ kə ghù kə̀ kə də nəniy. 4U nyəŋ zù isə zù kwoʼ kə anə kàʼ fə̀ liy fiy ghu tyoŋə nə̀ à də̀ Sikamò ani kòʼ Yesù, aŋwòə Yesù kə kwu ani tsìy dzəd awote. 5Abù Yesù zù kwùm tsə nəniy anə ikiy i fəkàʼ fə̀, u dzày kwoʼ yə̀ â we nə̀, “A Zàkiyùs, mbab fyi tswi bə, aŋwòə mə kî zìy swukə a ndaw yiə̀.”

6Zàkiyùs ə zə̀àŋì fyi tswi bə̀, zù ŋgwam na tsə Yesù a ndàw we nə̀ dzwiʼi kə̀ soŋə̀ kìy. 7Abù aghê kôʼ nəniy ayiə̀ yə ghi, ghu kaʼ ani ŋwuŋi dzə̀ŋì nə̀, “Zakìyùs wə̀ ghi nə̀ ù də̀ wù ù bɛbə̀ wìy! Yesù zè nəniy ani zù nyi nə̀ we.”

8Zàkiyùs ə ŋwò təmi kə idoŋ, dzày yə̀ â we nə, “A Mwe ə̀ mbyi, Mə kî nìy kə̂ kə̀m kə ufyiə kam Mə dzâw nyiə̀ yə̂ awò aghè la yiy. Aghû yə̀ Mə kə tsê kôʼ dzə̂ nəniy, Mə ki tsə kwunì nsòŋə inkyàʼì.”

9Yesù mee a we nə, “Zə̀kìy mə bii fyi isəd i ndaw yiə̀ yìy zii, aŋwòə wò nyə̀ də̀ sòʼo wà Ablàhâm. 10Wà Wù kə fə̀ bù ani bù kaw kòʼ aghù yə̀ ghu nây doʼò tə̀ ghe bii fyi ghu.”

Zə̀zə̌ fə aghê kəfàʼ yə̀ Mwe ə̀ kə̀fàʼ kə nyiə̀ ghu nə̀ ùkhiy wiy

(Matìyò 25.14-30)

11Abù ghu sî namə zwələ nəniy ayiə yə, Yesù ə kaʼ nyi dyaŋi yə̀ ani dzày fə̀ zə̀zə̌. Ù maa swəd mà yə̀ a Yèlusalèm, aghee ghà yə̀ ə mòʼò kə nə̀ soŋə fiy nyiə̀ dzìy kpe â Zə̀kìy ani saʼ aghû. 12U dzày tsə nə̀, “Wù ù sòŋə̀ ù lìy kə də̀ tsə̀ ŋwô, u ŋwò zù anə inaʼ ì liy yiy nə̀ ghu tsuk tsə ighe an-a-dòŋ, tə̀ ghe ki kâm dzwoŋi bə̂ 13U twoŋə tsə aghě kəfàʼ àvəm dzàw nyə̀ tsə ghu nə̀ kamtiy ivəm ivəm dzày tsə a ghu nə̀, ‘I zəŋə yəə nənìy bekəivən kiy anə ukhiy wə̀ lyimə tsə soŋə fə Mə ki bê dzwəŋə nəniy ate.’ ” 14Aghee inaʼ i we yiy kwunə bà we, ghu twum tsə aghû nə̀ ghu dzwumì yə̂ we ani zù dzày nə̀, “Ghè liə dzə̀ wày nə̀ wù wə̀ dòʼò dòŋ kələ.” 15Ghu nam tsuk tsə kə we an-a-dòŋ. Abù ù dzwoŋi bə̂ nəniy, u twoŋə na bə̀ àghě kəfàʼ yə̀ ù kə nyiə̀ na nəniy ukhiy wiy â ghu ani bày fyi kə namə kə kày kəli fyi kə nəniy ate. 16Ù səsə wə ə bù dzày bə nə̀, “A mwe, ukhiy yə̂ wə̀ mə nɛmə fəli sòŋə ivəm anə tuw kə ù wə wò kə nyiə̀ naa nəniy â miə̀.” 17Mwe ə̀ kə̀fàʼ wə̀ bə̀lì kə nə̀, “Wò mə fàʼ dzwàb. Wò də̌ wù kə̀fàʼ ùdzòŋə̀ wìy anə yiə yə wò də ani zəŋi bekivən anə nyoŋə fə ukhiy fə, mə kî nyə̀ bə̀ wò nə̀ naʼà tìy ivəm wò si lia.” 18Wè kə̀fàʼ ùlìy wìy ə zù bù dzày yə̀ a we nə, “A mwe, ukhiy yə̂ wə̀ mə nɛmə kwe fəli namə kiy nsoŋə intà.” 19Mwe ə̀ kə̀fàʼ a dzày tsə a we nə, “Niy yə̀ naʼà tìy ìtà wò si saʼa.”

