Luk 19

Zezú rá̧ Zasé

1Zezú ka̧ Jeriko, a kaw tá ɓil pû 2dáy, njuku a há̧na erú, rɛŋɛ́ ɓá Zasé, ɓá gáŋnjuku mára̧ lari lambô a Rɔmɛri̧. Ké erú ka hɛ̧zíŋa mambá. 3Ké ɛ́ ŋgboro kó a gé ɓá Zezú lé, dáy a ké gáŋ nyáy, ké ziŋ ŋgboro kó nɛ́ nyá, ɓayhí̧lé njukuri daw mambá a fal a Zezú. 4Dáy, ké kó nǎŋ a ŋgú ɗambɛl, a sé he tûl dii a há̧na, a kú ɗí ɓá Sikɔmɔ́r, ɓay a ké ma kó Zezú ka e tána. 5Gelka Zezú gé ka̧ bɔʼɔ diikéy, ké mbí nûn nɛ́ a kó Zasé a sa hí̧ nɛ́ ɓá: «Zasé, mɔ́ ɗere ga, ɓayhí̧lé sénɛ́, belɓá mí ná pû a mɔ̌.» 6Zasé ɗere ɓá gánáké a gí nyá Zezú ka mûnrína sé pû mɛ̌. 7Njukuri kó kuriri kaw kála, a tí ŋgɔ̧rɔ̧ ɓay a bazeŋ a kuriri a sa: «Njuku nɛ́ e sé ná pû a njuku ɓékéhɛ̧ nɛ́!» 8Gelka, kú gé ka̧ ɓil vûn a mɛ̌y, Zasé uru a ew mbɛl a Gáŋmbây a sa: «Gáŋmbây, mɔ́ lá, mi e wal hɛ̧zíŋa mǐ ɓá lawgel hí̧ njuku fóyári. Mǐ, mí nyá hɛ̧ a njuku ɓá ríway, mi e rerú bɔʼɔké nɛŋ hí̧ njukuké.» 9Zezú sa hí̧ nɛ́: «Sénɛ́, pɛ̧́na ri vûn a mɔ̌ dá, ɓayhí̧lé mɔ̌ kɔ́, mɔ ɓá gun sɛl î̧n a Abaraham. 10Ɓayhí̧lé, Gun a njuku gí ɓay a ké ɛ́ a ké pɛ̧́ njukuri ka ɓɔ́l.»

Galaɓay a mínya

(Mat 25:14-30)

