Mak 7

Unoʼo umbaʼ imbey

(Mat 15.1-9)

1Mbə́ Farasay nə mbə ataʼa ba akə unoʼo moʼ noʼo Yerusanem ŋu fere iyad Yeso, 2mbə́ zən kwi mbə məŋə-anó Yeso moʼ mə jəgə nu cha u səw ubugə. Isəw numugə amə ungɨŋ unoʼo ba Jû. 3Cha mbə Farasay kə ba Jû uma ujum mə jəgə uma nu cha udi səw ubugə numugə unoʼo ma mə tey. Amə inji zənə umbaʼ imbey uma siy abú úŋwən. 4Amaʼazənə umə wene zaʼa iyuŋ, cha umə jəgə uma ni cha udi si aghəy kwi inyo ma zayn numugə amə ungɨŋ unoʼo uma. Unó nanaʼ chini mə awu ni mbə mə ighəy. Mbə mə isəw itoʼ, səw ikɨŋ foro aghəy zənə mbə mə zi u aghəy ungɨŋ nu utana akə bronz.

5Ba Farasay wu ni mbə ataʼa ba akə unoʼo wu biri abú Yeso kwi, “Aton zənə umbə məŋə-anó kə num uma unoʼo mbənə umba mbaʼ imbey mə aghəy amə da ngiya? Umbə jəgə nu ubugə ni cha umə zayn numugə amə ungɨŋ mba unoʼo amə da ngiya?” 6Yeso ywiri abú úŋwən kwi, “Wa ukən Nwiye Azaya ghayn anó asiʼ da ngwen umbən ba figə unó.” Wə ŋwaʼanayn kwi,

“Ba mbəŋ mbə wumini aŋu aba akə uchəw,

Asɨmə fiŋ uma tə agha sá.”

7“Umbə wumini aŋu atəw ukow,

Umbə ataʼa ba akə unoʼo ba ni kwi amə umbəŋ unoʼo!”

8“Mbən sayn unoʼo Nwiye sə yimə amə unoʼo ba.”

9Yə́ gha ighayn abú úŋwən kwi, “Mbən yə nə inji chuŋ iton unoʼo Nwiye i num amə umbən unoʼo.” 10Mose ghayn kwi, “Wumini ungwə mbaʼ nə ungwə ingo foro kwi, ‘Uzwere wa ŋunə u jimə mbaʼ ma kə ingo.’ 11Asɨmə mbən yə ghayn kwi wa mbə ghayn abú mbaʼ ma kə abú ingwo ma kwi aghəy zənə ami naʼ inen Amə Koban. (Anigə amə kwi mə si naʼ abú Nwiye). 12Anigə cha umi beni kwi u aghəy anó moʼ abú mbaʼ ma kə abú ingwo ma. 13Akə inji zəŋ, mbən iniy inayn Nwiye akə unó mbənə mbən mə́ tey abú ba. Mbən yə́ nibi aghəy unó chini nanaʼ ni mbəŋ.”

Ghəy zənə amə aghəy kwi ka wa zayn ma

(Mat 15.10-20)

14Yeso ghayn nigə igha tiya ikwiy ba asin feyn ighayn abú úŋwən kwi, “Umbən ujum mbən zəw anó zənə amə ŋu ghayn anji chuŋ. 15Cha aghəy moʼ awu nu wa bə jəg kə wa mbə nugə ayi ghəy kwi ka wa zayn ma. Amə aghəy zənə amə duw ungɨŋ wa amə ghəy kwi ka wa zayn ma.” 16[Wa ŋunə umə nə atoŋ u zəw].#7.16 Cha asin aŋwaʼanayn zəŋ ungɨŋ uŋwaʼanayn moʼ.

17Amaʼazənə yə si sayn ikwiy ba wu inyi ungɨŋ na, mbə məŋə-anó ma biri aton akə inayn maʼa zəŋ. 18Yeso ghayn abú úŋwən kwi, “Mbən ki kyayn ngwen jən mi ghara? Mbə ki zən ngwen kwi cha aghəy moʼ zənə wa mə jəgə kə nugə nu ami aghəy kwi ka wa zayn ma.” 19Ayə nigə damugə cha aghəy wu mə nyi ama ungɨŋ fiŋ ma. Ayə nyi amə ungɨŋ ibom. Anigə chigə du ŋu ibóŋ. (Umugə yə ghayn anó zəŋ yə si sob kwi u aghəy jəgi ujum kəʼ kwi ba jəg).