20Wè kə̀fàʼ ùlìy wìy ə zù bù dzày yə̀ a we nə, “A mwe ə̀ kə̀fàʼ, ukhiy yiə̀ wə̀, Mə maa tòʼò faŋi nù na dzwàb anə bə̀d kəndzwu. 21Mə kə tsəŋə ŋwò wô nə̀ wò də̌ wù ù tâw wìy. Wò liə ani nìy fyiə kə à də wày kə kiə̀ kìy, liə sòʼò ani kyilə namə kiy nə̀ wò kə̀ fâʼ nəway.” 22Mwe ə kəfàʼ wə̀ mee a we nə, “Mə saʼa kə wò anə dzə̀ yiə̀. Wò də̌ wù ə̀ kə̀fàʼ ù bɛbə̀ wìy! Wò kə sî mbaŋ kwu nəniy ghii nə̀ Mə də wù ùtaw wìy, zòʼò nyiə sòʼò ùfyiə nə̀ Mə kə̀ fâʼ nəway. 23À kə sì də̌ kìə̀ wò kə də kə̀ kwe nû na yə̂ ukhiy wam wiy a ndàw ùkhiy, u mə lyɛbi fâʼ kə ntuw?”

24U dzày yə̀ awò àghù yə̀ ghu kə tiy nəniy awote a ghu nə, “Ghà nîy ŋwô bə̂ ukhiy wə ù kwu nəniy tə̀ ghà nyiə̀ yə̂ â wù wə̀ ukhiy u we wiy mə̀ kwoʼ kûm nəniy sòŋə ivəm.” 25Ghu mee a we nə, “A mwe, ukhiy u we wiy mə bòʼ kwoʼ kwùm nsòŋə ìvəm!” 26Yesù ə dzày yə̀ a ghu nə̀, “Mə ndzəmə̀ dzìy bə̀ ŋwò â ghà nə̀ ‘wù wə̀ ù fàʼ dzwàb nəniy anə ukhiy wə̀ ghu nyə̀ nəniy â we, ghu kî namə nyə̀ fwulə ndə̀m ukhiy â we. Akwuni bû Wù wə̀ ù də kə̀ fâʼ anə ukhiy wə ghu kə nyiə̀ na nəniy â we, ghu ki nîy ŋwò kə nyàŋə fə ghu kə nyə̀ na nəniy â we ghu nyiə̀ yə̂ â wù wə̀ ù kwu nəniy anə ndə̀m. 27A kwuni bû àghù yə̀ ghu bâ nəniy miə, ghu kə də liə way miə nə̀ Mə doʼò dòŋ kə ghu, nìy bə̀ nənìy ghu fə tə̀ ghà wiy tsə ghu anə sə kam.’ ”

Yesù ə zù a Yèlusalèm təə à də̀ kədòŋ

(Matìyò 21.1-11; Mâk 11.1-11; Dzwan 12.12-19)

28Anə yiə yə Yesù dzày mà tsə nəniy ayiə yə, u ŋwò dyaŋi yə̀ kə ŋwò ù wìy ù kwoʼo nəniy a Yèlusalèm. 29Abù ù swələ yə̂ nəniy anə nàʼà fə Betfèt nə̀ nàʼà fə Betanì anə udoŋ wə̀ ghu tyoŋə nəniy nə̀ à də̀ udoŋ u Olìf, u twum tsə tsə̀təndii tə we ibè, 30dzày yə̀ a ghu nə, “Zù nənìy anə nàʼà fə̀ fə də nəniy isə. A ki buu ghà nyiə kwoʼo yə̂ nəniy, ghà ki kôʼ tsə lwədkə kəndzàkâs ghu təŋì naa nəniy nə̀ wù lìy kamə nyi kwoʼ kôʼ ate. Ghà ki zê bû nyiə̀ bə̂ â mìə̀. 31Abu wù lìy wìy bəbə nəniy â ghà nə̀ ‘Ghà zê iyî kìə̀?’ Ghà ki dzây yə̂ â we nə̀, ‘Mwe ə̀ mbyi dziy fâʼ tsə ate.’ ”

32Aghû yə̀ ù kə twum zû isə, ghu zù kòʼ yə̀ àyiə ghà yə̀ àdzə̀m anə yiə yə ù kə dzây nəniy â ghu. 33Abù ghu zû kaʼ tsə nəniy ani zè lwədkə kəndzàkâs kə̀, nə̀ mwe bəbə nə̀ “Ghà zê iyîkìə̀?”

