Kə̀fàʼ 2

Zwàykə̀zwekiy kə bù azoŋə̀ aghě Kəzə̀

1Abù ntsuk fə Pentekòs#2.1 Pentekòs myìŋə̀ Mə̀ntsukə mə̀vəm intà. À də̌ ntàŋə̀ ntsukə mə ìn kə tsîy tsə anə yiə yə Zə̀kìy kə zɛmə̀ ŋwò nəniy Yesù zù kwùm anə ntsuk fə Zwàykə̀zwekiy kə bû nəniy ate ani bù dòʼò təŋ. fìy bû nəniy, aghû yə̀ àdzə̀m ghu kə bɛmə nəniy â Yesù ghu dzəŋə dòʼò anə lòʼo kə mòʼ. 2Aghee ntwùm ə̀ Yesù zuw dəm kiy foŋə bê an-a-byiwuŋ yəə à tsìy zoŋ. Ghu zuw dəm kə ghè kə̀ foŋ anə lòʼo tə dzə̀m anə ndaw yə ghu kə də nəniy ate. 3Ghu kòʼ ùfyiə ù liy wiy u də nəniy yəə à də̀ unɛm u məvə̀lə̀, u sàlì fyi yə̀ anə bə̀lə̀ tə̀ dzə̀m tswi mwam tsə ghu dzə̀m anə utuw, ghu yə ghu kə də nəniy awote a ndaw. 4Zwàykə̀zwekiy nyi tsə azoŋə̀ ghu dzə̀m. Ghu kaʼ ani dzə̀ŋì anə dzə̀ŋì tə nàʼà tə̀ liy tiy. À kə ghu fây Zwàykə̀zwekiy nə̀ ghu dzə̀ŋì aghii.

5Aghě Dzû yə̀ ghu kə fwulə̀ nəniy Zə̀kìy nə̀ ghu muə a Yèlusalèm, ghu kə ŋwò bə̀ anə nàʼà tə mbyi tə dzə̀m. 6Abù ghu zuw tsə nəniy dəm kə, ŋwàâ kə ghù kìy dzəŋə bə̀. Adzwə kə ŋge zwum ghu aŋwòə ghu kə zuw kyilə yə̀ ayiə yə aghû yə̀ kə dzìy nəniy anə dzə̀ŋì tə nàʼà tə ghu. 7Ghu kə ŋge dyoʼo ŋwò, adzwə zwum sòʼò ghu ate. Ghu kaʼ ani bəb nə̀, “Aghû yə̀ ghu dzəŋə̀ nəniy ghii, ghu we də̀ aghee Galìlî ə? 8À sì də̌ kìə̀ ŋgà ə zuw ghu dzəŋə̀ nəniy anə dzə̀ŋì tə nàʼà tə ŋgàŋ ə? 9Ŋgaŋ à liy ŋwô bə̀ a Patìyà, à liy a Medìyà, à liy a Elàm, a Mèsòpòtemìyà, à liy a Dzùdiyà, à liy a Kàpàdosìyà, à liy a Pontùs nə̀ a Esìyà. 10À liy ŋwô bə̀ a Fligìyà, à liy ŋwô bə̀ a Pàmfilìyà, anə inaʼ i Idzìp nə̀ a bə̀d kə inaʼ i Libìyà kə̀ kə də nəniy kə̀lə̀ Sìlîn. Aghê liy ŋwô bə̀ a Lûm. 11Aghê Dzû nə̀ ghù yə̀ ghu kə də wày aghee Dzû yìy, ghu kə kwuni fə̂d dòʼò bə̂ nəniy aghee Dzû yìy, nə̀ aghě Klît, nə̀ àghě Alàb yìy, ghu dzìy, ghè zuw yə̀ ghu dzəŋə̀ anə dzə̀ŋì tə i naʼa tələ tyi dzìy kwab tə ayiə tə Zə̀kìy zəŋi nəniy.” 12Adzwə kə ŋge zwum ŋwô aghê àdzə̀m. A ghê liy tsə̀ŋə̀ bəbə kə awò wù ùmoʼ umòʼ nə̀, “Ì yu ba myìŋə̀ kìə̀?”

