YouVersion Logo
Search Icon

Péna a Apotereri 17

17
Pôl rá̧ Silás ka̧ Tesaloník
1Pôl rá̧ Silás tá lá Amfipolîs rá̧ Apoliní a ka̧ Tesaloník, a Juyífri erú ka vûn gɔ́ŋ Gáŋvbôn a kuriri ka sá̧y. 2Ka ɓá báŋ péna niŋa mɛ̌ dát dáy, Pôl sé ri ɓil vûn gɔ́ŋ Gáŋvbôn a Juyífri. A ɓil nâm ɔʼɔ sáy tɔ́ŋ mbɛ̧́nɛ̧, ké many hána kuu njukuri a ké ziŋ kuriri a golóy sé tûl hɛ̧ ka ɗé ka̧n ɓil Mbété a Gáŋvbônri̧. 3Ké ten táŋáké, a tɔ́ʼɔ hí̧ kuriri ɓá báŋké ka Mbété nɔ́rí̧ sáy, ɓá Mɛsí e tɔ́ʼɔsêe, a toma ka hûl. Ké sa hí̧ kuriri ɓá: «Ɓá Zezú nɔ́, ka mi kaw saɓay a mɛ̌ hí̧ wǎyri nɛ́y, pé ɓá Mɛsí.» 4Ɓaykénɔ́ ri law a Juyíf a há̧narí̧, dáy kú uru a tɔ́ŋ Pôl rá̧ Silás, rá̧ njuku a fékéri ka zi tí ɓá Juyífri yá, ka e ka wɔ́w a Gáŋvbôn rá̧ wûny rɛŋ ɗínari̧ kɔ́ ɓá ŋgɛ̧́náké, tɔ́ŋ kuriri.
5Nǎŋnɔ́, Juyíf a há̧narí̧ mbá ka sɛ́rɛ, dáy a kú mára̧ gun kaban njukuri ka zi tí ka tûl yáy, a kaw lá tûl ŋgboroy, nǎŋnɔ́, kú tí dɔʼɔlɔ njukuri, a niŋ hɛ̧ táŋ ŋgboroké lá ɓil pû. Kú gí ka̧ pû a Zasɔŋ a ɓew hɛ̧ri̧, a ɛ́ Pôl rá̧ Silás, ɓay a ŋgbá kuriri sé mbɛl a njukuri. 6Dáy, a kú ziŋ kuriri yá, a kú ŋgbá Zasɔŋ rá̧ njuku láɓulaw a há̧narí̧, a ɓá kuriri sé mbɛl a njuku walɓay a pûri. Kú gé vbá̧nzáʼa kɔ̧ tûl a kuriri a sa ɓá: «Njuku nɛ́rí̧, kí tûl a njukuri lá gélri too ka tísiri, dáy a ŋgɛŋnɛ́, kú gí e ka gelé dá! 7Zasɔŋ nyá kuriri ná gé lé! Njuku nɔ́rí̧ too, zi niŋ hɛ̧ri̧ ka sáŋna a mbây lúkí ziy yá. Ɓayhí̧lé kú sa ɓá, mbây a féké erú, rɛŋɛ́ ɓá Zezú.» 8Ɓayké nɔ́, lú law a njukuri rá̧ gáŋnjuku pûri. 9Zasɔŋ rá̧ njuku láɓulaw a fékéri, pû lari ɓá ŋgɛ̧́náké rá̧ pé gáŋnjuku walɓayri pɔŋ kuriri.
Pôl rá̧ Silás ka̧ tísiri a Béré
10Gelka sû̧ŋ niŋ dáy, njuku láɓulawri ɓá Pôl rá̧ Silás kála sé pû Béré. Ka kú gé ká̧y, kú tá sé vûn gɔ́ŋ Gáŋvbôn a Juyífri. 11Nûn a njuku pûkéri ŋgburu ndé njuku a Tesaloníkri. Kú nyá ɓay a Gáŋvbôn ka lawrína. Sêe too, kú kaw kɛ̧́ a ɛ̧ ɓil ɓay ka ɗé ka̧n ɓil Mbété a Gáŋvbôn, ɓay a kú kó ɓá, ɓay ka Pôl tɔ́ʼɔy, sé ma gelké lé. 12Njukuri ɓá ŋgɛ̧́náké a bazeŋ a kuriri láɓulaw. A ɓil a njukuri ka zi tí ɓá Juyífri yáy, wûny rɛŋ ɗína a há̧narí̧ erú, rá̧ wɔ̧rɔ̧́njukuri ɓá ŋgɛ̧́náké kɔ́ a láɓulaw. 