YouVersion Logo
Search Icon

Péna a Apotereri 19

19
Pôl ka̧ Efɛze
1Ɓil nâm ka Apoló e ka Kɔrɛŋte, Pôl tá ka ŋgboro a ɓil kon a kaw a Azí, a ka̧ Efɛze. A goló, ké gé ziŋ gun láɓulaw a há̧narí̧ 2dáy, a vbí kuriri: «Gelka i láɓulaw, Têm Pukí ɗere kɔ̧ tûl a wǎyri lé?» Kú zi nzɛ́ʼɛ a sa: «Rú zi lá bɔʼɔké mbêw, ɓay a Têm Pukí yá!» 3Dáy ké vbí kuriri ɓá: «Batêm a gé i ziŋ lé?» Kú zi ɓá: «Batêm a Zâŋ.» 4Dáy Pôl resa hí̧ kuriri ɓá: «Zâŋ, ɓá njukuri nyá batêm a fere káwa, ké sa hí̧ njuku Izirayɛ́lri ɓá kú láɓulaw hí̧ njuku ka e gína a fal, ka ɓá Zezú.» 5Gelka kú láɓayké, kú gí nyá batêm ka rɛŋ a Gáŋmbây Zezú. 6Pôl ɓá ndɔ̂ʼɛ kɔ̧ tûl a kuriri, dáy Têm Pukí ɗere kɔ̧ tûl a kuriri, kú tí saɓay ka nzáʼaɓayri ɓórí ɓórí, a tɔ́ʼɔɓay a Gáŋvbôn. 7Kuriri too, tûl a kuriri bôo a sére.
8Falké Pôl sé vûn gɔ́ŋ Gáŋvbôn a Juyífri, a saɓay hí̧ kuriri táŋ wɔ́w. Fêw sáy, ké saɓay kuu kuriri sé tûl hɛ̧ ka kó Pû a Gáŋvbôn, a ɛ́ ŋgboro ɓá njukuri a kaw lá nɛ́, kú láɓulaw. 9A ɓilké nɔ́ too, njuku a há̧narí̧ kpúlaw a kuriri a zi láɓulaw yá, ka ɓew ɓá ɓay a Gáŋmbây a mbɛl a njukuri. Dáy, Pôl pɔŋ kuriri a kála, a mára̧ njukuri ka láɓulaw kɔ̧ ɓórí, a tɔ́ʼɔ kuriri hɛ̧ sêe too a ɓil gáŋ vûn mbɛlhɛ̧ a Tiranus. 10Ké niŋ nǎŋnɔ́ mbimbɔ̂m sére, njukuri too ka ná ɓil kaw a Azí, Juyífri rá̧ njukuri ka zi tí ɓá Juyífri yáy, láɓay a Gáŋmbây. 11Gáŋvbôn niŋ gáŋ hɛ̧sáʼamari̧ ka ŋgboro a Pôl. 12Nǎŋnɔ́ nzáʼa laari malé gárí a kú ɓá ɗa mûn a Pôl, a ɓá guku njuku záŋmári̧, njuku záŋmári̧ ziŋ ŋgɛ́rɛ, têm ɓékéri tɛ̧́ ka mûn a kuriri.
Gun a Sikévari lé ní têm ɓékéri
13Juyíf a há̧narí̧, há̧ra̧ lá ɓil pûri ɓay a ní têm ɓékéri ka mûn a njukuri, dáy a lé mbí rɛŋ a Gáŋmbây Zezú ɓay a ní têm ɓékéri rú. Kú sa hí̧ têm ɓékéri ɓá: «Rú sa hí̧ wǎyri, í tɛ̧́ ka rɛŋ a Zezú nɔ́, ka Pôl tɔ́ʼɔ!» 14Nǎŋnɔ́ pé ɓá péna ka gun a gáŋnjuku nzáʼaká̧na, a rɛŋɛ́ ɓá Sikéva, a tûl a kuriri zíndɔ̂ʼɔsáy, kaw niŋákéy. 