Péna a Apotereri 21

Pôl sé ka̧ Zerúzalɛ̂m

1Fal ka rú pɔŋ gáŋnjuku péna a Efɛziyɛ̧ri̧, rú sé he batô, ɓay a sé tísiri a Kós. Típélé a féké, rú gé ka̧ Rodɛs, a goló rú uru a sé ka̧ Patara. 2Rú gé ziŋ batô a kaw gé ɓá Fenisí, dáy, rú gé ri ɓilké pé a kála. 3Gelka, rú gé ka̧ gbaŋ pû Sípɛrɛ, rú pɔŋ tûlkɔ̂ɔké, a fɔ́ŋ lá ŋgboro a zabaw, a mbí ŋgboro a Sírí. Rú gé ka̧ gbaŋ pû a Tîr, ɓayhí̧lé a goló, pé batô e gé ɗere hólari kɔ̧rú̧y. 4Rú gé ziŋ gun láɓulawri a goló, dáy a gé kaw kuu kuriri nâm zíndɔ̂ʼɔsáy. Têm Pukí vbara kuriri, dáy kú sa hí̧ Pôl, ɓá ké zi ná sé ka̧ Zerúzalɛ̂m. 5Nǎŋnɔ́, ka nâm a ɓurú ɔ dáy, rú uru a mbí ŋgboro. Kú ɗa rú kuu wûny a kuriri rá̧ gun a kuriri too, tɛ̧́ ɓil pû. Gelka rú gí ka̧ gbaŋ mbii, rú gé huku siri kuu kuriri too, a gɔ́ŋ Gáŋvbôn. 6Fal ka rú vbara há̧narí̧ dáy, rú sé he ɓil batô, dáy kú rekála sé gel a kuriri.

7Rú ɔrɔ gɔ́rɔ́ a ɓurú ka Batô, uru ka Tîr gí Potólemayis. A fal ka rú sé nam gun láɓulawri a ɓil pûké, rú kaw kuu kuriri nâm mbêw. 8Típélé a féké, rú uru a sé ka̧ Sezaré. A goló, rú gé ri ɓil hɛlɛ a Filíp#21:8 Pap 6:1-6, njuku tɔ́ʼɔ Bélaɓay, dáy a gé ná gé lé. Filíp nɔ́, ɓá mbêw, a ɓil a njukuri zíndɔ̂ʼɔsáy, a kú ten kuriri a Zerúzalɛ̂m, ɓay a kú wal lâʼay. 9Ké e ka gun wûnynjukuri nɛŋ, ka zi tu wɔ̧rɔ̧́njuku yá ɓáy, a kaw saɓay a Gáŋvbôn ka ɓá kɔ̧ nzáʼa a kuriri. 10Dáy, rú gé ná goló nâm ɓá ŋgɛ̧́náké, nǎŋnɔ́ njuku a há̧na ɓá porofɛ́t, rɛŋɛ́ ɓá Agabús gí ka Judé. 11A gí ziŋ rú, ka mbí hɔ́ʼɔ ŋgá̧ tûl laa a Pôl, a ŋgá̧ ndɔ̂ʼɛ rá̧ bɛʼɛ, a sa: «I lá hɛ̧ ka Têm Pukí sáy: Ka Zerúzalɛ̂m, gáŋnjuku Juyífri e ŋgá̧ njuku hɔ́ʼɔ ŋgá̧ tûl laa nɛ́, ɓá báŋa nɛ́. Kú e ɓá nɛ́ ka̧n ɓil ndɔ̂ʼɔ a njukuri ka zi tí ɓá Juyífri yáy.» 12Fal láɓayké nɔ́, ɓurú rá̧ njuku a fékéri a goló too, rú vú hí̧ Pôl, ɓá ké zi ná sé Zerúzalɛ̂m. 13Dáy, Pôl rerú ɓá: «Ɓayhí̧, i vú, a zi ɓay a hú mûn ní lé? Mǐ, mi kaw ɗɛ́ŋ tí ɓá, ɓay a ziŋ ŋgá̧na mbêw yáŋ nyá, dáy ɓay a ziŋ hûl kɔ́ ka Zerúzalɛ̂m, ɓay tûl rɛŋ a Gáŋmbây Zezú.» 14Ka ké zi láɓay a ɓurú yáy, rú zi many nɛ́ mbaa, rú sa ɓá: «Gáŋmbây ké niŋ hɛ̧ ɓá báŋké a ké ziy!»

15Falké nâm kpay a goló, rú mɔny hɛ̧ a ɓurú, a kála sé Zerúzalɛ̂m. 16Gun láɓulaw a há̧narí̧ ka Sezaré, ɗa ɓurú sé ka̧ gel a njuku a há̧na, ka e nyá ɓurú ná gé lé, rɛŋɛ́ ɓá Nasoŋ, ké ɓá gun pû a Sípɛ́rɛ, ké láɓulaw hí̧ Zezú ɗiɓaŋ dá.