20Wə ŋu imbey imə ghay kwi, amə ghəy zənə amə duw ungɨŋ wa amə ighəy kwi ka wa zayn ma. 21Ayə nigə damugə ikoni boŋ itə́ duw ungɨŋ wa itə́ kaŋa duw amə ungɨŋ fiŋ wa. Ikono wu itə́ aghəy kwi wa ni aghəy unó iboŋ, jəgə isəg, ni ji, kwi wa zwere wa chini, 22kwi wa neŋe uyey kə anóm wa chini, kwi wa kuw wuboro ughəy, ni aghəy unyimi unó, ni kuw imbəw, ni chiŋe ukum wa, ni aghəy adoʼ, ni figə unó, ni bana ba, ni wey unó, ni beʼere inyo, ni aghəy unó ni cha ukəʼərə. 23Uno iboŋ mbəŋ ujum umbə duw ungɨŋ wa anigə ighəy cha uŋwən mə zayn.

Ibeni fiŋ ayey moʼ

(Mat 15.21-28)

24Yeso noʼ á Genesared iŋu aba abey Tayi yə́ pey yi inyi ungɨŋ na moʼ. Cha yə di kaba kwi wa moʼ kyay kwi uŋwən yə awu ungɨŋ na anigə amə cha inji abú uŋwən ipaʼa. 25Aba ighari wu, ayey moʼ ni Azugə iboŋ mə ungɨŋ ukwere ma zəw anó da Yeso. Anigə yə ŋu izum utəw inwi imbəy abú Yeso 26Ayey wu mə ayey Greek anigə mbə bə́ uŋwən á Foenisia. Wə zum utəw nigə iboʼo ubugə abú uŋwən kwi u chiyə Azugə iboŋ wu ungɨŋ ukwere ma. 27Yeso ghayn abú uŋwən kwi, mba isayn buŋ di jəg damugə cha adi boŋ kwi mba num aghəy jəgi buŋ imaʼ abú bəw.

28Ayey wu ywiri abú uŋwən kwi, “Mə kyay nigə masa, asɨmə mə nibi kyay kwi, ka ba bəw tənə imə aton agayi itə́ jəgə ikəg u aghəy mbənə imə fwayn Amaʼazənə buŋ mə jəgə.”

29Yeso ghayn abú uŋwən kwi, “Numugə ngwə ghayn nigə noʼ iŋu Azugə iboŋ wu si sayn ungwə ukwere.”

30Ayey wu noʼ iŋu unuʼ pey yi zən ukwere wu ni uneŋe igun ukon. Azugə iboŋ wu si du ungɨŋ akwere wu.

Yeso zwey ukəw u gha inayn

31Yeso noʼ aba abey Tayi, yə chigə á Sidon ichigə aba abey zənə yə mə nə ubey ghum iŋu animini Galeli. 32Ba moʼ num ukəw iŋu naʼ abú uŋwən. Mbə naʼ nigə iboʼo ubugə abú uŋwən kwi u niŋe ubugə ma igun wa wu. 33Yeso num wa wu idu akaʼa ba iŋu asin zeʼe. Wə pey awu izi itugi abugə ma atoŋ wa wu ichad amira ibira ineme wa wu awu. 34Amaʼazənə yə bira nigə, yə ney azobo ichwed ma ghayn abú wa wu kwi, “Efata.” Aton amə kwi “fəʼə!”

35Aba ighari wu, utoŋ ma toʼo ineme ma za u ti ni inayn anji chuŋ. 36Yeso aghəy nigə ichede ba wu kwi ka ughayn ma anó zəŋ abú wa moʼ. Asɨmə numugə yə chede úŋwən nigə, amə nigə mbə́ mə́ mara isaŋa anó wu. 37Ba ujum mbənə mbə́ zəw, mbə yere anigə ighayn kwi, “U yə aghəy unó ujum anji chuŋ, yə aghəy kwi ukəw zəw anó nibi aghəy kwi u ni inayn!”

Currently Selected:

Mak 7: NGI

Highlight

Copy