15Dáy têm ɓéké zi nzáʼa a kuriri a sa: «Mi tu Zezú, a tu gé ɓá Pôl, dáy a wǎyri, i ɓá gé lé?» 16Dáy, njuku ráy ka e ka têm ɓéké, uru a tí vbá̧ kuriri, ké ndé kuriri a ŋgɛ́rɛ, a ɓá kuriri tɔ́ʼɔsêe ɓá ŋgɛ́rɛ́ké, nǎŋnɔ́, kú tɛ̧́ a ɓil vûn a mɛ̌ ka ŋgúna, mûn a kuriri too ɓǎŋ baa, ka nɔʼɔ. 17Njuku pû Efɛzeri, Juyífri rá̧ njukuri too a láɓayké, wɔ́w ɓá kuriri, nǎŋnɔ́, kú hɛʼɛ rɛŋ a Gáŋmbây Zezú. 18Njukuri ɓá ŋgɛ̧́náké ka láɓulaw gí, a sa a mbɛl a njukuri, hɛ̧ belyákéri too a kú niŋ. 19A bazeŋ a kuriri, njukuri ɓá ŋgɛ̧́náké a kaw niŋ hɛ̧ ŋgálári, fá̧ mbété ŋgálá kuriri, a gí njúŋ a mbɛl a njukuri too. Kú kɛ̧́ lari mbétéké, sáki ísɔ́t bondíɓí#19:19 Lariké mínya mbêw, ɓá lari péna, a njuku nâm mbêw.. 20Nǎŋnɔ́, pé ka ŋgboro a kpɔ́ŋa a Gáŋmbây, ɓay a Gáŋvbôn sé magél too, a tɔ́ʼɔ kpɔ́ŋa a mɛ̌.
Bére uru a Efɛze
21Fal hɛ̧ nɔ́rí̧, Pôl zi ɓay a tá ka ŋgboro a Maseduwa̧n rá̧ Akayí ɓay a sé Zerúzalɛ̂m. Dáy a sa: «Gelka mǐ, mí ka̧ Zerúzalɛ̂m, belɓá mí tá sé ka̧ Rɔm kɔ́.» 22Ké pé njuku a mɛ̌ri̧ sére sé Maseduwa̧n, Timoté rá̧ Eráste, dáy, a rekaw nâm kpay a ɓil kaw a Azí.
23A ɓil nâmké nɔ́, ŋgɛ́rɛ ɓay uru a Efɛze ɓay tûl ɓay a Gáŋmbây. 24Njuku mɔny hɛ̧ a há̧na rɛŋɛ́ ɓá Demɛtiriyus, mɔny gun vûnri̧ ka lari ɓá báŋa a vûn a vbôn wûnynjuku Artemís, nǎŋnɔ́, a kaw ziŋ lari ɓá ŋgɛ̧́náké kɔ́ hí̧ njukuri ka kaw niŋ pénáké kuu mɛ̌. 25Dáy, Demɛtiriyus nɔ́, mára̧ njukupéna a mɛ̌ri̧, rá̧ njukuri ka kaw niŋ mára̧ péna nɔ́rí̧ too, a sa hí̧ kuriri: «I tu ɓá, béla káwa a manárí̧ gí ka ŋgboro a péna nɛ́. 26Dáy, wǎyri too i kaw lánáké, a kaw kó hɛ̧ ka kaw tánáy: Pôl nɔ́ sa ɓá vbônri̧, ka njukuri mɔny ka ndɔ̂ʼɔ kuriri, zi tí ɓá gbát vbônri̧ nyá, nǎŋnɔ́, njukuri ɓá ŋgɛ̧́náké láɓayké, a tɔ́ŋ nɛ́, zi tí ɓá ka Efɛze mbɛ́ŋ nyá, lágelri ɓá ŋgɛ̧́náké a ɓil kaw a Azíri. 27Sé nǎŋnɔ́ lé, péna a manárí̧ e léna, a niŋ rá̧ hɔ̧́na a vûn a vbôn wûnynjuku Artemís, zi tí ka nɛ́rɛ̧ mbaa. A goló, hɔ̧́ná a mɛ̌ ka njuku a tísiri a Azíri rá̧ njukuri too ka tísiri kaw hɔ̧́ nɛ́y, zi tí ná mbaa!»
