Zâŋ 1

Ɓay mbí hay mûn

1Ka títáʼa hɛ̧ri̧ too, Ɓay tí erú dá. Ɓay erú kuu Gáŋvbôn, dáy Ɓay ɓá Gáŋvbôn. 2Ka títáʼaké, Ɓay erú kuu Gáŋvbôn. 3Gáŋvbôn mɔny hɛ̧ri̧ too ka ŋgboro a Ɓay. Hɛ̧ a ké zi mɔny ka ŋgboro a Ɓay yáy, zi tí yá. 4A ɓil a Ɓay pé ndísɛ̌ʼɛ erú, dáy ndísɛ̌ʼɛké ɓá geltáŋa a njuku a tísiriri. 5Geltáŋa taʼa a ɓil tirí̧ma dáy tirí̧ma zi nyá nɛ́ nyá. 6Gáŋvbôn pé njuku a há̧na, rɛŋɛ́ ɓá Zâŋ. 7Ké gí ɓay a saɓay sé tûl a geltáŋa rá̧ njukuri too ka láɓay a mɛ̌y, kú láɓulaw hí̧ ɓayké. 8Ké zi tí ɓá geltáŋa mɛ̌ ka mûn nɛ́ nyá, ké gí ɓay a saɓay a geltáŋa. 9Geltáŋaké ɓá gbát geltáŋa, ka gí tísiri, gí táŋ njukuri too. 10Ɓayké gí tísiri nɛ́, ɓá mɛ̌ pé mɔny tísiri, dáy njuku a tísiriri zi tu nɛ́ nyá. 11Ké gí gel a njuku a mɛ̌ri̧ dáy njuku a mɛ̌ri̧ zi nyá nɛ́ nyá. 12Dáy, a njukuri too ka nyá nɛ́, ka a láɓulaw hí̧ nɛ́y, ké hí̧ kuriri kpɔ́ŋa tɛ̧́ gun a Gáŋvbôn. 13Tí ɓá ka ŋgboro a mbuŋa malé ka ŋgboro a zína a law a njuku yá, ɓá ka ŋgboro a zína a Gáŋvbôn.

14Ɓayké rembí mûn a njuku, a rekaw bazeŋ a maná, mbá ka béla law rá̧ gbátɓay. Ná kó hɔ̧́na a mɛ̌, ɓá báŋa hɔ̧́na a gun mbêw a Gáŋvbôn. 15(Zâŋ saɓay a mɛ̌ a vbá̧nzáʼa a sa: «Ɓá mɛ̌ pé mi tí sa ɓá: Njuku ka e gí ka falní, ké ndé mí ka nɛ́rɛ̧, ɓayhí̧lé ké tí e ɗambɛl hí̧ mí.») 16Katína, ná ziŋ hɛ̧ri̧ too a ɓil béla a mɛ̌, a rezíŋ ɓáy. 17Gáŋvbôn hí̧ nárí̧ sáŋna ka ŋgboro a Mɔyíze, dáy béla rá̧ gbátɓay a mɛ̌, gí ka ŋgboro a Zezú Kiris. 18Njuku a há̧na zi kó Gáŋvbôn bɔʼɔ mbêw yá, dáy Gun mbêw a mɛ̌, ka ɓá Gáŋvbôn, ka kaw gbaŋ a Bâa a mɛ̌, pé niŋ rá̧ pé njukuri tu nɛ́y.

Ɓay a Zâŋ Batís

(Mat 3:1-12; Mrk 1:1-8; Luk 3:1-18)