13Dáy, gelka Juyíf a Tesaloníkri, lá ɓá Pôl kaw tɔ́ʼɔɓay a Gáŋvbôn ka Béré, kú uru a gí, a tí gí niŋ hɛ̧ táŋ ŋgboroké, a uru hɛ́rɛ a njukuri. 14A Núnmbɛ̧́nɛ́ a goló, gun láɓulawri ɓá Pôl kála sé ŋgboro a mbii lúkí, dáy Silás rá̧ Timoté, kuriri kú rekaw ɓil pû Béré. 15Njukuri ka ɗá Pôl sé kuu mɛ̌ sé ka̧ tísiri a Atɛn. Falké kú resé Béré, a nzáʼapéna a Pôl, sé hí̧ Silás rá̧ Timoté ɓá kú gé ziŋ nɛ́ ɓá gánáké.
Pôl ka̧ Atɛn
16Gelka Pôl kaw zoko Silás rá̧ Timoté ka Atɛn, ké mbá ka lawyíra sé tûl pûké, ɓayhí̧lé pûké mbá ɓá vbônri̧. 17Ké sé ɓil vûn gɔ́ŋ Gáŋvbôn a many há̧narí̧ kuu Juyífri rá̧ njukuri ka zi tí ɓá Juyífri yá, ka a hɛʼɛ Gáŋvbôn. A gel káwa dawá, nâm too, kú many há̧narí̧ kuu njukuri a ké gé ziŋ kuriri. 18Njuku a hɛ̧túna Epikiriyɛ̧ rá̧ Stoyiziyɛ̧ a há̧narí̧ saɓay kuu Pôl. Njuku a há̧narí̧ vbí ɓá: «A̧hí̧ bâa ɓala nɛ́ zi ɓay a sanáké lé?» Njuku a fékéri sa ɓá: «ɛ́ŋ ɓá ké kaw saɓay a vbôn tísiri a fékéri», a kaw zoko ɓá Pôl ké saɓay a Zezú rá̧ ɓay a toma a hûl#17:18 Kú kaw kɛrɛ ɓá: «Toma ka hûl» ɓá rɛŋa a vbôn wûnynjuku a há̧na.. 19Dáy, a kú ɗa nɛ́, a ɓá nɛ́ sé kuu kuriri, sé mbɛl mára̧ a gáŋnjukuri, a kú ɗí ɓá: Mára̧ a Areyopaze#17:19 Mára̧ a Areyopaze, ɓá mára̧ a gáŋnjukuri ka tûl kon a Atɛn, a nɔ́ pé kú ɗí ɓá: Mára̧ Areyopaze., dáy a kú sa hí̧ nɛ́ ɓá: «Ŋgboro erú ɓá rú tuhɛ̧ a ŋgɛŋké, ka mɔ kaw tɔ́ʼɔké lé? 20Mɔ kaw sa hí̧ rú, hɛ̧ a tísiri a fékéri, dáy, rú zi ɓay a tu hɛ̧ ka hɛ̧ké zi ɓay a sanáké.» (21Ɓayhí̧lé njuku a Atɛnri̧ too rá̧ gɔ́rɔ́ri too, ka e a Atɛn, kaw ɓá saɓay malé láɓay a hɛ̧ a ŋgɛŋkéri.)
22Dáy Pôl, uru a ɓil mára̧ké, a tí saɓay: «Njuku Atɛnri̧, mi kó ɓá, i kaw ɓá njukuri ka ɗél vbônri̧ mambáy, ka ŋgboro hɛ̧ri̧ too. 23Ɓayhí̧lé, ka mi há̧ra̧ ɓil pû a wǎyri, mi kó hɛ̧ ɗéla a wǎyri ka i mbó ka̧n. Mi kó nzáʼaká̧na púhɛ̧ a há̧na, a kú ɗé hɛ̧ ka̧nrú̧y ɓá: “Hi̧ vbôn a há̧na ka njuku zi tu yáy.” Katína! Hɛ̧ ka i ɗél táŋ túnáké, pé mi gí sa táŋáké hí̧ wǎyriy. 