13Aghê à liy yiy fə̀də̀ tsoʼo àghù yə̀ ghu kə bɛmə nəniy â Yesù, dzìy tsə nə̀, “Ghu mə mu ke nlwù mə̀ taw mìy.”

Pità ə dzə̀ŋì yə̀ nə̀ ŋwàâ kə̀

14Pità ə dyaŋi ŋwò təmi kə idoŋ nə̀ àghě ntwùm ə̀ Yesù yìy a vəm nə̀ wù ùmòʼ. Pità ə dzə̀ŋì yə̀ nə̀ ŋwàâ kə̀ anə dzə̂ ì taw yìy a ghu nə, “Aghee Dzû nə̀ àghù yə̀ ghu muə nəniy a Yèlusalèm, ghà zuw tsə nənà ayiə yə, mə dzii tyi dzây bə̂ fyiə kə kə tsîy nəniy. 15Aghû yə̀ ke dzə̀ way nlwù mìy anə yiə yə ghà moʼò nəniy. À nam də fwa tə iwùŋ ì bwùkə nə̀ bələ̀ bə̀lə̀ tìy. 16Zə̀kìy kə kwuni dzày nə̀ wè ntwùmə Kə̀zə̀ Dzùwêl nə̀ ù nàʼà yə̀ nə̀,

17‘Anə ntsukə mə̀ ìn bàm mə̀ â mbyi ani mày,

mə nî nyə̀ bə̀ Zwàykə̀zwekiy awò àghè dzə̀m.

Awa ghii iŋə̀mə̀ nə̀ iyəŋi ni naʼà ntwum yam.

Iŋə̀mə̀ anə ghàŋ fəli, Zə̀kìy ni dê ghu nə̀ ayiə yə a kwu nəniy ani bù fyi.

Iŋə̀mə̀ ghii yə ghu dzwə̂n doʼò, Zə̀kìy ni dê ghu nə̀ àyiə àsoŋə̀ yìy anə məndzə̀mə̀.

18Ani bu ntsukə mə̀ ghè mə̀ kpe tsə nəniy,

mə nî nyiə̀ Zwày kam awò àghě ntwum yamə iyəŋi nə̀ iŋə̀mə̀,

ghu ni naʼà ntwum yam.

19Mə kî fàʼ mali tə ayiə idoŋ an-a-vələ

nə̀ kwab tə ayiə tiy an-a-mbvə̀dintsə.

Kâŋ tìy ni kuŋ, uvələ wiy ni byaʼa, nək kə̀soŋə̀ kìy ni fyi soʼò.

20Â ntsuk fə̀ nê nê fə Mwe ə̀ mbyi fiy ani bù.

Ləm kiy ni bvə̂ bə̂ anə inyi,

ndzoŋ ni baŋə yəə à də̀ təkâŋ.

21Ani bu à də kə ndiə ù ŋwa yə̂ nəniy ifây yìy awò Mwe ə̀ mbyi, Mwe ə̀ mbyi nî bii fyiə ŋwǒ we.’

22Gha, aghee Islàel, ghà zwəli tsə ayiə yə mə dziy dzây awò ghà. Yesù Kə̀litò kə də̌ wù ù kə fyi nəniy anə inaʼ i Nazalèt, Zə̀kìy ndzə̀m dê bə̀ awò ghà abidzəmə̀ mali tə yiə nə̀ kwab tə yiə tə Yesù kə zəŋə nəniy nə̀ à kə ə Yesù twum bə̀ ìghe. Ghà kwu ŋwô ayiə ghè yə̀ aŋwòə a kə fyi anə fwumi kghi. 23Zə̀kìy ma byay na, tsə̀m tsə sòʼò nə̀ ghe nyiə̀ bə̂ Yesù awò ghà, ghà ə nìy kə we nyiə̀ tsìy yə̀ awò àghè àbɛbə yiy, ghu ba wiy màʼà kə we anə kàʼ fə təzəd. 24Zə̀kìy kwuni zɛ̀mə̀ ŋwò kə we anə ipfə, bii ŋwò fyi bə̀ sòʼò we anə daʼa kə ipfə, aŋwòə ipfə yə̀ kə kwu dzə̀ way daʼakiy ani kwiy na we yəə à də̌ wè ndàw ntsaʼ anə inaʼ i pfə. 25Devìd kə dzày tsə ayiə kwùmə̀ yə̀ nə̀ Yesù nə̀,

‘Mə taw kòʼò tsə̀ Mwe ə̀ mbyi akə̀lə̀ mìə̀,

mə̀ kî wày ani tsəŋ sòʼò aŋwòə ù də̌ anə ukwe wam ù nyiə wiy.

