Márke 2

Zezú ŋgɛ́rɛ njuku kpɛrɛ a há̧na

(Mat 9:1-8; Luk 5:17-26)

1A falké nâm kpay, Zezú regí Kapɛrnahûm, dáy kú lá ɓá ké e a ɓil vûn. 2Nǎŋnɔ́ njukuri ɓá ŋgɛ̧́náké mára̧ sé mbá, gél ewá zi tí yá, ka nzáʼaŋgboroké a kála kɔ́. Nǎŋnɔ́, Zezú tɔ́ʼɔɓay hí̧ kuriri. 3Njuku a há̧narí̧ gí gel a Zezú, a ɓá njuku kpɛrɛ a há̧na gí, njukuri nɛŋ hol nɛ́. 4A kú ziŋ ŋgboro ɓá nɛ́ gí mbɛl a Zezú yáy, ɓay tûl a njukuri, kú he sé tûl vûn, a gé gu gel ma gelkáwa a Zezú. Dáy a kú ɗere njuku záŋmá ráy, a ɓil hîi nâm a mɛ̌ gé mbɛl a Zezú. 5Gelka Zezú kó láɓulaw a kuriri, ké sa hí̧ njuku kpɛrɛ ɓá: «Gun a mǐ, mi vbá̧buma ɓéké a mɔ́ dá.» 6Njuku tɔ́ʼɔ sáŋna a há̧narí̧ ka e a gelké, tí kɛrɛ a ɓil law a kuriri ɓá: 7«Ɓayhí̧rá̧ njuku nɛ́ sa nǎŋnɔ́ lé? Ké fára Gáŋvbôn! Njuku a sí̧ ma vbá̧buma ɓéké a njuku lé? Ɓá Gáŋvbôn mbêw yáŋ!» 8Núnmbɛ̧́nɛ́ nɔ́, Zezú tu kɛrɛ a kuriri, dáy a sa hí̧ kuriri ɓá: «Ɓayhí̧rá̧, i erú ka mára̧ kɛrɛ nǎŋnɔ́ lé? 9Dáy, a̧hí̧ ná ɗɛ́ŋ, sa hí̧ njuku kpɛrɛ ɓá: “Mi vbá̧buma ɓéké a mɔ́ dá” malé sa hí̧ njuku kpɛrɛ ɓá: “Mɔ́ uru, a ka hîi a mɔ̌, a séséna,” pé ná ɗɛ́ŋ lé? 10Dáy mi zi ɓá í tu ɓá: Gun a njuku erú ka kpɔ́ŋa ka tísiri nɛ́, ɓay vbá̧buma ɓéké a njukuri.» Nǎŋnɔ́ Zezú resa hí̧ njuku kpɛrɛ ɓá: 11«Mi sa hí̧ mɔ́, mɔ́ uru, a ka hîi a mɔ̌, a resé vûn a mɔ̌.» 12Núnmbɛ̧́nɛ́ nɔ́, njuku kpɛrɛ uru a mbɛl a njukuri too, a ka hîi a mɛ̌, a tɛ̧́, a kála. Nǎŋnɔ́ njukuri too ka kóy, kaw yér, a ɗél Gáŋvbôn a sa: «Rú zi kó mára̧ hɛ̧ nɔ́ bɔʼɔ mbêw yá!»

Zezú ɗí Leví

(Mat 12:1-8; Luk 6:1-5)

13Zezú resé gbaŋ fâ̧w a Galilê. Njukuri too gí gé lé, ké tɔ́ʼɔhɛ̧ hí̧ kuriri. 14Gelka Zezú kaw tána, ké kó Leví gun a Alfé, ka kaw ka vûn pû lari lambô, dáy a sa hí̧ nɛ́ ɓá: «Mɔ́ tɔ́ŋ mí!» Dáy Leví uru a tɔ́ŋ nɛ́. 15Sêe a há̧na, Zezú kaw sɔ̧́lâʼa a ɓil vûn a Leví. Dáy njuku mára̧ lari lambôri ɓá ŋgɛ̧́náké rá̧ ɓéké njukuri gí kaw nzáʼa lâʼa kuu mɛ̌ rá̧ gunbɛʼɛri. Ɓayhí̧lé kú ŋgɛ̧́ mambá ka tɔ́ŋ fal a Zezú. 16Gelka njuku tɔ́ʼɔ sáŋnari̧ ka ɓá Fariziyɛ̧́ri̧ kó ɓá Zezú kaw sɔ̧́lâʼa kuu njuku mára̧ lari lambôri rá̧ ɓéké njukuri, kú sa hí̧ gunbɛʼɛri ɓá: «Ɓayhí̧ Gáŋnjuku a wǎyri sɔ̧́lâʼa kuu njuku mára̧ lari lambôri rá̧ ɓéké njukuri lé?» 17Zezú lá kuriri dáy a sa: «Njukuri ka erú ka ŋgɛ́rɛ, zi tí a nzala a njuku hí̧ nzáʼagoy yá, ɓá njuku záŋmári̧. Nǎŋnɔ́, mi zi gí ɛ́ njukuri ka kaw ɓá njuku a ndárákéri yá, mi gí ɓay a njukuri ka kó ɓá, kú kaw ɓá ɓéké njukuri.»