Pôl ka̧ Zerúzalɛ̂m a tá sé gel a Ják

17Gelka rú gé ka̧ Zerúzalɛ̂m, nyîn a manárí̧ ka láɓulaw ka Zerúzalɛ̂m, gí nyá ɓurú ka sáʼa. 18Típélé a féké, Pôl uru kuu ɓurú gí gel a Ják, ka gáŋnjuku mára̧ a gun láɓulawri too mára̧ erúy. 19Pôl gí nam kuriri, a gí tí sa hí̧ kuriri hɛ̧ too ka Gáŋvbôn niŋ ka ŋgboro a mɛ̌, a bazeŋ a njukuri ka zi tí ɓá Juyífri yáy. 20Gelka kú láɓayké, kú ɗél Gáŋvbôn, a sa hí̧ Pôl ɓá: «Mɔ́ kó, nyîn, Juyífri ísɔ́t dawaní ziŋ láɓulaw hí̧ Gáŋmbây: kuriri too, mbí mûn a kuriri a tɔ́ŋ ɓá sáŋna a Mɔyíze. 21Dáy, mɔ́ lá hɛ̧, a kú sa hí̧ kuriri ɓá: Mɔ̌, mɔ́ sa hí̧ Juyífri too, a ná bazeŋ a njuku a fékéri ɓá kú pɔŋ sáŋna a Mɔyíze, a kú zi ná vbé ganzá hí̧ gun a kuriri, a kú zi ná tɔ́ŋ péna niŋ a Juyífri. 22Dáy a̧hí̧ ná e niŋáké a ŋgɛŋnɛ́ lé? Katína, kú e lánáké ɓá mɔ e a gelé. 23Dáy, mɔ́ niŋ hɛ̧ ka rú zi a ŋgɛŋnɛ́: Rú erú a gelé wɔ̧rɔ̧́njukuri nɛŋ, ka hí̧nzáʼa hí̧ Gáŋvbôn. 24Mɔ́ ɗa kuriri sé kuu mɔ̌, a mɔ́ niŋ hɛ̧púna turu mûn kuu kuriri, a mɔ́ pú hɛ̧ too hí̧ kuriri, ɓay a kú kpôtûl a kuriri#21:24 Njukuri ka hí̧nzáʼa hí̧ Gáŋvbôn ka a kpôtûl ɓay tûl hí̧nzáʼaké, ka a kaw ka tâny tûl a kuriri sá, sêe a kú e ɔrɔ nâm hí̧nzáʼaké, kú sé pú lari hí̧ gáŋnjuku nzáʼaká̧na ɓay kú ma kpôtûl a kuriri, dáy kú niŋ lâʼa, a záymûn. . Nǎŋnɔ́ njukuri too, e tu ɓá gbátɓay zi tí ɓil ɓay a kú lá sé tûló yá, ɓayhí̧lé kú e kó ɓá mɔ̌ kɔ́, mɔ́ kaw tɔ́ŋ sáŋna a Mɔyíze. 25A njukuri ka zi tí ɓá Juyífri yáy, ka a láɓulaw, rú ɗé mbété hí̧ kuriri, a sa hí̧ kuriri sé tûl hɛ̧, ka rú ŋgá̧nzáʼa sé tûlké, ɓá kú zi ná sɔ̧́ hay a kú niŋ hɛ̧púna rú̧ hí̧ vbônri̧, kú zi ná sɔ̧́ hay a sêmké, a kú zi ná niŋ dala.»

26Dáy, típélé a féké, Pôl ɗa njuku nɛŋ nɔ́rí̧, ka tí niŋ hɛ̧púna turu mûn kuu kuriri. Kú resé ɓil vûn a Gáŋvbôn, ɓay a gé ŋgbá nâm, a kú e ɔrɔ hɛ̧púna turu mûn a kuriri, zi ɓay a sa ɓá, sêe a kú e niŋ hɛ̧púna, ɓay tûl a kuriri mbêw mbêw tooy.

