Kə̀fàʼ 9

Sôl kə bɛmə kə awo Yesù

(Kə̀fàʼ 22.6-16; 26.12-18)

1Sôl wə̀ ù kə kaʼ tsə nəniy ani zəŋi ayiə àbɛbə nə̀ àghù yə̀ ghu bɛmə nəniy â Mwe ə̀ Mbyi a Yèlusalèm, ighaa yiy kə namə kwoʼo kə we ani wiy màʼà tsə̀təndii tə Mwe ə̀ mbyi. U ŋwò kə zù akə̀lə̀ wù ùlwaʼà ùnè wìy, 2u dzày yə̀ â wù ùlwaʼà unè wìy nə̀ ù twà tsə uŋwàʼà ù twum yə̀ anə ndaw tə udzəŋə tə ghe Dzû a Dàmaskòs, ù dzày yə̀ nə̀ ŋgəd tə ndaw tə udzəŋə tə tədzə̀m dzəŋi bə̀ nə ìghe ani kwi aghû yə̀ ghu kə də nəniy anə ndaw tə udzəŋə tə ghè tə̀ nə̀ ghu dzwùmə̀ àyiə yə anə dzəd yə Mwe ə̀ mbyi kə tyi dê nəniy. Ù kə liə ani kwiy bù iyəŋi nə̀ iŋə̀mə̀ a Yèlusalèm yəə à də̀ aghê ndàw ntsaʼ. Sôl ə ŋwò zù a Dàmaskòs. 3Abù Sôl bè mìà nəniy anə inaʼ i Dàmaskòs, kaʼì tìy ŋwò mwà fyi tswi bə̀ an-a-byiwuŋ, mwày tsìy yə̀ anə uwè uwe ùdzə̀m. 4U bvə̀ tswi tsə ambvə̀dintsə, u dyaŋi zuw dzə̀ ìlìy yìy ì dzìy nəniy awe nə, “A Sôl, A Sôl, à də̌ kiə̀ wò zəŋə nəniy nə̀ mə fii ə?”

5Sôl ə bəb tsə nə̀, “A Mwe, wò də̀ ndiə?” Dzə̀ ìghè yə̀ ə bə̀lì kə a we nə, “Mə də Yesù, wù wə̀ wò zəŋi nəniy nə̀ mə fii.”

6Ŋwòə kə nyiə, wò tsîy nyi yə̂ anə inaʼ, ghu ki dzây bə̂ àyiə yə wò kwu nəniy ani zəŋi.

7Aghû yə̀ ghu kə bwîy fwumə bə̂ nəniy nə̀ Sôl, ghu təmi dòʼò kə awote moŋ ghu zuw. Ghu zuw dzə̀ ì ghè yə̀ kə̀ kwuni kôʼ dzə̂ nəway wù wə̀ ù dzə̀ŋì fyi bə̂ nəniy. 8Abù Sôl ŋwò kə nəniy ambvə̀dintsə, u fwiy kə asə ə we, u kwuni kòʼò dzə̀ wày fyiə kə̀liy kiy. Ghu kwi tsə we anə ukwe, tàlì zù nə̀ we a Dàmaskòs. 9Sôl dòʼò tsə ntsukə inti, nə̀ ù kòʼò wày àsə yiy, nyiə way fyiə kə̀liy kiy, muə sòʼò wày fyiə kə̀li kiy.

10Wè lìy wìy ù kə bɛmə soʼò â Yesù, ù kə də̌ awote a Dàmaskòs izəd i kə də nə̀ à də̌ Ànàniyàs, Zə̀kìy dè bə̀ we nə̀ àyiə àliy anə udzɛ̀mə̀, nə̀ Mwe ə̀ mbyi kə twoŋə tsə nə̀, “A Ànàniyàs!” U bɛmə kə dzày tsə awò Mwe ə̀ mbyi a we nə, “A Mwe ə̀ mbyi, miə wə.”