26À yù də̀ ighe mə ŋge səaŋə nəniy

dwiʼi kiy də soʼo anə ayiə yam à dziy yiy,

yəə mə tsəb də kə nəniy wè mbyi, ù də mùə̀ tsà wày,

mə ki muə nə̀ mə gaʼ na fòŋ yam anə tɛb k-a-zə̀.

27Mwe ə̀ mbyi way ani na dzə̀ ùwee nam anə isày.

Mə də wù ù zwê wìy, ù kì na sòʼò wày nə̀ ivəən i wè kə fàʼ ə̀ we yiy fwây anə isày.

28Ù mə dè miə nə̀ dzəd yə mə də ani tsìy ate mə ki muə

zəŋi sòʼò nə̀ mə ki dyoʼo a kə̀lə̀ we.’

29Awizə̂ yamə, mə kwu ani dzày tee fyi bə̀ àyiə kwùmə̀ yə̀ nə̀ Devìd, tə̀lì ŋgàŋ ùsəsə, ùsòŋə̀ wìy. Ù maa pfə ghu kələ we. Isây iwe yiy nam də̀ fə nə̀ ŋgàŋ ani bù kùm tsə zii. 30Devìd kə də̌ wè ntwùm ə̀ Kə̀zə̀, u kwu təŋ sòʼò fyiə kə Zə̀kìy kə tɛb na nəniy awò we. Zə̀kìy kə nyi kə məŋkà nə̀ ghe kî zəŋə tsə wù lìy wìy anə tuu kə Devìd nə̀ ù dòʼò tsə kədòŋ anə yiə yə̀ Devìd kə də nəniy dòŋ kìy ate. 31Devìd kə kòʼ na zìì yə̀ ayiə yə a dziy nam bû fyi, u dzày na bə̀ ayiə yə Zə̀kìy nî zɛ̀mə̀ ŋwò bə̂ nəniy wù wə̀ ù sùw na nəniy. U dzày tsə nə̀,

‘Zə̀kìy kî twumi na dzə̀ wày we anə inaʼ i ghě pfə yiy,

Ivən i we yiy kî fwày sòʼò wày anə isày.’

32Zə̀kìy mə ndzə̀m zɛ̀mə̀ ŋwò kə we anə ipfə. Ghəd ə dzə̀m də ŋwô ani dzày nyìə̀ awò ghà nə̀ Zə̀kìy mə zɛ̀m kə we anə ipfə. 33Zə̀kìy mə nìy kwoʼ Yesù an-a-vələ, na tsə we anə ukwe u we ù nyiə wiy, nyiə̀ sòʼò we nə̀ Zwàykə̀zwekiy ighəd anə yiə yə̀ ù kə tɛb na. Fyiə kə ghà koʼo nəniy ghè zəŋə nəniy nyiə, nə̀ àyiə yə ghà zuw ghè dzîy soʼò nəniy, à zəŋə̂ daʼa kə Zwàykə̀zwe kə Yesù nyiə̀ nəniy awò ghə̀d. 34Devìd kə kə̀ kwoʼ dzə̂ an-a-vələ u kwuni dzày tsə nə̀,

‘Mwe ə̀ mbyi Kə̀zə̀ kə dzày tsə awò Mwe wam nə̀

dòʼo tsə anə ukwe wam ù nyiə wiy,

35ani zù kwùm soŋə fə mə kî nìy nia bə̂ nəniy aghû yə̀ ghu bâ nəniy wô a təŋə ifwe yiə̂ ghu doʼò tsə fyiə kə̀ gaʼa kə awù kìy.’ ”

36Pità ə dzày kwe fəli tsə nə̀, “Aghee Islàel yìy ki ndzə̀mə̀ kyilə tsə ŋwò nə̀ Yesù wə̀ ghu kə ba wiy nəniy we anə kàʼ fə təzəd, Zə̀kìy mə zəŋi nə̀ ù dòʼò tsə Mwe ə̀ mbyi, ù dòʼò tsə sòʼò Kə̀litò.”