24Gáŋvbôn ka mɔny tísiri rá̧ hɛ̧ri̧ too ka e a ɓilké, mɛ̌ pé ɓá Gáŋmbây a tísiri rá̧ nûnalêy. Ké zi ná ɓil vûnri̧ ka ndɔ̂ʼɔ njukuri záy yá. 25Ké zi zoko ɓá njukuri kú niŋ hɛ̧ há̧na hí̧ nɛ́ nyá, ɓayhí̧lé, ɓá mɛ̌ pé hí̧ njukuri too, káwa a ndísɛ̌ʼɛ, nyína rá̧ gárá hɛ̧ri̧ too. 26Ké tí a tûl a njuku mbêw, pé a mɔny njukuri too, ka kaw magélri too ka tísiri. Ké ŋgbá fêw kây rá̧ zâl too hí̧ kuriri, a kúŋ kɔ́rɔ́ pûri too, ka njukuri e kawrúy. 27Gáŋvbôn niŋ hɛ̧ nɔ́rí̧ too, ɓay njukuri kú ɛ́ nɛ́. Ziŋ nɛ́, mí lá tapát rá̧ kɔ́, kóyálé kú e ziŋ nɛ́. Katína lé, Gáŋvbôn zi kaw ɗí ka njuku a há̧na mbêw a bazeŋ a manárí̧ nyá. 28Ɓá báŋké a kú sa:
“Ɓá ka ŋgboro a mɛ̌ pé ná e ka ndísɛ̌ʼɛ, pé ná sésénay, pé ná kaw.”
Ɓá báŋké ka njuku si̧ŋɓay#17:28 Njuku si̧ŋɓay: zi ɓay a sa ɓá njuku ka ɗél hɛ̧ ka si̧ŋ malé ka ŋgboro a ɓay. Njuku sa si̧ŋɓay, há̧na lé ɓá ɗéla, há̧na lé ɓá yáwhɛ̧. Ɓá njuku ka saɓay malé ɗí si̧ŋ ka ŋgboro a galaɓay. a há̧narí̧ a bazeŋ a wǎyri ɗé kɔ́ ɓá:
“Rú kaw ɓá gun a mɛ̌ri̧ kɔ́.”
29Nǎŋnɔ́ dáy, ka ná kaw ɓá gun a Gáŋvbôn, sa a goló ɓá, ná zi ná kɛrɛ ɓá Gáŋvbôn ɛ́ŋ hɛ̧ri̧ ka ɓá: vbí̧rí̧lari, lari, malé saw, ka njukuri mbó a ŋgboro a hɛ̧túna rá̧ kɛrɛ a kuriri. 30A tu ɓá, Gáŋvbôn zi ɛ̧rɛ̧ káwa a tâ̧wké ka njukuri zi tuhɛ̧ nyáy nyá. Dáy a ŋgɛŋnɛ́, ké ɗí njukuri too, lágelri too, ɓá kú fere káwa a kuriri. 31Ɓayhí̧lé Gáŋvbôn tí ŋgbá nâm, a ké e walɓay kɔ̧ tûl a njukuri too ka tísiri ɓá ndáráké ka ŋgboro a njuku a ké ten. Ké tɔ́ʼɔ hí̧ njukuri, ka ŋgboro a toma nɛ́ a bazeŋ a hûlri.»
32Gelka kú lá Pôl saɓay a toma a hûlri, njuku a há̧narí̧ sáʼa nɛ́, a fékéri sa ɓá: «Rú e lá mɔ́, sé tûl ɓayké nɔ́ a sêe a féké!» 33Nǎŋnɔ́, Pôl pɔŋ kuriri, a kála. 34A ɓilké nɔ́ too, njuku a há̧narí̧ tɔ́ŋ nɛ́, a láɓulaw: A Bazeŋ a kuriri, Denís erú, ké kaw ɓá njuku mbêw a bazeŋ a mára̧ a gáŋnjuku a Areyopazeri, wûny há̧na rɛŋɛ́ ɓá Damarís rá̧ njuku a fékéri ɓáy kɔ́.

Currently Selected:

Péna a Apotereri 17: pnz

Highlight

Share

Copy

None

Want to have your highlights saved across all your devices? Sign up or sign in