28Gelka njuku nɔ́rí̧ láɓayké nǎŋnɔ́, hɛ́rɛ ŋgbá kuriri, kú vbá̧nzáʼa a sa: «Hɔ̧́na ɓá a Artemís vbôn a Efɛziyɛ̧ri̧!» 29A goló, gel ná ɓá ɓala lá ɓil pûri too. Njukuri gé ŋgbá Gayus rá̧ Aristark, ka kaw ɓá njuku a Maseduwa̧nri̧ sére too, ka gí kuu Pôl, a kɔʼɔ kuriri, a gé mára̧ há̧narí̧ ɓá ŋgɛ̧́náké kɔ̧ gel mára̧ dawá. 30Pôl, zi ɓay a ké sé ɓil mára̧ké, dáy gun láɓulawri de nɛ́. 31Gáŋnjuku péna a há̧narí̧ a ɓil kaw a Azí, ka ɓá mbáŋa a Pôl, pé njukuri gí sa hí̧ Pôl ɓá ké ná sé gel a dawáké. 32A ɓilké nɔ́, njuku lá mbɛ́ŋnɛ́ zi tí yá. Njuku a há̧narí̧ vbá̧nzáʼa kuriri sé ɓórí, njuku a fékéri vbá̧nzáʼa a kuriri sé ŋgboro a féké ɓórí kɔ́. Njuku a fékéri, ɓá ŋgɛ̧́náké a bazeŋ a kuriri zi tu a̧hí̧ mára̧ kuriri gí goló yá. 33Dáy, njuku a há̧narí̧ a bazeŋ a kuriri, kaw sa táŋa hɛ̧ké hí̧ njuku a há̧na, ka rɛŋɛ́ ɓá Alekzaŋndɛrɛ, ka Juyífri sɔʼɔrɔ nɛ́ ɗambɛl. Dáy Alekzaŋndɛrɛ gí gbaŋ ndɔ̂ʼɛ, a zi ɓay a saɓay hí̧ kuriri. 34Dáy njukuri tu ɓá ké kaw ɓá Juyíf, kú vbá̧nzáʼa too, ka ɓay a mbêwké Zaa gelé ké niŋ sɛl a sêe sére ɓá: «Hɔ̧́na ɓá Artemís vbôn a Efɛziyɛ̧ri̧!»
35Ɓá pɔ̧́nɔ̧́ rá̧ pé gáŋnjuku a há̧na ka ɓá njuku ɗé hɛ̧ a pûké, ɓá kuriri pɔŋ nzáʼa kuriri, dáy a sa: «Wǎyri njuku Efɛziyɛ̧ri̧, a gé zi tu ɓá pû a Efɛze, ɓá pû ka koro vûn a vbôn Artemís rá̧ saw a vbôn a mɛ̌ ka ɗere gí a nûnalê yáy lé? 36Njuku há̧na ka e manyáké zi tí yá, i pɔŋ vbá̧nzáʼa, a í zi ná niŋ hɛ̧ há̧na táŋ kɛráké. 37I ɓá njuku nɛ́rí̧ gí gelé, a tu ɓá kú zi ríw hɛ̧ há̧na a ɓil vûn a vbôn a manárí̧ nyá, kú zi fára vbôn a manárí̧ nyá. 38Demɛtiriyus rá̧ njukuri ka tɔ́ŋ nɛ́, kú mí e ka ɓay kuu njuku a há̧na lé, ná erú ka nâm walɓayri kuu njuku walɓayri: A goló pé ɓá gel a kú e ɓá ɓayké gírúy. 39Rá̧ wǎyri, mí e ka ɓay a féké ka i zi ɓay a sanáké, ná e kó ɓilké a mbɛl mára̧ a njukuri ka marú̧y. 40Kú e deɓay ka̧n nzáʼa a manárí̧ ɓá ná uru bére, ɓay tûl hɛ̧ ka tá ka sénɛ́. Ɓayhí̧lé ná zi ma, ɓay a sa táŋa hɛ̧ ka tá hí̧ njukuri sé tûl mára̧ké nɛ́ yá. Fal saɓay nɔ́, ké sa hí̧ njukuri ɓá kú rekála sé nzáʼaŋgboro a kuriri.»

Currently Selected:

Péna a Apotereri 19: pnz

Highlight

Share

Copy

None

Want to have your highlights saved across all your devices? Sign up or sign in