Matiye 22

Galaɓay sé tûl lâʼa a gel nyá wûny

(Luk 14:15-24)

1Zezú mbí ɓay, a sa galaɓay a féké hí̧ kuriri ɓáy, ɓá: 2Pû a Gáŋvbôn ɛ́ŋ ɓá Mbây a há̧na, ka kara lâʼa ɓá a ŋgɛ̧́náké, ɓay a gun a mɛ̌ ka e nyá wûny. 3Ké pé njukupéna a mɛ̌ri̧, ɓá kú sé ɗí njukuri ɓay a kú gí sɔ̧́lâʼa dáy njukukéri zi ɓay a gína nyá. 4Ké repé njukupénari̧ a féké ɓáy, ɓá kú sé sa hí̧ njukuri a ké ɗí kuriri, ɓá: «Lâʼa a mí mɔny, ná ɗɛ́ŋ dá! Mi í gun ndayri rá̧ hɛ̧hɔ́la a mǐ a mbárákéri, a mɔny too dá. I gí gel lâʼa nyá wûny!» 5Dáy, njukukéri zi kél yá, a kála sé gel séna a kuriri, njuku a há̧na sé wâʼa a mɛ̌, njuku a féké kála sé gel zé sɔ́ʼɔ a mɛ̌. 6A fékéri ɓáy, ŋgbá njukupénákéri̧ a ɓá kuriri tɔ́ʼɔsêe, a í kuriri. 7Dáy mbâyké gé ɗí hɛ́rɛ a pé ŋgawbéreri sé í njuku nɔ́rí̧, a njúŋ vûn a kuriri too. 8Falké, ké sa hí̧ njukupéna a mɛ̌ri̧ ɓá: «Lâʼa nyá wûny ná ɗɛ́ŋ dá, dáy njuku nɔ́rí̧ ka mi ɗí kuriri, ma lâʼaké mbaa. 9Í sé tûl gáŋ ŋgborori too, a i ɗí njukuri too, ka i ziŋ, kú gí sɔ̧́lâʼa.» 10Nǎŋ, njukupénari̧ sé gbaŋ gáŋ ŋgborori, dáy a gé mára̧ njukuri a kú ziŋ too, njuku a belyákéri malé a bélákéri too gí, vûn lâʼa mbá ɓá njukuri.

11Dáy Mbây rí vûn ɓay a sé kó njukuri a kú ɗí kuriri, lé ké kó njuku a há̧na ka zi rí laa nyá wûny nyáy. 12Pé a vbí nɛ́ ɓá: «Mbáŋa a mǐ, ná a̧ní rá̧ mɔ́ ri gelé táŋ rí laa nyá wûny lé?» Dáy, njuku ráy zi saɓay yá. 13Nǎŋnɔ́ mbây sa hí̧ njukupénari̧ ɓá: «Í ŋgá̧ ndɔ̂ʼɛ rá̧ bɛʼɛ, a i mbí nɛ́ vbú kála a ɓil tirí̧ma. A goló, ké e vúna a sɔ̧́ sîlé.» 14Ɓayhí̧lé, kú ɗí njukuri ɓá dawáké dáy njukuri tɛ̧́w yáŋ, pé kú lú kuriri.

Pú lambô hí̧ mbây Sezar

(Mrk 12:13-17; Luk 20:20-26)

15Falké Fariziyɛ̧́ri̧ mára̧ há̧narí̧, a sé ɛ́ ŋgboro niŋ a̧ní rá̧ kú ŋgbá Zezú ka ɓay a nzɛ́ʼɛ lé? 16Dáy a kú pé gunbɔʼɔ a kuriri a há̧narí̧, kuu njuku a fal a Herodri sé sa hí̧ Zezú ɓá: «Gáŋnjuku, rú tu ɓá, mɔ́ sa gbátɓay, mɔ tɔ́ʼɔ ŋgboro a Gáŋvbôn ɓá a ndáráké táŋ niŋ wɔ́w a njuku, ɓayhí̧lé mɔ kó njukuri too mambɛ̧́nɛ́. 17Dáy mɔ́ sa hí̧ rú, hɛ̧ ka mɔ́ kɛrɛ sé tûl ɓay nɛ́: Sáŋna a manárí̧ wá, hí̧ ŋgboro hí̧ njuku ɓá ké pû lambô hí̧ mbây a Rɔmɛri̧ malé ké pû yá lé?» 18Dáy Zezú tu ɓéké law a kuriri dáy a sa: «Njuku foori ɓayhí̧ i zi lé mí lé? 19Í tɔ́ʼɔ mí lari a kú pú lambô rúy!» Kú mbí mínya mbêw a ɓá hí̧ nɛ́. 20Zezú vbí kuriri: «A tûl mínya nɛ́, têm rá̧ rɛŋ a njuku a sí̧, kú ɗé ka̧nrú̧ lé?» 21Kú zi a sa: «ɓá Sezar.» Dáy Zezú sa hí̧ kuriri: «Í hí̧ Sezar hɛ̧ ka ɓá ɓála a Sezar, a í hí̧ Gáŋvbôn, hɛ̧ ka ɓá ɓála a Gáŋvbôn.» 22Gelka kú lá nǎŋnɔ́, kú kaw yér, dáy a uru a gbɛ́ŋɛ́ a rekála.