34Ghu bə̀lì yə̀ àghù yə̀ dzìy a ghu nə, “Mwe ə̀ mbyi kwu kə fàʼ ate.” 35Ghu nìy bù nə̀ ghe kiy awò Yesù, nìy zìy yə̀ ndzwu tə ghu azoŋə̀ ndzàkâs kə̀, bòʼò kwe kə Yesù ate. 36Abù ù zè nəniy, aghee zə̀ʼà yə̀ ndzwu tə ghu anə dzəd.

37Abù ghu bê mià nəniy a lòʼo kə dzəd kwumi tswi bə̂ nəniy ate anə ukaʼ u Olìf, ŋwàâ kə tsə̀təndii tə tə̀dzə̀m, ghu kaʼ tsə ani dwiʼi nyə̀ sòʼò ùkali awò Zə̀kìy anə dzə̀ tə̀ taw tiy, anə mali tə yiə tə ghu kə kôʼ nəniy. 38Ghu dzìy tsə nə̀, “lwì kìy də â dòŋ kə̀ kə bê nəniy anə izəd i Mwe ə̀ mbyi. Ibvay yiy də an-a-vələ nə̀ ùkali wiy â Zə̀kìy!”

39Aghee Falàsî yə̀ ghu kə də nəniy anə ŋwàâ kə̀, ghu dzày yə̀ awò Yesù a we nə, “A àtyi dè, kwàa tsə tsə̀təndii tiə̀ tə̀ nə̀ ghu doʼò tsə moŋ!”

40Yesù ə bə̀lì yə̀ a ghu nə, “Mə dzîy bə̀ â ghà nə̀, abu ghu zuw doʼò yə̂ moŋ, atay ki kaʼ yə̂ ani bwoʼ məmbòŋ.”

Yesù diy awò inaʼ i Yèlusalèm

41Abù Yesù swəd mâ yə̂ a Yèlusalèm, yiə ù kòʼ yə̂ nəniy inaʼ i ghè yə̀, u dìy awò inaʼ i ghè yə̀ 42u dzày tsə nə̀, “I ŋge bɛbə ŋwò anə yiə yə aghû yə̀ də kwu way fyiə kə kə də ani bù ghu nə̀ ìbvay yiy zii! Ghu kâm wày dzə ani kòʼ fyiə kə kə də nəniy ani nyə̀ ghu nə̀ ìbvay yiy. 43A Yèlusalèm, soŋə fiy kî bè ŋwò, aghû yə̀ ghu dzwə nəniy nə̀ ghà, ghu ki biə dzɛmə̀ na tsîy yə̂ ghà anə ubàʼ u təmbà ani ŋwày nə̀ ghà. Sǔgôʼ tìy ni dzɛmì na tsîy yə̂ ghà anə ubə̀d ùdzə̀m. 44Ghu nî nìy təmə bə̀ ghà ambvə̀d, ghu wiy maʼà àghù yiə̀. Ghu kî nia sə way itay ìliy yiy azoŋə̀ àzə̀, aŋwòə ghà kə kə̀ kôʼ kəli nəway soŋə fə Zə̀kìy kə bû nəniy ate ani bù bii fyi gha.”

Yesù ə zù a ndàw Kə̀zə̀

(Matìyò 21.12-17; Mâk 11.15-19; Dzwan 2.13-22)

45U nyi yə̀ anə be kə ndàw Kə̀zə̀ zù kaʼ ani dzwùm fyi aghû yə̀ ghu kə fyiə̀ nəniy awote. 46U dzày yə̀ a ghu nə, “I twâ dòʼò anə ŋwàʼà k-a-zə̀ nə̀ Zə̀kìy kə dzày tsə nə, ‘Ndaw yam də loʼo kə̀ gwuŋə kiy.’ Ghà kwuni nîy na tsə nə̀ à də̀ loʼo kə aghê tsoŋə nê dyoʼò nəniy ate!”

47Yesù ə tyi dè àyiə ntsuk idzə̀m a ndàw Kə̀zə̀. Ŋgəd tə aghè àlwaʼa, nə̀ ghè tyi dee ulàŋ wìy, nə̀ ŋgəd tə ghě ghà yə̀ ə khu dzəd ani wiy màʼà we. 48Ghu kàmə̀ khu kè dzəd ani zəŋi ghii, aŋwòə aghê àdzə̀m kə tsə̀ŋə̀ zwulə kə àyiə we a dziy yiy.

Currently Selected:

Lukâs 19: isu

Highlight

Copy