Kú ŋgbá Pôl a ɓil vûn a Gáŋvbôn

27Gelka, nâm zíndɔ̂ʼɔsáyké zi tɛ̧́w ɓay a ɔna, Juyíf a há̧narí̧ ka gí a ɓil kaw a Azí, kó Pôl a ɓil vûn a Gáŋvbôn, dáy a uru njukuri kɔ̧ tûl a Pôl a ŋgbá nɛ́. 28A vbá̧nzáʼa ɓá: «Njuku Izirayɛ́lri, i hí̧ndɔ̂ʼɔ hí̧ ɓurú! I kó njuku nɛ́, ka tɔ́ʼɔɓay lá gélri too hí̧ njukuri, ɓá kú many gun Izirayɛ́lri, a kú pɔŋ sáŋna a Mɔyíze, rá̧ vûn a Gáŋvbôn. Ké ɓá njukuri ka zi tí ɓá Juyífri yáy, gí ri ɓil vûn a Gáŋvbôn, a ɓew gel a táŋáké nɔ́!» (29Kú sa nǎŋnɔ́, ɓayhí̧lé Juyífri kó Tirofim, njuku Efɛze a há̧na kuu Pôl ka Zerúzalɛ̂m, a kɛrɛ ɓá Pôl ɓá nɛ́ gí ri ɓil vûn a Gáŋvbôn.)

30Gelri ná ɓá ɓala lá ɓil pûri too, njukuri tɛ̧́ lágelri too gí. Kú gí ŋgbá Pôl, a kɔʼɔ nɛ́ tɛ̧́ ɓil vûn a Gáŋvbôn, a tu nzáʼaŋgborokéri ka̧nrú̧. 31Njukuri ɛ́ ŋgboro ɓay a í Pôl. Gelka kú gí sa hí̧ gáŋnjuku a ŋgawbére a Rɔmɛ́ a há̧na, ɓá njuku Zerúzalɛ̂mri̧ too, e a ɓil dɔ́ʼɔla. 32A gé láɓayké nɔ́, ké uru ɓá gánáké, a fa̧ ŋgawbéreri rá̧ mbây kaw tûl a ŋgawbéreri ísɔ́t kuu mɛ̌, a gí ka̧. Gelka, njukuri gí kó kuriri dáy, kú pɔŋ vbá̧ Pôl. 33Nǎŋnɔ́, pé ké gí, a sa kú ŋgbá Pôl, a kú ŋgá̧ nɛ́ ka sɛl wɛ̧̂ɛ. Dáy, a vbí ɓá: Njuku nɛ́, ɓá gé lé? A̧hí̧ ké niŋ lé? 34Dáy a bazeŋ a kuriri, njuku a há̧narí̧ vbá̧nzáʼa kuriri ɓórí, njuku a fékéri vbá̧nzáʼa kuriri ɓórí sé, kú zi lá ɓilké yá. Nǎŋnɔ́ ka gáŋnjuku a ŋgawbéreri zi ma lá ɓil ɓayké yáy, ɓay tûl ɓala a njukuri, ké sa ɓá kú ɗa Pôl sé tu nɛ́ ka̧n ɓil ŋgɛ́rɛ gáŋ vûn. 35Gelka, kú gé ka̧ gel héna ɓay a ri vûnké, ŋgawbéreri gé mbí Pôl, ɓayhí̧lé njukuri gí ka ŋgɛ́rɛ. 36Ɓayhí̧lé, njukuri too tɔ́ŋ kuriri, a vbá̧nzáʼa ɓá: «Kú í nɛ́!»

Pôl saɓay hí̧ njuku a Zerúzalɛ̂mri̧

37Gelka, kú zi ɓay a ɓá Pôl ri ɓil ŋgɛ́rɛ gáŋ vûnké, Pôl vbí gáŋnjuku a ŋgawbéreri ɓá: «Ŋgboro erú hí̧ mí, ɓay a mi saɓay tɛ̧́w lé?» Dáy gáŋnjuku a ŋgawbéreri sa hí̧ nɛ́: «Mɔ tu sa nzáʼa girɛ́k kɔ́ lé?» 38Dáy mɔ zi tí ɓá Egyptiyɛ̧ nɔ́, a ɓil nâm a há̧narí̧ a gelé, a ké uru njukuri tɔ́ŋ nɛ́ sé ɓil lawkɔr, njukuri ma niŋ kumrá̧ké nɛŋ nyá lé? 39Pôl zi nzɛ́ʼɛ, a sa: «Mǐ, mi kaw ɓá Juyíf, pû mǐ ɓá Társe, ka tísiri a Silisí. Mi kaw ɓá gun ɓil pû ka e ka nɛ́rɛ̧ mambá. Mi vú hí̧ mɔ́, mɔ́ pɔŋ mí, a mi saɓay hí̧ njukuri!» 40Dáy, gáŋnjuku a ŋgawbéreri pɔŋ ŋgboro hí̧ nɛ́, ɓá ké saɓay. Pôl uru a niŋ ndɔ̂ʼɛ hí̧ njukuri, njukuri pɔŋ nzáʼa kuriri, gel ná yím, dáy Pôl saɓay hí̧ kuriri ka nzáʼa hebiré:

Currently Selected:

Péna a Apotereri 21: pnz

Highlight

Copy