Vbí ɓay sé tûl toma a hûlri

(Mrk 12:18-27; Luk 20:27-40)

23Sêe a mbêwké nɔ́, njuku Sadusiyɛ̧ri̧ gí gél a Zezú. (Ɓá kuriri nɔ́, pé sa ɓá toma a hûl zi tí yáy). Dáy a kú vbí Zezú 24a sa: «Gáŋnjuku, Mɔyíze sa ɓá, njuku mí hú rá̧ a pɔŋ wûny táŋ gun lé, nyîn nɛ́ ké renyá wûnyké a mbuŋ gelnûn nɛ́ hí̧ nɛ́. 25Dáy nyîn a há̧narí̧ erú, tûl a kuriri zíndɔ̂ʼɔsáy. Gáŋnjukuké nyá wûny ka hú táŋ mbuŋ gun, a ké zi mbuŋ nyáy, ké pɔŋ wûny a mɛ̌ hí̧ tɔ́ŋ tûlé. 26Ná ɓá mbêwké ziŋ nyîn a séreké, falké nyîn a sáyké, nǎŋ tûl a kuriri zíndɔ̂ʼɔsáyké too nyá wûnyké. 27Fal a kuriri too lé, wûnyké gí hú kɔ́. 28A toma a hûlri wá, a gé e kaw ɓá wɔ̧rɔ̧́ a wûnyké a bazeŋ a nyînrí̧ zíndɔ̂ʼɔsáy nɔ́rí̧ too lé? Ɓayhí̧lé kuriri too, kú nyá wûnyké ɓá wûny!» 29Zezú fere a sa hí̧ kuriri: «Í kaw rɔ́ʼɔ law a wǎyri, ɓayhí̧lé i zi tu hɛ̧ ka ɗé ka̧n ɓil Mbété a Gáŋvbôn nyá, a zi tu kpɔ́ŋa a mɛ̌ nyá. 30Nǎŋnɔ́, ka toma a hûlri, wɔ̧rɔ̧́njukuri tí nyá wûnynjukuri malé wûnynjukuri tí nyá wɔ̧rɔ̧́njukuri yá. Dáy kú e kaw ɛ́ŋ báŋa aŋnze a Gáŋvbônri̧ a nûnalê. 31A hɛ̧ ka kó toma a hûlri, i zi kɛ̧́ ɓay ka Gáŋvbôn sa hí̧ wǎyri ɓá: 32“Mí ɓá Gáŋvbôn a Abaraham, Gáŋvbôn a Izák rá̧ Gáŋvbôn a Zakob yá lé?” Gáŋvbôn zi tí ɓá Gáŋvbôn a hûlri yá, ké ɓá Gáŋvbôn a njuku a ndísɛ̌ʼɛri.»

33Njukuri too ka lá nɛ́y, kaw yér sé tûl tɔ́ʼɔhɛ̧ a mɛ̌.

Sáŋna a sí̧ ndé ka hɔ̧́na lé?

(Mrk 12:28-34; Luk 10:25-28)

34Gelka Fariziyɛ̧́ri̧ lá ɓá Zezú tu nzáʼa a Sadusiyɛ̧ri̧ ka ɓay, kú sé mára̧ há̧narí̧ a gí. 35Dáy njuku mbêw a bazeŋ a kuriri, ɓá gáŋnjuku tɔ́ʼɔ sáŋna, zi ɓay a lé Zezú, a vbí nɛ́ ɓá: 36«Gáŋnjuku, sáŋna ka hɔ̧́ ndé sáŋnari̧ too ɓá a sí̧ lé?» 37Zezú zi a sa: «Mɔ zi Gáŋmbây, Gáŋvbôn a mɔ̌ ka lawɔ́ too, ka têm a mɔ̌ too rá̧ ka hɛ̧túna a mɔ̌ too.» 38A nɔ́ pé ɓá sáŋna ka hɔ̧́ ndé sáŋnari̧ tooy. 39Dáy a séreké ka ɛ́ŋ mbɛ̧́nɛ́ ɓá: «Mɔ́ zi mbɔ́ŋnɔ́ ɓá báŋa mûn nɔ́.» 40Sáŋna a Mɔyíze too rá̧ hɛ̧tɔ́ʼɔ a porofɛ́tri too, tɔ́ŋ fal a sáŋna a sérekéri nɔ́.

Kiris ɓá gun a gé lé?

(Mrk 12:35-37; Luk 20:41-44)

41Fariziyɛ̧́ri̧ mára̧ há̧narí̧ dáy Zezú vbí kuriri ɓá: 42«A̧hí̧ i kɛrɛ sé tûl a Kiris lé? Ké ɓá gun a gé lé?» Kú zi a sa: «Ké ɓá gun a Davít.» 43Zezú resa hí̧ kuriri: «Ná a̧ní rá̧ Davít mbá ka Têm Pukí ɗí nɛ́ ɓá: “Gáŋmbây lé?” Ɓayhí̧lé Davít sa ɓá:

44“Gáŋmbây, Gáŋvbôn sa hí̧ Gáŋmbây a mǐ: Mɔ́ gí kaw ndɔ̂ʼɔ lâʼa a mǐ, ka̧ sêe ka mí e ɓá njuku ŋgá̧na a mɔ̌ri̧ tɛ̧́ gel ɓá bɔʼɔ kɔ̧rú̧.”» #22:44 Ps 110:1

45«Ka Davít mí ɗí nɛ́ ɓá “Gáŋmbây” ná a̧ní rá̧, ké e rekaw ɓá gun a Davít lé?» 46Njuku a há̧na mbêw a bazeŋ kuriri ka saɓay zi tí yá. Tí ka sêeké nɔ́, njuku a há̧na zi laŋ ɓay a vbí Zezú ɓay mbaa.

Currently Selected:

Matiye 22: pnz

Highlight

Copy