Péna a Apotereri 23
23
1Pôl e a Zerúzalɛ̂m, kú ɗa nɛ́ gí ew mbɛl a gáŋnjuku walɓayri, dáy ké mbí nûn nɛ́, a ɛ̧rɛ̧ kuriri a sa: «Nyîn nírí̧, a law a táŋáké, pé mi niŋ péna a Gáŋvbôn gí ka̧ sénɛ́.» 2Dáy, gáŋnjuku nzáʼaká̧na Ananínya, sa hí̧ njukuri ka ew ka gbaŋa Pôl ɓá kú vbá̧ nzɛ́ʼɛ. 3Dáy, Pôl sa hí̧ nɛ́: «Ɓá mɔ̌ pé Gáŋvbôn e vbá̧náké, mára̧ gekén a pukáké#23:3 Ɓayké nɔ́ zi ɓay a sa ɓá, njuku foo. Tɔ́ʼɔ ɓá gekén ka ɓá pírí a kú ɓá púy nɔ́ rú̧ ka pukuy. Kú ɗáŋ ka̧ ɓilké lé, ná ɓá yírí dát. Nǎŋnɔ́ tɔ́ʼɔ ɓá njuku ka tɔ́ʼɔ mûn ɓá ké kaw ɓá njuku a Gáŋvbôn, dáy ɓil lawɛ́ ná ɓá yírí dát.! Mɔ kaw, ɓay a walɓay ka̧n tûl ní ɓá báŋké ka sáŋna vbíy, a mɔ many sáŋna, a sa kú vbá̧ mí!» 4Njukuri, a kaw ɗɛ́ŋ kuu Pôl, sa hí̧ nɛ́: «Mɔ fára gáŋnjuku nzáʼaká̧na a Gáŋvbôn!» 5Dáy Pôl zi nzáʼa a kuriri a sa: «Nyîn nírí̧, mi zi tu ɓá, ké kaw ɓá gáŋnjuku nzáʼaká̧na nyá. Katína, kú ɗé ka̧n ɓil Mbété a Gáŋvbôn ɓá: Mɔ́ sa ɓékéɓay sé tûl a mbây a njuku a mɔ̌ri̧ nyá!»
6Pôl tu ɓá, a bazeŋ a gáŋnjuku walɓayri, a há̧narí̧ ɓá Sadusiyɛ̧ri̧, rá̧ a fékéri ɓá Fariziyɛ̧́ri̧, ɓaykénɔ́, ké vbá̧nzáʼa ɓá gbénáké a sa: «Nyîn nírí̧, mi ɓá Fariziyɛ̧́, gun a Fariziyɛ̧́. Ɓay hɛ̧ ka mi mbílaw ní sé tûl ɓay a toma hûl, pé kú ɓá mí gí ew mbɛl walɓay nɛ́.» 7Gelka, Pôl saɓay nǎŋnɔ́, Fariziyɛ̧́ri̧ kuu Sadusiyɛ̧ri̧ tí many há̧narí̧, a goló ɗéma ná a bazeŋ a njukuri ka mára̧y. (8Ɓayhí̧lé Sadusiyɛ̧ri̧ sa ɓá toma hûlri zi tí yá, aŋnzeri rá̧ têmri̧ zi tí yá, Fariziyɛ̧́ri̧, kuriri, kú sa ɓá hɛ̧ nɔ́rí̧ too erú.) 9Njukuri too tí vbá̧nzáʼa, ɓálari ŋgɛ̧́ gé ɓá mbɛl, dáy gáŋnjuku tɔ́ʼɔ sáŋna a há̧narí̧, ka ɓá Fariziyɛ̧́ri̧, uru a saɓay ka ŋgɛ́rɛ ɓá: «Rú zi kó ɓékéhɛ̧ a njuku nɛ́ niŋ nyá, há̧na, aŋnze a há̧na malé têm a há̧na pé saɓay hí̧ nɛ́ lé!» 10Gelka, gáŋnjuku a ŋgawbéreri kó ɓayké gé ɓá mbɛl, ké ŋgú wɔ́w ɓá kú ná niŋ nǎŋ a í Pôl, dáy a sa hí̧ ŋgawbéreri ɓá: I ɗere, a i ɓá Pôl tɛ̧́ a ɓil a njukuri, a i ɓá nɛ́ sé ɓil ŋgɛ́rɛ gáŋ vûn. 11Sû̧ŋ a féké, Gáŋmbây tɔ́ʼɔ mûn nɛ́ hí̧ Pôl a ɓil lɔ́la, a sa hí̧ nɛ́: «Mɔ́ ŋgbá ɓá kpúnáké, ɓá báŋa nɔ́, ka mɔ saɓay a mǐ a gelé a Zerúzalɛ̂m, belɓá, mɔ́ sé saɓay a mǐ kɔ́ ka Rɔm.»