11Gelka Zezú gí ɗɛ́ŋ ka Zerúzalɛ̂m, njukuri kaw láɓay a mɛ̌, a kɛrɛ ɓá káwa Mbây a Gáŋvbôn ka̧ a ŋgɛŋnɛ́ dá. Dáy Zezú mbí galaɓay ɓáy a sa hí̧ kuriri ɓá: 12«Gun pû mbây a há̧na, uru sé tísiri a mɛ̌, ɓá ɗínáké ɓay sé nyá mbây, rá̧ a ké regí kaw mbây. 13Ɗambɛl rá̧ ké kála, ké ɗí njukupéna a mɛ̌ri̧ bôo, a hí̧ kuriri njuku mbêw mbêw too mínya ɓá ŋgɛ̧́náké, a sa: Í niŋ hɛ̧sɔ́ʼɔ rú ka̧ sêe ka mi e regí: 14Dáy a uru a kála. Njuku a pû mɛ̌ri̧ zi ɓay a mɛ̌ nyá, dáy a pé njukuri tɔ́ŋ nɛ́, ɓá kú sé sa: Rú zi ɓá njuku nɛ́, ké kaw mbây a tûl a ɓurú yá: 15Ké gé ka̧ sá̧, kú gé hí̧ nɛ́ mbây, nǎŋnɔ́ ké regí pû mɛ̌. A pé ɗí njukupéna a mɛ̌ri̧ ráy a ké hí̧ kuriri mínya, ɓá kú gí. Njuku sí̧ lé too, ké gí sa hɛ̧ a ké ziŋ ka tûl mínyaké. 16Titíla njuku gí, a sa: Gáŋnjuku, mí niŋ hɛ̧sɔ́ʼɔ ka mínya a mɔ hí̧ mí, a ziŋ mínya a féké bôo ɓáy kɔ̧ tûlké. 17Mbây sa hí̧ nɛ́: Bel mambá, njukupéna a béláké. Ka mɔ koro gunhɛ̧ ɓá béláké, mi e ɓá mɔ́ kaw mbây ka tûl pû bôo. 18Njuku a séreké gí a sa: Gáŋnjuku, mí ziŋ mínya a féké ndíɓí ɓáy kɔ̧ tûl mínya ka mɔ hí̧ mí. 19Mbây sa hí̧ nɛ́: Mɔ̌, mi e ɓá mɔ́ kaw mbây ka tûl pû ndíɓí: 20Njuku a féké gí a sa: Gáŋnjuku, mɔ́ nyá mínya a mɔ̌, mi ŋgá̧ ka nzáʼa gári pé a ɓá mú. 21Mi ŋgú wɔ́w a mɔ̌, ɓayhí̧lé mɔ ŋgbɔ́rɔ mambá, mɔ kaw ɓá njuku ka mbí hɛ̧ a gel ka mɔ zi ɓá hɛ̧ ka̧nrú̧ nyáy, mɔ lú hɛ̧pay a gel ka mɔ zi rú hɛ̧ ka̧nrú̧ nyáy. 22Mbây rerú hí̧ nɛ́: Njukupéna a belyáké, mi e walɓay a mɔ̌ sé tûl ɓay a nzáʼa. Mɔ tu ɓá mi kaw ɓá njuku ka ŋgbɔ́rɔ mambáy, ka mbí hɛ̧ a gel ka mi zi ɓá hɛ̧ ka̧nrú̧ nyáy, a lú hɛ̧pay a gel ka mi zi rú hɛ̧ ka̧nrú̧ nyáy. 23Dáy, ɓayhí̧rá̧ mɔ zi sé ɓá mínya a mǐ, ka̧n vûn lari rá̧ sêe ka mǐ, mí regí nyánáké lé, mí ziŋ a féké ka̧n tûlké yáy lé? 24Dáy, a sa hí̧ njukuri ka e a gelké, í ŋgbá nɛ́ a naʼa mínya ka ndɔ̂ʼɛ, a í hí̧ njuku ka erú ka mínya bôo. 25Kú sa ɓá: Gáŋnjuku, mɛ̌ ké erú ka mínya bôo dá. 26Mbây sa hí̧ kuriri ɓá: Njuku ka erú ka hɛ̧y, kú e ɓá a féké ɓáy ka̧n tûlké hí̧ nɛ́, a njuku ka zi tí ka hɛ̧ nyáy, kú e naʼa a tɛ̧́wké nɔ́ a ké erúy. 27A njuku ŋgá̧na a mǐri̧, ka zi ɓá mí kaw mbây yáy, í ŋgbá kuriri gí gelé, a í kuriri a mbɛl ní.»

Zezú kaw ri ɓil pû a Zerúzalɛ̂m

(Mat 21:1-11; Mrk 11:1-11; Zâŋ 12:12-19)

28Fal saɓay nɔ́rí̧, Zezú uru ɗambɛl a njukuri ɓay a he sé Zerúzalɛ̂m. 29Gelka ké zi ɗɛ́ŋ ka Bɛtfazé rá̧ Betaní, ka e ɗɛ́ŋ kuu kon a Oliviyé, ké pé gunbɛʼɛri sére ɗambɛl. 30«A sa hí̧ kuriri ɓá: Í sé pû nɔ́ ka ná a mbɛl, wǎyri mí gé ká̧y, i e kó gun máhóla a kú ŋgá̧ nɛ́ ka̧n, njuku zi he tûlké bɔʼɔ mbêw yá ɓáy. Í sɛl nɛ́ gírú. 31Dáy wǎyri mí kaw sɛ́laké rá̧ njuku a há̧na mí gé vbí wǎyri ɓá: Ɓayhí̧ i sɛl gun máhóla nɔ́ lé? I sa hí̧ nɛ́ ɓá Gáŋmbây pé zi ɓayké.»