11Mwe ə̀ mbyi mee a we nə, “Byay tsə uwe niə̀ wìy, wò zû a ndàw wù wə̀ izəd i də nə̀ à də̀ Dzudàs ì də nəniy anə dzə̀d yə ghu twoŋə nə̀ à də̌ dzə̀dlə̀ tsitsi. Abu wò zù kwùm tsə nəniy awote, wò ki kòʼ tsə wè lìy a wo ù gwùŋə̀ nəniy, izəd i we yiy də nə̀ à də̀ Sôl, ù ŋwò bə̂ nəniy anə inaʼ i Tasùs. 12Zə̀kìy mə dè sòʼò a we nə̀ wù lìy mə̀ tsìy nyi bə̀ ŋwò ghu tyoŋə nəniy we nə̀ à də̌ Ànàniyàs. U bù gaʼ tsə awo we azoŋə̀ ìghe, ani zəŋi tsə nə̀ ghe kâm kaʼ ani kòʼ tə̀loʼo.”

13Ànàniyàs ə bə̀lì kə a we nə, “A Mwe ə̀ mbyi, ndə̀mə̀ àghù mə ŋge dzày ayiə àfyia yə wù wə̀ zəŋə nəniy azoŋə̀ àghù yiə̀ à zwe yiy a Yèlusalèm. 14Ŋgəd tə aghè àlwaʼa yiy mə nyiə̀ sòʼò we nə̀ daʼa kiy nə̀ ù bù fə̀, ù kwi ŋwò nə̀ àghù yə̀ àdzə̀m ghu fwùlə̀ nəniy wô.”

15Mwe ə̀ mbyi dzày yə̀ â Ànàniyàs a we nə, “Ŋwò yə! Mə mə we sày nə̀ ù fàʼ awò mìə ani zəŋi tsə nə̀ aghû yə̀ ghu də wày aghee Dzû, nə̀ ùdòŋ wìy, nə̀ àghě Islàel yìy àdzə̀m, ghu kəli tsə wù wə̀ mə də nəniy we. 16Miə nə̀ ùwe nam wiy, mə kî zəŋə ŋwò nə̀ ù kòʼ ndzòʼò ìfii yə ù kwu nəniy ani fii anə ayiə yə ù bɛmə nəniy anə ìzəd yam nìʼà yə̀ sòʼò awò àghè liy yiy.”

17Ànàniyàs ə ŋwò yə̀, zù tsìy nyi tsə a ndaw yə Sôl kə də nəniy ate, zù gaʼ tsə awo we azoŋə̀ Sôl, dzày tsə nə̀, “Àzə̀ wam Sôl, Mwe ə̀ mbyi, Yesù wə ù kə bû dè ùwee wiy awò wò anə dzəd ù twum bə̀ mìə̀ fə akə̀lə̀ wò. Ù mìə̀ fə twum bə̀ nə̀ wò kaʼ dzwoŋi tsə ani kòʼ àsə, Zwàykə̀zwekiy bû soʼò azoŋə̀ wò.” 18Ufyiə ùlìy wiy u də nəniy yə̀ à də̀ zwiy tə itsi, ə dyaŋi tswaʼi fyi bə̀ anə asə ə Sôl, u kaʼ ani kòʼ tə̀loʼo. U təmi kə idoŋ, Ànàniyàs ə nyiə̀ tsə we nə̀ mwi m-à-zə̀ mìy. 19Abù ù nyi kə nəniy, daʼa kə we kiy bù dzwoŋi.

Sôl kə nàʼa ntwùm ìdzoŋə̀ yìy a Dàmaskòs

Sôl kə dòʼò tsə ndə̀mə̀ ntsukə nə̀ àghù yə̀ ghu kə bɛmə nəniy Zə̀kìy a Dàmaskòs. 20U ŋwò tsə zù a ndàw dzəŋə kə ghě Dzû zù kaʼ ani nàʼà awote nə̀ Yesù də̌ Wà Kə̀zə̀.

21Aghû yə̀ àdzə̀m ghu kə zuw nəniy ntwum yə ù kə naʼà nəniy, adzwə ŋge zwum ghu ate. Ghu kaʼ ani bəb nə̀, “Àyu way wù wə̀ ù kə zəŋə nəniy utswə̂d wìy azoŋə̀ àghù yə̀ ghu kə dzwùmə̀ nəniy Yesù a Yèlusalèm yə̀? Ù we bù sòʼò fə̀ ani bù kwi aghù, tə̀ ù zù dzwoŋi nə̀ ghu akə̀lə̀ ŋgəd tə aghè àlwaʼa tiy ə?”