Juyíf a há̧narí̧ láhá̧na ɓay a í Pôl
12Típélé a féké, Juyíf a há̧narí̧ mára̧ a láhá̧na ɓá múnáké, a háhɛ̧, a sa: Ɓurú mí zi í Pôl yáy, rú tí sɔ̧́lâʼa, a tí nzó mbii yá. 13Njukuri ka láhá̧narí̧ ka a háhɛ̧, kú ndé njukuri bon nɛŋ. 14Kú sé ziŋ gáŋnjuku nzáʼaká̧nari̧, rá̧ gáŋnjuku pûri, a sa hí̧ kuriri: «Rú háhɛ̧ a mbɛl a njukuri, ɓá rú mí zi í Pôl yáy, rú tí sɔ̧́lâʼa, a tí nzó mbii yá. 15Dáy, ŋgɛŋnɛ́, rú zi ɓá a bazeŋ a wǎyri, a njuku walɓayri, í vbí gáŋnjuku ŋgawbére a Rɔmɛri̧, ɓá ké ɓá Pôl gí mbɛl a wǎyri. Í tɔ́ʼɔ ɓá, í zi ɓay a kó ɓil ɓay a mɛ̌ ɓá táŋáké. A ɓurú, rú e kaw ɗɛ́ŋ ɓay a í nɛ́, gelka kú e ɗa nɛ́ ɓay a gí mbɛl a wǎyri.»
16Dáy, gun nǎa a Pôl, gun a mánǎa a mɛ̌, láɓayké a uru sé ziŋ Pôl, a ɓil ŋgɛ́rɛ gáŋ vûn, a gé saɓayké hí̧ Pôl. 17Dáy, Pôl ɗí gáŋnjuku a ŋgawbéreri mbêw, a sa hí̧ nɛ́: «Mɔ́ ɗa kaban njuku nɛ́ sé gel a gáŋnjuku a ŋgawbéreri, ké e ka ɓay, ɓay a sa hí̧ nɛ́.» 18Nǎŋnɔ́, ké ɗa kaban njuku ráy, sé gel a gáŋnjuku a ŋgawbéreri, a gé sa: «Njuku vûn sɛl Pôl, ɗí mí, a sa ɓá mí ɗa kaban njuku nɛ́ gí goló, ké e ka ɓay, a ké e sa hí̧ mɔ́y.» 19Gáŋnjuku a ŋgawbéreri gí ŋgbá ndɔ̂ʼɛ a ɗa nɛ́ sé falgel, dáy a vbí nɛ́: «Ɓayhí̧, mɔ́ zi ɓay a mɔ́ sa hí̧ mí lé?» 20Kaban njuku ráy, zi a sa: «Gáŋnjuku walɓayri, láhá̧na ɓay a vbí mɔ́, ɓá mɔ́ ɓá Pôl gí vûn walɓay a típélé, ɓay a kú ɛ́ ɓil ɓay a mɛ̌ ɓá táŋáké. 21Dáy, mɔ́ ná zibɔʼɔké! Ɓayhí̧lé gbaŋa njukuri bon nɛŋ, ka zi ɓay a mú ŋgboro, dáy a háhɛ̧ a mbɛl a njukuri, ɓá kú tí sɔ̧́lâʼa, a tí nzó mbii yá, a kú mí zi í Pôl yáy. Ŋgɛŋnɛ́, kú kaw ɗɛ́ŋ, a zoko ɓá zibɔʼɔ ɓay a mɔ̌.» 22Dáy, gáŋnjuku a ŋgawbéreri sa hí̧ kaban njuku ráy, ɓá ké zi ná sa hí̧ njuku a féké ɓáy, a ké sa hí̧ nɛ́. Dáy a pɔŋ nɛ́ kála.