32Njuku nzáʼapénari̧, sé a gé ziŋ hɛ̧ too ɓá báŋké nɔ́ ka Zezú sa hí̧ kuriri. 33Gelka kú kaw sɛl gun máhólakéy, njuku máholákéri vbí kuriri ɓá: «Ɓayhí̧ i sɛl gun máhóla lé?» 34Kú fere a sa: «Gáŋmbây pé zi ɓayké.» 35Dáy kú ɗá gun máhólaké gí hí̧ Zezú, a mɔny gáŋ laa a kuriri kɔ̧ tûlké, a ɓá Zezú he kawrú. 36Gelka Zezú kaw tûl gun máhóla a kaw sésénay, njukuri fi gáŋ laa a kuriri kɔ̧ tûl ŋgboro. 37A kú zi dɛ́ŋ ka Zerúzalɛ̂m, a ŋgboro ka ɗere lá bɔʼɔ kon a dii Oliviyé, gunbɛʼɛri mbá ka mûnrína, a tí ɗél rɛŋ a Gáŋvbôn ka ŋgɛ́rɛ ɓay tûl hɛ̧sáʼamari̧ a kú kó, ké niŋ. 38A kú sa ɓá: «Gáŋvbôn, ké ɗí béla kɔ̧ tûl a mbây a gí ka rɛŋ a Gáŋmbây. A vónáké ké ná a nûnalê, rá̧ hɔ̧́na ké hí̧ Gáŋvbôn!»

39Fariziyɛ̧́ a há̧narí̧, ka e a bazeŋ a njukuri, gí sa hí̧ Zezú ɓá: «Gáŋnjuku, mɔ sa hí̧ Gunbɔʼɔri ɓá kú pɔŋ vbá̧nzáʼa.» 40Dáy Zezú fere a sa kuriri ɓá: «Mi sa hí̧ wǎyri, kú pɔŋ vbá̧nzáʼa a kuriri lé, sawri e vbá̧nzáʼa, ɓay a hí̧ ɗél hí̧ mí!»

Zezú vú kɔ́ tûl a Zerúzalɛ̂m

41Gelka Zezú zi ɗɛ́ŋ, ka a kó pû Zerúzalɛ̂m, ké tí vúna, 42a sa: «Wǎyri njuku Zerúzalɛ̂mri̧, i zi tu hɛ̧ ka e hí̧ wǎyri ŋgboro ziŋ a vónáké a sénɛ́ nyá! Dáy ŋgɛŋnɛ́, í kó, ŋgboroké ŋgá̧ hí̧ wǎyri, i zi ma kónáké yá. 43Ɓayhí̧lé sêeké e ka̧na, ka njuku ŋgá̧na a wǎyri e gí ɗɔ́ŋ wǎyri ka hɛ̧béreri, a de ŋgboro tɛ̧́na, ka ŋgɛ́m wǎyri ŋgboro too, ɓay a ɓá wǎyri tɔ́ʼɔsêe. 44Kú e nduku wǎyri a gbɛʼɛrɛ pû a wǎyri too, a tí pɔŋ saw a há̧na ka̧n tûl mbɛ̧́nɛ́ nyá. E ná nǎŋ hí̧ wǎyri, ɓayhí̧lé i zi tu nâm ka Gáŋvbôn gí, ɓay a gí hí̧ndɔ̂ʼɔ hí̧ wǎyri yá.»

Zezú a ɓil vûn a Gáŋvbôn

(Mat 21:12-17; Mrk 11:15-19; Zâŋ 2:13-22)

45Zezú gé ka̧, a gé ri ɓil vûn a Gáŋvbôn, a tí ní njuku zé sɔ́ʼɔri a ɓilké, 46a sa: «A ɓil Mbété, Gáŋvbôn sa: Vûn a mǐ ɓá vûn gɔ́ŋ Gáŋvbôn, dáy a wǎyri, i ɓá vûnké tɛ̧́ pɔ̂ny a ríwari!» 47Zezú tɔ́ʼɔhɛ̧ dát, a ɓil vûn a Gáŋvbôn. Gáŋnjuku nzáʼaká̧nari̧, kuu njuku tɔ́ʼɔ sáŋnari̧ rá̧ gáŋnjuku a pûri ɛ́ ŋgboro, ɓay kú í nɛ́. 48Dáy, a zi tu a̧ní kú e niŋáké yá, ɓayhí̧lé njukuri too géké súkú a kuriri a kaw láɓay a Zezú.

Currently Selected:

Luk 19: pnz

Highlight

Copy