Zezú saɓay a sáŋhɛ̧

(Mat 9:14-17; Luk 5:33-39)

18Sêe a há̧na gunbɔʼɔ a Zâŋ Batísri rá̧ Fariziyɛ̧́ri̧ kaw sáŋhɛ̧, dáy njukuri gí vbí Zezú ɓá: «Ɓayhí̧rá̧ gunbɔʼɔ a Zâŋri̧ rá̧ gunbɔʼɔ a Fariziyɛ̧́ri̧ sáŋhɛ̧, rá̧ mɔ̌ gunbɔʼɔri zi sáŋhɛ̧ nyáy lé?» 19Dáy Zezú fere a sa hí̧ kuriri ɓá: «I kɛrɛ ɓá njuku mbaŋa a njuku nyá wûny e sáŋhɛ̧, ka njuku nyá wûny mí erú kuu kuriri ɓáy lé? Sêe too ka njuku nyá wûny, erú a bazeŋ a kuririy, kú zi ma sáŋhɛ̧ nyá. 20Dáy, sêe a kú e mbí njuku nyá wûny a bazeŋ a kuriri, a goló, kú e sáŋhɛ̧!»

21«Njuku a há̧na tí mbí nzáʼa laa a ŋgɛŋké, a pól tâ̧w gári rú yá, ɓayhí̧lé nzáʼa laa a ŋgɛŋké e sɔ̧́ tâ̧w gári dáy, gɔ́rɔ́ké e réhɔ̧́ mambá. 22Nǎŋnɔ́ kɔ́, njuku a há̧na tí aŋa vôn a ŋgɛŋké kɔ̧ ɓil tâ̧w kɛrɛ#2:22 Kɛrɛ vôn malé íri vôn: A Juyífri kɛrɛ malé íri vôn a kuriri ɓá hɔ́ʼɔ nânyri̧ pé kú sá̧ ɓá báŋa ŋguu rá̧ a kara vôn dalé kú aŋa kɔ̧ rú̧ rá̧ vôn nzé rá̧ kú nzó. yá, ɓayhí̧lé vôn a ŋgɛŋké e vbere tâ̧w kɛrɛké, dáy vônké e rekɔ̧ kpâa. Nǎŋnɔ́, kú e pɛ̧rɛ̧ vôn kɔ́, a pɛ̧rɛ̧ kɛrɛ kɔ́. Belɓá kú aŋa vôn a ŋgɛŋké kɔ̧ ɓil kɛrɛ a ŋgɛŋké.»

Zezú rá̧ nâm ɔʼɔ a Juyífri

(Mat 12:1-8; Luk 6:1-5)

23Sêe ɔʼɔ a Juyífri, Zezú kaw tá ɓil wâʼa bulé, dáy gunbɛʼɛri ka tûl séna, tí haw bulé a gbaŋ ŋgboro. 24Dáy Fariziyɛ̧́ri̧ sa hí̧ Zezú ɓá: «Mɔ́ kó, ɓayhí̧rá̧ gunbɔʼɔri niŋ hɛ̧ ka sáŋna a manárí̧ de ka nâm ɔʼɔ lé?» 25Dáy Zezú resa hí̧ kuriri ɓá: «I zi kɛ̧́ hɛ̧ ka Davít niŋ bɔʼɔ mbêw yá lé? Sêe a há̧na, nzala í nɛ́ mɛ̌ kuu njuku séna a mɛ̌ri̧, kú zi tí ka hɛ̧lâʼa yá. 26Davít ri ɓil vûn a Gáŋvbôn, a ɓil nâm ka Abiyatár kaw ɓá gáŋnjuku a nzáʼaká̧na, a sé sɔ̧́ biré a kú hí̧ ɓá hɛ̧púna hí̧ Gáŋvbôn, ka njuku a ɓǎŋké ma sɔ̧́naké yáy, ɓá gáŋnjuku nzáʼaká̧na hɛʼɛ pé ma sɔ̧́náké. Davít sɔ̧́, a wal hí̧ njuku séna a mɛ̌ri̧ kɔ́!» 27Falké, Zezú resa hí̧ kuriri ɓáy ɓá: «Nâm ɔʼɔ, mɔny ɓá ɓay a njukuri, a zi tí ɓá njukuri, pé kú mɔny ɓay a nâm ɔʼɔ yá. 28Ɓaykénɔ́ pé Gun a njuku, kaw ɓá gáŋnjuku a nâm ɔʼɔ.»

Currently Selected:

Márke 2: pnz

Highlight

Copy