Matiye 7

Walɓay kɔ̧ tûl a mbɔ́ŋnɔ́ nyá

(Luk 6:37-38, 41-42)

1«Í walɓay kɔ̧ tûl a mbáŋa a wǎyri yá, ɓay a Gáŋvbôn, ké tí ná walɓay kɔ̧ tûl a wǎyri kɔ́. 2Ɓayhí̧lé, Gáŋvbôn e walɓay kɔ̧ tûl a wǎyri ɓá báŋké ka i walɓay kɔ̧ tûl a njukuri kɔ́, ké e lé wǎyri kɔ́, ka hɛ̧ léhɛ̧ nɔ́, ka i lé ɓála mbaŋa a wǎyri rúy. 3Ɓayhí̧rá̧, mɔ́ kó ɓá râw kpâa, a nûn a nyîn nɔ́, dáy a zi kó ŋgburu dii a nûn nɔ́ nyáy lé? 4Ná a̧ní rá̧, mɔ́ e sa hí̧ nyîn nɔ́ ɓá: Mɔ́ pɔŋ mí ten râw kpâa a nûn nɔ́, a tu ɓá, mɔ́ e ka ŋgburu dii a nûn nɔ́ nyáy lé? 5Njuku foo, mɔ́ tí ten ŋgburu dii a nûn nɔ́ rá̧ ɓáy, dalé, mɔ́ e kó gel ɓá táŋáké, ɓay a ten râw kpâa a nûn a nyîn nɔ́!

6Í zi ná mbí hɛ̧ a táŋáké hí̧ vâari, ɓay a kú zi ná refére, a núŋ wǎyri. Í zi ná vbú zaw a wǎyri hí̧ kɔsɔri, ɓay a kú zi ná yáw zawké, a há̧ra̧ tûlké ka ndáʼa.»

Vbí hɛ̧, ɛ́ hɛ̧ rá̧ haŋ nzáʼaŋgboro

(Luk 11:9-13)

7«Í vbí, kú e hí̧ wǎyri, í ɛ́, í e ziŋáké, í haŋ, kú e ŋgburu nzáʼaŋgboro hí̧ wǎyri. 8Ɓayhí̧lé, njuku ka vbí, kú e hí̧ nɛ́, njuku ka ɛ́y, e ziŋáké, rá̧ njuku ka haŋ, kú e ŋgburu nzáʼaŋgboro hí̧ nɛ́. 9Njuku a sí̧ a bazeŋ a wǎyri e hí̧ gun a mɛ̌ saw, a ké mí gɔ́ŋ nɛ́ biré lé? 10Malé, ké e hí̧ sôy hí̧ gun a mɛ̌, a ké mí vbí nɛ́ nzwîy lé? 11Dáy i ɓá ɓéké njukuri, i tu hí̧ hɛ̧ a béláké hí̧ gun a wǎyri, pé ma Gáŋvbôn, Bâa a wǎyri ka e a nûnalê, pé tí hí̧ hɛ̧ a béláké hí̧ njukuri ka vbí nɛ́ hɛ̧ nyáy lé?

12Nǎŋnɔ́, i niŋ ɓá báŋké nɔ́ hí̧ njukuri, hɛ̧ri̧ too ka i zi ɓá kú niŋ hí̧ wǎyri. Katína, ɓá hɛ̧ri̧ ka mbété a sáŋna a Mɔyíze rá̧ porofɛ́tri tɔ́ʼɔy.»

Nzáʼaŋgboro a ayáké

(Luk 13:24)

13«Í ri lá nzáʼaŋgboro a ayáké! Ɓayhí̧lé nzáʼaŋgboro a ánaké, ɓá ŋgboro ka ná ɗɛ́ŋ, dáy ɓá ŋgboro ka ɓá njukuri sé hûl, njukuri ɓá ŋgɛ̧́náké, ri lá ŋgboroké nɔ́. 14Dáy, nzáʼaŋgboro ka a yáy, ɓá ŋgboro ka lá séna mambáy, ɓá ŋgboro ka ɓá njukuri sé gelkáwa a ndísɛ̌ʼɛ dát. Dáy, njukuri tɛ̧́w yáŋ, pé mbí ŋgboroké.»