Kú pé Pôl sé gel a mbây tûlkaw Felíkse
23Falké gáŋnjuku a ŋgawbéreri, ɗí mbây a ŋgawbéreri sére, a sa hí̧ kuriri: «I mára̧ ŋgawbéreri ísɔ́t sére rá̧ njuku dônri̧ bon zíndɔ̂ʼɔsáy rá̧ ŋgawbéreri ísɔ́t sére ka e ka gó a kuriri. A i kaw ɗɛ́ŋ ɓay a sé Sezaré, a sɛl a sêe zíndɔ̂ʼɔmbêw a haŋa sû̧ŋ. 24I mɔny dônri̧ kɔ̧, ɓay a ɗa Pôl, ɓá béláké sé gel a mbây tûlkaw Felíkse.» 25Falké, ké ɗé mbété nɛ́: 26«Mǐ Kolode Lisiyás, mi nam mɔ́, mɔ̌ gáŋnjuku, mbây tûlkaw Felíkse. 27Juyífri ŋgbá njuku nɛ́, ka mi pé nɛ́ gé goló nɛ́y, a zi ɓay a í nɛ́. Gelka mi lá ɓá ké kaw ɓá gun pû a Rɔm: Mǐ kuu ŋgawbére a mǐri̧, rú gé ten nɛ́. 28Dáy, ɓay a tu ɓayhí̧rá̧, Juyífri zi ɓay a í nɛ́ lé, mi ɗa nɛ́ gí mbɛl a gáŋnjuku walɓay a kuriri. 29Mi gí lá ɓá kú niŋ ɓay kuu Pôl, ɓay a tûl sáŋna a kuriri. Dáy rú zi ziŋ hɛ̧ há̧na mbêw, ka Pôl niŋ, ka ma ɓay a ké ziŋ hûl malé ɓay a ɓá nɛ́ ka̧n vûn sɛl yá. 30Falké lé, kú gí sa hí̧ mí ɓá Juyíf a há̧narí̧, láhá̧narí̧ ɓay a í nɛ́, ɓaykénɔ́, pé mi pé nɛ́ ɓá gánáké gé golóy. Dáy a sa hí̧ njukuri ka deɓay ka̧n nzɛ́ʼɛ, ɓá kú gé kalmany a mɛ̌ a goló sá̧.»
31Ŋgawbéreri niŋ hɛ̧ ka gáŋnjuku a kuriri sa hí̧ kuriri, a ɗa Pôl ka haŋa sû̧ŋ, a ɓá nɛ́ sé gel a Aŋtipâs. 32Típéléké, ŋgawbéreri ka sé ka bɔʼɔ, rekála sé gel péna kuriri, a pɔŋ njuku dônri̧ ɗa Pôl kála rú. 33Gelka kú gé ka̧ Sezaré, kú gé hí̧ mbétéké hí̧ mbây tûlkaw Felíkse, a gé ɓá Pôl tɔ́ʼɔ nɛ́. 34Mbây tûlkaw gé kɛ̧́ mbétéké a vbí Pôl ɓá ké ɓá gun ɓil kaw a sí̧ lé? Pôl zi a sa: A ɓil kaw a Silisí, 35dáy, ké sa hí̧ Pôl: «Mi e lá mɔ́, ka sêe ka njukuri ka deɓay ka̧n nzáʼa e gínay.» Dáy, a hí̧nzáʼa ɓá kú ɓá Pôl sé ɓil gáŋ vûn a mbây tûlkaw, a kú koro nɛ́.
Currently Selected:
Péna a Apotereri 23: pnz
Highlight
Share
Copy

Want to have your highlights saved across all your devices? Sign up or sign in
© 2023 CABTAL