37Abù aghû yə̀ zuw tsə nəniy ayiə yə̀, fôŋ tìy ŋge fyimi ghu ate. Ghu bəb awò Pità nə̀ àghě ntwùm ə̀ Yesù àliy yə, a ghu nə, “Awizə̂, ghè də ani zəŋi yə̀ mə̀yə nyiə?”

38Pità ə bə̀lì kə a ghu nə, “Gha adzə̀m kwu ani kyèmì ŋwò fyi bə̀ anə ibɛb ghi, ghà nîy kə soʼò mwi m-à-zə̀ anə izəd i Yesù Kə̀litò tə̀ Zə̀kìy ki nîyzə̂ bɛb təli kə nyiə̀ soʼò ghà nə̀ Zwàykə̀zwekiy. 39Zə̀kìy kə zəŋi na nə̀ ghe nî nyiə̀ namə kə ghè kə̀ awò gha dzə̀m nə̀ àwa ghi yiy. Ù nì nyiə̀ namə kə awò àghù yə̀ àdzə̀m ù sày kə nə̀ à də̀ aghee ighe.”

40Pità ə tswù yə̀ ghu dzə̀m anə ayiə yiə, u dzày sòʼò ghu nə̀ ndə̀mə̀ tə ayiə tə̀ liy tiy. U dyaŋi dzày yə̀ a ghu nə̀, “Mə bwoʼ gha nə̀ wokiy, ghà bii fyi iwe nəli anə mfəm yə Zə̀kìy kî nyiə̀ nəniy awò àghù yə̀ ghu zəŋə nəniy ayiə àbɛbə yiy anə ghu yə̀ ghu muə nəniy zii.” 41Ndə̀mə̀ àghù ə bɛmə kə ntwùm ə̀ ìdzòŋə̀ yə̀, nìy kə sòʼò mwi m-à-zə̀ a ntsuk fə ghà fə̀. Ntàŋə̀ àghě ghè yə̀ kə də̀ yəə à də̌ təkaam iti ani təm fwumi yə̀ anə ghù yə̀ ghu kə bɛmə nəniy Yesù. 42Aghee ghà yəə nyiə̀ dzwàb tsə soŋə fə ghu ani zwiʼi ayiə awò àghě ntwùm ə̀ Yesù yìy kə tyi dê nəniy â ghu. Ghu də̀ anə fyiə kəmòʼ. Ghu dzəŋə nyiə ba k-a-zə̀, gwùŋə̀ dzəŋə sòʼò.

Ayiə yə aghee Kə̀zə̀ yìy kə muə nəniy ate

43Aghee ntwumə Yesù yìy kə fàʼ ndə̀mə̀ mali tə yiə nə̀ kwab tə yiə tiy, adzwə zwum yə̀ àghè dzə̀m ate. 44Aghû yə̀ àdzə̀m ghu kə bɛmə nəniy Zə̀kìy, ghu kə bà tsə̀ ani bee təmə dzəŋə, dzùw yə̀ ùfyiə wə̀ ùdzə̀m ghu kə kwu nəniy nə̀ wù ùmoʼ umòʼ. 45Ghu fyiè tsə ufyiə wə̀ ghu kə kwu nəniy, nìy kə ùkhiy ghè wə̀ dzùw nyiə̀ yə̀ awò àghù yə̀ ghu kə də kwu way fyiə kə̀li kiy. 46Ntsuk indzə̀m, ghu bè təmə dzəŋə a ndàw Kə̀zə̀. Ghu dzəŋə nyiə a ndaw tə ghu. Ghu nyiə fwumi yə̀ nə̀ ghu dyoʼo ŋwò, kwu sòʼò fôŋ tə̀ dzoŋə̀ tìy. 47Ghu nyìə̀ sòʼò ukali â Zə̀kìy, ghu kwu iliə anə iwè ighu. Ntsuk indzə̀m, Mwe ə̀ mbyi kwe fwulə yə̀ ntàŋə̀ ghu anə aghù yə̀ ù kə bii fyiə tsə nəniy ghu.

Currently Selected:

Kə̀fàʼ 2: isu

Highlight

Copy