Porofɛ́t a manyákéri

(Luk 6:43-44)

15«Í koro tûl a wǎyri ɓay a porofɛ́t a manyákéri. Kú kaw gí gél a wǎyri lé, kú niŋ mûn a kuriri ɓá báŋa mbóléri. Dáy a ɓil law a kuriri, kú kaw ɓá ɓéké gáʼanri̧. 16Í tu kuriri, ka bɔʼɔséna a kuriri. Kú zi ma ɗɔ́rɔ́ léna njɔ̧̂ny ka tûl dii ŋgátúru yá, ɓá báŋké nɔ́, kú tí ɗɔ́rɔ́ léna duní ka tûl dii mbaʼaw yá? 17Béla diiri hí̧ léna a bélákéri, a ɓéké diiri hí̧ léna a belyákéri. 18Béla diiri zi ma hí̧ léna a belyákéri yá, nǎŋnɔ́ kɔ́, ɓéké diiri zi ma hí̧ léna a bélákéri yá. 19Dii too, ka zi hí̧ léna a bélákéri yáy, kú kúŋ a ɓá vbú hɔrɛ. 20Nǎŋnɔ́, í tu porofɛ́t a manyákéri a ŋgboro a bɔʼɔséna a kuriri.»

A gé gbát e rí ɓil Pû a Gáŋvbôn lé?

(Luk 13:25-27)

21«Zi tí ɓá njukuri too, ka ɗí mi: “Gáŋmbây! Gáŋmbây!” Pé e ri ɓil Pû a Gáŋvbôn nyá, dáy ɓá njukuri ka niŋ hɛ̧ ka Bâa a mǐ ka e a nûnalê ziy. 22Njukuri ɓá ŋgɛ̧́náké e sa a sêe ké ɓá: “Gáŋmbây! Gáŋmbây!” Tí ɓá a ŋgboro a rɛŋɔ́, pé rú niŋ péna ɓá báŋa porofɛ́tri yá lé? Tí ɓá a rɛŋɔ́, pé rú ní têm ɓékéri yá lé? Tí ɓá a rɛŋɔ́, pé rú niŋ hɛ̧sáʼamari̧ ɓá ŋgɛ̧́náké yá lé? 23Dáy, mi e sa hí̧ kuriri ɓá: “Mí zi tu wǎyri bɔʼɔ mbêw yá, i kála ɓá ɗínáké ka gbaŋ ní gé sá̧, wǎyri njuku niŋ ɓékéhɛ̧ri̧!” »

Galaɓay a vûn sére

(Luk 6:47-49)

« 24Nǎŋnɔ́, njuku ka láɓay nɛ́ ka mi kaw sanáké, ka ŋgbá ɓayké, ka a niŋ pénáké ɓá báŋké nɔ́y, ké kaw ɓá báŋa njuku a rɔ̧́náké, ka zá vûn a mɛ̌ ka̧n tûl láráy. 25Gáŋ mbɔ̂m tɔ́, kúna niŋ, mbii mbá, a gí, a zaʼa vûnké dáy vûnké zi lé yá, ɓayhí̧lé, kú zá vûnké ka̧n tûl lárá. 26Dáy njuku, ka láɓay nɛ́ ka mi sa, ka a zi niŋ pénáké yáy, kaw ɓá báŋa dɔ̂ʼɔ, ka zá vûn a mɛ̌ ka̧n tûl sikɔʼɛrɛ. 27Gáŋ mbɔ̂m tɔ́, kúna niŋ, mbii mbá, a gí, a zaʼa vûnké dáy vûnké lé too kɔ̧ siri.»

Kpɔ́ŋa a Zezú

28Gelka Zezú ɔrɔ tɔ́ʼɔhɛ̧ a mɛ̌y, njukuri láɓayké, a kaw yér sé tûl mára̧ tɔ́ʼɔhɛ̧ké nɔ́, 29ɓayhí̧lé, ké tɔ́ʼɔhɛ̧ké a kpɔ́ŋa ka gí a gel a Gáŋvbôn, a zi ɛ́ŋ tɔ́ʼɔhɛ̧ a njuku tɔ́ʼɔ sáŋnari̧ nyá.

Currently Selected:

Matiye 7: pnz

Highlight

Copy