22Sôl kwuni bày dyimə fyiə kə uwee ani nàʼà ayiə yə̀ nə̀ daʼa kiy, dè yə̀ sòʼò ayiə awò aghee Dzû yə̀ yìy nə̀ Yesù də wə̀ Zə̀kìy sûw kyili naa nəniy, adzwə ə zwum aghee Dzû yə̀ ghu kə muə nəniy a Dàmaskòs, Ghu də kàm kwu way iyiə ìdziy yiy.

23Abù ntsukə tsîy koŋə yə̂ nəniy, aghee Dzû yìy kwi tsə kədzəŋə, səay tsə ani wiy màʼà Sôl, 24Sôl kwuni bù kəli fyi kə nə̀ ghu khu dzəd ani kwi wiy we. U bù kəli fyi kə sòʼò nə̀ ghu kyìŋə̀ zələ yə̀ ùfə̀b u mbà inaʼ i ghà yə̀, kyìŋə̀ bvunə ani kwi ighe. 25Aghû yə̀ ghu kə dzwumə̀ nəniy we, ghu nìy kə we nə̀ ntsukə tə̀liy tiy, kwe tsə Sôl anə ŋkhìy kə̀ nê kìy, kwe fyi tswi yə̀ we anə kəbwòʼ kə kə də nəniy anə bàʼ kə mbà, u ŋwò yə̀.

Sôl ə zù a Yèlusalèm

26Sôl kə ŋwò tsə a Dàmaskòs zù a Yèlusalèm. Yəə ù zù kwùm tsə nəniy, u liə anə təm fwumi yə̂ aghù yə̀ ghu kə bɛmə nəniy Zə̀kìy awote. Ghu kwuni tsəŋə we aŋwòə ghu kə kə̀ bɛmə dzə̂ nə̀ ù də̌ wù wə̀ ù bɛmə nəniy awò Yesu. 27Wè lìy izəd i kə də nə̀ à də̌, Bànabàs, ə dyaŋi bù fày kə we, nìy zù nə̀ we akə̀lə̀ àghě ntwùm ə̀ Yesù yìy. U tyi dzày yə̀ â ghu yəə Sôl kòʼ nəniy Mwe ə mbyi ate anə dzəd. Dzày yə̀ sòʼò yəə Mwe ə mbyi kə dzəŋì nəniy ate nə̀ we. U tyi dzày yə̀ sòʼò yəə Sôl kə naʼà nəniy ntwùm ə̀ Mwe ə̀ mbyi Yesù ate a Dàmaskòs nə̀ daʼa kiy. 28Sôl dzə̀ dòʼò tsə nə̀ ghu kə ghi, dyaŋi kaʼ yə̀ ani bwìy nàʼà kyabi tsə̀ ntwùm ə̀ Kəzə̀ a Yèlusalèm nə̀ fòŋ ìtaw yìy anə izəd i Mwe ə̀ mbyi. 29U nàʼà sòʼò ntwum Kə̀zə̀, bə̀lə̀ sòʼò àyiə nə̀ àghě Glîk yə̀ ghu kə dzəŋə̀ nəniy idzəŋì i ghě Dzû yìy, kwuni dzə̀ŋə̀ ìdzə̀ŋi Dzû. Aghû yə̀ ə kwuni liə ani wiy màʼà we. 30Abù aghee Kəzə̀ yìy bû kəli fyi kə nəniy ayiə yə ghi, ghu nìy kə Sôl tsìy yə̀ nə̀ we a Kàsalìyà twum zù we a Tasùs.

31Aghee dzəŋə kə Ndàw Kə̀zə̀ yə̀ i kə də nəniy a Dzùdiyà nə̀ Galìlî nə̀ Sàmaliyà ə tsə̀ŋə kyilə yə̀ kə ibvay fwùlə̀ yə̀ kə Mwe ə̀ mbyi nə̀ ŋkwiʼi miy. Zwàykə̀zwekiy bù kwe tsə fôŋ tə ghu, zəŋi tsə, ghu dùw fyi yə̀ anə ntàŋə̀ ghu.