19Ɓay ka Zâŋ sa ka sêe ka mbây a Juyífri a Zerúzalɛ̂m, pé njuku nzáʼaká̧nari̧ rá̧ njuku niŋ péna a ɓil vûn a Gáŋvbônri̧ sé ge lé, ɓá kú gé vbí nɛ́ ɓá: «Mɔ̌, mɔ́ ɓá gé lé?» 20Zâŋ zi mú nyá, ké sa táŋáké hí̧ kuriri ɓá: «Mǐ, mí zi tí ɓá Kiris yá.» 21Kú revbí nɛ́ ɓáy ɓá: «Dáy mɔ́ ɓá gé lé? Mɔ́ ɓá Eli lé?» «Zâŋ sa háy, mi zi tí ɓá Eli yá.» Kú revbí ɓáy ɓá: «Dáy mɔ́ ɓá porofɛ́t lé?» Zâŋ sa: «háy.» 22Kú resa hí̧ nɛ́ ɓáy: «Dáy a mɔ̌ wá, mɔ́ ɓá gé lé? Rú zi ɓay a rerú ka nzáʼapéna hí̧ njukuri ka pé rúy. Mɔ́ sa hí̧ rú, mɔ̌ ka tûló, mɔ ɓá gé lé?̄» 23Zâŋ sa hí̧ kuriri ɓá: «Mi ɓá njuku ka kakaa a lawkɔ́r: Í mɔny ŋgboro ɓá ndáráké ɓay a Gáŋmbây!̄» (Nǎŋnɔ́ pé porofɛ́t Ezayí sáy.)

24A bazeŋ a njukuri a kú pé kuriri gí gel a Zâŋ, Fariziyɛ̧́ri̧ a há̧narí̧ erú. 25Kú vbí nɛ́ ɓáy ɓá: «Mɔ̌, mí zi tí ɓá Kiris malé Eli malé porofɛ́t yáy, ɓayhí̧ mɔ ɓá njukuri nyá batêm lé?̄» 26Zâŋ sa hí̧ kuriri: «Mǐ, mi ɓá njukuri nyá batêm ka mbii dáy a bazeŋ a wǎyri njuku a há̧na erú, ka i zi tu nɛ́ nyá. 27Ké e gí ka falní, dáy mi zi ma ɓay a sɛ́l sɛl sabɔʼɔ a mɛ̌ nyá.» 28Hɛ̧ nɔ́rí̧ too niŋ ka Betaní a hélkála mbii a Jurdɛ́ŋ, gelka Zâŋ ɓá njukuri nyá batêm.

Zezú Gun a Gáŋvbôn

29Típélé a féké, Zâŋ kó Zezú kaw gí gé lé, dáy a sa: «Í kó gun mbólé a Gáŋvbôn ka e lú ɓéké a njuku a tísiriri. 30Ɓá ɓay a mɛ̌, pé mi sa ɓá: “Njuku a há̧na e gí a falní dáy, ké ndé mí ka nɛ́rɛ̧, ɓayhí̧lé ké tí e ɗambɛl hí̧ mí.” 31Mǐ, mi zi tu nɛ́ nyá dáy, ɓay a ké tɔ́ʼɔ mûn nɛ́ hí̧ njuku Izirayɛ́lri, pé mi gí hí̧ batêm ka mbii hí̧ njukuri.» 32Dáy Zâŋ sa ɓáy ɓá: «Mí kó Têm a Gáŋvbôn ɗere gí a nûnalê ɓá báŋa bûm gí ew tûlé. 33Mǐ, mi zi tu ɓá ké ɓá gé lé yá, dáy Gáŋvbôn ka pé mí gíy, ɓay a mí ɓá njukuri nyá batêm ka mbii, sa hí̧ mí ɓá: “Mɔ̌ mí kó Têm Pukí ɗere gí ew tûl a njuku lé, ɓá njuku nɔ́, pé e ɓá njukuri nyá batêm ka Têm Pukí.” 34Zâŋ sa: Mi kó ka nûn ní, dáy a sa, njuku nɔ́, ké ɓá Gun a Gáŋvbôn.»