Pita zəŋi mali tə yiə a Lidà nə̀ a Dzopà

32Pità ə bwìy zù anə lòʼo tədzə̀m. A sòŋə fə̀liy fiy. U zù a Lidà ani zù twoŋə zuw aghee Kəzə̀ awote. 33U zù kway yə̀ wù lìy u də nəniy awote izəd i kə də nə̀ à də̌ Enèyàs, nə̀ ù mə pfə dòʼò tswi bə̂dkə̀bə̂d nə̀ ù ndwàmə̀ ŋwò tswi tsə dzə̀ wày anə ukày anə tə ŋə̀mə̀ ìfamə. 34Pità ə dzày tsə a we nə̀, “A Enèyàs, Yesù Kə̀litò mə zəŋi taw wô. Ŋwò kə wò byay tsə ukây yiə̀.” Enèyàs ə dyaŋi ŋwò kə idoŋ nə̀ ù mə taw. 35Aghû yə̀ àdzə̀m ghu kə muə nəniy a Lidà nə̀ a Salòn, ghu kòʼ we nə̀ ù mə taw. Ghu bɛmə kə sòʼò â Mwe ə̀ mbyi.

36Wìyəŋi ùlìy wìy kə də̀ tsə̀ ə Dzopà ù kə bɛmə nəniy â Yesù, ghu twoŋə we nə̀ à də̌ Tàbità. (Izəd i we anə idzə̀ŋì Glîk kə twoŋə nə̀ à də̌ “Dokàs.”) U taw zəŋə tsə̀ ayiə àdzoŋə̀ yìy, fìy sòʼò àghè la yiy. 37U kaʼ tsə ani dzàŋ anə sòŋə fə ghè fə̀, pfə tsə. Ghu sùw maʼà tsə ivəən i we nə̀ŋì na yə̀ anə idzwə i ndaw, anə ndàw ìdoŋ yiy. 38Dzopà kə kwùlì də kə akə̀lə̀ Lidà. Abù aghee Kəzə̀ yə̀ a Dzopà zuw tsə nəniy nə̀ Pità də̌ a Lidà, ghu twum tsə aghê àbè nə̀ ghu zû dzây yə̂ a we nə, “Ghè bwoʼ kəwo mbab bù fə akə̀lə̀ ghə̀d.” 39Pità ə byay tsə uwe, zù dzəŋi nə̀ aghû yə̀ ghu kə twum yə̂ nəniy ghu akə̀lə̀ we. Yəə ù bù kwùm tsə, ghu nìy kwoʼ yə̀ nə̀ we anə ndàw ì ghè yə̀. Ndə̀mə̀ Iyəŋi mpfənsə kə də̀ awo ghu dîy, ghu koŋə bə̀ akə̀lə̀ Pità dè yə̀ we nə̀ ndzwu tə Dokàs kə zəŋi nəniy anə sòŋə fə ù kə nam də ùtaw wìy. 40Pità ə dzày tsə nə̀ ghu ŋwò fyi yə̀ abee, à bù ghu ŋwô fyi yə̂, u nyaʼa tswi tsə gwùŋì. U dyaŋi kyèmì tsìy yə̀ anə ivə̀n yə̀ dzày tsə nə̀, “A Tàbità, ŋwǒ kə idoŋ.” U fwiy fyi kə asə ə we, yəə ù kòʼ tsə nəniy Pità, ŋwò dòʼò kə nə̀ ùwuŋ wiy. 41Pità ə kwi tsə we anə ukwe, təmi na kə we idoŋ. U dyaŋi twoŋə nyi bə̀ aghee Kəzə̀ adzə̀m, nə̀ iyəŋi mpfənsə yə, nìy dè yə̀ Dokàs â ghu nə̀ ù mə zɛ̀mə̀. 42Iyiə yə Pità kə zəŋi nəniy i foŋ tsìy kpe yə̀ inaʼ i Dzopà ìdzə̀m. Ndə̀mə̀ àghè ə kəli sòʼò ìbɛmə â Mwe ə̀ mbyi. 43Pità ə dzə̀ muə koŋə yə̀ ndə̀mə̀ mə̀ntsukə a Dzopà, a ndàw wù wə̀ ù zwùbə̀ ùfyiə wiy anə gùw tə tə nyàm, ghu twoŋə nə̀ à də̀ Simùn.

Currently Selected:

Kə̀fàʼ 9: isu

Highlight

Copy