Titíla gunbɔʼɔ a Zezúri

35Típélé a féké, Zâŋ kaw goló ɓáy kuu gunbɛʼɛri sére. 36Gelka ké kó Zezú kaw tánay, ké sa: «I kó gun mbólé a Gáŋvbôn!» 37Gunbɔʼɔ a Zâŋri̧ sére nɔ́, láɓay ráy, a uru, a tɔ́ŋ Zezú. 38Zezú kí a kó kú tɔ́ŋ nɛ́ dáy a vbí kuriri: «A̧hí̧ i zi lé?» Kú sa: «Rabi, mɔ́ ná sí̧ lé?» («Rabi» zi ɓay a sa ɓá: «Njuku tɔ́ʼɔhɛ̧.») 39Zezú resa hí̧ kuriri: «Í gí, i e kó gel nâm a mǐ.» Kú sé, a gé kó gel nâm a Zezú, a kaw kuu mɛ̌ ka sêeké nɔ́, ka mbína bɔʼɔ sêe nɛŋ a bɔʼɔlêw. 40Mbêw a bazeŋ njukuri sére ráy, ka láɓay a Zâŋ ka a tɔ́ŋ Zezú, ɓá Anderé nyîn a Simɔŋ Píyɛ́r. 41Anderé sé, a gé ziŋ nyîn nɛ́ Simɔŋ a sa hí̧ nɛ́: «Rú ziŋ Mɛsí.», («Mɛsí» zi ɓay a sa ɓá: «Kiris.») 42Ké ɗá Simɔŋ, a sé gel a Zezú. Dáy Zezú ɛ̧rɛ̧ nɛ́, a sa hí̧ nɛ́: «Mɔ ɓá Simɔŋ gun a Zâŋ, kú e ɗí mɔ́ ɓá Séfás.» (Rɛŋké zi ɓay a sa ɓá: «Saw.»)

Filíp rá̧ Natanayɛl tɔ́ŋ Zezú

43Típélé a féké, Zezú uru ɓay a sé Galilê, a gé ziŋ Filíp dáy, a sa hí̧ nɛ́ ɓá: «Mɔ́ tɔ́ŋ mǐ.» 44(Filíp ɓá njuku Bɛtsayida ka ɓá pû Anderé rá̧ Píyɛ́r kɔ́y.) 45Falké, Filíp gé ziŋ Natanayɛl, a sa hí̧ nɛ́: «Rú ziŋ njuku ka Mɔyíze rá̧ porofɛ́tri kɔ́, saɓay a mɛ̌y. Ɓá Zezú, gun a Jozɛf, njuku pû a Nazarɛ́t.» 46Natanayɛl sa hí̧ Filíp: «Hɛ̧ a béláké a há̧na ma tɛ̧́ ka Nazarɛ́t lé?» «Filíp sa hí̧ nɛ́, mɔ́ gí, mɔ e kónáké.» 47Gelka Zezú kó Natanayɛl gí gbɛ́ŋɛ́y, ké sa: «Í kó gbát gun a Izirayɛ́l, hɛ̧ a ndáráyaké mbêw zi tí gé lé yá.» 48Dáy Natanayɛl vbí nɛ́: «Mɔ niŋ a̧ní rá̧ a tu mí lé?» Zezú fere a sa: «Mi tí kó mɔ́ ka mɔ kaw ka bɔʼɔ dii njɔ̧̂ny ɗambɛl rá pé Filíp ɗí mɔ̌y.» 49Nǎŋnɔ́, Natanayɛl sa hí̧ nɛ́ «Gáŋnjuku, mɔ kaw ɓá Gun a Gáŋvbôn, mɔ kaw ɓá mbây a gun Izirayɛ́lri!» 50Zezú resa hí̧ nɛ́: «Nǎŋnɔ́, mɔ láɓulaw hí̧ mí, ɓay hɛ̧ ka mi sa hí̧ mɔ́ ɓá, mi tí kó mɔ́ ka bɔʼɔ dii njɔ̧̂ny lé? Mɔ e kó béla a gáŋ hɛ̧ri̧ ka e ndé a nɛ́rí̧ ɓáy!» 51Dáy, ké resa hí̧ nɛ́ ɓáy ɓá: «Katína mi kaw sa hí̧ wǎyri, i e kó nûnalê ŋgburu, lé aŋnze a Gáŋvbônri̧ e he ka ɗere ka tûl a Gun a njuku!»

Currently Selected:

Zâŋ 1: pnz

Highlight

Copy